Ejipitidara weere Ɩjɩrayɛl bɩsana dɩ wa n kpaan \ref Ther 33.3-8; Joj 24.6; Neh 9.9-11; Ebi 11.29; 1 Kor 10.1; Khɩ 114; 136.13-15
14
1 Dɩ Thãgba Kɔ̃tɩn mɩɩna Mʋɩjɩ a sʋʋraa: 2 «Mɩana Ɩjɩrayɛl bɩsana a sɔ war wɩ kɛra jɛ Pɩ-Ahɩrɔtɩ bəənə, kɛ hanɩ Mɩgɩdɔl na laɲɔ̃ thɩ̃thɩɩn, Baal-Sefɔ̃ ƴɛbʋrɔ. Le na too, nɩ khunə laɲʋɔn. 3 Dɩ Faarɔ̃ na kpɩɛrɛ, nɩ buure waa bəənə, dɩ bəən kpala nar. 4 Dɩ ma cʋʋrɛ Faarɔ̃ɔ ha dɩ ga khɩɩr, dɩ a na wee nɩ na kpaan. Dɩ le ma nɩna ɩ̃ i dʋbɩ, ɔbɔɔkɛ ma bũburõ wɩnɩ fɛw. Dɩ mɛ̃ wa jɩ dɩ mɛr dʋɔn Thãgba Kɔ̃tɩn.» Dɩ Ɩjɩrayɛl bɩsana cʋʋ oti, mɔna wɩ so warnɩ.5 Dɩ ɔbɔɔkɛ wɩ sonɩ Faarɔna aa, Ɩjɩrayɛl bɩsana jaal, ɔr na ɔɔ thɔ̃daraa kpɩɛr debire. Dɩ wɩ so: «Aɲera sɩ faa Ɩjɩrayɛl bɩsana dɩ wɩ jal ya fɛ? Ana na dɔ sɩ thɔma?» 6 Dɩ Faarɔ̃ gbɛbɩ ɔɔ koke hotorosɔ a kpana ɔɔ sɔrasɩsɔ. 7 A kɔɔ gbaar koke hotoro taamaadõ (600) gɩrɛ ɓɔnanɩ a jɔ fɛw, a gbana Ejipiti koke hotorosɔ fɛw. Fɛw bɩɛlbɩɛla, kona yẽther, yẽther jʋnɛnɔ. 8 Dɩ Thãgba Kɔ̃tɩn cʋʋ Faarɔ̃ɔ ha dɩɩ khɩɩr, dɩ wee Ɩjɩrayɛl bɩsana da n kpaan. Sɩ Ɩjɩrayɛl bɩsana kɔɔ ther na tu jɩɩr. 9 Dɩ Ejipitidaraa sɔrasɩsɔ wee wɩ na gãgona fɛw, na koke hotorosɔɔkɛ wɩ jʋʋnɩ. Dɩ wɩ kpaanɛ a 'li wɩ ka wɩ jɛnɩ laɲɔ̃ nʋɔra, Pɩ-Ahɩrɔtɩ, ka Baal-Sefɔ̃ɔ bəən pɛnɩ ƴɩɛ.
10 Faarɔ̃ n kɔɔ wɔrɔnɛ. Bɔɔkɛ Ɩjɩrayɛl bɩsana na hɩɩnɩ a yɩ Ejipitidara dɩ wa n kpa war khiro, maar fʋlɛ wɛr jɔɔ ka dɩ wa n hulẽ Thãgba Kɔ̃tɩnna. 11 Dɩ wɩ so Mʋɩjɩra ayɩ: «Kana na hale Ejipiti dɩɩra ga, gɛra fɩ kpa sɩ ɩna kɩɛr sɩ khiire bəənə ya? Aɲera fɩ cʋʋ sɩ thaa a ti sɩ Ejipiti? 12 Ga do gɛr sɩ n kɔɔ so far Ejipiti dɩ sɩ yɩ fɩ faa sɩ, sa n do Ejipitidara thɔma, gɩ baar gɩrɛ sa khiirni bəənə mɔlɔaa?» 13 Dɩ Mʋɩjɩ birse wɩ: «Na n do maar n fʋ na'. Nɩ tɔɔ cɔcɔ sɩ na hɩnɛ mɔ̃ Thãgba Kɔ̃tɩn na taa nɩnɩ nĩ; gɩdonɩ Ejipitidaraakɛ nɩ yɩnɩ gɩrɛ, na bir na yɩ wɩ kpɩɩ bã. 14 Thãgba Kɔ̃tɩn na tea na pɛ nar, sɩ nɛrɛ, nɩ pɩra kɩrkɩr.»
