SOGƲƲRDARA 20

Kʋʋr Ɩjɩrayɛl bɩsanana na Bɛ̃jamɛ̃ɛ məlsɔra

1 Mɛ̃ Ɩjɩrayɛl bɩsana fɛw ther Dã bǝǝnnǝ a fʋ ka wire na n jalnɩ dɩ pɛ ɲɔ̃bɔ a jalna dana Bɛɛrseba bǝǝnnǝ ka wire na n jalnɩ dɩ pɛ ɲɔ̃bɩlã, a fʋ Galaadɩ bǝǝnnǝ wi phã pa billo, wɛr pa bɩɛldarara fɛw, a kpa jɛ Thãgba Kɔ̃tɩnɩ ƴɔɔ Mɩsɩpa dɩɩra a ho tɩɩ bɩɛl. 2 Dɩ Ɩjɩrayɛl bɩsanaa kɔ̃tɩ̃sɔ kɛ thɛnɩ Ɩjɩrayɛl bɩsanaa casɔra fɛw, kɔɔ hale Thãgbaa toolee thɩ̃thɩɩn. Wɩ har sɔrasɩ nɛdara gbɩlanɩ der paar taanã (400.000), kɛ n kɛnanɩ bajɩna. 3 Dɩ Bɛ̃jamɛ̃ɛ mǝlsɔ nɩɛrɛ mɔ̃ Ɩjɩrayɛl bɩsana kpanɩ a jɛ Mɩsɩpa dɩɩra. Le Ɩjɩrayɛl bɩsana bule: «Nɩ mɩa sɩ mɔ̃kɛ puu caarɩlera danɩnakɛ sɩ hɩɩn.» 4 Dɩ Levɩɩ məlile dɔnɩ khɛrɩlera wɩ kʋnɩɩ ko so aa: «Mɩ kɔɔ daan Gibea, Bɛ̃jamɛ̃ɛ mǝlsɔɔ dʋɔ, mɛrɛ na ɩ̃ khɛr dɩ sa n cɔ. 5 Dɩ Gibea dɩ kɔ̃tɩna ɩɩrna mɩ, a pɔ dɩtɩnɔ a dii cʋɔraakɛ mɩ hanɩ. Mɛr wɩ kɔɔ ƴaal wɩ kʋra, sɩ dɩɩ do ɩ̃ khɛr wɩ hʋɔlɔ dɩ khi. 6 Gɛr gɩ dɩ̃ gba ɩ̃ khɛrra kheni a kuur ƴɔɔ paar ƴɔɔ paar a thɔna dɩɩra fɛʋʋkɛ nɛr Ɩjɩrayɛl bɩsana hɩnɩ; gɩdonɩ wɩ cʋʋrɛ kpɔ̃kpɔrɔ̃ thɔma, na yicur thɔma dɩɩ ka. 7 Nɛr ha wɩrɛ fɛw nɛr Ɩjɩrayɛl bɩsana, nɩ mɩa kha sa te kpɩɛrɛ kɩɛr!»

8 Dɩ tɩbɩla fɛw ɩɩr na nɔ bɩɛl ayɩ: «Tibil bɩɛllakɛ sɛrɛra na kɛr ɔɔ kẽkẽ waʋa', bɩɛllakɛ na lõ ɔɔ cɔa'. 9 Gɩrɛ sa cʋʋnɩ nɛnɛ̃ Gibeadarara dʋɔn: Lɩɩ sa lɩ sɩ sɩ jal mɔna lɩɩ sonɩ sɩ kena wɩ. 10 Sa tire Ɩjɩrayɛl bɩsanaa casɔra fɛw tɩbɩla tamaana (100), tɩbɩla yʋɔr; tɩbɩla gbɩlanɩna (1000) tɩbɩla tamaa (100), tɩbɩla gbɩlanɩ yʋɔrra (10.000ra) Tɩbɩla gbɩlanɩ (1000), wɩ jal wɩ ƴaal dɩkɔ wɩ ɩna wɩ ha wɩrɛ sɛnɩ. Awɩ kɛr bɔɔ, sɩ cʋʋ Gibea Bɛ̃jamɛ̃ɛ mǝlsɔ gɩ mɩɛna mɔna awɩ yicur thɔ̃ɔkɛra wɩ cʋʋnɩ Ɩjɩrayɛl dɩɩra hanɩ. 11 Thale Ɩjɩrayɛl bɩsana fɛw gbɛbɩ a ho tɩɩ bɩɛl wɩ kena Gibeadara.

