Ruti caananɛ Nɔɔmɩɩ koo tibil \ref Lev 19.9-10; 1 Tɩm 5.4; Jb 29.11,16
2
1 Kuun bɩɛl kɔɔ hale ado Nɔɔmɩ koo tibil. Kuunna dor tibil kpɛ, a ler ka, Elɩmɛlɛkɩɩ cara gɩ, dɩ wa n wɩɩ Boajɩ.2 Dɩ Moabɩ Ruti so Nɔɔmɩna ayɩ: «ha mɩ hʋɛ ɩ̃ jal lɔɔsɔ ma n kpɛ ɔɔjɩ, ntɛɛ paakɛ wa jɩ mɩnɩ bʋɔra». Dɩ Nɔɔmɩ tu: «Jala ya ɩ̃ bikhɛr».
3 Dɩ a jaal lɛ bɩɛla a kpɛ ɔɔjɩ da n kpaanna ɔɔjɩ khaa khiro. Jaa lɩɛra Elɩmɛlɛkɩɩ tibiliikɛ wɩ n weni Boajɩɩ lɛ gɩ. 4 Dɩ mɔ̃ ga toonɩ gbe, Boajɩ ther Bɛtɩlɛhɛm a pɔ dã, a fʋɔr ɔɔjɩ kha ayɩ: «Thãgba Kɔ̃tɩn n hana kha na nɛrɛ. Dɩ wɩ tu: «Thãgba Kɔ̃tɩn n bɔna fɩ.» 5 Dɩ Boajɩ bule ɔɔ thɔ̃daar ʋrɛ n hɩnɛnɩ ɔɔjɩ kha ayɩ: «amɛ hɩna khɛrɩkɛ?» 6 Dɩ thɔ̃ donaa hɩ̃ɩdaarɩle birsee: «Moabɩ khɛr gɩ, kɛ thɛnɩ Moabɩ dɩɩra a ɩ̃ na Nɔɔmɩ. 7 A sor, wɩ hanɩ hʋɛ ɩnɩ n kpɛ ɩna n uulnǝ ɔɔjɩ caasɔɔkɛ n jɛnɩ ɔɔjɩ khaa khiro. Dɩ a fʋna duuro a ɩnɩ, thɔmanana a jɩɩl waa a dana nɛnɛ̃ɛkɛ, gbe dɩbara a hɩɩr gbakara.»
8 Dɩ Boajɩ so Rutira: «Ɩ̃ bikhɛr, pɛ nũu. Fa n jal na kpɛ ɔɔjɩ lɛ kpɩɩra ga. Fa n hʋnɔna kɩɛra', sɩ tɔɔ na ɩ̃ thɔ̃daar khɛrsɔ. 9 Hɩnɛ ka wɩ n khanɩ wa n jalna, sɩ na kpaan thɔ̃do khɛraa khiro. Mɩ pɩɛrɛ ɩ̃ thɔ̃daar kũusɔ wa n tha fara'. A yɔlkhaa fʋ fɩ, jala ɲɔ gɩrɛɛkɛ thɔ̃daar kona cɛnɩ pɛ bʋlasɔɔra.» 10 Dɩ Ruti sʋr (a gʋɛ ƴɩɛ) sa sʋʋraa ayɩ: «Mɔ̃ mɩ fʋ sa 'lɛ bɔ jɩɩr afɩ ƴɛra, dɩ fa n we mɩ tibil, mɛrkɛ dɔnɩ kpakpal?» 11 Dɩ Boajɩ sʋʋraa: «Wɩ mɩɩ mɛr bɩɛlbɩɛl thɩ̃ɛ fɛʋʋkɛ fɩ kɔɔ cʋʋnɩ afɩ koo nɩra, dɩɩ fʋna afɩ koo khi bɔɔ, na mɔ̃kɛ fɩ faanɩ afɩ thɩ, na afɩ nɩ, na afɩ dʋɔkɛ wɩ kɔ̃ fɩnɩ, sa ɩ̃ caarraakɛ fa kɔɔ jɩnɩ kpɩɩa'. 12 Thãgba Kɔ̃tɩn n ka fɩ gɩrɛɛkɛ fɩ kɔɔ cʋʋnɩ. Thãgba Kɔ̃tɩnɩkɛ dɔnɩ Ɩjɩrayɛlɩ Thãgba n hana fɩ afɩ lɩmɩ bilǝni, ʋrɛɛkɛ fɩ ɩnɔnɩ, ɔɔ gbɛl n kɛa far.» 13 Dɩ Ruti so: «Fɩ jɩ mɛr bʋɔra kpɛ ya ɩ̃ kɔ̃tɩ̃. Fɩ mɩɩrɛ thɩ̃ɛ dɩɩ lõ mɛr afɩ thɔ̃daar khɛrɩ hara. Fɩ cʋʋ mɛr dɩ̃ faa haar sɩrakɛ ma hɩɩr kha dɩkha na afɩ thɔ̃daar khɛr bɩɛla'.»
