Pakɩ thɩmɩɩ \ref Thɩ 13.3-10; Dət 16.1-8; Lu 22. 7-20
12
1 Dɩ Thãgba Kɔ̃tɩn so Mʋɩjɩ na Aarɔna le Ejipiti dɩɩra ayɩ: 2 «Sɩporɩkɛ na dɔ nar caca sɩpor sɩporasɔɔra. Ɔr na dʋɔn caca sɩpor yɩɛra. 3 Nɩ mɩana Ɩjɩrayɛl bɩsana a sɔ war: sɩporɩkɛɛ wire yʋɔra, cɔ kana fɛw bɩɛlbɩɛl n hanana bana ɓolʋ; bana ɓol bɩɛl n dɔ cɔ bɩɛlɩda. 4 Ado cɔ ka dɔɔ na kpɛr a na puno na kho bana ɓol bɩɛla', a ɓana kha na ɔɔ cɔ khuda ʋrɛ a wɔrɔnanɩ kheu. Wɩ hɩɩn kha tibil nʋɔɔkɛ wɩ hanɩ, na mɔ̃ ntɛ na punonɩ na kho, sɩ wɩ tɩnɛ. 5 Sɩ a dɔ banaa agɩbo bʋ ɓolʋ, kɛ na hananɩ taana'; a dɔ dakʋʋr, kɛ cieni yɛ bɩɛl. 6 Nɩ phiire nʋmɩɩle a thɩnɛ, gɩ dana sɩporɩkɛɛ wire yʋɔr yenana. Dɩ ga wiile dʋɔrɔ, nɛr Ɩjɩrayɛl bɩsana fɛw na kho anɩ nʋ̃sɔ. 7 Nɩ gba ɔɔ tɔmɩn a cala lõfonɔ gɛlʋ yeɲɔra na lõfonɔ kpabɩ paar, cɔ dɔɔraakɛ na khonɩ. 8 Dɩtɩ̃ bɩɛlaalera, na hɩ nʋʋnɩle a na kho na buruukɛ na hananɩ tabɩɩra', na faakɛ kharanɩ. 9 A ga jɩɩ bã', na n khɔa'; na n thɩɩ na ɲʋɔna'. Sɩ nɩ hɛ dɔɔra; a hɛ na yʋʋ, na nɛɛ, na bɩ̃daar thɩ̃ɛ fɛw. 10 Na n sɩ thɩ̃ɛ faa gɩ cɔa', sɩ ado thɩ̃ɛ bor sa sɩ a wɩl dɩɩ, nɩ thiə gɩ duuro. 11 Thakɛ na kho gɩ: Nɩ khɩma lophɛrɛ anɩ kẽkena, a tɔna sabara, a fɔrɔ gbʋʋl ɲɔ̃kɔɔ, sɩ na khɔ na phananɛ; gɛr na dʋɔn Thãgba Kɔ̃tɩnɩ Pakɩ. 12 Ga dɩtɩnɔɔle, ma kpaarɛ Ejipiti dɩɩra fɛw, a na kʋʋr caca bɩsana fɛw, gɩ fʋna tɩbɩla gɩ gbana nʋma. Dɩ ma pɛr Ejipiti thãgbasɔɔra sor, dɩ mɛ̃ wa jɩ dɩ mɛr dʋɔn Thãgba Kɔ̃tɩn. 13 Tɔmɩn na dɔ jɩɩn cɔnasɔraakɛ nɩ hanɩ. Dɩ bɔɔkɛ ma yɩnɩ tɔmɩnɩle ma phor, dɩ mɛ̃ thɩlkɩɩrɩkɛ na dananɩ Ejipiti na dã na'.14 Ɔ wiile na dɔ nar jɩ̃jɩna wire, dɩ na cʋʋrɛ fɛtɩ kɔ̃tɩ̃ɩ mɛr Thãgba Kɔ̃tɩnɩ irə. Ga dor jɔfʋ khorr, kɛ na n cʋʋnɩ məle wo məlela.
