Mʋɩjɩɩ thɛɛ Jeturo pɔr a kher wɩ. \ref Thɩr 4.18-26; 1 Fã 8. 41-43; Dət 1.9-18; 16.18-20; 2 Kur 19.4-10; Sokp 27.9
18
1 Jeturookɛ dɔnɩ Madɩ̃a bonɩ jidaar, kɛ dɔnɩ Mʋɩjɩɩ thɛɛ nɩɛrɛ gɩrɛ fɛʋʋkɛ Thãgba cʋʋnɩ Mʋɩjɩra na ɔɔ too Ɩjɩrayɛl bɩsanana. A nɩɛrɛ mɔ̃kɛ Thãgba Kɔ̃tɩn cʋʋ wɩnɩ dɩ wɩ the Ejipiti. 2 Jeturo kpar Mʋɩjɩɩ khɛr Sefora, kɛ a kɔɔ pɛnɩ hʋɛ dɩ kɛr bir le ɔɔ thɩɩ pa, 3 a kpana Mʋɩjɩɩ bikona yeɲɔ a jalna. Bɩsana yeɲɔɔlera, kɔ̃tɩn n dʋɔn Gɛɛrsɔn, kɩrʋ dʋɔn «Kpakpal mɩ do kɩɛr», gɩdonɩ a sor kpakpal ɩnɩ do dɩɩraakɛra ɩnɩ hanɩ. 4 Diine na n do Eliejɛɛr, kɩrʋ dʋɔn «Ɩ̃ Thãgba dor tataa», gɩdonɩ a sor ɩnɩɩ thɩɩ Thãgba taa nɛr Faarɔ̃ɔ bajɩnana.5 Dɩ Jeturo kpar Mʋɩjɩɩ khɛr na ɔɔ bikona da n pɔnanaa le bə̃ kparara, ka wɩ toonɩ Thãgba Kɔ̃tɩnɩ gɔ̃gɔna. 6 Dɩ a thʋɔn so Mʋɩjɩra aa ɩnɛr Jeturo, ɔɔ thɛɛ n pɔr na ɔɔ khɛr na ɔɔ bikũusɔ, ɩnɩ n yɩɩ. 7 Dɩ Mʋɩjɩ ther a caanʋʋ, a sʋr a fʋɔr agɩpɩ dɩ palʋʋ. Dɩ wɩ bule kha bɔɔ agɩpɩ dɩ wɩ lõ le Mʋɩjɩɩ kẽkẽ waw. 8 Dɩ Mʋɩjɩ gba mɩɛ ɔɔ thɛɛ, gɩrɛ fɛʋʋkɛ Thãgba Kɔ̃tɩn cʋʋnɩ Faarɔ̃ na ɔɔ too Ejipitidarara, dɩɩ do Ɩjɩrayɛl bɩsana dɔ nɔɔ. A mɛgʋʋrɛ dakha nɩwɛ caar dɩɩdɩɩkɛ wɩ yɩnɩ hʋɛra na mɔ̃ Thãgba Kɔ̃tɩn kɔɔ taa wɩnɩ. 9 Dɩ daw fʋrɛ Jeturo bɔɔraakɛ Thãgba Kɔ̃tɩn cʋʋnɩ Ɩjɩrayɛl bɩsanana na mɔ̃ a taa wɩnɩ Ejipitidaraa ɲɔ̃kɔɔ. 10 Dɩ a sor: «Thãgba Kɔ̃tɩnɩkɛ taa nɩnɩ Faarɔ̃ɔ na Ejipitidaraa ɲɔ̃kɔɔ hɩna fʋɔrɛ. 11 Nɛnɛ̃ mɩ jɩrɛ dɩ Thãgba Kɔ̃tɩn dʋɔn Thãgbaakɛ kɔ̃tɩnanɩ a jɔ thãgbasɔ fɛw. A nɩnanɛ ɔɔ fãga tɩbɩlalaakɛ n kpoanɩ Ɩjɩrayɛl bɩsanana.»
12 Dɩ Mʋɩjɩɩ thɛɛ Jeturo jire bonɩ thiinə Thãgba Kɔ̃tɩnna na gɩ̃ɩ bonɩsɔ. Dɩ Aarɔ̃ na Ɩjɩrayɛl bɩsanaa kɔ̃tɩ̃sɔ fɛw pɔr a khona wɩ dɩkɔ, Thãgbaa ƴɛra.