12 Dɩ Ɩjɩrayɛl bɩsana thɔnananɛ tɩbɩla Bɛ̃jamɛ̃ɛ mǝlsɔɔ dɩsɔra a bule wɩ ayɩ: Aɲee puu ca ha gelela cʋɛnɩ anɩ thɩ̃thɩɩn thale? 13 Nɛnɛ̃ nɩ hana sɩ tɩɩ khabaasɔɔlera hanɩ Gibea, sɩ kʋʋr wɩ, gɩ do nɔɔ sɩ hɛl puureele Ɩjɩrayɛl bɩsanaa thɩ̃thɩɩn. Sɩ Bɛ̃jamɛ̃ɛ mǝlsɔ na ƴaal wɩ pɛ awɩ omɩsɔ Ɩjɩrayɛl bɩsana nũǝ'.

14 Dɩ Bɛ̃jamɛ̃ɛ mǝlsɔ ther awɩ dʋɔsɔ a kpa jɛ Gibea dɩɩra wɩ kena Ɩjɩrayɛl bɩsana. 15 Dɩ wɩ therre Bɛ̃jamɛ̃ɛ mǝlsɔɔkɛ thɛnɩ dɩɩra dɩɩra dawiile dɩ wɩ ha tɩbɩla gbɩlanɩ kpelẽ maadõ (26.000), kɛ n kɛnanɩ bajɩnasɔ, sɩ wa therna Gibeadara a pɛra'. Wɩ therre Gibeadara wɩrɛ telenenɩ ɲɔ̃ɔ dɩ wɩ ha tɩbɩla taamakoɲɔ (700). 16 Tɩbɩlalaale fɛw tɩbɩla taamakoɲɔ hale telenenɩ ɲɔ̃ɔ, a do ɲɔ̃bɩlãdara. Wɛr fɛʋʋle punone a bã yʋsũu bire na bãbʋʋ sɩ wa da'. 17 Dɩ wɩ therre dakha Ɩjɩrayɛl bɩsanaa sɔrasɩsɔ dɩ wɩ dã tɩbɩla gbɩlanɩ der paar taanã (400.000) kɛ n kɛnanɩ bajɩnasɔ sɩ Bɛ̃jamɛ̃ɛ məlsɔ na ɓanɔa'. 18 Dɩ Ɩjɩrayɛl bɩsana jaal Betɛl a bule Thãgba ayɩ: Ʋmɔ̃ɔ ca asɩ thɩ̃thɩɩn na kɔɔ jala caca a na kena Bɛ̃jamɛ̃ɛ mǝlsɔ? Dɩ Thãgba Kɔ̃tɩn so: Judaa mǝl n kɔɔ jala ɓo.

19 Dɩ Ɩjɩrayɛl bɩsana mãa ɩɩrɛ duuro a jal dʋ awɩ jɛ pa wɩ kena Gibeadara. 20 Ɩjɩrayɛl bɩsana ther wɩ kena Bɛ̃jamɛ̃ɛ məlsɔ. Dɩ wɩ gbaar ko ɲɔ̃ɔ Gibeadaraa ƴɛbʋrɔ. 21 Dɩ Bɛ̃jamɛ̃ɛ mǝlsɔ ther Gibea a kʋʋr Ɩjɩrayɛl bɩsana gbɩlanɩ kpelẽ yeɲɔ (22.000) ga wiilera ko jɛw. 22 Ɩjɩrayɛl bɩsana pɛrɛ 'lar sa bir the wo a gba ko ɲɔ̃ɔ kãkɛra wɩ kɔɔ thenɩ caca wire. 23 Wɩ kɔɔ jaal Thãgba Kɔ̃tɩnɩ ƴɔɔ ɓo a bɩ a dana dʋɔrɔ, a bule Thãgba Kɔ̃tɩn ayɩ: Sɩ teenanɛ sɩ birǝ jala wo a kɛna asɩ omɩsɔ, Bɛ̃jamɛ̃ɛ mǝlsɔra ya? Dɩ Thãgba Kɔ̃tɩn birse wɩ: Ɔɔ! Nɩ jala kɛna wɩ. 24 Dɩ Ɩjɩrayɛl bɩsana jaal balaɲɔ wireele wo a kena Bɛ̃jamɛ̃ɛ mǝlsɔ. 25 Dɩ ga balaɲɔ wirǝǝle wo Bɛ̃jamɛ̃ɛ mǝlsɔ ther Gibea ko jɛw a kʋʋr Ɩjɩrayɛl bɩsana gbɩlanɩ yʋɔr makõther (18.000), wɛr fɛʋʋkɛ n kɛnanɩ bajɩna. 26 Dɩ tɩbɩla fɛw Ɩjɩrayɛl bɩsanana jaal Betɛl a too le Thãgba Kɔ̃tɩnɩ ƴɛbʋrɔ a bɩ, a linǝ nʋɔ ga wiile a dana dʋɔrɔ. Wɩ jiri bonɩ thiinǝsɔ, na 'likha bonɩɛsɔ Thãgba Kɔ̃tɩnɩ ƴɔɔ. 27 Agɩpɩ Ɩjɩrayɛl bɩsana bire bule Thãgba Kɔ̃tɩn wo a hɩɩn gɩdonɩ dabɔɔle le Thãgbaa ʋlfɛ khɛɛsʋ kɔɔ ha. 28 Ga bɔɔlera Fɩneasɩɩkɛ dɔnɩ Ɛlɩajaarɩ bikuun, sɩ ɔɔ thɩ kɔ̃tɩ̃ na n do Aarɔ̃ɔ, kɔɔ dʋɔn kɔ̃tɩn Thãgba ƴɔɔ. Dɩ Ɩjɩrayɛl bɩsana bire bule wo ayɩ: Sɩ teenanɛ sɩ birǝ jala a kɛna asɩ omɩsɔ, Bɛ̃jamɛ̃ɛ mǝlsɔra wo yaa, sɩ sɛrɔ? Dɩ Thãgba Kɔ̃tɩn birse wɩ aa: Nɩ jala, gɩdonɩ cʋɔ, ma bo wer a na to anɩ ɲɔ̃kɔɔ.