Buruukɛ na hananɩ tabɩɩraa' fɛtɩ.
15 A fʋ caca wire a dana wire makoɲɔra, buruukɛ na hananɩ tabɩɩra', na n kho. Sɩ a fʋnanakɛ caca wire, na n do tabɩɩr n ha nɩ cʋɔrɔa'; tibil wo tibilikɛ na khɔnɩ tabɩ buru caca wireele na fɔnɩ, wa hɛlʋʋlɛ Ɩjɩrayɛl bɩsanaa thɩ̃thɩɩn. 16 Caca wirera na hananɛ kpa jɛrɩkɛ dɔnɩ kpa jɛ kɔ̃tɩ̃ɩ.
Makoɲɔ wirera dakha na hananɛ kpa jɛrɩkɛ dɔnɩ kpa jɛ kɔ̃tɩ̃ɩ.
Ga wisɔraale na n cʋʋ thɔ̃ bɩɛla'. Anɩ dɩko na cʋʋ dɩbara.
17 Na n cʋʋrɛ fɛtɩɩkɛra dɔnɩ buruukɛ na hananɩ tabɩɩraa' fɛtɩ, gɩ do jɩ̃jɩna wire, wireekɛ mɩ tini anɩ too Ejipiti dɩɩra. Na n hɩɩnɛ wireekɛra 'lɩm, gɩ do nar jɔfʋ khorr məle wo məlela. 18 Caca sɩporɩ wire yʋɔr yenãa dʋɔrɔ, na kho tabɩ buruə', gɩ dana wire kpelẽ bɩɛlɩ dʋɔrɔ. 19 Wire makoɲɔ biləni, wa n yɩ anɩ cɔ tabɩɩr fɩɩʋraka'. Tibil wo tibilikɛ na khɔnɩ tabɩ thɩ̃ɛ, wa hɛlʋʋlɛ Ɩjɩrayɛl bɩsanaa thɩ̃thɩɩn, a bẽbe gɩ, a dɩdaar gɩ. 20 Na n kho tabɩ buru bɩɛlakɛ, paar wo paarɩkɛ na hana'.»
Pakɩ dɩko gbɛbɩrɛ
21 Dɩ Mʋɩjɩ wer Ɩjɩrayɛl bɩsanaa kɔ̃tɩ̃sɔ fɛw a so war: «Nɩ jala fɔ banaa agɩbo bʋ ɓolʋ mɔ̃ nɩ donɩ cɔdaar kona fɛw bɩɛlbɩɛl, a kɔ Pakɩra. 22 Nɩ gba ɩjɔpɩ fa lire, a mʋa tɔmɩnaakɛ na tɛnɩ na pɛ tasara, sa cala tɔmɩnna lõfonɔ kpabɩ paar, na lõfonɔ gɛlʋ yeɲɔra, sɩ tibil na n kpu phiilo gɩ dana duuroə'. 23 Dɩ ɔbɔɔkɛ Thãgba Kɔ̃tɩn na kpaarnɩ a na n kʋʋr Ejipitidaraa caca bisɔ, aa yɩ tɔmɩn lõfonɔ kpabɩ paar, na lõfonɔ gɛlʋ yeɲɔra, Thãgba Kɔ̃tɩn na kãasɩrɛ anɩ cɔ na faa, dɩ mɛ̃ gbõgolõdaar na lõ nɩ cʋɔrɔ a na kʋ tibilə'. 24 Na n hɩnɛ ga thɩ̃ɩkɛra gɩ do nar jɔfʋ, nɛrɛ na anɩ bisɔɔkɛ na kpaanɛnɩ bɔɔ khorr. 25 Ɔbɔɔkɛ na lonɩ dɩɩraakɛ Thãgba Kɔ̃tɩn na ha nɩnɩ mɔ̃ a kɔɔ ʋlfɛnɩ, nɩ fɔrɔ cʋʋ pa caarɩkɛ khorr. 26 Dɩ a anɩ bɩsãsɔ bule nɩ: "Aɲe dɔ cʋʋ pa caarɩkɛɛ kɩr?" 27 Nɩ to yɛ: "Pakɩ bonɩɛ gɩ Thãgba Kɔ̃tɩnna. Ɔbɔɔkɛ sɩ kɔɔ hanɩ Ejipiti dɩɩra, Thãgba Kɔ̃tɩn kʋʋrɛ awɩ caca bɩsãsɔ fɛw, sa kãasɩ asɩ cɔsɔɔra, dɩ khir na lõ la'." » Dɩ Ɩjɩrayɛl bɩsanaa kɔ̃tɩ̃sɔɔle gburõkhu a fʋɔr. 28 Agɩpɩ dɩ wɩ kɛr jal a cʋʋ oti mɔ̃ Thãgba Kɔ̃tɩn kɔɔ mɩɛnɩ Mʋɩjɩ na Aarɔ̃.
