Jɔfʋ yʋɔrɩkɛ Thãgba hanɩ Ɩjɩrayɛl bɩsana. \ref Dət 5.2-22; Mat 5.17-48; 22.35-40; Rɔm 13.8-1; Jã 1.17; Dət 5.22-31
20
1 Yɛkɛ gɩrɛ fɛw Thãgba sonɩ Ɩjɩrayɛl bɩsanana:2 «Mɛr dʋɔn Thãgba Kɔ̃tɩn afɩ Thãgba, kɛ te fɩnɩ Ejipiti dɩɩra, dee dʋʋra.
3 Fa n hana gɩ̃ɩ thãgba a ɓã mara'.
4 Fa n hana thɩ̃ɛɛkɛ wɩ cʋʋnɩ dɩ do thɩl, agɩbo thɩ̃ kpɩɩkɛ wɩ cʋʋnɩ dɩ ho dɩkha thãgbara ƴũu, agɩbo dɩkha kɛ thɩɩra dɩ dɩkha gɩ ɲɔ bɩnɔ thɩɩraakɛ tɩɛra'. 5 Fa n gburõkhu gaa thɩ̃sɔraale a na fʋɔr ga; gɩdonɩ mɛr Thãgba Kɔ̃tɩn afɩ Thãgba, mɩ dor Thãgbaakɛ n gbugəni, dɩ̃ heen thɛɛkɛ n laarɛ mɩnɩ sor na awɩ bisɔ a jalna dana balãther na balanã məlle. 6 Sɩ dɩ̃ bɔna wɩrɛ n naan mɩnɩ, dɩ wɩ nɩ ɩ̃ jɔfʋsɔ nũu, dɩ̃ dana məlle gbɩlanɩ.
7 Fa n gba mɛr Thãgba Kɔ̃tɩn afɩ Thãgbaa i, a na mɩɩna baba ga, gɩdonɩ ma faa ntɛɛkɛ na cʋɛnɩ thala'.
8 Jɛna hɩɩr wire a na cɔ gɩ. 9 Wire maadõo bɩnɔ, dɔ thɔma, cʋɛ afɩ thɔ̃sɔ fɛw. 10 Sɩ wire makoɲɔ wirera, hɩɩr wire gɩ. Mɛr Thãgba Kɔ̃tɩn afɩ Thãgbaa wi gɩ. Fɛrɛ na afɩ bikuun na afɩ bikhɛr na afɩ thɔ̃daar kuun na afɩ thɔ̃daar khɛr na afɩ nʋ̃sɔ na kpakpalɩkɛ hanɩ afɩ cɔ, na n cʋʋ thɔ̃ dɩkharakɛ ga wiila'. 11 Wire maadõ mɛr Thãgba Kɔ̃tɩn gba a tinə ƴũu na thɩɩ na laɲʋɔn na gɩrɛ fɛʋʋkɛ hanɩ agɩ bɩnɔ, sa hɩɩr wire makoɲɔ wirera. Gɛr gɩ dɩ mɛr Thãgba Kɔ̃tɩn bɔna ɔ wiile, a thɩɩn gɩ kpɩɩ.
12 Na cɔ afɩ thɩ na afɩ nɩ, dɩ mɛ̃ fa pʋɔr thɩɩraakɛ mɛr Thãgba Kɔ̃tɩn, afɩ Thãgba na ha fɩnɩ.
13 Fa n kʋ tibilə'.
14 Fa n ƴaal khɛr kpɩa'. Fa n ƴaal kuun kpɩa'.
15 Fa n yuə'.
16 Fa n sõso pɛ afɩ alãkha tibilǝ ga..
17 Fa n pɩɛr haar afɩ alãkha tibili thɩna ga: dɩ ɔɔ cɔ gɩ dɩ ɔɔ khɛr gɩ, dɩ ɔɔ thɔ̃daar kuun gɩ, dɩ ɔɔ thɔ̃daar khɛr gɩ, dɩ ɔɔ na gɩ, dɩ ɔɔ kũkə̃ gɩ, dɩ dɩkha gɩrakɛ, kɛ dɔnɩ ɔɔda ga.»
18 Dɩ Ɩjɩrayɛl bɩsana nɩɛrɛ thãgba nɔ khena, na tutuu ʋʋn, a yɩna mɔ̃ thãgba n lɩnɩ dɔɔ, na mɔ̃ gɔ̃gʋɔn donɩ isi haar. Dɩ mɔ̃ wɩ yɩɛnɩ thale, wɩ n jɩɩn sa tɔ jɩɩl ƴɔɔ. 19 Dɩ wɩ sor Mʋɩjɩra: «Fɛrɛ thɛthɛ na n mɩana sɩ, sa pɛ fɛr nũu. Thãgba na n telẽ na mɩɩna sa', a mɛ̃ ga, sa khiire.» 20 Dɩ Mʋɩjɩ birse wɩ: «Na n do maar n fʋna'. Ado Thãgba tɔ wɔrɔ̃ nɩ, bɩnɛ a n be nɩ. A n ƴaalɛ nɩ hanana nar cʋrɛ, gɩ do nɔɔ na n cʋʋ sopugoə'.» 21 Ɩjɩrayɛl bɩsana tɔr hʋnɔ, sɩ Mʋɩjɩ wer tɔ pɔ ndɔlɔ̃pa biruura ka Thãgba hanɩ.
Jɔfʋ, bonɩ ji pa mɩra. \ref Dət 27.5-7; Mat 18-20
22 Dɩ Thãgba Kɔ̃tɩn so Mʋɩjɩra: «Mɩɛnɛ Ɩjɩrayɛl bɩsana ayɛ: "Nɩ yɩ gɛr, dɩ ƴũu mɩ ha sa mɩɩna nɩ. 23 Na n hana thãgbasɔɔkɛ wɩ cʋʋnanɩ dɛ bulo agɩbo dɛ, a ɓã mara'. Na n do mã'. 24 Nɩ mɛ bonɩ ji paar na jaar, ka na n ji marnɩ bonɩ thiinə na ha ie bonɩɛsɔ, na anɩ nʋ̃ yɩra na anɩ nʋ̃ kɔ̃tɩ̃sɔ. Dɩ ma pɔr a na bɔna nɩ paar wo paarɩkɛ ma cʋʋnɩ ɩ̃ i ga n dʋbɩrɔ. 25 Ado bokana nɩ n mɩna, na n gba boka thelnanɛ a mɩna ga, gɩdonɩ a nɩ gba ther a thelna, ga dor nɩ ƴɔ̃ƴɔ̃ɔ gɛr, dɩ ga bɔr ɩ̃ thɔna ga. 26 Na n mɩ bonɩ ji paarra gɩ gbaan, gɩ ho wa n jʋʋnɛ le ƴũuə'. Dɩ mɛ̃ tɩbɩla na yɩ anɩ sãɓɔlɔ̃a'." »