Jɔfʋsɔ, dearaakɛ dɔnɩ Ebirə
21
1 Dɩ Thãgba Kɔ̃tɩn bir so: «Yɛkɛ jɔfʋsɔɔkɛ fa hanɩ Ɩjɩrayɛl bɩsana: 2 A fɩ the Ebirə bɩsaan dɩ do dee, a na dor thɔma yɛna maadõ, sɩ yɛna makoɲɔdaara a na ther pɔy ɔɔ dee dora, sɩ a na lɩmɩ thɩ̃ɛa'. 3 Ado dɩbara a kɔɔ lõ, dɩbarara a na the. Sɩ ado a kɔɔ hananɛ khɛr, ɔɔ khɛr na ther kha na ɔr. 4 Ado ɔɔ kɔ̃tɩ̃ hanaa khɛr, dɩ 'lɛrɔ bɩsana, kuuminə agɩbo kheminə, ɔɔ kɔ̃tɩ̃ hɩna khɛrɩle na ɔɔ bɩsãsɔ sɩ a the dɩbara. 5 Sɩ ado deele sor kpẽgelẽe a yɩ: Mɩ nar ɩ̃ kɔ̃tɩ̃ na ɩ̃ khɛr na ɩ̃ bɩsãsɔ ma n ƴaal ɩ̃ the ɩ̃ dee dora ga, 6 liir dɩphã ɔɔ kɔ̃tɩ̃ n kpaa a danana mɛr Thãgba, a kpaa pɔna a jɩɩl a ƴɛl loona, agɩbo lõ thɩrʋra, sɩ a cuu nũu na sẽbire, sɩ deera n too khor a na n dʋʋ thɔma.7 Ado tibil dolõ ɔɔ bikhɛr dɩ do dee, a na puno a na the ɔɔ dee dora mɔ̃ konaakɛ dɔnɩ dea n thena'. 8 Sɩ ado aa da ɔɔ kɔ̃tɩnnaakɛ kɔɔ ƴaalɛnɩ a gbaa a hea', a 'laanɛ hʋɛ wɩ birsee. Aa hana hʋɛ a na dolõo ca kpɩɩra ga, a mɛ̃ ga, ga dor a fɩɩlʋlɛ. 9 Dɩ ado ɔɔ bikuun a thɩɩnʋ a ha, dɔ a cʋʋraa thɩ̃ɛ mɔna kheminəə jɔfʋ hanɩ hera. 10 Dɩ adorakɛ a gba khɛr kpɩɩ, sɩ a na n ɓɔr thɩ̃ bɩɛlakɛ caca khɛrraale, dɩ dikor gɩ, dɩ kẽkena gɩ, dɩ phɩ̃ padaa ga. 11 Ado a bo a n haa thɩ̃ɛ yẽtherɩla', khɛrɩle punone a the ɔɔ dee dora pɔy, sɩ a na lɩmɩ mũsumoə'.
Jɔfʋsɔɔkɛ wɩ pɛrnɩ ado fɩ dɩ tibilə
12 A tibil be tibil a kʋ, wɩ kʋɔ dakha. 13 Sɩ ado a n kɔɔ bʋʋnaa ga, sɩ dɩɩ do thɩlkɩɩr gɩ, kɛ mɛr Thãgba faanɩ dɩ tibilile ji ntɛɛ ɲɔ̃kɔɔ, ma nɩ faarɛ paarɩkɛ a na punonɩ a na fuu na jalɔ a na wɔ̃. 14 Sɩ ado ntɛ jɩrɛ gbobɩ sa kʋ ɔɔ alãkha tibil na fɩɩlɛ, adorakɛ a ca a fʋ ɩ̃ bonɩ ji pa, nɩ hɛlaa bonɩ ji paarara a kɔ.
15 A tibil bɩɩr ɔɔ thɩ agɩbo ɔɔ nɩ, wɩ kʋɔ.
16 A tibil yu tibil a dolõ, agɩbo ntɛ hale ɔɔ ɲɔ̃kɔɔ 'lo, wɩ kʋɔ.
17 A tibil nɩɩr ɔɔ thɩ, agɩbo ɔɔ nɩ, wɩ kʋɔ. 18 Ado tɩbɩla na ke, dɩ bɩɛl be bɩɛl na ɲɔ̃pure, agɩbo bokaar, dɩ aa khə' sɩ dɩ ga khʋʋ, da phɩna phɩ̃ paar, 19 sɩ dɩ ga too dɩɩ do ntɛ n ɩɩrɛ dɩ gbuu gbʋʋl da n kpaarna jɩɛra, ʋrɛ bɩrɛɛnɩɩda hɛlɛ. Sɩ a na lɩmʋʋnɛ mɔ̃ a kuruunɩ thɔmana, a haanaa dakha phaphapha a kpɛɛna.
