Ɩjɩrayɛl bɩsanaa hũhuun Sɩn bəənə. \ref Ther 11.4; Dət 8.2,16; Neh 9.15-20,21; Khɩ 78.23-35; Jã 6.30-35; 48-58; Fɩl 4.19
16
1 Dɩ Ɩjɩrayɛl bɩsana ther Elɩm a jal dã Sɩn bə̃ kparara, kɛ hanɩ Elɩm na Sɩnayɩ gɔ̃gɔ̃ thɩ̃thɩɩn. Wɩ thenɩ Ejipiti balaɲɔ sɩporɩ wire yʋɔr yemɔɩra wɩ dã le. 2 Dɩ le, Ɩjɩrayɛl bɩsana fɛw mar dɩ wa n hũhuun Mʋɩjɩ na Aarɔna ayɩ: 3 «Aɲera Thãgba Kɔ̃tɩn bo kʋʋr sar, ɔbɔɔkɛ sɩ hanɩ Ejipiti, ka nʋʋn ƴɔnɩ, ɔbɔɔkɛ sɩ n khonɩ dɩkɔ a hi sa sa'? Nɩ kpa sɛr ɩna kɩɛr bə̃ kparara, sɩ khiire kɔmɛr ya?» 4 Dɩ Thãgba Kɔ̃tɩn so Mʋɩjɩra: «Hɩnɛ ma cʋʋrɛ dɩkɔ dɩ ga the ƴũu ga n jɛ. Dɩ mɛ̃ Ɩjɩrayɛl bɩsana na the wa n khɩɩ wire wire, mɔ̃ na dana wɩnɩ. Dɩ mɛ̃ ma be wɩ bɩnɛ ɩ̃ jɩ ado wɩ n ɩɩrɛ mɔ̃ ɩ̃ jɔfʋ sonɩ, agɩbo wa n ɩɩra'. 5 Wire maadõ wirera, ɔbɔɔkɛ wa thɩɩnɩ gɩrɛ wɩ khɩɩnɩ ga bʋnɛ na dɛɛnɔ balaɲɔ gɩ jɔ gɩrɛ wɩ n kɔɔ khɩɩnɩ.»6 Dɩ Mʋɩjɩ na Aarɔ̃ sor Ɩjɩrayɛl bɩsanana fɛw ayɩ: «Nĩ dʋɔrɔɔkɛ na jɩ dɩ Thãgba Kɔ̃tɩn cʋɛ nɩ dɩ nɩ the Ejipiti dɩɩra. 7 Sɩ a dɩɩ wɩl, na yɩrɛ ɔɔ i dʋbɩ gɩdonɩ a nɩɛrɛ anɩ hũhuunɩkɛ nɩ n hũhuunəəni; gɩdonɩ sɛrɛ aɲe sɩ do dɩ na hũhuunə sɩ?» 8 Dɩ Mʋɩjɩ so: «Thãgba Kɔ̃tɩn na ha nɛr nĩ dʋɔrɔɔkɛ nʋʋn dɩ na kho, a hana nɩ dɩkɔ duuro gɩ dã nɩ mɔ̃ nɩ n ƴaalnɩ; gɩdonɩ a nɩɛrɛ anɩ hũhuunɩkɛ nɩ n hũhuunəəni, ga do sɛra nɩ n hũhuunə', sɩ Thãgbara gɩ, gɩdonɩ sɛrɛ, sa do thɩ̃ɛa'.»
9 Agɩpɩ Mʋɩjɩ so Aarɔna aa, a sɔ Ɩjɩrayɛl bɩsanana fɛw wɩ tɔ dana Thãgba Kɔ̃tɩnɩ ƴɛra, gɩdonɩ a nɩɛrɛ awɩ hũhuun. 10 Ɔbɔɔkɛ Aarɔ̃ n mɩɩnanɩ Ɩjɩrayɛl bɩsana, Thãgba Kɔ̃tɩnɩ i dʋbɩ yɩrrɛ le ndɔlɔ̃paara dapaara bə̃ kpara bilo, dɩ wɩ fi ƴɩɛ dɩ wa n hɩɩn.
11 Dɩ Thãgba Kɔ̃tɩn so Mʋɩjɩra ayɩ: 12 «Mɩ nɩɛrɛ Ɩjɩrayɛl bɩsanaa hũhuun. Sɔ war, dʋɔrɔɔkɛ wa khor nʋʋn a na khona dɩkɔ duuro gɩ dã wɩ mɔ̃ wɩ n ƴaalnɩ. Dɩ mɛ̃ wa jɩ mɛr dʋɔn Thãgba Kɔ̃tɩn, awɩ Thãgba.»