29 Dɩ Ɩjɩrayɛl bɩsana jalnanɛ tɩbɩla a ker khuirǝ khuirǝ a finǝ Gibea dɩɩra. 30 Agɩpɩ Ɩjɩrayɛl bɩsana bire the balãther wirera wo wɩ kena Bɛ̃jamɛ̃ɛ mǝlsɔ. Dɩ wɩ gbaar ko ɲɔ̃ɔ Gibea ƴɛbʋrɔ mɔna cacadaasɔ kɔɔ hanɩ. 31 Dɩ Bɛ̃jamɛ̃ɛ mǝlsɔ ther a caan Ɩjɩrayɛl bɩsana dɩ wɩ hal wɩ a phʋ̃ dɩɩra. Dɩ wɩ mar dɩ wa n kʋʋr Ɩjɩrayɛl bɩsana wo mɔna cacadaasɔ kɔɔ hanɩ. Dɩ wɩ kʋrɛ tɩbɩla kpelẽ yʋɔrsɔ wo Ɩjɩrayɛl bɩsananaa thɩ̃thɩɩn le hɔ̃ balɔ hʋɛraakɛ n jalanɩ Betɛl na hʋɛraakɛ n jalanɩ Gibea. 32 Dɩ Bɛ̃jamɛ̃ɛ mǝlsɔ na n so: «Sɩ puno wer wo caca khaasɔra! Sɩ Ɩjɩrayɛl bɩsana na n so kha aa, ɩna n ca a halla wɩ phʋna dɩɩra, a thɛna hʋɛrasɔ.» 33 Dɩ dapaara Ɩjɩrayɛl bɩsana fɛw thɩɩrɛ awɩ pasɔ a gba ko ɲɔ̃ɔ paarɩkɛ wɩ n wenɩ Baal-Tamaar; dɩ wɩrɛ kɔɔ wʋɔnɛnɩ Gibea bə̃ faana dakha thɩɩrɛ dapaara. 34 Dɩ kona gbɩlanɩ yʋɔrɩkɛ (10.000) wɩ kɔɔ phiirni Ɩjɩrayɛl bɩsanana fɛw daan Gibea ƴɛbʋrɔ. Dɩ kʋʋr kporre na sobɔr. Sɩ Bɛ̃jamɛ̃ɛ mǝlsɔ na n kɔɔ kpɩɛrna dɩ puure na dã wɛr fɩɩʋraka'. 35 Sɩ Thãgba Kɔ̃tɩn cʋʋrɛ ga wiile dɩ Ɩjɩrayɛl bɩsana kʋʋr Bɛ̃jamɛ̃ɛ mǝlsɔ tɩbɩla gbɩlanɩ kpelẽ yemɔy na tɩbɩla tamaa (25.100), kɛ dʋɔnɩ sɔrasɛɛkɛ n kɛnanɩ bajɩna.

