ƖJƖRAYƐL BƖSANA, SƖNAƖ Bə̃ KPARARA.
Thãgba sor ɩna ʋlfɛnanɛ Ɩjɩrayɛl bɩsana. \ref Dət 5.2; 4.10-12; 33.2-3; Ebirə 12.18-24
19
1 Mɔ̃ Ɩjɩrayɛl bɩsana thenɩ Ejipiti, wɩ daan Sɩnayɩ bə̃ kparara balãther sɩporɩ caca wirə. 2 Refɩdɩm wɩ the a jal dã Sɩnayɩ bə̃ kparara a jɛ le. Liir Ɩjɩrayɛl bɩsana jɛ le gɔ̃gɔ̃ ƴɛbʋrɔ.3 Dɩ Mʋɩjɩ jʋʋnɛ Thãgbaa pa, dɩ Thãgba Kɔ̃tɩn wɩɩ le gɔ̃gʋɔna ƴũu a sʋʋraa: «Yɛ gɩrɛ fa sonɩ Jakɔbɩɩ toora, gɩrɛ fa mɩɛnɩ Ɩjɩrayɛl bɩsana: 4 "Nɛrɛ thɛthɛ yɩrɛ gɩrɛ fɛʋʋkɛ mɩ cʋʋnɩ Ejipitidarara. Nɩ yɩrɛ mɔ̃ mɩ gba nɩnɩ a ɩna kɩɛr ɩ̃ kɩrɔ. Mɩ gba nɛr mɔ̃kɛ sɩgbʋraa n gbanɩ ɔɔ bisɔ dɩ pɛ gbɛlala. 5 Nɛnɛ̃, a na pɛ ɩ̃ thɩmɩɩ nũu bɔɔbɔɔ, a na hɩɩn ɩ̃ ʋlfɛ, na dor ɩ̃da kpẽgelẽe, ɩ̃ tookɛ mɩ hɩnɩ tɩbɩlala fɛw thɩɩra, gɩdonɩ thɩɩ fɛw mɛr hɩna. 6 Nɛrɛ, na do marɛ jamanaa bonɩ jidara, nɩ do caarɩkɛ phonɩ, tɩbɩlaakɛ mɩ phiirnɩ ɩ̃ thɔna." Gɛr dɔ gɩrɛ fa so warnɩ.»
7 Dɩ Mʋɩjɩ kɛrɛ bir awɩ jɛw, a we kɔ̃tɩna fɛw, a mɩɛ wɩ gɩrɛ Thãgba Kɔ̃tɩn sʋʋraanɩ. 8 Dɩ Ɩjɩrayɛl bɩsana fɛw tu nɔ bɩɛl: «Sa cʋʋrɛ gɩrɛ fɛʋʋkɛ Thãgba Kɔ̃tɩn sonɩ.» Dɩ Mʋɩjɩ bir gba gɩrɛ wɩ sonɩ a mɩɛ Thãgba Kɔ̃tɩn. 9 Dɩ Thãgba Kɔ̃tɩn so Mʋɩjɩra: «Ndɔlɔ̃pa kɔ̃tɩɩna ma ha, a na pɔ na mɩɩna fɩ. Dɩ mɛ̃ Ɩjɩrayɛl bɩsana na puno na nɩɛ mɔ̃ mɩ n mɩɩna fɩnɩ, gɩ do nɔɔ wa n hana far ha pɛrɛ bɔɔ fɛw». Dɩ Mʋɩjɩ bir gba gɩrɛ wɩ sonɩ a mɩɛ Thãgba Kɔ̃tɩn.
Thãgba Kɔ̃tɩn gbune Sɩnayɩ gɔ̃gʋɔna a mɩɩna Mʋɩjɩ.
