Jɔfʋ, Pakɩ thɩmɩɩra na caca besɔɔra \ref Thɩ 12; The 3.11-13, 40-51; 18.15-17; 1 Kor 6.19-20
13
1 Dɩ Thãgba Kɔ̃tɩn mɩɩna Mʋɩjɩ thakɛ ayɩ: 2 «Gba caca besɔ fɛw a ha mɩ: Ɩjɩrayɛl bɩsanaa caca bisɔ na awɩ nʋ̃sɔɔ caca bisɔ, fɛw dʋɔn ɩ̃da.»3 Dɩ Mʋɩjɩ so Ɩjɩrayɛl bɩsanana: «Nɩ jɛna wireekɛ nɩ thenɩ Ejipiti, ka nɩ kɔɔ donɩ dea. Thãgba Kɔ̃tɩnɩ fãga kɔɔ dɔ kɩrʋ dɩ nɩ the. Dɩ a na cʋʋ fɛtɩ agɩ irə na n kho tabɩ buruə'. 4 Nɩ kɔɔ gbaar hʋɛ sɩporɩkɛ wɩ n wenɩ Abɩbɩ sɩpora, kɛ dɔnɩ ɔɔjɩ kha bɔɔ. 5 Ɔ sɩporaakɛra, na n cʋʋ fɛtɩ Thãgba Kɔ̃tɩnna, ɔbɔɔkɛ Thãgba Kɔ̃tɩn na cʋʋ nɩnɩ dɩ na lõ Kanãa dɩɩra, kɛ dɔnɩ Kanãa məlsɔ, na Amɔɔr məlsɔ, na Hɩvɩtɩsɔ, na Jebusɩdara, na Hɛtɩɩ məlsɔɔ dʋɔ, kɛ a kɔɔ ʋlfɛnanɩ anɩ thɩsɔ, ɩna ha nɛr. Dɩɩ gɩɩkɛ naƴɩlɛ̃ na thʋʋr n celnɩ.
6 Wire makoɲɔɔ bɩnɔ, buruukɛ na hananɩ tabɩɩra', na n kho.
Sɩ wire makoɲɔ wirera, nɩ cʋʋ fɛtɩ, Thãgba Kɔ̃tɩnɩ irə.
7 Wire makoɲɔraale, buruukɛ na hananɩ tabɩɩra', na n kho.
Wa n yɩ anɩ thɩ̃thɩɩn tabɩɩr dɩ tabɩ buru ga.
8 Dɩ owiile, mɩɛnɛ afɩ bɩsã ayɛ, fɩ n cʋʋ gɛr fa n jɩna mɔ̃kɛ Thãgba Kɔ̃tɩn kɔɔ cʋʋ fɩnɩ dɩ fɩ the Ejipiti.
9 Thãgba Kɔ̃tɩnɩ fãga ɲɔ̃, a kɔɔ tinə nɩ dɩ nɩ the Ejipiti. Dɩ gaa fɛtɩɩle na do narɛ jɩ̃jɩna thɩ̃ɛ, ga ho narɛ jɩɩn ɲɛɛna na kubiro. Dɩ mɛ̃ Thãgba Kɔ̃tɩnɩ thɩmɩɩ na ha anɩ nɔra.
