Kəə 'lɛ nɩɛ \ref Nɩr 15.2-4; So 5; 2 Sam 22
15
1 Dɩ Mʋɩjɩ na Ɩjɩrayɛl bɩsana khɩ̃ nɩɛɛkɛ dɩ wa n dʋbɩna Thãgba Kɔ̃tɩn a so:«Ma khɩnɛ nɩɛ ɩ̃ dʋbɩna Thãgba Kɔ̃tɩn; gɩdonɩ a nɩnanɛ ɔɔ dakpɛ do.
A dʋnanɛ gãgʋʋ na ʋrɛ jʋnɛɛnɩ laɲʋɔnɔ.
2 Ɩ̃ fãga Thãgba Kɔ̃tɩn gɩ.
Ɔr mɩ n khɩɩ. A taa mɛr,
Ɔr dɔ ɩ̃ Thãgba, ma khɩnɛ nɩɛ na dʋbɩnaa.
Ɩ̃ thɩɩ Thãgba, ɔr ma n kpãga.
3 Thãgba Kɔ̃tɩn dʋɔn koke kpɩɛ
Thãgba Kɔ̃tɩn dʋɔn ɔɔ i.
4 Faarɔ̃ɔ koke hotorosɔ na ɔɔ sɔrasɩsɔ gbʋmanɛ laɲʋɔnɔ.
Faarɔ̃ɔ kɔ̃tɩ̃ ɓɔ̃sɔ khiire fɛw laɲʋɔnɔ.
5 Ɲɔ gbɩlã biro wɩ gbũ dɩ ɲʋɔn thi war biləbilə.
Wɩ gbune dahulõ paar, boka khaa dɩ ɲʋɔn thi war biləbilə.
6 Afɩ ɲɔ̃bɔra, Thãgba Kɔ̃tɩn, fãga haar he le.
Afɩ ɲɔ̃bɔ, Thãgba Kɔ̃tɩn bũburone afɩ lãlaardara.
7 Afɩ wabɩ tʋɔrɛ afɩ sodara a kpɛɛ.
Afɩ nĩkhi hɩ̃ wɛr mɔ̃ dɔɔ n hɩnɩ kpɛɛrɛ.
8 Afɩ fesu kpar ɲʋɔn der.
Dɩ ɲɔ cɩnanɛ jɩɩl, a der a ho gʋʋ.
Dɩ ɲʋɔn khɩɩr le ɲɔ gbɩlã biro le laɲɔ̃ bɩnɔ.
9 Lãlar kɔɔ sor: "Ma weguure na kpaan na 'lii,
ɩ̃ taa thɩ̃ɛ mɔ̃ mɩ n ƴaalnɩ.
Ɩ̃ bajɩna ma punonaa."
10 Sɩ fɩ phʋbɩrɛ jɩɛ,
dɩ laɲʋɔn kha thi war.
Dɩ wɩ gbũ ther kulõbu khaa
ɲɔ gbɩlã biro.
11 Amɛ hãale thãgbasɔɔra a ho fɩ yaa, Thãgba Kɔ̃tɩn?
Amɛ hãale a thʋ̃ phu, a ɓɔ̃ afɩ kha?
Ʋmɔ̃ hãale, kɛ n kɔnɩ maar,
kɛ n cʋɛnɩ nɔ kpaa thɩ̃ɛsɔ,
a teena khɩɩrɛ afɩ kha?
12 Ɲɔ̃ khɩɩ fɩ 'laa dɩbara
sɩ wɩ bũburõ thɩ bɩnɔ.
13 Afɩ ha bulola fɩ thɔɔrɛ afɩ tookɛ fɩ birsenɩ.
Afɩ fãga fɩ thɔɔna wɩ fɩ dana afɩ cɔ phurə.
14 Dɩ mɔ̃ ca kpɩɩsɔ nɩɛnɩ gɩrɛ kanɩ, wɩ n jɩɩn:
maar hor ga hərəre Fɩlɩsɩtɛ̃sɔ.
15 Edɔ̃ sɔrasɩ kɔ̃tɩna nɩɛrɛ dɩ haar the wɩ.
Dɩ Moabɩ koke kpɛna na n jẽ,
Kanãadaraa ha phaarɛ, dɩ ɲɛ̃ɛ khiir wɩ koo.