Nyẽbe yʋɔr thɩlkɩɩr: Ejipitidaraa caca bisɔɔ khiir \ref Thɩ 11.1-8; Khɩ 105.36-38; Ej 63.4
29 Dɩ dɩnɩrɔ, Thãgba Kɔ̃tɩn kʋʋrɛ wɩrɛ fɛʋʋkɛ dɔnɩ caca bɩsana Ejipiti dɩɩra: a fʋna Faarɔ̃ɔ caca bɩsãakɛ na deaanɩ, a dana khaɩda ʋrɛ hanɩ khaɩra, ɔɔ caca bɩsã, a gbana nʋma fɛʋʋ caca bisɔ. 30 Dɩ Faarɔ̃ jaarɛ dɩtɩnɔɔlera, ɔr na ɔɔ thɔ̃dara na Ejipitidara fɛw. Dɩ hulẽbe gbɔr Ejipiti gɩdonɩ cɔ bɩɛlakɛ na hale tibil na khinəə ga.
31 Dɩ ɔ dɩtɩnɔɔlera, Faarɔ̃ wer Mʋɩjɩ na Aarɔ̃ a so war: «Nɩ thɛ ɩ̃ dʋɔ, nɛrɛ na anɩ toosɔ fɛw! Nɩ jala a dɔ thɔma anɩ Thãgba Kɔ̃tɩnna mɔna nɩ kɔɔ sonɩ. 32 Nɩ kpa dakha anɩ nʋ̃ yɩra na anɩ nʋ̃ kɔ̃tɩ̃sɔ, mɔna nɩ kɔɔ sonɩ. Sɩ nɩ bɩɛlɛ Thãgba a bɔna mɩ.» 33 Dɩ mɔ̃ Ejipitidara kpɩɛrnɩ ɩna khiire fɛw, wɩ n wʋɔrɛ Ɩjɩrayɛl bɩsana, wɩ thɛ khə̃khə̃.
34 Dɩ Ɩjɩrayɛl bɩsana gba awɩ buru mɩ̃ɩkɛ wɩ kɔɔ luurnɩ sɩ ga bʋ̃ pa', a fʋrɔ. A gba dakha buru luurdaa a parna kɩ̃kɩɩn a pɛ ɲɔ̃gbɛgbɛlɔ. 35 Dɩ Ɩjɩrayɛl bɩsana kɔɔ cʋʋrɛ gɩrɛ Mʋɩjɩ kɔɔ so warnɩ. Wɩ kɔɔ bɩɛlɛ Ejipitidarara thɩ̃ɛsɔɔkɛ wɩ cʋʋnanɩ dɛ bulo, na dɛ, na kẽkena. 36 Dɩ Thãgba Kɔ̃tɩn kɔɔ cʋʋrɛ dɩ wɩ 'li bɔ jɩɩr Ejipitidarara. Dɩ wɩ kɔɔ ha wɛr gɩrɛ wɩ bɩɛlnɩ. Dɩ mɛ̃ Ɩjɩrayɛl bɩsana phʋʋn Ejipitidara.
