22
1 «A yu na kha lõo dɩtɩnɔ sɩ a lõ cʋɔrɔ dɩ wɩ fʋʋraa a bɩɩrʋ dɩ khi, ɔɔ kʋʋle na do tɩɩ kʋ sopuuə'. 2 Sɩ ado dɩwɩlɔ gɩ ɔɔ kʋʋle dor tɩɩ kʋ sopuu, dɔ a lɩmɩ. Sɩ ado aa hana thɩ̃ɛ a na lɩma', wɩ dolonee dee khaa gɩ do ɔɔ yu dɔ nɔɔ. 3 Ado gɩrɛra a yunɩ hale 'lo na yire dɩ hana, ado na gɩ, ado kũkə̃ə gɩ, agɩbo banaa, a 'laanɛ sa birə nɛ ɔ cara dadɛɛna a ɓananɔ.4 A tibil faa ɔɔ nʋ̃sɔ dɩ wɩ jal a kʋɛ thɩ̃ɛ tibil kpɩɩ lɔɔ, agɩbo tibil kpɩɩ dɩvɛ̃ thɩr lɛ gɩ, dɩ wɩ kʋɛ, ntɛ na 'laarɛ ɔɔ lɛ thɩ̃ɩkɛ a gbanɩ lɛ ʋrɛra bʋɔnɔnɩ agɩbo dɩvɛ̃ thɩr lɛ ʋrɛra bʋɔnɔnɩ gɩ kʋ gɩ lõ kha. 5 A tibil na cʋʋ dɔɔ dɩɩ ma a lõ sɔ̃sʋɔnɛna a jal a hɩ̃ bile der paar, agɩbo gɩrɛ wa khanɩ pa', agɩbo lɩɛ gɩ hɩ̃, ntɛ thiəni dɔɔle na lɩmɩnɛ gɩ kʋ gɩ lõ kha. 6 A tibil ha tibil kpɩɩ mũsumo, agɩbo thɩ̃ dɩkha a thɩnɛ, dɩ wɩ yu gɩ le ntɛɛ cɔra, ado wɩ 'li ʋrɛ yuonɩ, a na lɩmɩnɛ ɔ cara balaɲɔ. 7 Sɩ ado wa 'li yuə', cɔdaar n tɔ dana mɛr Thãgbaa ƴɔɔ a ʋlfɛnɛ ayɛ, ɩna thar thɩ̃daarɩ thɩna na ɩnɩɩ ɲɔ̃a'.
8 Thɩ̃ɛ wo thɩɛnaakɛ baranɛ harnɩ, ado na gɩ, ado kũkə̃ə gɩ, ado banaa gɩ, ado kɩ̃kɩɩn gɩ, agɩbo thɩ̃ dɩkhaakɛ bonɩɩ thɩmɩra, kɛ ʋ n yɩnɩ ɩnɩɩda gɩ dɩ ʋ n yɩ ɩnɩɩda gɩ, tɩbɩla yeɲɔɔlera n baranɛnɩ kha n tɔ pɔ mɛr Thãgbaa ƴɔɔ, dɩ ʋrɛ mɛr Thãgba na hanɩ dɩɩ, ɔr na lɩma thɩ̃daar balaɲɔ.
9 A tibil ha ɔɔ alãkha tibil kũkə̃ə, agɩbo na, agɩbo banaa, agɩbo nʋmɩ woo nʋmɩnakɛ, dɩ khi agɩbo dɩ kha dɩkhãa pa, agɩbo wɩ kpar na fãga, sɩ ga do tibil yɩɩra', 10 ʋrɛ fɔrɔnɩ nʋmɩna n ʋlfɛnɛ na mɛr Thãgba Kɔ̃tɩnɩ i. A ʋlfɛnɛ a yɛ ɩna thar nʋ̃daarɩ nʋna na ɩnɩɩ ɲɔ̃a', dɩ nʋ̃daarɩle n to ʋlfɛrɛɛle ole na n lɩmɩ thɩ̃a'. 11 Sɩ ado ɔɔ cɔ wɩ yu nʋmɩna, ntɛ na lɩmɩnɛ nʋ̃daar. 12 Dɩ ado hɔ̃ nʋmɩ kɔ nʋ̃ dɔɔ, dɔ a gba dasɛlɛɛ a nɩna wɩ jɩ sobɔr gɩ. Dɩ thale aa hana thɩ̃ɛ a na lɩmɩ ado hɔ̃ nʋmɩ kʋʋa'.
