Balanã tataa : Debora
4
1 Mɔ̃ Ehudi khini pɩ Ɩjɩrayɛl bɩsana bire wa n cʋʋ wo gɩrɛ na n danɩ Thãgba Kɔ̃tɩnna ga. 2 Dɩ Thãgba Kɔ̃tɩn bo wɩ a faa Yabɛ̃ɛ ɲɔ̃kɔɔ, Kanãadaraa jamana bɩɛl gɩ a hale Hasɔɔr dɩɩra. Ɔɔ sɔrasɩ kɔ̃tɩ̃ɩ i n dʋɔn Sɩsɩra. Harɔsɛtɩ-Goyɩm dɩɩra a ha. 3 Yabɛ̃ kɔɔ hananɛ ther koke hotoro gbɩlanɩ phe tamaa (900). Dɩ a hʋɔlɛ Ɩjɩrayɛl bɩsanana gbõgolonena a cʋʋna yɛna kpelẽ. Dɩ Ɩjɩrayɛl bɩsana hulene a wena Thãgba Kɔ̃tɩn.4 Ga bɔɔle Debora, Lapɩdɔtɩɩ khɛr, kɛ dɔnɩ Thãgbaa mɩmɩɩ kɔɔ dʋɔn so gʋʋrdaar Ɩjɩrayɛl bɩsanana. 5 Kalã thɩrʋʋkɛ hanɩ Rama, na Betɛl dɩɩ thɩ̃thɩɩn, Efɩrayɩmɩ mǝlsɔɔ bǝnnǝ, kɛ dɔnɩ gɔ̃gɔ̃ dɩɩsɔ, le Debora n too. Gɛr gɩ dɩ wa n wɩɩ Deboraa Kalã thɩr. Dɩ Ɩjɩrayɛl bɩsana n jaal ɔɔ pa da n gʋʋr wɩ sɔ. 6 Wi bɩɛl Debora thʋ̃ɔ a we Barakɩ, Abɩnoamɩ bikuun; kɛ thɛnɩ Kedɛsɩ, Nɛfɩtalɩɩ mǝlsɔɔ dʋɔ a sʋʋraa: «Thãgba Kɔ̃tɩn, Ɩjɩrayɛlɩ Thãgba sɔ thakɛ aa: Fɩ jala a te kona gbɩlanɩ yʋɔr (10.000) Nɛfɩtalɩ, na Jabɩlɔ̃ɔ mǝlsɔra, a kpa wɩ jalana Tabɔɔr gɔ̃gʋɔna. 7 Ɩna hallɛ Sɩsɩra, kɛ dɔnɩ Yabɛ̃ɛ sɔrasɩsɔɔ kɔ̃tɩ̃ a pɔ far, na ɔɔ koke hotorosɔ, na ɔɔ sɔrasɩsɔ le Kɩsɔ̃ kɔlɔ̃ nʋɔra ɩnɩ n gbaa, ɩnɩ n to fɩ ɲɔ̃kɔɔ. 8 Dɩ Barakɩ sʋʋraa: Ado fa jaal na mɛrɛ, ma jaal; sɩ ado fa n jal kha na mɛrɛa', ma jal la'. 9 Dɩ Debora sʋʋraa: Ma jaal kha wer na fɛrɛ, sɩ jɛna fa 'lɛrɔ ire kǝǝreraaka', gɩdonɩ khɛr bulonee ɲɔ̃kɔɔ Thãgba Kɔ̃tɩn na gba Sɩsɩra a na to. Dɩ Debora ɩɩrɛ dɩ wɩ jal kha na Barakɩ Kedɛsɩ dɩɩra. 10 Dɩ Barakɩ wer Jabɩlɔ̃, na Nɛfɩtalɩɩ mǝlsɔ a jɛ Kedɛsɩ dɩɩra. Dɩ kona gbɩlanɩ yʋɔr (10.000) kɔɔ kpaaraarɛ. Dɩ Deboraa thɛthɛra jaal kha dakha na ɔr.
11 Sɩ ga bɔɔlera Ebɛɛrɩkɛ dʋɔnɩ Kenɩɩ mǝl faarɛ wɩ̃ɩ Kenɩɩ mǝlsɔɔkɛ dɔnɩ ɔɔ casɔ, kɛ dɔnɩ Obabɩɩkɛ dʋɔnɩ Mʋɩjɩɩ khɛrrɩ õkuunɩ mǝlsɔ, sa lee kpɩɩ a jal dʋ ɔɔ kẽkẽ wa sɛn thɩr kɩrɔ kɛ khonǝnɩ Saananɩm bǝǝnnǝ, Kedɛsɩ dɩ khʋra.