13 Dɩ mɔ̃ dɩɩ wɩlnɩ, Mʋɩjɩ kar too da n gʋʋr sɔ. Dɩ tɩbɩla jɛr duuro a dana dʋɔrɔ. 14 Dɩ ɔɔ thɛɛ yɩrɛ gɩrɛ fɛʋʋkɛ a n cʋʋnɩ tɩbɩlala. Dɩ bulee: «Mɔ̃ɔ thɔ̃ do ca gɩ thaa? Aɲera fɩ ha dɩbara, sɩ tɩbɩla fɛw na n pɩɛr, duuro a dana dʋɔrɔ?» 15 Dɩ Mʋɩjɩ birsee: «Jɛ tɛ paar wɩ n ɩ̃ Thãgbara. 16 A wɩ hana nɩwɛ dɔɔ mɛra wɩ n ɩ̃. Mɛr n gʋʋrɛ awɩ thʋ̃ khasɔ, mɩ n mɩɛ wɛr dakha gɩrɛ dɔnɩ Thãgbaa jɔfʋ na ɔɔ dɩɩrsɔ.»
17 Dɩ ɔɔ thɛɛ sʋʋraa: «Gɩrɛ fɩ n cʋʋnɩ ga bɔra'. 18 Fɛrɛ thɛthɛ na vɔɔrɛ na wɩrɛ n pɔ farnɩ dakha. Thɔmaakɛ khɩɩrɛ ka fɛr bɩɛlɩ cʋʋra. Fa puno na cʋʋ gɩ dɩbara ga. 19 Nɛnɛ̃ pɛ mɩ nũu. Ma ha fɛr fɩlɛ, dɩ Thãgba n hana kha na fɛrɛ. Fɛr na jɩlɛ Thãgbaa ƴɛra na tɩbɩlaa i, fɩ gba awɩ thɩmɩɩsɔ fa n jɩɩlna Thãgbaa ƴɛra. 20 Na mɩɛnɛ wɩ Thãgbaa jɔfʋsɔ na ɔɔ dɩɩrsɔ. Na mɩɛnɛ wɩ hʋɛɛkɛ teananɩ wɩ gba, na gɩrɛ teananɩ wɩ cʋɛ. 21 Hɩnɛ, a phire tɩbɩlaakɛɛ thɩ̃thɩɩn, konaakɛ hananɩ fɩl bʋɔ, kɛ n cʋɔnɩ Thãgba, kɛ dɔnɩ sobɔdara, kɛ na n fɩɩlɛnɩ dɩ wɩ khɔa', a pɛ war wɩ do kɔ̃tɩna: tɩbɩla gbɩlanɩ gbɩlanɩɩ kɔ̃tɩ̃, tɩbɩla tamaa tamaa kɔ̃tɩ̃, tɩbɩla kpalaɲɔ yʋɔr yʋɔrɩ kɔ̃tɩ̃, tɩbɩla yʋɔr yʋɔrɩ kɔ̃tɩ̃. 22 Wɩ do wɩrɛ na n gʋʋrɛnɩ tɩbɩla sɔ bɔɔ fɛw, sɩ wɩ gba gɩrɛ wa n punona', wa n pɔna far. Dɔ gɩ ha thale gɩ haba far. 23 A fɩ cʋʋ thale, sɩɩ do Thãgbaa tuur gɩ, fa punone na hana fãga na dana khu paar, dɩ tɩbɩla dakha na n kɛrɛ awɩ cɔsɔ na ha ɩɩ.»
24 Dɩ Mʋɩjɩ pɛr ɔɔ thɛɛ nũu, a cʋʋ mɔna a sonɩ. 25 A phiire konaakɛ hananɩ fɩl bʋɔ Ɩjɩrayɛl bɩsanaa thɩ̃thɩɩn a pɛ war dɩ wɩ do kɔ̃tɩna. A pɛrɛ: tɩbɩla gbɩlanɩ gbɩlanɩɩ kɔ̃tɩ̃, tɩbɩla tamaa tamaa kɔ̃tɩ̃, tɩbɩla kpalaɲɔ yʋɔr yʋɔrɩ kɔ̃tɩ̃, tɩbɩla yʋɔr yʋɔrɩ kɔ̃tɩ̃. 26 Dɩ kɔ̃tɩnaale n gʋʋrɛ tɩbɩla sɔ, bɔɔ fɛw. Sɩ dɩ wɩ gba gɩrɛ wa n punona' a jalna Mʋɩjɩra.
27 Agɩpɩ dɩ Mʋɩjɩ faa ɔɔ thɛɛ dɩ kɛr bir kɔ̃ ɔɔ dʋɔ.