Dɩɩsɔɔkɛ wɩ hanɩ Levɩɩ mǝlsɔ.
35
1 Thãgba Kɔ̃tɩn mɩɩnanɛ Mʋɩjɩ Moabɩ bǝ̃ fãasɔɔra, Jʋrdɛ̃ mɩɩr nʋɔra, Jeriko ƴɛbʋrɔ ayɩ: 2 «Kpãkpaanɛ Ɩjɩrayɛl bɩsanana, dɩɩsɔɔkɛ wa 'lɛnɩ, wɩ hana Levɩɩ mǝlsɔ dɩ ɩkha wɩ tooro. Wɩ hana wɩ dakha nʋ̃ khʋʋl paarsɔ gɩ dii dɩɩsɔɔrara. 3 Dɩɩsɔɔraale wa n cɔ, sɩ agɩ bilǝbilǝsɔ n do ka wa n khʋʋlnanɩ awɩ nʋ̃sɔ na ka wa pɛrnɩ thɩ̃ kpɩɩsɔɔkɛ wɩ hananɩ na awɩ nʋ̃sɔ fɛw. 4 Paarsɔɔkɛ na diənɩ dɩɩsɔɔraakɛ na hanɩ Levɩɩ mǝlsɔ, pɛw fɔ gʋʋraakɛ diǝnɩ dɩɩra a jala dana mɛtɛrɛ taamɔy (500) bilǝ fɛw. 5 Nɩ kurǝ paarra gɩ gbãa mɛtɛrɛ gbɩlanɩ (1000) wi phã pa bilo, mɛtɛrɛ gbɩlanɩ (1000) ka wire na n jalnɩ dɩ pɛ ɲɔ̃bɩlã, mɛtɛrɛ gbɩlanɩ (1000) wi lõ paar bilo, mɛtɛrɛ gbɩlanɩ (1000) ka wire na n jalnɩ dɩ pɛ ɲɔ̃bɔɔ. Dɩɩ n ha thɩ̃thɩɩn. Thale awɩ dɩ khuisɔ na ha. 6 Dɩɩsɔɔraakɛ na hanɩ Levɩɩ mǝlsɔ, nɩ thero dɩɩ maadõ gɩ do taa 'lɛ dɩɩsɔ ka tibilikɛ na kɔnɩ tibil sɩ ga do a jɩrɛ sa cʋga' na punonɩ na ca na jal na 'lɛ taarɛ. Nɩ hana wɩ dakha dɩɩ kpalaɲɔ yeɲɔ (42). 7 Dɩɩ fɛʋʋkɛ na hanɩ Levɩɩ mǝlsɔ na gbɛbɩrɛ na ha dɩɩ kpalaɲɔ makõther (48) na agɩ dɩ khuisɔ. 8 Nɩ te dɩɩsɔɔra Ɩjɩrayɛl bɩsanaa dɩsɔɔra. Ca wɩrɛ hananɩ dɩɩ dɩɩ jɔr wɩ te jɔɔ, wɩrɛ na hana gɩnɩ dɩɩ kpɛra, wɩ te gbe. Ca dɔɔ n te gɩ mɩɛ kha na mɔ̃ ɔɔ thɩɩkɛ a 'lɛnɩ hanɩ a hana Levɩɩ mǝlsɔ».Taa 'lɛ dɩɩsɔ
9 Thãgba Kɔ̃tɩn sor Mʋɩjɩra ayɩ: 10 «Sɔ Ɩjɩrayɛl bɩsanana wɔɔ: Ɔbɔɔkɛ na iirni Jʋrdɛ̃ mɩɩr sɩ na lõ Kanãa dɩɩra, 11 nɩ phire dɩɩsɔ gɩ do taa 'lɛ paar, a tibil kʋ tibil sɩ ga do a jɩrɛ sa cʋa', ntɛ n puno a ca a jal le. 12 Ga dɩɩsɔɔle na dɔ nar taa 'lɛ paar hel tiirdaara. Dɩ mɛ̃ ʋrɛra kɔnɩ tibil na ca na jal le gɩ do nɔɔ wa n kʋʋ saagado wɩ kɔɔ kɩɩlnaanɛ ɓoa' ga. 13 Dɩɩsɔɔkɛ na phiinɩ nɩ te dɩɩ maadõ gɩ do nar taa 'lɛ paar. 14 Nɩ te dɩɩ yẽther Jʋrdɛ̃ mɩɩr iiro wi phã paar, a te dɩɩ yẽther Kanãa dɩɩra, gɩ do taa 'lɛ dɩɩsɔ. 15 Dɩ tibil wo tibil, a Ɩjɩrayɛl bɩsaan gɩ, a kpakpal gɩɩkɛ hanɩ Ɩjɩrayɛl bɩsanaa thɩ̃thɩɩn, a kpakpal hʋ ka gɩ, a kʋ tibil sɩ ga do a jɩrɛ sa cʋa', a puno a ca a wɔ̃ dɩ bɩɛlla ga dɩsɔɔraale.