13 A tibil pemɩ ɔɔ alãkha tibilə nʋmɩ, dɩ kha dɩkhãa pa, agɩbo a khire nʋ̃daarɩ khiro, ntɛ na lɩmɩnɛ. 14 Sɩ ado nʋ̃daarra wɩ hana kha, ntɛ na hana thɩ̃ɛ a na lɩma'. Sɩ ado a luere nʋmɩna, lue mũsũ nʋɔɔle a na lɩmɩ gɩ do gɩ daan.
Jɔfʋ Thãgba cʋʋra na alãkha tibil cʋʋra.
15 A tibil fɩɩl khebiireekɛ na jɛnɩ kuun pa', kɛ na hananɩ wɛdaara', a phɩna, a 'laanɛ bi na, sa gbaanɛɛ a hɛ. 16 A thɩrɛ tʋɔnakɛ kpãkpalãa ɩna n haa khebirə' sɩ a na lɩmɩnɛ bi na mũsũ kilele, mũsũ nʋɔɔkɛ wɩ n lɩmɩnɩ sa he khebirikɛ na jɛnɩ kuun pa'.
17 Fa n sɩ khɛrraakɛ dɔnɩ sidumodaar na yirə'.
18 A tibil phɩna nʋmɩ, wɩ kʋɔ. 19 A tibil ji bonɩɛ thãgba kpɩɩsɔɔra sɩ a ga do mɛr Thãgba Kɔ̃tɩnna gɩ dɩbara 'lẽ'lẽ'lẽ ga, wɩ kʋɔ kper.
20 Fa n phʋʋn kpakpala', fa n hʋɔlaa ga, gɩdonɩ nɩ kɔɔ dor dakha kpakpala Ejipiti dɩɩra a yɩɛ. 21 Na n ʋʋn khikhɛrʋra dɩ khilə̃buurə ga. 22 A fa ʋʋn war dɩ wɩ hulẽ mar, ma pɛr awɩ hulẽbi nũu. 23 Dɩ ɩ̃ nĩkhi na lɩrɛ dɔ khaa dɩ ma cʋʋ wɩ kʋʋr nɩ kʋʋra na bajɩna, sɩ anɩ khɛrsɔ n do khikhɛra dakha anɩ bɩsãsɔ n do khilə̃bii wer.
24 A fɩ pemɩ tibilikɛ dɔnɩ bɔdaar mũsumo ɩ̃ toora, kɛ hanɩ kha na fɛrɛ, fa n cʋʋ a hʋʋraa helʋ a hana fa', fa n fɛrɛɛ a dɛɛnɔ khora'. 25 A fɩ tee afɩ alãkha tibili kẽkẽ nɩ a thɩɩn, thɩ̃ dɩkhaaraakɛ a gba farnɩ, birənə hanaa sɩ wire n lõ, 26 gɩdonɩ ɔr bɩɛla dʋɔn ɔɔ kẽkẽ nɩ, ɔr a n kɛɛ tomɩra; a ga hala' aɲe a na thi a na phɩna? Dɩ ado a hulẽ a wena mɩ, ma pɩɛrɛ nũu gɩdonɩ mɛrɛ mɩ n jɩrɛ bʋɔra.
27 Fa n nɩɩr Thãgba ga, fa n sɔ̃ afɩ dɩɩ kɔ̃tã'. 28 Fa n do gɩ ka bɔɔ sɩ fa n ha mɩ afɩ caca thɩ̃ lɛ thɩ̃ɛsɔɔra na gɩrɛ fɩ teena mɩnɩ afɩ dɩvɛna ga. Hana mɩ afɩ caca bikuun afɩ bikũusɔɔra. 29 Na cʋɛ mɛna dakha na afɩ nʋ̃ kɔ̃tɩnaa caca bisɔ na afɩ nʋ̃ yɩraa caca bisɔ. Nʋmɩɩ caca bi na cʋʋrɛ wire makoɲɔ na ɔɔ nɩ, sɩ wire makõther wirera gbaanɛɛ a hana mɩ.
30 Tɩbɩlaakɛ mɩ hɩnɩ na do. Gɛr gɩna n kho nʋmɩɩkɛ dɩkha kʋnɩ hʋɔnɔa'. Nɩ pɩɛr benana.»