20 A tibil bɩɩr ɔɔ dee na gbʋʋl, a kuun gɩ a khɛr gɩ dɩ khii ɲɔ̃kɔɔ, a na 'lɛr sor dɩ ga khɩɩr. 21 Sɩ ado a cɔr wi bɩɛl, agɩbo wire yeɲɔ, ntɛ na 'lɛ sora', gɩdonɩ ɔɔ mũsũ a thenaa.
22 A kona na ke a thʋ khɛr pɛmɛdaar dɩ ɓɔr a kɔ̃ sɩ thɩlke kpɩɩ na bir a dɛbɩrɔa', khɛdaar n pɛ war sor, wɩ lɩmɩ helʋ gɩ tee kha na mɔ̃ so gʋʋrdaar yɩɛnɩ dɩɩ bɔr. 23 Sɩ ado thɩlkɩɩr bire a danɔ, dɔ yire n lɩmɩ yire. 24 Yi khorore na lɩmɩnɛ yi khorore, ɲɩ̃ khaarɛ na lɩmɩnɛ ɲɩ̃ khaarɛ, ɲɔ̃ kʋɛrɛ na lɩmɩnɛ ɲɔ̃ kʋɛrɛ, nɔ kʋɛrɛ n lɩmɩ nɔ kʋɛrɛ. 25 Dɔ hɩɩn na lɩmɩnɛ dɔ hɩɩn, kho sɩɛ na lɩmɩnɛ kho sɩɛ, ɓɔrɛ n lɩmɩ ɓɔrɛ.
26 A tibil be ɔɔ dee a kuun gɩ a khɛr gɩ yirera, a kʋɛsʋʋ yire, a fagaa a the ɔɔ dee dora gɩ kʋ gɩ lõ kha na ɔɔ yiikɛ kʋɛanɩ. 27 Dɩ a ɲɩnɛ a kha ɔɔ dee, a kuun gɩ a khɛr gɩ, a fagaa a the ɔɔ dee dora gɩ kʋ gɩ lõ kha na ɔɔ ɲɩ̃ɩkɛ khanɩ.
28 A na gɔ tibil na ʋnɛ, a kuun gɩ, a khɛr gɩ dɩ khi, wɩ dʋrɛ nara na bokana a kɔ, wa n kho ɔɔ nʋ̃a' sɩ nadaar na 'lɛ sora'. 29 Sɩ ado kɛkɛra na dɔɔra n kɔɔ paalɛ dɩ gʋɔr tɩbɩla dɩ wɩ so dadaara sɩ dɩ a n jʋʋrʋa', dɩ ɩ̃ a kʋ tibil, a kuun gɩ a khɛr gɩ, wɩ dʋrɛ nara na bokana a kɔ, sa kɔ dakha dadaar a pɩɛr. 30 Dɩ ado wɩ pɛr dadaara helʋ a lɩma sa 'lɛ yire, a lɩma gɩrɛ fɛʋʋkɛ wa sʋʋraanɩ. 31 A na gɔ bɩsaan, a kũubir gɩ a khebir gɩ a kʋ, wɩ cʋɛraa mɔ̃ jɔfʋ bɩɛlɩlera sonɩ. 32 A na gɔ tibili dee a kʋ, a kuun gɩ a khɛr gɩ, nadaar n lɩma sikile mũsumo kpelẽ yʋɔr a hana ʋrɛ hɩnanɩ dee sɩ wɩ dʋrɛ na dɔɔ na bokana a kɔ.
33 A tibil khɛr ɲɔ tɛ korʋʋ a faa agɩbo ɲɔ tɛ korʋʋ gɩ dɩ kpe sɩ aa khaana', dɩ tibili na, agɩbo kũkə̃ə gɩ a jiro, 34 ɲɔ tɛ kordaarɩle na lɩmɩnɛ mũsumo a na ha nʋ̃daar, sɩ a na hɩ̃ nʋ̃ khire.
35 A tibili na gɔ ɔɔ alãkha tibili na dɩ khi, wɩ dolone nʋ̃ yireele a tɩnɛnɛ mũsumo, a gba dakha nʋ̃ khire a tɩnɛnɛ. 36 Sɩ ado wɩ kɔɔ jɩnanɛ na dɔɔ paalɛ kɛkɛra, sɩ dadaar na jʋʋrʋa', ɔr na 'laanɛ na yire na ha ʋrɛ ɔɔ na khini gɩ kʋ gɩ lõ kha, sɩ a hɩ̃ na khire.
37 A tibil yu na agɩbo banaa a kʋ agɩbo a dolõ, a na lɩmɩnɛ. A na nɩrrɛ na yemɔy, ado na gɩ; banaa yenã ado banaa gɩ.»