Kanãa dɩɩ khɩɛr pasɔ
34
1 Thãgba Kɔ̃tɩn sor Mʋɩjɩra ayɩ: 2 Kpãkpaanɛ Ɩjɩrayɛl bɩsanana ayɛ wɔɔ: Ɔbɔɔkɛ na lonɩ Kanãa dɩɩra, kɛ dɔnɩ dɩɩkɛra na dɔnɩ anɩda, kɛ dɔnɩ Kanãa dɩɩ, nɩ yɛkɛ ɔɔ pɛlsɔ: 3 Ka wire na n jalnɩ dɩ pɛ ɲɔ̃bɩlã, awɩ dɩ na khɩɛrɛ Sɩn bǝ̃ kparaa a khɩɛrna Edɔ̃ dɩɩ. Ka wire na n jalnɩ dɩ pɛ ɲɔ̃bɩlanaale anɩ pɛl na jaal thale gɩ gbũ laɲɔ khireea khu pa, wi phã paar. 4 Anɩ pɛl na kɛrɛ na jal Akɩrabɩm jʋʋn paar, ka wire na n jalnɩ dɩ pɛ ɲɔ̃bɩlã gɩ kana Sɩn bəən gɩ jal Kadɛsɩ-Barnea wi phã paar ɲɔ̃bɩlana agɩpɩ gɩ kana Hasaar-Adaar na Asɩmɔ̃. 5 Anɩ pɛl na ther Asɩmɔ̃ gɩ jal gɩ thʋ Ejipiti kɔlɔ̃ sɩ gɩ gbũ gɩ khu Medɩterane laɲʋɔnnab. 6 Wi lõ paar Medɩterane laɲʋɔn na dɔ anɩ pɛl. 7 Ka wire na n jalnɩ dɩ pɛ ɲɔ̃bɔɔ, nɩ te anɩ pɛl Medɩterane laɲʋɔnna a jalana danana Hɔɔr gɔ̃gʋɔna. 8 Nɩ fɔ Hɔɔr gɔ̃gʋɔnna a te anɩ pɛl a kana Lebo-Hamatɩ a danana Sedadɩ. 9 Anɩ pɛl na ther liir gɩ jal Jɩfʋrɔ̃ gɩ jal gɩ khu Hasaar-Enã. Thale na dɔ anɩ pɛl ka wire na n jalnɩ dɩ pɛ ɲɔ̃bɔɔ. 10 Wi phã paar nɩ te pɛl gɩ fʋ Hasaar-Enã gɩ jal gɩ dã Sefam. 11 Anɩ pɛl na ther liir gɩ jal Rɩbɩla, Ayɩn wi phã paar; agɩpɩ gɩ gbũ gɩ thʋ Kɩnerɛtɩ laɲɔ gẽgerẽ nʋɔra, wi phã paar, 12 gɩ gbũ gɩ thʋ Jʋrdɛ̃ sɩ gɩ jal gɩ khu laɲɔ̃ khirera. Thale na dɔ anɩ dɩɩ khɩɛr pasɔ.»13 Dɩ Mʋɩjɩ kpãkpaanɛ Ɩjɩrayɛl bɩsanana ayɩ : «Ɔr dɔ dɩɩkɛra Thãgba Kɔ̃tɩn yɩnɩ sɩ lɛ lɩɩ sa tɩnɛnɛ caar yʋɔr phe bireele na dakuru. 14 Ribɛ̃ɛ ca wer na Gadɩɩ ca na Manasee ca kur, wɩ kɔɔ 'lɛr awɩ thɩsɔ mɔna awɩ thɩ kɔ̃sɔ hanɩ. 15 Caar yeɲɔɔle na dakuru, wɩ kɔɔ 'lɛr awɩ thɩsɔ, kɛ Jʋrdɛ̃ wi phã paar, Jeriko ƴɛbʋrɔ.»
Kɔ̃tɩnaakɛ bulonɩ dɩ tɩnɛnɛna awɩ isɔ
16 Thãgba Kɔ̃tɩn sor Mʋɩjɩra ayɩ: 17 «Nɩ yɛ tɩbɩlaakɛ na tɩnɛnɛnɩ dɩɩra awɩ isɔ: Eleajaar bonɩ jidaar gɩ na Nunii bikuun Jojue. 18 Nɩ te kɔ̃tɩna bɩɛlbɩɛl caar fɛw bɩɛlbɩɛlla a ɓana war wɩ tɩnɛ dɩɩra. 19 Yɛkɛ konasɔɔraa isɔ: Judaa cara, Yefuunee bikuun Kalɛbɩ gɩ. 20 Sɩmeyɔ̃ɔ cara, Amihudii bikuun Samʋɛl gɩ.
21 Bɛ̃jamɛ̃ɛ cara Kɩsɩlɔ̃ɔ bikuun Elɩdadɩ gɩ.
22 Dãa cara, Yogɩlɩɩ bikuun Buki gɩ, kɛ dɔnɩ kɔ̃tɩn.
23 Jojɛfɩɩ mǝlsɔɔra: Manase cara Efodɩ bikuun Hananɩɛl gɩ.
24 Efɩrayɩmɩ cara Sɩfɩtãa bikuun Kemʋɛl gɩ.
25 Jabʋlɔ̃ɔ cara, Parnakɩɩ bikuun Elɩsafã gɩ, kɛ dɔnɩ kɔ̃tɩn.
26 Ɩsakaarɩ cara, Ajãa bikuun Paltɩɛl gɩ, kɛ dɔnɩ kɔ̃tɩn.
27 Ajɛɛrɩ cara, Selomɩɩ bikuun Ahihudɩ gɩ, kɛ dɔnɩ kɔ̃tɩn.
28 Nɛfɩtalɩɩ cara, Amihudi bikuun Pedahɛl gɩ, kɛ dɔnɩ kɔ̃tɩn.
29 Wɛr dɔ wɩrɛ Thãgba Kɔ̃tɩn phiirni wɩ tɩnɛnɛ Kanãa dɩɩ a hana Ɩjɩrayɛl bɩsana.