Ɩjɩrayɛl bɩsana ther Ejipiti \ref The 33.3-5; 9.1-14; 15.14-16; Jən 15.13-14; Th tt 7.6-7
37 Dɩ Ɩjɩrayɛl bɩsana ther Ramɩsɛsɩ dɩɩra dɩ wa n jal Sukɔtɩ. Wɩ kɔɔ thɔɔrɛ tɩbɩla gbɩlanɩ der paar taamaadõ (600.000), sɩ wa ther bɩsana ga. 38 Tɩɩ khɩna jɔjʋɔ, kɛ thɛnɩ paar dɩɩdɩɩ kɔɔ jaal kha na wɛr. Wɩ kɔɔ hananɛ nʋma dɩ wɩ jɔr ka: nʋ̃ yɩra na nʋ̃ kɔ̃tɩna. 39 Dɩ wɩ kɔɔ hɩrɛ buru mɩ̃ɩkɛ wɩ luurnɩ Ejipiti, kɛ wa pɛrnɩ tabɩɩra', dɩ ga kɔɔ bɔ̃a', gɩdonɩ wɩ kɔɔ wee wer, dɩ wa yɩ jɩɩl paar, wɩ puno wɩ gba dɩkɔa'. 40 Yɛ nʋɔɔkɛ Ɩjɩrayɛl bɩsana kɔɔ cʋʋnɩ Ejipiti dɩɩra, har yɛna taanã na kpelẽ yʋɔr (430). 41 Dɩ yɛna taanã na kpelẽ yʋɔrɩ (430) pɩ bɔɔ, ga wiilera 'lɩm, Thãgba Kɔ̃tɩnɩ too the Ejipiti a cʋr gbulonə gbulonə.
42 Ɔbɔɔkɛ Thãgba Kɔ̃tɩn tini ɔɔ too dɩ wɩ the Ejipiti dɩɩra, a dʋrɛ jʋʋrɛ dɩtɩ̃ biləni. Mɛna Ɩjɩrayɛl bɩsana na dʋ jʋʋrɛ dɩtɩnɛnaakɛ biləni awɩ thɩ kɔ̃ wo thɩ kɔna fɛw, gɩdonɩ Thãgba Kɔ̃tɩn hɩna dɩtɩnɛɛkɛra.
43 Dɩ Thãgba Kɔ̃tɩn so Mʋɩjɩ na Aarɔna: «Nɩ yɛ jɔfʋʋkɛ hanɩ le Pakɩ thɩmɩɩra:
kpakpal bɩɛlakɛ na hana hʋɛ na kho Pakɩ dikora'.
44 Dee wo deekɛ wɩ thenɩ na war, hananɛ hʋɛ a na kho gɩ ado a kure khʋ̃ʋ.
45 Sɩ hʋ ka ʋrɛ n kananɩ hʋɛ a gbũ afɩ cɔ, na baadee thɔ̃ don, na hana hʋɛ a na kho ga.
46 Cɔ ka bɩɛldara n gbɛba kha cɔ bɩnɔ a khɔ Pakɩ dikorra. Wa n gba thena phiiloa', wa n cɔ dakha khubuə'.
47 Ɩjɩrayɛl bɩsana fɛw na cʋɛ Pakɩ fɛtɩra.
48 Ado bẽbe dɔɔ anɩ thɩ̃thɩɩn ƴaal ɩnɩ n cʋɛ Pakɩ fɛtɩ Thãgba Kɔ̃tɩnɩ irə, kona fɛw ntɛɛ cɔ n kuro khʋ̃ʋ. Dɩ mɛ̃ a na puno a na wɔrɔ̃ dʋɔdaraa kha, a cʋʋ fɛtɩra. Sɩ tibil wo tibilikɛ na kuronɩ khʋ̃ʋa', aa hana hʋɛ a na kho Pakɩ dikora'.
49 Dɩ jɔfʋ bɩɛla gɩ dʋɔdarara na bẽberaakɛ tɔɔnɩ anɩ thɩ̃thɩɩn.»