10 Dɩ yɛna wo yɛna, a ɔ bɔ dã, na n hɩnɛ jɔfʋʋkɛra.
11 Ɔbɔɔkɛ Thãgba Kɔ̃tɩn na cʋʋ nɩnɩ dɩ na lõ Kanãa dɩɩra, kɛ a kɔɔ ʋlfɛnɩ ɩna har anɩ thɩsɔ na nɛrɛ, 12 nɩ gba caca kuuminə fɛw, na anɩ nʋmaa caca dakosɔ fɛw a hana Thãgba Kɔ̃tɩn. Ɔr hɩna. 13 Ado kũkə̃ə caca dako gɩ, nɩ debaa na banaa agɩbo bʋ ɓolʋ. A na n deba', nɩ bɩɛ bãbiro a kɔ. Dɩ nɩ birsene dakha anɩ caca bisɔ anɩ bisɔɔra. 14 Dɩ dɩkhõo, ado anɩ bɩsãsɔ bule nɩ: "Aɲe dɔ kɩrʋ nɩ n cʋʋnɩ thakɛ?" Nɩ birse wɩ nɩ yɩ: "Thãgba Kɔ̃tɩn kɔɔ cʋɛ sɩ dɩ sɩ the Ejipiti, dee dʋʋra na ɔɔ fãga. 15 Dɩ mɔ̃ Faarɔ̃ na n tunɩ na faa sɩ sɩ tha', Thãgba Kɔ̃tɩn cʋʋrɛ dɩ awɩ caca bɩsãsɔ fɛw khiir Ejipiti dɩɩra. A fʋna tɩbɩla a gbana nʋmaa caca bisɔ, fɛw khiire. Gɛr gɩ dɩ sɩ gba caca besɔ nʋmana a ha Thãgba Kɔ̃tɩn dɩɩ do bonɩ ji thɩ̃ɛ, sɩ dɩ sɩ birse asɩ caca bikona asɩ bɩsãsɔɔra." 16 Dɩ gaa cʋʋ caakɛ na do narɛ jɩɩn ɲɛɛna na kubiro gɩ cʋʋ nɩ na n jɩna dɩ Thãgba Kɔ̃tɩn kɔɔ cʋɛ nɩ dɩ nɩ the na ɔɔ fãga, Ejipiti.»
Mɔ̃ Thãgba Kɔ̃tɩn thɔɔnɩ Ɩjɩrayɛl bɩsana bəənə. \ref The 33.1-6; Neh 9-12,19; Khɩ 27.1
17 Ɔbɔɔkɛ Faarɔ̃ faanɩ Ɩjɩrayɛl bɩsana dɩ wɩ the, Thãgba na kɔɔ kpa wɩ jalna na Fɩlɩsɩtɛ̃sɔɔ dɩ hʋa', sɩrakɛ ɔr kɔɔ wɔrɔnɛ a telena; gɩdonɩ a sor aa, a tɩbɩlaakɛ yɩ kʋʋr awɩ ƴɛbʋrɔ, maar na fʋ wɛr, dɩ wa kɛr a na bir Ejipiti. 18 Dɩ gɛr gɩ dɩ gbana wɩ hʋ kɛrʋ, kɛ n thɛnɩ bə̃ kparara, sɩ dɩ seer laɲɔ̃ sɩɛ. Ɩjɩrayɛl bɩsana kɔɔ ther Ejipiti dɩɩra mɔ̃ sɔrasɛ n thenɩ kʋʋra.
19 Dɩ Mʋɩjɩ jalnanɛ Jojɛfɩɩ khubisɔ, gɩdonɩ Jojɛfɩ kɔɔ sor Ɩjɩrayɛl bɩsanana ɩnɩ hananɛ tu jɩɩr gel dɩ Thãgba na kher wer; dɩ a cʋʋ wɛr dɩ wɩ ʋlfɛ ayɩ ɩna faa ɔɔ khubisɔ Ejipita'.
20 Dɩ wɩ ther Sukɔtɩ a jal jɛ Etam bəənə, bə̃ kpara nʋɔra. 21 Dɩ Thãgba Kɔ̃tɩn n kɔɔ kʋʋl wɛr ƴɩɛ dɩwɩlɔ ndɔlɔ̃paara a na n nɩ war hʋɛ, sɩ dɩtɩnɔ, dɩ kʋʋl wɩ ƴɩɛ ndɔlɔ̃paaraakɛ dɔnɩ dɔɔ, a na n carã wɩ, gɩ do nɔɔ wa n ɩɩr dɩwɩlʋ na dɩtɩnɛ fɛw. 22 Dɩ ndɔlɔ̃paarɩle na n tɔ, sɩ dɩ sɩ war, a dɩtɩnɔ gɩ, a dɩwɩlʋla ga.