Bɛ̃jamɛ̃ɛ mǝlsɔ bire ler.
21
1 Ɩjɩrayɛl bɩsana kɔɔ ʋlfɛrɛ ɔbɔɔkɛ wɩ kɔɔ hanɩ Mɩsɩpa dɩɩra ayɩ tibil bɩɛllakɛ ɩnɛrɛra na n ha Bɛ̃jamɛ̃ɛ mǝl ɔɔ bikhɛr a hɛa'. 2 Dɩ Ɩjɩrayɛl bɩsana kɛrɛ a bir Betɛl dɩɩra a too le Thãgba Kɔ̃tɩnɩ ƴɔɔ a dana dʋɔrɔ. Dɩ wɩ khɩɩrɛ a bɩ jɔɔ ka. 3 Wɩ sor Thãgba Kɔ̃tɩnna ayɩ: Pha! Aɲe dɔ kɩrʋ yaa Thãgba Kɔ̃tɩn Ɩjɩrayɛlɩ Thãgba dɩ thɩ̃ɛ thaa dã dɩ Ɩjɩrayɛl ca bɩɛl na n ɓɔrrɔ? 4 Dɩ dɩwɩllɔ wɩ mãa ɩɩrɛ duuro a mɩ le bonɩ ji paar a ji bonɩ thiinǝsɔ na 'likha bonɩɛsɔ. 5 Dɩ wɩ bulele kha aa: Ʋmɔ̃ hãale sɛr Ɩjɩrayɛl bɩsanaa cara na ɩnanɩ kɩɛr kpa jɛraakɛ gɩrɛ Thãgba Kɔ̃tɩnɩ ƴɔa? Sɩ kɔɔ ʋlfɛrɛ dɩɩ khɩɩr ka ayɩ: Tibil wo tibilikɛ na pʋɔnɩ kpa jɛraale Thãgba Kɔ̃tɩnɩ ƴɔɔ Mɩsɩpa dɩɩra ga wɩ kʋɔ. 6 Bʋɔ fʋrɛ Ɩjɩrayɛl bɩsana awɩ omɩsɔ Bɛ̃jamɛ̃ɛ mǝlsɔɔdara a kɔ̃tɩ̃ ka dɩ wa n waal aa: «Ca bɩɛl n ɓɔrrɛ sɛr Ɩjɩrayɛl bɩsanana nĩ ! 7 Aɲe sa cʋʋ sɩ na 'lɛ khɛra na ha wɩrɛ sɛnɩ na yire, gɩdonɩ sɩ kɔɔ 'lire ʋlfɛrɛ na Thãgba Kɔ̃tɩnɩ i ayɩ sa n ha wɩ asɩ bikhɛrsɔ wɩ ha'?» 8 Gɛr gɩ dɩ wa n bule aa: Ɩkha hale Ɩjɩrayɛl bɩsanaa casɔra, kɛ na pʋɔnɩ le Mɩsɩpa dɩɩra Thãgba Kɔ̃tɩnɩ ƴɔa ya? Le wɩ yɩɛ dɩɩ do tɩɩ bɩɛllakɛ Yabɛsɩdaraakɛ hanɩ Galaadɩ bǝǝnnǝ na kɔɔ pɔ le pa bɩɛldaraa kpa jɛraala'. 9 Dɩ wɩ therre tɩbɩla a hɩɩn dɩɩ do tɩɩ bɩɛllakɛ, kɛ thɛnɩ Yabɛsɩ, Galaadɩ bǝǝnnǝ na hala'. 10 Dɩ wɩ thɔna warɛ kona gbɩlanɩ yʋɔr yeɲɔ (12.000), kɛ dʋɔnɩ kuun kha bɔy a so : «Nɩ jalla a kʋrɛ Yabɛsɩdara, kɛ hanɩ Galaadɩ bǝǝnnǝ na bajɩna na khɛra na bɩsana.» 11 Mɔ̃ na cʋʋnɩ dʋɔn: Nɩ kʋrɛ kona fɛw, na khɛr wo khɛrɩkɛ jɩɛnɩ kuun. 12 Dɩ wɩ yɩrɛ le Yabɛsɩ, Galaadɩ bǝǝnnǝ khebi khɔ̃ phana taanã, kɛ na jɩɛnɩ kuuna', dɩ wɩ kpa wɛr a jalna le jɛw Sɩlo, Kanãa dɩɩra.13 Dɩ Ɩjɩrayɛl bɩsana fɛw thɔnanɛ thɔ̃thɔna Bɛ̃jamɛ̃ɛ mǝlsɔraakɛ hanɩle Rɩmɔ̃ nãabʋʋna wɩ mɩana wɩ ha iedaa. 14 Dɩ Bɛ̃jamɛ̃ɛ mǝlsɔ kɛr dabɔɔle a bir dɩ wɩ ha wɩ khɛraakɛra wɩ kɔɔ faanɩ na yire Galaadɩ bəənnə, Yabɛsɩ khɛraa thɩ̃thɩɩn; sɩ wa hale a na dã wɩ fɛʋa'.