36 Dɩ Bɛ̃jamɛ̃ɛ mǝlsɔ jɩrɛ dɩɩ do wɩ puno wer. Ɩjɩrayɛl bɩsana halɛ dɩ wa n bir sɩ dɩ wa n faa Bɛ̃jamɛ̃ɛ mǝlsɔra bǝǝn, gɩdonɩ tɩbɩlaakɛ wɩ kɔɔ pɛrnɩ dɩ wɩ nɔ Gibea wɩ n kpɩɛrɔ. 37 Dapaara dɩ tɩbɩlaale kɔɔ wʋɔnɛnɩ thɩɩr a mala Gibea dɩɩra a kʋʋr dɩdara na bajɩna. 38 Mɔ̃ Ɩjɩrayɛl bɩsana kɔɔ gʋʋrnɩ kha dʋɔn: Wɩrɛ kɔɔ wʋɔnɛnɩ teenanɛ wɩ cʋɛ isi kɔ̃tɩ̃ɩ gɩ bã Gibea dɩɩra ga n jʋʋn. 39 Ɩjɩrayɛl bɩsana kɔɔ hallɛ kʋʋrra dɩ wa n bir, dɩ Bɛ̃jamɛ̃ɛ mǝlsɔ kʋ wɩ tɩbɩla kpelẽ yʋɔrsɔ; dɩ wa n so: Baalɛ na hala', sɩ puno wer pɩ mɔna gɩ kɔɔ hanɩ caca kʋʋsɔra. 40 Dabɔɔle isi kɔ̃tɩ̃ɩ mar dɩɩra dɩ ga n jʋʋn, dɩ Bɛ̃jamɛ̃ɛ mǝlsɔ na hɩɩn awɩ khiro dɩɩ do dɩɩ fɛw dor dɔ lɩna haar dɩ ga n jʋʋn ƴũu. 41 Le Ɩjɩrayɛl bɩsana bir kɛr pɩɛr Bɛ̃jamɛ̃ɛ mǝlsɔ dɩ maar fʋlɛ wɩ dɩphã mɔ̃ wɩ yɩnɩ puureekɛ na dana wɩnɩ. 42 Dɩ wɩ caalɛlɛ Ɩjɩrayɛl bɩsanaa ƴɛra a gba bǝ̃ kpara hʋɛ. Sɩ dɩɩ do kʋʋr lire kpala war. Dɩ wɩrɛ thɛnɩ dɩɩrasɔ dɩ wa n pɔ na n kʋʋr wɩ gɩdonɩ awɩ thɩ̃thɩɩn wɩ ha. 43 Ɩjɩrayɛl bɩsana kpalalɛ Bɛ̃jamɛ̃ɛ mǝlsɔra a weele wɩ wa faa wɩ dɩ wɩ hɩɩra', a kʋʋr wɩ foo a jalna dana paarɩkɛ hanɩ Gibea wi phã pa khʋra. 44 Dɩ kona gbɩlanɩ yʋɔr makõther (18.000) fɛw, kɛ dʋɔnɩ kuun khaasɔ kɔɔ khiire Bɛ̃jamɛ̃ɛ mǝlsɔra. 45 Sɩ wɩrɛ sɛnɩ, wɩ caalɛlɛ na bǝ̃ kpara khʋʋ, ka Rɩmɔ̃ nãabʋ̃ʋ hanɩ. Dɩ Ɩjɩrayɛl bɩsana kʋʋr wɩ tɩbɩla gbɩlanɩ yemɔy (5.000) hʋɛrasɔ; sa weele wɩ a dana Gidẽɔ dɩ khʋra a kʋʋr tɩbɩla gbɩlanɩ yeɲɔ (2.000.) 46 Dɩ Bɛ̃jamɛ̃ɛ mǝlsɔɔkɛ khiirenɩ dawiile awɩ nɔ har tɩbɩla gbɩlanɩ kpelẽ yemɔy (25.000) fɛw, kuun khaasɔ gɩ, kɛ n kɛnanɩ bajɩna. 47 Dɩ kona taamaadõ (600) wɩrɛraakɛra kɔɔ caalɛnɩ a jal bǝ̃ kpara khʋra, Rɩmɔ̃ nãabʋʋna toore le a dana sɩpora yenã. 48 Agɩpɩ Ɩjɩrayɛl bɩsana kɛr a bir Bɛ̃jamɛ̃ɛ mǝl wɩrɛra sɛnɩ dɩɩra dɩɩra a kʋʋr wɩ na bajɩna, a fʋna tɩbɩla a gbana nʋma fɛw na thɩ̃ɛ fɛʋʋkɛ wɩ caananɩ. Dɩ wɩ thiilele dakha dɩɩ wo dɩɩ fɛʋʋkɛ wɩ yɩnɩ.