Thãgba Kɔ̃tɩn phaanɛ ɔɔ too
2
1 Thãgba Kɔ̃tɩnɩ thɔ̃thɔ̃ thu bɩɛl ther Gilgal a jal Bokim a so Ɩjɩrayɛl bɩsanana ayɩ: Mɩ kɔɔ ti ner Ejipiti dɩɩra a thena, a ɩna nɩ dɩɩraakɛ mɩ kɔɔ ʋlfɛnanɩ anɩ thɩ kɔ̃tɩ̃sɔ. Dɩ mɩ kɔɔ sor ayɩ: Ma phɩlã ɩ̃ nɔ bɩɛl ʋlfɛ na nɛrɛ yuurəka'. 2 Dɩ nɛrɛ dakha, na n ʋlfɛ kha nɔ bɩɛl ʋlfɛrɛ na dɩdaraakɛ yuurəka', sɩ nɩ wɩɛrɛ awɩ bonɩ ji pasɔ. Sɩ na kɔɔ nɩ mɩ nũǝ'. Aɲe nɩ cʋʋrɔ thale? 3 Dɩ gɛr dɔ kɩrʋ dɩ̃ so mer ayɩ: Ma weele wɩ anɩ ƴɛbʋrɔ 'lo bã. Sɩ anɩ kɩrɔ wa too, awɩ thãgbasɔ n do nar pheru. 4 Ɔbɔɔkɛ Thãgba Kɔ̃tɩnɩ thɔ̃thɔ̃ thuule mɩɩnɩ Ɩjɩrayɛl bɩsana thɩmɩale fɛw a pɩ, wɩ har nʋɔ dɩ wa n khɩɩlɛ fɛw. 5 Gɛr gɩ dɩ wɩ dʋ paarɩle ire Bokim, kɩrʋ dʋɔn benɩɛ. Dɩ wɩ jire le bonɩɛsɔ Thãgba Kɔ̃tɩnna.Gɩrɛ kanɩ mɔ̃ Jojue khini pɩ
6 Jojue kɔɔ bɩlanɛ Ɩjɩrayɛl bɩsana. Dɩ wɩ jaal wɛr fɛw bɩɛlbɩɛl a gba dɩɩ, ntɛ ɔɔ bəəkɛ wɩ ha anɩ. 7 Dɩ Ɩjɩrayɛl bɩsana kɔɔ dor thɔma Thãgba Kɔ̃tɩnna bɔɔ fɛʋʋkɛ Jojue hanɩle na yire, na bɔɔ fɛʋʋkɛ kɔ̃tɩnaakɛ sɛnɩ, bɔɔkɛ Jojue khini pɩ, kɛ dɔnɩ wɩrɛ kɔɔ yɛnɩ thɔ̃ kɔ̃tɩnaakɛ Thãgba Kɔ̃tɩn kɔɔ cʋʋnɩ Ɩjɩrayɛl bɩsanana. 8 Nunii bikuun Jojue, kɛ dɔnɩ Thãgba Kɔ̃tɩnɩ thɔ̃daar cʋʋrɛ yɛna tamaa na yʋɔr (110) sa khi. 9 Dɩ wɩ dʋʋrɛ le Tɩmɩna-Hɛrɛsɩ dɩɩra, kɛ hanɩ bǝǝnnǝǝkɛ wɩ haanɩ le Efɩrayɩmɩ mǝlsɔɔ gɔ̃gɔ̃ dʋɔ, Gasɩ gɔ̃gʋɔna, ka wire na n jalnɩ dɩ pɛ ɲɔ̃bɔɔ. 10 Dɩ bɔ bɩɛl tɩbɩlaale khiire fɛw awɩ alãkha bara dakha a kpaan kɔ̃tɩnana. Agɩpɩ mǝl kpɩɩ kpaanɛ, kɛ na kɔɔ jɩɛnɩ Thãgba Kɔ̃tɩn, dɩ gɩrɛɛkɛ a kɔɔ cʋʋnɩ Ɩjɩrayɛl bɩsanana ga.
Ɩjɩrayɛl bɩsanaa Thãgba bo
11 Ɩjɩrayɛl bɩsana cʋʋrɛ gɩrɛ na n danɩ Thãgba Kɔ̃tɩnna ga, dɩ wa n fʋɔr thãgbasɔɔkɛ wɩ n wenɩ Baal. 12 Wɩ bor Thãgba Kɔ̃tɩn, awɩ thɩsɔ Thãgba, kɛ kɔɔ te wɩnɩ Ejipiti dɩɩra a thena sa ma thãgba kpɩɩsɔɔkɛ dɔnɩ caarsɔkɛ diǝ warnɩɩ thãgbasɔ, dɩ wa n gburõkhu wɛra. Mɛ̃ wɩ cʋʋ nĩkhii dɩɩ fʋ Thãgba Kɔ̃tɩn. 13 Wɩ bor Thãgba Kɔ̃tɩn sɩ dɩ wa n fʋɔr thãgbasɔɔkɛ wɩ n wenɩ Baal*, na Asɩtartesɔ*.