14 Diko kho bɔɔ, Boajɩ so Rutira: «Tɔ wɔrɔnɛ khɔ dɩkɔ. Te buru a ɓɛna ƴɔ̃ɔa na khɔ». Dɩ Ruti toore a khunǝ ɔɔjɩ kha. Dɩ Boajɩ 'laaraa ɔɔjɩ bi cɩɩnanɛ, dɩ kho a hi sa fʋrɔ gɩrɛɛkɛ sɛnɩ. 15 Agɩpɩ a bire ɩɩr da n kpɛ. Dɩ Boajɩ so ɔɔ thɔ̃daar kũusɔɔra: «Nɩ dɔ a na n kpɛ kpɛɛra, na n khabɩrʋa'. 16 Nɩ golone ɔɔjɩ caa ɩkharakɛ a faaraa a na n uul, na n phaanʋa'.»
17 Dɩ a kpɛr ɔɔjɩ le lɔɔ waa a dana dʋɔrɔ; a be gɩrɛra a kpɛnɩ, dɩɩ thɔɔ Efab nɔ bɩɛl. 18 Dɩ a gbaar gɩrɛɛkɛra a kpɛnɩ a kɔna nɩna ɔɔ koo nɩ. A tire dakha dikorikɛ a kɔɔ khonɩ sɩ dɩɩ sɩ, a haa. 19 Dɩ ɔɔ koo nɩ bulee: «Kana fɩ kpɛ ɔɔjɩra nĩ? Dɩ kana fɩ do thɔma? Bɔnanɛ n hana ʋrɛraakɛ wɛ fɩnɩ tibil»! Dɩ Ruti mɩɩrɛ ɔɔ koo nɩ thɩ̃ɛɛkɛ kɔɔ kanɩ ɔɔ bilo, agɩpɩ dɩ so: «Ʋrɛɛ paakɛ mɩ donɩ thɔma nĩ wɩ n we Boajɩ». 20 Dɩ Nɔɔmɩ so ɔɔ bikuuni khɛrra ayɩ: «Thãgba Kɔ̃tɩnɩkɛ buloneni haar yidarara, na khĩdidarara n bɔna kuunile. Sa bir sʋʋraa: «Kuunilera asɩ tibil bɩnɔ gɩ, ɔr dɔ asɩ cɔhɩn». 21 Dɩ Moabɩ Ruti bir so: «A so: marɛrakɛ ayɩ, ɩ̃ tɔɔna ɩnɩɩ thɔ̃dara, gɩ dana bɔɔkɛ wa khanɩ ɩnɩɩ ɔɔjɩ fɛw na pɩ». 22 Dɩ Nɔɔmɩ sor ɔɔ bikuuni khɛrra ayɩ: «Gɛr bʋɔnɔ ɩ̃ bikhɛr. Tɔa na ɔɔ thɔ̃daar khɛrsɔ, wa n caana fɩ ʋkhaa lɔa'».
23 Dɩ a toore na Boajɩɩ thɔ̃daar khɛrsɔ, a na n kpɛ phaphapha gɩ dana ɔɔjɩ pɩ bɔɔ, na bile pɩ bɔɔ; sɩ ɔɔ koo nɩra a n kɔɔ cɔna.