15 Dɩ bʋɔ fʋrɛ Ɩjɩrayɛl bɩsana ka Bɛ̃jamɛ̃ɛ mǝlsɔra, gɩdonɩ Thãgba Kɔ̃tɩn cure kaar Ɩjɩrayɛl bɩsanaa casɔra. 16 Dɩ Ɩjɩrayɛl bɩsanaa kɔ̃tɩ̃sɔ so: «Gɩdonɩ Bɛ̃jamɛ̃ɛ mǝlsɔɔ khɛrsɔ tire fɛw, mɔ̃ sa cʋʋ sɩ na 'lɛ khɛra a na ha wɩrɛ sɛnɩ na yire?» 17 Dɩ wɩ sor: «Dɔ Bɛ̃jamɛ̃ɛ mǝl wɩrɛ sɛnɩ na yire n 'lɛ khɛra, gɩ do nɔɔ ca bɩɛl na n ɓɔr Ɩjɩrayɛl bɩsanaa casɔra ga.» 18 Sɩ sa puno a na ha wɩ asɩ bikhɛrsɔ dɩ wa hea', gɩdonɩ sɩ kɔɔ ʋlfɛrɛ ayɩ: «Ntɛɛkɛ na hananɩ ɔɔ bikhɛr Bɛ̃jamɛ̃ɛ mǝl, sʋɔn n 'lie.» 19 Sɩ wɩ bire so: «Yɩɛr wo yɩɛr Thãgba Kɔ̃tɩnɩ fɛtɩ n hale Sɩlo dɩɩra.» Sɩlo dɩɩ har Betɛl khɔra ka wire na n jalnɩ dɩ pɛ ɲɔ̃bɔɔ, a hana wi phã paar hʋɛraakɛ n thɛnɩ Betɛl dɩ jal Sɩsɛm dɩɩra a ha dakha Lɛbɔna khɔ ka wire na n jalnɩ dɩ pɛ ɲɔ̃bɩlã. 20 Dɩ le wɩ ha Bɛ̃jamɛ̃ɛ mǝlsɔ hʋɛ ayɩ: Nɩ jala a wʋɔnɛ le dɩvɛ̃ thɩr lɔɔsɔ. 21 Na n hɩnɛ a nɩ yɩ Sɩlo kheminǝ dɩ wɩ the a cʋr a na sa bɩna, nɩ the dɩvɛ̃ lɔɔsɔ nɛrɛ fɛw, ntɛ n fʋ khebi bɩɛl wɩ do anɩ khɛr nɩ kɔna le anɩ dʋɔ. 22 Ado awɩ thɩsɔ agɩbo awɩ õkũusɔ ɩ̃ sar a na waal sa so warɛ wɔɔ: Nɩ na na sɩ sa jɛ wɩ bʋɔra, gɩdonɩ sa kɔɔ yɩ khɛra Yabɛsɩ kʋʋrra a ha wɛr fɛʋa'. Dɩrakɛ ga donɩ nɛr hana wa' anɩ dɩpa ga. 23 Dɩ Bɛ̃jamɛ̃ɛ mǝlsɔ cʋʋrɛ ɔmɛna. Wɩ fʋlɛlɛ kheminǝǝkɛ n sanɩ bɩna Sɩlo dɩɩra dɩɩ dã wɩ, dɩ wɩ kɛrna birnǝ awɩ caa thɩra a bir mɩ awɩ dɩ a tooro. 24 Da bɔɔlera Ɩjɩrayɛl bɩsana bɩlã dɩ wa n bir ntɛ ɔɔ cara na ɔɔ cɔ kara. Dɩ mɛ̃ tɩbɩla fɛw bɩɛlbɩɛl kɛr a kɔ̃ ntɛ ɔɔ dɩ thɩra.
25 Ga bɔɔle Ɩjɩrayɛl bɩsana na kɔɔ hana jamana ga. Ntɛ n cʋʋrɛ gɩrɛ a yɩnɩ dɩɩ bʋɔraa.