12 Dɩ wɩ sor Sɩsɩrara aa Barakɩ, Abɩnoamɩɩ bikuun hale a jʋʋn Tabɔɔr gɔ̃gʋɔna. 13 Dɩ Sɩsɩra khɩɩ ɔɔ ther koke hotoro gbɩlanɩ phe tamaara (900), a kpana ɔɔ too, a jɛ le Harɔsɛtɩ-Goyɩm dɩɩra ɔɔ pa, a khuo wɩ fɛw a jalna Kɩsɔ̃ kɔlɔ̃ nʋɔra na ɔr. 14 Dɩ Debora so Barakɩra ayɩ: Ɩrɛ, gɩdonɩ nĩ dɔ wireekɛ Thãgba Kɔ̃tɩn na gbanɩ Sɩsɩra a na dʋ fɩ ɲɔ̃kɔɔ. Thãgba Kɔ̃tɩnɩ thɛthɛ hale a gbana fɩ ƴɩɛ. Dɩ Barakɩ ɩɩrɛ na kona gbɩlanɩ yʋɔrɩkɛra n kpaaraanɩ Tabɔɔr gɔ̃gʋɔna a gbũ. 15 Dɩ Thãgba Kɔ̃tɩn tinǝnǝ Sɩsɩra na ɔɔ koke hotorosɔ fɛw, na ɔɔ too fɛw na bajɩna a pɛ ƴɔɔ Barakɩɩ ƴɛ kʋʋlɔ. Dɩ Sɩsɩra faa ɔɔ koke hotoro sa gbũ a cana nɛɛ. 16 Dɩ Barakɩ weele koke hotorosɔ, na sɔrasɩ lãlarara a kpaana foo a dana Harɔsɛtɩ-Goyɩm dɩɩra. Dɩ a kʋʋrɛ Sɩsɩraa sɔrasɩsɔ ɓibi na bajɩna, bɩɛl 'lẽ'lenakɛ na sa'.
17 Sɩ Sɩsɩra ca na nɛɛ a jal a lõ Yayɛlɩ kẽkẽ waw. Ebɛɛrɩkɛ dɔnɩ Kenɩɩ mǝl ɔɔ khɛr gɩ, gɩdonɩ 'likha kɔɔ hale Yabɛ̃ɛkɛ dɔnɩ Hasɔɔr jamana, na Ebɛɛrɩkɛ dɔnɩ Kenɩɩ mǝli too thɩ̃thɩɩn. 18 Dɩ Yayɛl ther a caan Sɩsɩra a sʋʋraa: Lona kɛ yaa ɩ̃ kɔ̃tɩ̃; lona kɛ ɩ̃ pa. Fa n do maar n fʋ fa'. Dɩ Sɩsɩra lʋʋn le ɔɔ kẽkẽ waw, dɩ gba kẽkẽ nɩɩ a thiirǝǝ. 19 Dɩ Sɩsɩra sʋʋraa: Mɩ n bɩɛl fɛr; ha mɩ ɲʋɔn gbe ɩ̃ ɲɔ; ɲɔkhaa fʋ mɛr. Dɩ Yayɛl khɛr ɲɔ pɛ lokaar, a ƴemɩ na ƴɩlɛ̃ a haa dɩ ɲɔ; sɩ dɩ bir thiirǝǝ. 20 Agɩpɩ dɩ Sɩsɩra bir sʋʋraa ayɩ: Jɩlɛ le kẽkẽ wa lõfonʋɔra. A tibil ɩ̃ a bule fɩ aa: Tibil lʋʋn kɛ ya? Sɔ: Ɔ̃'ɔ̃. 21 Agɩpɩ dɩ daar wɩb, gɩdonɩ a vɔɔrɛ jɔɔ ka. Dɩ Ebɛɛr khɛr Yayɛl gbaar kẽkẽ wa kpãbire, na marto a pɔna hɛlɛlɛlɛ a kpaa ɔtaabirera, foo dɩ kpãbire jal gɔ thɩɩ. Dɩ Sɩsɩra khi.
22 Dɩ mɔ̃ Barakɩ weenɩ Sɩsɩra da n kpaan, Yayɛl caanʋʋnɛ a sʋʋraa: 'Ɩna kɛ ɩ̃ nɩ far ʋrɛra fɩ n ƴaalnɩ. Dɩ Barakɩ lʋʋn le Yayɛlɩ pa a yɩ Sɩsɩra phɩnanɩ thɩɩra a khi na kpãbirera. 23 Ga wiile Thãgba wure Yabɛ̃, Kanãadaraa jamana Ɩjɩrayɛl bɩsanana. 24 Dɩ Ɩjɩrayɛl bɩsana jɩɛ pɛr ɲɛ̃ kheu Yabɛna, kɛ dɔnɩ Kanãadaraa jamana, phaphapha a ba punoo a hɛllʋ dɩphã.