Ɩjɩrayɛl bɩsanaa hũhuun Refɩdɩm bəənə ɲɔ thɩmɩɩra. \ref 1-7; Ther 20.1-13; Khɩ 114.7-8
17
1 Dɩ Ɩjɩrayɛl bɩsana fɛw ther le Sɩn bə̃ kparara a jal gbe gbe gbe mɔna Thãgba Kɔ̃tɩn n sonɩ, a jɛ Refɩdɩm. Dɩ liir, wa yɩ ɲʋɔn na ɲɔa'. 2 Dɩ tɩbɩlaale na n ƴaal Mʋɩjɩ kɩla, dɩ wa n so: «Ha sɩ ɲʋɔn sɩ ɲɔ.» Dɩ birse wɩ: «Aɲera nɩ n ƴaal mɩ kɩla? Aɲera nɩ n fifiləlo Thãgba Kɔ̃tɩn?» 3 Sɩ mɔna ɲɔlkhaa n lɩɛr wɩnɩ wɩ n jɩɛ hũhuun Mʋɩjɩra aa aɲe dɔ nɔɔ dɩ ti nɩ Ejipiti a thena, ɩnɩ n khiir ɲɔlkhaa ɩnɛrɛ, na ɩnɩɩ bɩsãsɔ, na ɩnɩɩ nʋ̃sɔ ya? 4 Dɩ Mʋɩjɩ hulẽ Thãgba Kɔ̃tɩnna a sʋʋraa: «Mɔ̃ ma do tɩbɩlaakɛ? A ga jal thaa wa dʋʋrna mɛr bokana.» 5 Dɩ Thãgba Kɔ̃tɩn sʋʋraa: «Kpa kɔ̃tɩ̃ ɩkha, a gbana afɩ gbolɩkɛ fɩ kɔɔ benanɩ Nɩɩl mɩɩr ɲʋɔn a ka kʋlɛ ƴɩɛ. 6 Ma jɩɩlɛ afɩ ƴɛbʋrɔ bokaara, Orɛɛbɩ gɔ̃gʋɔna. Dɩ fa ber bokaarɩle dɩ ɲʋɔn na ther, dɩ tɩbɩla na ɲɔ.» Dɩ Mʋɩjɩ cʋʋ ɔmɛ̃ kɔ̃tɩnasɔɔlee ƴɛra. 7 Dɩ a dʋrɛ paarɩle ire Masa na Meriba, kɩrʋ dʋɔn fifiləle na kɩla; gɩdonɩ liir, Ɩjɩrayɛl bɩsana ƴaal Mʋɩjɩ kɩla, liirə wɩ fifilə Thãgba Kɔ̃tɩn dɩ wa n sona: «Thãgba Kɔ̃tɩn har asɩ thɩ̃thɩɩn yaa, aa ha ka'?»Ɩjɩrayɛl bɩsana punone Amalɛkɩɩ too \ref Dət 25.17-19; 1 Sam 15; 1 Kur 4.42-43
8 Dɩ Amalɛkɩɩ məlsɔ pɔr wɩ kena Ɩjɩrayɛl bɩsana le Refɩdɩm. 9 Dɩ Mʋɩjɩ so Jojuera: «Phire kona, a thɛ kɛna Amalɛkɩɩ too. Cʋɔ, ma jʋʋnɛ na too gɔ̃gɔ̃ yʋɔ na Thãgbaa gbolɩkɛ ɲɔ̃kɔɔ.» 10 Dɩ Jojue cʋʋrɛ gɩrɛ Mʋɩjɩ sʋʋraanɩ, a the a kena Amalɛkɩɩ too. Sɩ Mʋɩjɩ na Aarɔ̃ na Uur jʋʋn gɔ̃gɔ̃ yʋɔ. 11 A Mʋɩjɩ khəi ɲɔ̃ɔ ƴũu, dɩɩ do Ɩjɩrayɛl bɩsana n punone wɩ; aa gbunə dɩɩ do Amalɛkɩɩ too n punone. 12 Dɩ mɔ̃ ɲɛ̃ɛ ƴɔlnɩ Mʋɩjɩ, Aarɔ̃ na Uur gbaar bokaar a thɩɩn dɩ tooro. Sɩ bɩɛl ha ɔɔ ɲɔ̃bɩlana, bɩɛl ɲɔ̃bɔɔra, dɩ wɩ ɓa Mʋɩjɩɩ ɲɛ̃ a fʋrɔ dɩɩ jɩɩl mɛ̃ ƴũu a dana wi lõ bɔɔ. 13 Dɩ mɛ̃ Jojue kəə Amalɛkɩɩ toora, a kʋʋr wɩ na bajɩna.
14 Dɩ Thãgba Kɔ̃tɩn so Mʋɩjɩra: «Khera gaa thɩ̃sɔɔkɛ sɛbɛra gɩ do jɩ̃jɩna thɩ̃ɛ, sa sɔ Jojuera aa:
ma bũburone Amalɛkɩɩ too thɩɩra,
ma bũburõ wer dɩ tibil bɩɛlakɛ na jɩna awɩda a na mɩa'.»