16 A tibil be ɔɔ alãkha tibil na ther dɩ khi, tɩɩ kʋdaar ha ntɛɛle, wɩ kʋɔ. 17 A bokaarɩkɛ na kɔnɩ tibil a dʋnaa dɩ khi, tɩɩ kʋdaar ha ntɛɛle, wɩ kʋɔ. 18 A thɩ̃ɛɛkɛ dɔnɩ thɩrdaa, kɛ na kɔnɩ tibil a benaa dɩ khi, tɩɩ kʋdaar ha ntɛɛle, wɩ kʋɔ. 19 Ʋrɛ dɔnɩ hel tiirdaar n kɔ ntɛɛle; aa 'lii a kʋɔ. 20 A tibil tɔ ɔɔ alãkha tibil a kpɛɛ na laar kpɩɛrɛ, agɩbo a dʋʋ na dɩkha na puu cʋʋ kpɩɛrɛ dɩ khi, 21 agɩbo a ɲɔ̃ puure a benaa, gɩdonɩ a n kɔɔ bʋʋnaanɛ dɩ khi, wɩ kʋɔ; tɩɩ kʋdaar ha ntɛɛle. A ʋrɛɛkɛ dɔnɩ hel tiirdaar 'lii, a kʋɔ. 22 Sɩ ado tibil tɔ ɔɔ alãkha tibil a kpɛɛ sɩ ga do a jɩra', dɩ ga do a n kɔɔ bʋʋnaana', agɩbo a dʋʋ na dɩkha sɩ ga do puu cʋʋ kpɩɛrɛ a hanaa ga, 23 agɩbo bokaarɩkɛ na kɔnɩ tibil a cʋʋ dɩɩ jiirǝǝ dɩ khi, sɩ ga do sodara wɩ kɔɔ do kha ga, dɩ ga do wo puure a kpɩɛr gɩ 'liǝ', 24 Ɩjɩrayɛl bɩsana n gʋrɛ sora tɩɩ kʋdaar na hel tiirdaarɩ thɩ̃thɩɩn. 25 Nɩ yɛkɛ hʋɛsɔɔkɛ Ɩjɩrayɛl bɩsana na gbanɩ wɩ gʋʋrna sora: wɩ kɛa ntɛra hel tiirdaara a kpaa birǝnǝ dɩ dɔɔraakɛ a kɔɔ canɩ jal. Ntɛɛle kɔnɩ tibil n tɔɔ dɩɩraale gɩ dana bɔɔkɛ gbõdaarɩkɛ wɩ pɛrnɩ nĩ sãsɩna yʋɔ, a phiiruu na khini. 26 Sɩ a tɩɩ kʋdaarɩle ɩɩr dɩɩraakɛ a wɔnɩ a the dɩ khuirə, 27 a hel tiirdaar 'lii dɩ khuirə a kʋʋ, a na 'lɛ sor gɩdonɩ a kʋrɛ tibilǝ', 28 gɩdonɩ tɩɩ kʋdaar teenanɛ a tɔɔ dɩɩraakɛ a wɔnɩ gɩ dana bɔɔkɛ gbõdaar na khini. A gbõdaarɩle khi a punone a kɛr bir ɔɔ dʋɔ a too ɔɔ thɩra. 29 Gɛr dʋɔn jɔfʋsɔɔkɛ na n gʋʋrnanɩ sɔ ga n telẽ nɛrɛra na anɩ mǝlsɔɔra fɛw, paar fɛʋʋkɛ na toonɩ. 30 A tibil kʋ tibil dɩ tibil jɔjʋɔ toro yire, wɩ kɔ ntɛ. Sɩ yi toroda bɩɛlɩda na dã dɩ fa kʋrɔ tibilǝ'. 31 Na n tee birse thɩ̃ɛ tɩɩ kʋdaaraakɛ teananɩ khirǝ'. Wɩ kʋɔ. 32 Na n teeraa birse thɩ̃ɛ sɩ a ca a jal dɩɩraakɛ a wɔnɩ, agɩpɩ a kɛr a bir ɔɔ dʋɔ dabɔɔkɛ gbõdaar na khinǝ'. 33 Na n kpɔ̃kpɔrɔ̃ dɩɩkɛ nɩ toorona', gɩdonɩ tibil tɔmɩn n kpɔ̃kpɔrɔnɛ dɩɩ. Dɩ wa puno kpɩɩrakɛ a na phʋɔl dɩɩkɛ tɔmɩn deeronɩ saagado ʋrɛra kɔnɩ tibil ɔɔ tɔmɩn wɩ deera' ga. 34 Na n kpɔ̃kpɔrɔ̃ dɩɩkɛ nɩ tooronɩ, ka mɛrɛɛ thɛthɛ n cɔna', gɩdonɩ mɛr Thãgba Kɔ̃tɩn n cɔr Ɩjɩrayɛl bɩsanaa thɩ̃thɩɩn.