14 Dɩ nĩkhii fʋrɛ Thãgba Kɔ̃tɩn Ɩjɩrayɛl bɩsanana ka, dɩ bo wɩ faa tɩɩ phʋ̃ʋdaraa ɲɔ̃kɔɔ dɩ wɩ phʋʋn wɩ fɛw. A bo wer faa awɩ lãlaardarasɔraakɛ diǝ warnɩɩ ɲɔ̃kɔɔ dɩ wa hana punone a na pɩɛrna awɩ lãlaardara ga. 15 Bɔɔ fɛw a wɩ jal kʋʋrra, dɩ Thãgba Kɔ̃tɩn n hɛl war ɲɛ̃ɛ, dɩ awɩ sodara n puno wɩ, mɔ̃kɛra ɔr Thãgba Kɔ̃tɩn kɔɔ mɩɩ wɩnɩ a kpãkpaanɔ na ʋlfɛrɛ. Dɩ mɛ̃ wɩ ha ha hel kɔ̃tɩɩna dɩɩ ka. 16 Dɩ Thãgba Kɔ̃tɩn tire kuun khanaaa pɛ war dɩ wɩ taa wɩ wɩrɛ n phʋnɛ wɩnɩɩ ɲɔ̃kɔɔ. 17 Sɩrakɛ Ɩjɩrayɛl bɩsana na pɛ awɩ kuun khasɔ dakha nũǝ', gɩdonɩ wɩ n gburõkhure gɩ̃ɩ thãgbasɔra; dɩ wa n ƴɔ̃ƴɔɔnɔ awɩbara. Awɩ thɩ kɔ̃tɩ̃sɔ kɔɔ nɩrɛ nũu Thãgba Kɔ̃tɩnɩ jɔfʋsɔra bɔɔbɔɔ. Sɩ wɛr wɩ kɛrɛ dapaara sa faa jɔfʋsɔɔkɛ awɩ thɩ kɔ̃tɩ̃sɔ kɔɔ kparɔnɩ. Wa 'loro awɩ nɛka ga. 18 Bɔɔ fɛw, a Thãgba Kɔ̃tɩn ti kuun khaa a pɛr, Thãgba Kɔ̃tɩnɩ thɛthɛra n haan kha na ɔr. Dɩ a n taarɛ Ɩjɩrayɛl bɩsana awɩ lãlaardaraa ɲɔ̃kɔɔ bɔɔ fɛʋʋkɛ kuun khaale hanɩle na yire; gɩdonɩ bɔɔkɛ Ɩjɩrayɛl bɩsanana n senɩ awɩ hɔ̃hʋɔldara, na kpõkpoodaraa ɲɔ̃kɔɔ bʋɔ n fʋrɛ Thãgba Kɔ̃tɩn. 19 Sɩ a kuun khaale khi na pɩ dɩ wɩ bir gɔ lõ puurera wo. Dɩ wɩ cʋʋrakɛ gɩrɛ puuroni a jɔ awɩ thɩ kɔ̃tɩ̃sɔɔda. Wɩ n mar thãgba kpɩɩsɔ dɩ wa n fʋɔr, dɩ wa n gburõkhu war. Wa n faarakɛ awɩ cʋʋ pa puu bɩɛlla', mɛna wɩ n jalna laʋna.
20 Dɩ nĩkhii fʋrɛ Thãgba Kɔ̃tɩn Ɩjɩrayɛl bɩsanana dɩ so ayɩ: Gɩdonɩ caarɩkɛ kʋɛrɛ ɩ̃ nɔ bɩɛl ʋlfɛɛkɛ mɩ kɔɔ ʋlfɛnanɩ awɩ thɩ kɔ̃tɩ̃sɔ, gɩdonɩ wa nɩ nũu ɩ̃ thɩmɩɩra ga, 21 mɛrɛ dakha, caarsɔɔkɛ sɛnɩ sɩ dɩ Jojue khi, ma wee bɩɛllakɛ awɩ ƴɛbʋrɔa'. 22 Wɛrra ma gba a na jʋʋrna Ɩjɩrayɛl bɩsana a na hɩɩn. Dɩ ma jɩrɛ ado wɩ n kpaanɛ mɛr Thãgba Kɔ̃tɩnɩ hʋra mɔ̃ awɩ thɩsɔ kɔɔ cʋʋnɩ, agɩbo ado wa n kpaanɔa'. 23 Thale gɩ dã dɩ Thãgba Kɔ̃tɩn sɩrɔ le dɩɩra caarsɔɔkɛ aa kɔɔ tonɩ Jojuee ɲɔ̃kɔa' dɩ wɩ too; aa phana a weele wa'.