10 Dɩ Thãgba Kɔ̃tɩn bir so Mʋɩjɩra: «Mɩana Ɩjɩrayɛl bɩsana, a sɔ war wɩ phʋɔlɛ awɩbara nĩ na cʋɔ. Wɩ cɔcɔɔnɛ awɩ kẽkẽsɔ dakha. 11 Wɩ gbɛba pɛ wire balãther wirera, gɩdonɩ ga wiile mɛr Thãgba Kɔ̃tɩn na gbune, wɛr fɛʋʋ ƴɛra, Sɩnayɩ gɔ̃gʋɔna. 12 Pɩɛr khu paar gɔ̃gɔ̃ nʋɔra, sa kpãkpaanɛ war, wa n kãasa'. A ntɛ kãasɩ wa kʋʋrɛ. 13 Wa thaaraa ɲɔ̃ɔa', sɩ bokana wa dʋʋrnaa agɩbo wɩ thaarnaa sẽe. A tibil gɩ, a nʋmɩ gɩ, mɛna wa cʋgʋʋ. Ɔbɔɔkɛ wa ʋnɩ tutuu, gɛra ɩkha na puno na jʋʋn gɔ̃gʋɔna.»
14 Dɩ Mʋɩjɩ kɛr gbũ a jal Ɩjɩrayɛl bɩsanana, a phʋɔl wɩ sɩ dɩ wɩ cɔcɔɔ awɩ kẽkẽsɔ. 15 Sɩ dɩ so war: «Nɩ gbɛba pɛ kɛ na wire yẽther wirera, na n thar khɛra ga.»
16 Wire yẽther wirerara, duuro, ndɔlɔ̃pa kɔ̃tɩ̃ɩ hale gɔ̃gɔ̃ yʋɔ, dɩ thãgba na n phãa nɔ khena, da n lɩna dɔɔ. Dɩ tutuu nʋɔ dakha the khãkhãkhã, dɩ tɩbɩla fɛʋʋkɛ kɔɔ hanɩ jɛw, mar dɩ wa n jẽ. 17 Dɩ Mʋɩjɩ ti wɩ dɩ wɩ the, wɩ cãa Thãgba; dɩ wɩ tɔr pɔ gɔ̃gɔ̃ horo a jɩɩl. 18 Dɩ Sɩnayɩ gɔ̃gʋɔn fɛw dor isi haar, gɩdonɩ Thãgba Kɔ̃tɩn kɔɔ gbune le na dɔɔ dɩ isiir na n jʋʋn a ho dɔ kɔ̃tɩ̃ isiir. Dɩ gɔ̃gʋɔn fɛw na n jẽ na fãga. 19 Dɩ tutuu nʋɔ na n tii na fãga. A Mʋɩjɩ mɩɩ dɩ Thãgba n birsee na nɔ kheu. 20 Dɩ mɛ̃ Thãgba Kɔ̃tɩn kɔɔ gbũ Sɩnayɩ gɔ̃gʋɔna, a we Mʋɩjɩ dɩ jʋʋn le gɔ̃gɔ̃ yʋɔ.
21 Dɩ Thãgba Kɔ̃tɩn so Mʋɩjɩra: «Gbunə a kpãkpaanɛ tɩbɩlalaale wa n phana ayɩ ɩnɩ n yɛ mɛr Thãgba Kɔ̃tɩnna'. Ga dor nɔɔ dɩ jɔjʋɔ na khiir. 22 Bonɩ jidararakɛ, kɛ hananɩ hʋɛ dɩ wɩ wɔrɔ̃ mɛr Thãgba Kɔ̃tɩn, wɩ phʋɔlɛ awɩbara gɩ do nɔɔ jɔjʋɔ na n khiir awɩ thɩ̃thɩɩna'.» 23 Dɩ Mʋɩjɩ birse Thãgba Kɔ̃tɩn: «Tɩbɩla na puno na jʋʋn kɩɛr Sɩnayɩ gɔ̃gʋɔna ga; gɩdonɩ fɛrɛ thɛthɛ kɔɔ kpãkpaan sarɛ ayɩ sɩ pɩɛr khu paar, a cʋɛ gɔ̃gʋɔn a phu.» 24 Dɩ Thãgba Kɔ̃tɩn sʋʋraa: «Dɩ gbunə agɩpɩ fɩ jʋʋn na Aarɔ̃. Sɩ bonɩ jidara na tɩbɩla na n phana ayɩ ɩnɩ n jʋnɛ a yɛ mɛr Thãgba Kɔ̃tɩnna', a mɛ̃ gaa jɔjʋɔ na khiire awɩ thɩ̃thɩɩn.» 25 Dɩ Mʋɩjɩ gbũ jal a mɩɩna Ɩjɩrayɛl bɩsana.