SOGƲƲRDARA 3

Caarsɔɔkɛ Thãgba Kɔ̃tɩn sɩrɔnɩ Kanãa dɩɩra

1 Yɛkɛ caarsɔɔkɛra Thãgba Kɔ̃tɩn sɩrɔnɩ le dɩɩra a na n jʋʋrna Ɩjɩrayɛl bɩsanaakɛ dʋɔnɩ wɩrɛ fɛʋʋkɛ na kɔɔ kɩɛnɩ Kanãa kʋʋr a yɩ ga. 2 Ɔɔ ƴaal dʋɔn a dɩɩrna ko kɩɩr Ɩjɩrayɛl bɩsanaa mǝl phaakɛ na kpaanɛnɩ, kɛ na kɔɔ jɩɛnɩ kʋʋr mamara ga. 3 Wɛr dʋɔn Fɩlɩsɩtɛ̃sɔ jamana kɔ̃tɩ̃sɔ yemɔy na Kanãadara fɛw, na Sɩdɔ̃dara, na Hevɩ̃ɛsɔkɛ tɔɔnɩ Lɩbã gɔ̃gʋɔna a fʋna Baal-Hɛrmɔ̃, a jalna dana Lebo-Hamatɩ dɩ khʋra.

4 A sɩrɔrɛ caarsɔɔle a jʋʋrna Ɩjɩrayɛl bɩsana a na n hɩɩn ado wa nɩrɛ nũu ɔr Thãgba Kɔ̃tɩnɩ jɔfʋsɔraakɛ a kɔɔ 'laanɩ Mʋɩjɩra dɩ ha awɩ thɩ kɔ̃tɩ̃sɔ. 5 Mɛ̃ gɩ dã Ɩjɩrayɛl bɩsana toonɩ Kanãadara, na Hɛtɩɩ mǝlsɔ, na Amɔɔr məlsɔ, na Perejɩdara, na Hɩvɩtɩsɔ, na Jebusɩdaraa thɩ̃thɩɩn. 6 Dɩ Ɩjɩrayɛl bɩsana n her caarsɔɔlee bikhɛrsɔ, dɩ wɩ 'laa awɩ bikhɛrsɔ dakha awɩ bikũusɔra, dɩ wa n fʋɔrna dakha awɩ thãgbasɔ.

Ɩjɩrayɛl bɩsanaa kũu khasɔ

Caca kuun khaa: Otɩnɩɛl

7 Ɩjɩrayɛl bɩsana cʋʋrɛ gɩrɛ puuronɩ ka Thãgba Kɔ̃tɩnɩ ƴɛra. Wɩ diinǝne Thãgba Kɔ̃tɩn awɩ Thãgba, sɩ dɩ wa n fʋɔr Baal, na Asera thãgbasɔ. 8 Dɩ nĩkhii fʋrɛ Thãgba Kɔ̃tɩn Ɩjɩrayɛl bɩsanana dɩ bo wɩ faa Kusã-Rɩsatayɩmɩ ɲɔ̃kɔɔ, kɛ dɔnɩ Mejopotamɩ jamana. Dɩ Ɩjɩrayɛl bɩsana dʋʋraarɛ pɔtɔrɔ thɔma a cʋʋna yɛna makõther. 9 Dɩ Ɩjɩrayɛl bɩsana hulene a wena Thãgba Kɔ̃tɩn. Dɩ Thãgba Kɔ̃tɩn tire tataa a pɛ war dɩ taa wɩ; Otɩnɩɛl gɩ, kɛ dɔnɩ Kenaajɩɩkɛ dʋɔnɩ Kalɛbɩɩ õkuun diine bikuun. 10 Dɩ Thãgba Kɔ̃tɩnɩ Thu har Otɩnɩɛlla, dɩ do Ɩjɩrayɛl bɩsanaa kũu kha. Dɩ a jaal kʋʋrra. Dɩ Thãgba Kɔ̃tɩn gbaar Kusã-Rɩsatayɩm, kɛ dɔnɩ Mejopotamɩ jamana a dʋʋ ɲɔ̃kɔɔ dɩ punoo. 11 Dɩ dɩɩ ier dɩphã a dana yɛna kpalaɲɔ (40). Agɩpɩ Otɩnɩɛl, kɛ dɔnɩ Kenaajɩɩ bikuun khiri.

Balaɲɔ kuun khaa: Ehudi

12 Ɩjɩrayɛl bɩsana bire wa n cʋʋ wo gɩrɛ puuronɩ ka Thãgba Kɔ̃tɩnɩ ƴɛra. Dɩ Thãgba Kɔ̃tɩn cʋʋ Egɩlɔ̃ɔkɛ dʋɔnɩ Moabɩ jamana dɩ 'lɛ fãga. Dɩ a tʋɔrɛ a pɛr Ɩjɩrayɛl bɩsanana, gɩdonɩ wɩ n cʋʋrɛ gɩrɛ puuronɩ ka Thãgba Kɔ̃tɩnɩ ƴɛra. 13 Dɩ Egɩlɔ̃ ɓã kha na Amɔ̃ɔ mǝlsɔ, na Amalɛkɩɩ mǝlsɔ a jal kena Ɩjɩrayɛl bɩsana, a puno wɩ a tee kalã dɩɩ kɛ dɔnɩ Jeriko. 14 Dɩ Ɩjɩrayɛl bɩsana dor pɔtɔrɔ thɔma Egɩlɔna, kɛ dɔnɩ Moabɩ jamana, a cʋʋna yɛna yʋɔr makõther.