13 Dɩ dʋɔrɔra, 'lominəəkɛ hɔnɩ kpɩkpɛ, kɛ wɩ n wenɩ kaɩ pɔr tə̃tə̃tə̃ a mala le Ɩjɩrayɛl bɩsanaa jɛ pa. Dɩ mɔ̃ dɩɩ wɩlnɩ mɩ̃ɛ jire a dii awɩ jɛ para oti. 14 Dɩ mɔ̃ mɩɛnɩle jɛbɩnɩ pɩ, dɩkha be yɩra yɩra hale a jɛ thɩɩra a ho gɩlasɩ caar. 15 Dɩ Ɩjɩrayɛl bɩsana hɩɩn sɩ wa n bule kha bɩɛlbɩɛl: «Aɲe gɩ thakɛ ya fɛ?» Wa kɔɔ jɩ thɩ̃doo gɩ dona'. Dɩ Mʋɩjɩ so war ayɩ: «Gɛr dɔ gɩrɛ Thãgba Kɔ̃tɩn ha nɩnɩ gɩ dɔ anɩ dɩko. 16 Nɩ yɛ gɩrɛ Thãgba Kɔ̃tɩn sonɩ, aa fɛw bɩɛlbɩɛl n khɩa mɔ̃ na dana wɩnɩ; tibil bɩɛlɩda n dɔ omɛɛ nɔ bɩɛl. Omɛɛ nɔ bɩɛl n thɔɔrɛ kilə yenã. Nɩ khɩa gɩ mɩɛna tibil nʋɔ yemɔ̃ɔkɛ nɩ hanɩ anɩ cɔ.» 17 Dɩ wɩ cʋʋ oti. Ɩkha n khɩɩ dɩɩ jɔr, ɩkha n khɩɩ dɩɩ 'lũ. 18 Agɩpɩ wɩ n mɩɛrɛ na omɛɛ. Dɩ ʋrɛ khɩanɩ dɩɩ jɔr na n hana gɩ dɩɩ kara'. Ntɛ n 'lɛr gɩrɛ na danaanɩ khor. Dɩ ʋrɛ khɩanɩ dɩɩ 'lũ ga n ɓɔrʋa'. 19 Dɩ Mʋɩjɩ bir so war: «Tibil bɩɛl na n faa ɔɔda gɩ cɔa'.» 20 Sɩ ɩkha na pɛ nũuə', a sɩ awɩda faa dɩɩ cɔ. Dɩ dɔ kpɩrɔ dɩ ga n hʋ̃ puure, dɩ Mʋɩjɩ gbana wɩ nĩkhii. 21 Dɩ duuro fɛw, ntɛ n khɩɩrɛ gɩrɛ na danaanɩ khor, sɩ a wire hẽ, gɩrɛ sɛnɩ thɩɩra n hɩlɛ.
22 Wire maadõ wirera wɩ khɩɩrɛ dɛbɩ: tibil bɩɛl, omɛɛ nʋɔ yeɲɔ. Dɩ wɩrɛ fɛw dɔnɩ kɔ̃tɩna jaal a mɩɛ Mʋɩjɩ. 23 Dɩ so war: «Mɛ̃ Thãgba Kɔ̃tɩn so. Cʋɔ thɔma na n doa'. Hɩɩr wi phuu gɩ Thãgba Kɔ̃tɩnna. Nɩ cɩa gɩrɛ nɩ hananɩ a na cɩɩ, a thɩa gɩrɛ nɩ hananɩ a na thɩɩ. Gɩrɛ na sɛnɩ, nɩ thɩnɛ gɩ do cʋɔdaa.» 24 Dɩ mɛ̃ gɩrɛ sɛnɩ wɩl dɩɩ, mɔ̃ Mʋɩjɩ sonɩ. Ga n hʋ̃ puure, dɩ dɔ gɩ, a lonoa'. 25 Dɩ so war: «Nɩ khɔ gɛr nĩ, gɩdonɩ nĩ, hɩɩr wire gɩ Thãgba Kɔ̃tɩnɩ irə. Dɩ na yɩ gɩ dɩkhãa pa nĩ a na khɩɩa'. 26 Wire maadõ, na yɩ gɛr na n khɩɩ, sɩ wire makoɲɔra, na yɩ thɩ̃ɛa', gɩdonɩ hɩɩr wire gɩ.»
27 Dɩ wire makoɲɔ wireraalera, tibil ɩkha bor sa the a jal wɩ khɩɩ, wa yɩ thɩ̃ɛa'. 28 Dɩ Thãgba Kɔ̃tɩn so Mʋɩjɩra ayɩ: «Ʋmɔ̃ɔ bɔɔ ga dã, sɩ na nɩ ɩ̃ jɔfʋsɔɔra nũu? 29 Na yɩ gaa, mɛr Thãgba Kɔ̃tɩn ha nɛr hɩɩr wire; gɛr dɔ nɔɔ wire maadõ wirera dɩ̃ ha nɩ wire yeɲɔɔ dɩko. Gɛr gɩ nɛrɛ fɛw bɩɛlbɩɛl, ntɛ n tɔɔ ɔɔ pa. Tibil bɩɛlakɛ na n the jal paar wire makoɲɔ wireraala'.» 30 Dɩ Ɩjɩrayɛl bɩsana hɩɩrɛ wire makoɲɔ wireraale.
31 Dɩ Ɩjɩrayɛl bɩsana we dikorɩlera maan. Dɩkor gɩ, kɛ dɔnɩ thɩ̃ be yɩra yɩra, a bulolo, a daar ho gatookɛ wɩ cʋʋnanɩ thʋʋr.
32 Dɩ Mʋɩjɩ so: «Thãgba Kɔ̃tɩn sɔ aa, nɩ thɩnɛ maan omɛɛ nɔ bɩɛl, anɩ məlsɔ n yɩɛ, wɩ jɩ dɩko caarɩkɛ ɩnɩ ha nɩnɩ bəənə dɩ nɩ kho, ɔbɔɔkɛ ɩnɩ ti nɩnɩ Ejipiti dɩɩra a thena.» 33 Dɩ Mʋɩjɩ so Aarɔna: «Gba bʋlaa a pɩɛr maan omɛɛ nɔ bɩɛl a thɩnɛ Thãgba Kɔ̃tɩnɩ ƴɛra, gɩ too anɩ məlsɔɔ too.» 34 Mɔna Thãgba Kɔ̃tɩn sonɩ Mʋɩjɩra, Aarɔ̃ lonanɛ a phɔmɩ ʋlfɛ khɛɛsʋʋra.