Bɛ̃jamɛ̃ɛ mǝlsɔ cʋʋ pa puu
19
1 Ga bɔɔle Ɩjɩrayɛl bɩsana na kɔɔ hana jamana ga, Levɩɩ məl bɩɛl kɔɔ hale tɔɔnɩ Efɩrayɩmɩ gɔ̃gɔ̃ bə̃ khu paar a jal a gba khɛr Bɛtɩlɛhɛm, kɛ dʋɔnɩ Judaa mǝlsɔɔ dɩ. 2 Dɩ ɔɔ khɛrra cʋʋraarɛ khaarkhaar, sa fagʋʋ sa ca kɔ̃ ɔɔ thɩɩ cɔ Bɛtɩlɛhɛm, kɛ dɔnɩ Judaa mǝlsɔɔ dɩ a cʋʋ sɩpora yenã. 3 Dɩ ɔɔ ko ɩɩrɛ a kpaan ɩnɩ n bɩɛllʋʋ ɩnɩ n birnǝ. Ɔr na ɔɔ thɔ̃daar daɓolbir bɩɛl kɔɔ haan kha na kũkǝnǝ yeɲɔ. Dɩ khɛrɩle kpaarɛ a lona ɔɔ thɩɩ cɔ. Dɩ mɔ̃ ɔɔ thɩ yɩnɩ kuunile a teguure na daw. 4 Dɩ ɔɔ thɛɛ kona fʋʋrɛ toona dɩ cʋʋ wire yẽther ɔɔ pa. Le wɩ n kho dɩkɔ a yɔna sa cɔ.5 Dɩ balanã wirera, mɔ̃ wɩ ɩɩrnɩ duuro, Levɩɩ məlile gbɛbɩrɛ ɩnɩ n kɔ̃. Dɩ ɔɔ thɛɛ sʋʋraa: «Jɩlɛ a khɔ dikor gbe a lɛ fãga agɩpɩ nɩ kɔ̃.» 6 Dɩ wɛr yeɲɔ toore a kho kha dikor a ɲɔna. Agɩpɩ khɛrɩlee thɩ sor ɔɔ thɛɛra aa: «Birǝ cɔ a nɛ daw gbe.» 7 Dɩ kuun ɩɩrɛ ɩnɩ n kɔ̃ sɩ mɔ̃ ɔɔ thɛɛ kõ n phʋʋrʋʋnɩ mɛ̃ dɩ bir a cɔ le ga dɩtɩnɔɔle wo.
8 Dɩ balamɔy wirera a mãa ɩɩrɛ duuro ɩnɩ n kɔ̃. Dɩ ɔɔ thɛɛ kona bir sʋʋraa: Mɩ bɩɛl fɛr, jɩlɛ a khɔ dikor, sa pɩɛrɛ wire n jo gbe. Dɩ wɛr yeɲɔ khor dikor. 9 Dɩ kuun ɩɩrɛ ɩnɩ n kɔ̃ na ɩnɩɩ khɛr, na ɔɔ thɔ̃daar daɓolbirile, dɩ ɔɔ thɛɛ kɛ dɔnɩ khɛrɩlee thɩra bir sʋʋraa: «Hɩnɛ wire n pɩrɛ, bɔɔ kar, dɩɩ n tɩnɛ, nɩ cɔ kɛ fɩ nɩ daw, a dɩɩ wɩl cʋɔ nɩ maan ɩɩrɛ duuro nɩ gba hʋɛ fɩ kɔ̃ afɩ cɔ. 10 Sɩ kuun na tu ɩnɩ n cɔ 'lo bã a ɩɩr da n kɔ̃. Dɩ a daan Yebusi dɩ ƴɛbʋrɛ, kɛ dʋɔnɩ Jerujalɛm, ɔr na ɔɔ kũkǝnǝ yeɲɔɔkɛra gbaanɩ thɩ̃ɛ, na ɔɔ khɛrra. 11 Mɔ̃ wa danɩ Yebusi dɩɩ, wire pɩrɛ koo. Dɩ Levɩɩ məl thɔ̃daar daɓolbirile so ɔɔ kɔ̃tɩna aa: Sɩ lɛna Jebusɩdaraa dʋɔ a cɔ. 12 Dɩ ɔɔ kɔ̃tɩ̃ sʋʋraa: «Sa puno na kɛr a na jal kpakpal dɩɩraakɛ Ɩjɩrayɛl bɩsaan na hanaa ga. Gibea sa jal a na cɔ. 13 Sa bir so ɔɔ thɔ̃daarara aa: «Sɩ dɔ bʋɔ a dana paar yeɲɔɔle Gibea agɩbo Rama a cɔ le.» 14 Dɩ wɩ gbaar hʋɛ dɩ wa n jal. Mɔ̃ wa danɩ Gibea, kɛ dʋɔnɩ Bɛ̃jamɛ̃ɛ mǝlsɔɔ dʋɔ, dɩɩ do wire lʋʋn. 15 Dɩ wɩ lɩ̃ɛ a jal le Gibea ɩnɩ n cɔ. Dɩ Levɩɩ məlle lʋʋn a jɩɩl le dɩ gbasara. Sɩ tibil bɩɛllakɛ na we wɩ a tee wɩ ɔɔ cɔ wɩ puno wɩ cɔa'.