16 Ma kɔ̃tɩ̃ɩ fʋlɛ wɛr jɔɔ ka.
Thãgba Kɔ̃tɩn, afɩ fãga thɔ̃ɔkɛ fɩ cʋʋnɩ
dor nɔɔ dɩ wɩ gbãgbar.
Dɩ mɛ̃ afɩ tookɛ fɛr Thãgba Kɔ̃tɩn hɩnɩ
na ka.
Dɩ mɛ̃ afɩ tookɛ fɩ birseni na ka.
17 Nɛnɛ̃ fɩ thɔɔ wɛr fa n jalna afɩ gɔ̃gɔna,
fɩ ha wɩ too paar,
kãakɛ fɩ gbɛbɩnɩ fɩ tooro,
pa phuukɛ fɛr Thãgba Kɔ̃tɩn gbɛbɩnɩ na afɩ ɲɛ̃.
18 Thãgba Kɔ̃tɩn, fɩ toore jamana too paar bɔɔ khorr!»
19 Ɔbɔɔkɛ Faarɔ̃ɔ gãgosɔ na ɔɔ koke hotorosɔ na wɩrɛ hanɩ le koke hotorora lonɩ laɲʋɔnɔ pɩ, Thãgba Kɔ̃tɩn cʋʋrɛ dɩ ɲʋɔn kɛr a gbʋma wɩ. Sɩ Ɩjɩrayɛl bɩsana wer, kɔɔ seere laɲʋɔn na nɛɛ, thɩ khɩɩra.
20 Dɩ Mɩrɩyamɩɩkɛ dɔnɩ Thãgbaa mɩmɩɩ, kɛ dɔnɩ Aarɔ̃ɔ õkhɛr gbaar gõgʋ̃ʋ da n bɩ̃ dɩ Ɩjɩrayɛl khɛra fɛw na n kpaaraa a bɩ̃ gõgʋ̃ʋsɔ dɩ wa n sana bɩna. 21 Dɩ Mɩrɩyam na n ti thakɛ aa:
«Nɩ khɩna nɩɛ a dʋbana Thãgba Kɔ̃tɩn
gɩdonɩ a nɩnanɛ ɔɔ dakpɛ do;
a dʋnanɛ gãgʋʋ na ʋrɛ jʋnɛɛnɩ laɲʋɔna.»
Ɩjɩrayɛl bɩsana bə̃ kparara
Maara nyʋɔn \ref Ther 33.8-9; Thɩ 17.1-7
22 Dɩ Mʋɩjɩ thɔɔrɛ Ɩjɩrayɛl bɩsana dɩ wɩ the laɲɔ̃ sɩɛra dɩ wa n jal Suur bə̃ kparara. Dɩ wɩ ɩɩrɛ wire yẽther sɩ wa yɩ ɲʋɔn a na ɲɔa'.
23 Dɩ wɩ kɔɔ daan Maara, dɩ ɲʋɔn hale, sɩ wa puno a na ɲɔa'; gɩdonɩ gɩ kharɛ, gɛra dɔ kɩrʋ wɩ wenɩ maara, kɩrʋ dʋɔn kharɛ. 24 Dɩ tɩbɩla mar dɩ wa n hũhuun Mʋɩjɩra aa, aɲe ɩna ɲɔ gɩrɛ ya? 25 Dɩ Mʋɩjɩ hulẽ Thãgba Kɔ̃tɩnna, dɩ Thãgba Kɔ̃tɩn nɩɩraa thɩr ʋkha dɩ kha a dʋna ɲʋɔna, dɩ ɲʋɔn ie. Liir a ha wɩ jɔfʋsɔ. Liirə a be wɩ bɩnɛ a hɩɩn. 26 Dɩ Thãgba Kɔ̃tɩn so war ayɩ: «A na nɩ mɛr Thãgba Kɔ̃tɩn, anɩ Thãgba nũu bɔɔbɔɔ, a na cʋʋ gɩrɛ saranɩ ɩ̃ ƴɛra, a na pɛ ɩ̃ jɔfʋsɔ nũu a na cʋʋna gɩ, ma pɛ nar khookɛ mɩ pɛnɩ Ejipitidarara ga; gɩdonɩ mɛr dʋɔn Thãgba Kɔ̃tɩnɩkɛ n kpɛɛnɛ fɩnɩ khoo.»
27 Agɩpɩ wɩ daan Elɩm, ka ɲɔ bu kana yʋɔr yeɲɔ, na kalã thɩra kpalãther yʋɔr hanɩ a jɛ le ɲɔ nʋɔra.