15 Dɩ Ɩjɩrayɛl bɩsana hulene a wena Thãgba Kɔ̃tɩn. Dɩ Thãgba Kɔ̃tɩn tire tataa a pɛ war; Ehudi gɩ, kɛ dɔnɩ Geraa bikuun, kɛ thɛnɩ Bɛ̃jamɛ̃ɛ mǝllǝ, kɛ dɔnɩ ɲɔ̃bɩlã. Dɩ Ɩjɩrayɛl bɩsana thɔnanɛ Ehudi khaardaa a hana Egɩlɔ̃, kɛ dɔnɩ Moabɩ jamana.

16 Dɩ Ehudi ber bajɩnaakɛ n khɛnɩ billǝ yeɲɔ, sa gbaan a mãkhana ɲɔ̃kpalãbuu, a dana thɩ̃thɩ̃ ɲɔ̃bi yʋʋ gbã a saa ɔɔ kẽkẽ ballɔ ɲɔ̃bɔ kpɩ̃kpaanna. 17 Dɩ Ehudi jalnanɛ khaardaara a ha Egɩlɔ̃, kɛ dɔnɩ Moabɩ jamana. Sɩ Egɩlɔ̃ dor tibilikɛ curoroni ka. 18 Ɔbɔɔkɛ a 'laanɩ khaardaa pɩ, a thenanɛ tɩbɩlaakɛ kɔɔ gbaanɩ khaardaara dɩ wɩ jal, a faa dɩ wɩ kɛr. 19 Mɔ̃ Ehudi danɩ boka thɩlaakɛ hanɩ le Gɩlgal bǝ̃ khʋra a kɛrɛ bir a so jamanana ayɩ: Mɩ hananɛ yeɲɔ thɩmɩɩ dɩkha a ƴaal ɩ̃ so far yaa jamana. Dɩ jamana 'laa hʋɛ ɩnɩɩ too n thɩrɛ dɩ wɩ thɩɩr fɛw. 20 Le Ehudi tɔ a pʋɔraa, mɔ̃ a toonɩ ɔɔ too para, du ɩɩraakɛ ɔr dɩbara hɩnɩ le nãsʋrɔ ƴũu, a sʋɔraa: Thɩmɩɩrɩkɛ mɩ hananɩ a na mɩɩ fɩ yaa jamana, Thãgbara gɩ the. Dɩ jamana ɩɩr ɔɔ too para a jɩɩl. 21 Dɩ Ehudi 'laa ɲɔ̃bɩlã a hal ɔɔ bajɩnaakɛ a saanɩ ɲɔ̃bɔ kpɩ̃kpaana a kpaa bɩnɛna. 22 Dɩ khal bire lõ na sar fɛw a kpãasɛ khiro, dɩ niin thi khal birera, gɩdonɩ Ehudi na phe khalʋ bã.

23 Agɩpɩ dɩ Ehudi khaan nãsʋ du loo a kpala pɩɛra sa thena jɛ̃bɛrɛ̃ bilo. 24 Ɔbɔɔkɛ Ehudi thenɩ pɩ, jamanaa thɔ̃dara pɔr a yɩ ƴũu du loo dɩɩ kpala. Dɩ wɩ kpɩɛr aa, cuu a ha le bɩnɔ du ɩɩra. 25 Dɩ wɩ pɩɛrɛ waa, jamana na n khɛr loa'. Dɩ le wɛr thɛthɛ gba kile a khɛr loo dɩɩ do awɩ kɔ̃tɩ̃ hale a ji thɩɩra a khi. 26 Dɩ mɔ̃ wɩ n gbanɩ bɔɔ, dɩɩ do Ehudi 'lire fuure a kpãasɛ boka thɩla sa lõ Seɩra bǝǝnnǝ. 27 Mɔ̃ a danɩ paarɩle, a ʋnɛ tutuu Efɩrayɩmɩ mǝlsɔɔ gɔ̃gɔ̃ bǝ̃ dɩɩsɔɔra dɩ Ɩjɩrayɛl bɩsana gbune kha na ɔr gɔ̃gʋɔna dɩ gbana wɩ ƴɩɛ. 28 Dɩ a so warɛ ayɩ: Na n kpa mar; gɩdonɩ Thãgba Kɔ̃tɩn gbaar Moabɩdara, anɩ lãlaardara a dʋ nɩ ɲɔ̃kɔɔ. Dɩ wɩ gbune a kpaaraa. Dɩ wɩ varrɛ Jʋrdɛ̃ mɩɩr thɛlɛ̃ paar Moabɩ khʋra. Wa faa tɩɩ bɩɛllakɛ dɩ seera'. 29 Dɩ ga wiile wɩ kʋʋrrɛ Moabɩ kuun khenaakɛ dɔnɩ kuun khana gbɩlanɩ yʋɔrsɔ (10.000) bɩɛllakɛ na fuuǝ'. 30 Dɩ a fʋna ga wiile Moabɩdara wurre Ɩjɩrayɛl bɩsanana. Dɩ dɩɩ ier dɩphã a dana yɛna kpalanã (80).

Balãther kuun khaa: Samɩgaar

31 Mɔ̃ Ehudi karɔnɩ pɩ, Samɩgaar, Anatɩɩ bikuun hale dakha. A kʋʋrrɛ Fɩlɩsɩtɛ̃sɔ, kona taamaadõ na na weedaa^a, dɩɩ do ɔr dakha taarɛ Ɩjɩrayɛl bɩsana.