Thãgba ɓɛlɛ laɲʋɔn
15 Dɩ Thãgba Kɔ̃tɩn so Mʋɩjɩra: «Aɲera, fɩ n hulẽ mar? Sɔ Ɩjɩrayɛl bɩsanana wɩ ɩrɛ a gba hʋɛ. 16 Sɩ fɛrɛ, gba afɩ gbol a 'laanɛ laɲʋɔna, a tɩnɛnɛɛ, gɩ do nɔɔ pa khɩɩ n yɩr nɩ ka. 17 Mɛrɛ, ma cʋʋrɛ dɩ Ejipitidaraa ha na khɩɩr, dɩ mɛ̃ wa lõ na kpa nar khiro. Dɩ le ma nɩna ɩ̃ i dʋbɩ ɔbɔɔkɛ ma bũburõ wɩnɩ fɛw; Faarɔ̃, na ɔɔ sɔrasɩsɔ fɛw; koke hotorosɔ, na wɩrɛ hanɩ le koke hotorosɔɔrara. 18 Dɩ Faarɔ̃ na ɔɔ koke hotorosɔ na sɔrasɩ wɩrɛ hanɩ le koke hotorosɔraa bũburõ, na dor nɔɔ dɩ Ejipitidara na jɩ dɩ mɛr dʋɔn Thãgba Kɔ̃tɩn.»
19 Dɩ Thãgbaa thɔ̃thɔ̃ thuukɛ n kʋlɛnɩ Ɩjɩrayɛl bɩsana ƴɩɛ, ka fi a bir khiro, dɩ ndɔlɔ̃paarɩkɛ kɔɔ hanɩ ƴɛbʋrɔ, fire bir khiro dakha. 20 Dɩ ndɔlɔ̃paarɩle har Ejipitidara na Ɩjɩrayɛl bɩsanaa thɩ̃thɩɩn. A dor dabirə gɩ̃ɩ bilo, sa do dahɩrɛ bil bɩɛla. Dɩ gɩ dor nɔɔ wa puno na dã kha dɩtɩnɔɔla'.
21 Dɩ Mʋɩjɩ 'laa ɲɔ̃ɔ laɲʋɔna; dɩ Thãgba Kɔ̃tɩn thɔna jɛ kʋkʋʋlʋ, kɛ thɛnɩ kɩrɔ, dɩɩ phʋ̃ laɲʋɔn a cɔna; a vaar laɲʋɔnna sa faa pa khɩɩ. 22 Dɩ Ɩjɩrayɛl bɩsana kana pa khɩ paarɩlera laɲɔ̃ thɩ̃thɩɩn a seer. Laɲʋɔn kɔɔ vaarɛ a ho gʋʋ bilo bilo. 23 Dɩ Ejipitidara wee wer a kpaan. Dɩ Faarɔ̃ɔ gãgosɔ fɛw na ɔɔ koke hotorosɔ na wɩrɛ hanɩ le bɩnɔ, fɛw kɔɔ kpa warɛ le laɲɔ̃ bɩnɔ. 24 Dɩwɩl bɔɔ, Thãgba Kɔ̃tɩnɩkɛ hanɩ le ndɔlɔ̃paaraakɛ dɔnɩ dɔɔ, hɩɩnɛ Ejipitidara sa pɛ ɲaɲaanɛ awɩ pa. 25 A cʋʋrɛ awɩ koke hotoro nɛ dɩ ga n ma, ga n jala'. Dɩ wɩ so ayɩ: «Sɩ hʋnɔnɛna tɩbɩlaakɛ, Thãgba Kɔ̃tɩn teere da n pɛ war.»
26 Dɩ Thãgba Kɔ̃tɩn so Mʋɩjɩra: «'Laanɛ ɲɔ̃ɔ laɲʋɔna, a cʋɛ ɲʋɔn gɩ kɛr gɩ ɩ̃ gɩ thi Ejipitidarara: gɩ thi awɩ koke hotorosɔɔra na wɩrɛ jʋnɛnɩ gãgʋʋsɔɔra.» 27 Dɩ Mʋɩjɩ 'laa ɲɔ̃ɔ laɲʋɔna; dɩwɩl bɔɔ dɩ laɲʋɔn kɛr bir mɔ̃ gɩ kɔɔ hanɩ cacara. Dɩ Ejipitidara car mɔ̃ ɲʋɔn khanɩ dɩ ga n pɔ war. Sɩ Thãgba Kɔ̃tɩn khar ɲʋɔn a thi war. 28 Dɩ ɲʋɔn thire koke hotorosɔɔra, na Faarɔ̃ɔ sɔrasɩsɔɔra fɛw, kɛ kɔɔ kpaanɛnɩ Ɩjɩrayɛl bɩsanana laɲɔ̃ bɩnɔ. Bɩɛlakɛ na tha'. 29 Sɩ Ɩjɩrayɛl bɩsana wer, seere laɲʋɔn. Ɲʋɔn kɔɔ bãa bilo bilo a jʋʋn a ho gʋʋ. 30 Thãgba Kɔ̃tɩn taarɛ Ɩjɩrayɛl bɩsana Ejipitidaraa ɲɔ̃ɔkɔɔ ga wiilera. Dɩ wɩ yɩrɛ mɔ̃ Ejipitidara khiirni a phe laɲʋɔna. 31 Dɩ wɩ yɩrɛ dakha mɔ̃ Thãgba Kɔ̃tɩn cʋʋnɩ Ejipitidara dɩɩ the ɔɔ fãgara. Dɩ maar fʋlɛ wɛr Thãgba Kɔ̃tɩnna. Dɩ wɩ gbaar awɩ ha pɛ a dɛɛnaa; a pɛna ɔɔ thɔ̃daar Mʋɩjɩ haar.