16 Kuun kɔ̃tɩ̃ bɩɛl thɛ lɔɔ thɔmana dʋɔrɔ da n kɔ̃. Kuunile Efɩrayɩmɩ mǝlsɔɔ gɔ̃gɔ̃ dʋɔ a the sa too le Gibea. Sɩ dɩdaraale Bɛ̃jamɛ̃ɛ mǝlsɔ wɩ do. 17 Dɩ a na hɩɩnɛ a yɩ kpakpalɩle dɩ gbasara. Dɩ a buleele: «Kana fɩ the? Kana fɩ n jal?» 18 Dɩ sʋʋraa: Bɛtɩlɛhɛmɩkɛ dɔnɩ Judaa mǝlsɔɔ dʋɔ mɩ the dɩ ma n ka Efɩrayɩmɩ mǝlsɔɔ gɔ̃gɔ̃ bə̃ khu pa, ka mɩ thenɩ. Bɛtɩlɛhɛmɩkɛ dʋɔnɩ Judaa mǝlsɔɔ dʋɔ mɩ kɔɔ jal, sa kɛr ma n bir Thãgba Kɔ̃tɩnɩ cɔ. Sɩ tibil na hakɛ a tee mɩ ɔɔ cɔa'. 19 Sɩrakɛ sɩ hananɛ laagbee na hʋɔn sa hanɩ asɩ kũkǝ̃sɔ. Sɩ hananɛ dakha buru na dɩvɛ̃, mɛrɛ na ɩ̃ khɛr na kũubirikɛ sɩ hananɩ kha dɩɩ dã. Thɩ̃ɛ na ɓɔr sa'. 20 Dɩ kuun kɔ̃tɩ̃ɩle sʋʋraa: «Hanana ha ɩɩ! Ma hɩɩn fɛr thɩ̃ɛ fɛʋraakɛ na ɓɔra fɩnɩ. Fa cɔ kɩɛr dɩ gbasara ga.» 21 Dɩ a kpa wɛr a kɔna ɔɔ cɔ a pɛ kũkǝnǝnǝ dɩkɔ. Dɩ kpakpalaale cɔcɔɔrɛ nɛɛ agɩpɩ dɩ wɩ kho dikor a ɲɔna.
22 Dɩ mɔ̃ wɩ hanɩ kãkara dʋɔ kona, kɛ dɔnɩ tɩɩ khabaasɔ diire cʋɔrra dɩ wa n bɩɩr loo sa so kuun kɔ̃tɩɩnaale, dʋɔnɩ cɔdaar kuun aa: «Te kuunikɛ lonanɩ afɩ pa a the sɩ phɩnaa.» 23 Dɩ kuun kɔ̃tɩ̃ɩle the a so war aa: «Ɔ̃'ɔ̃! Ɩ̃ omɩsɔ, mɩ n bɩɛl nɛr, na n cʋʋ puurǝ'. Gɩdonɩ ɩ̃ cɔ kuunikɛ gbũ, na n cʋʋ yicur caarɩka'. 24 Ɩ̃ bikhɛr ha ʋrɛ aa jɩ kuun pa', dɩ kuunɩkɛraa khɛr hale dakha. Ma ti wer wɩ the. Nɩ pɛ war fãga, a cʋɛna wɩ mɔ̃ daan narnɩ. Sɩ na n cʋʋ kuunaakɛ wer ga yicur caaka'. 25 Sɩ tɩbɩlaale na n ƴaal wɩ pɩɛ nũǝ'. Dɩ Levɩ məlile fʋrɛ ɔɔ khɛr a ha wɩ phiilo. Dɩ wɩ phɩɩnaanɛ a hʋɔlaa foo a wɩlna dɩɩ sa fagʋʋ mɔ̃ kɩrʋ n gbanɩ.
26 Dɩ mɔ̃ dɩɩ wɩlnɩ duur khʋra, khɛrɩle pɔr a ji kuun kɔ̃tɩ̃ɩlee lõfonɔra, ka ɔɔ ko hanɩ a dana bɔɔkɛ dɩɩ wɩlnɩ. 27 Dɩ ɔɔ ko ɩɩrɛ duuro a khɛr loo sa the a gba ɔɔ hʋ dɩɩ do ɔɔ khɛr hale a ji lõfonɔɔ dɩ ɲɛ̃ɛ dɛ̃ɛ lõfonɔ gbẽgbera. 28 Dɩ sʋʋraa: «Ɩrɛ sɩ kɔ̃». Sɩ khɛr na birsǝ'a. Dɩ le kuun gbaa a pɛ ɔɔ kũkǝnǝ a kɔna ɔɔ pa. 29 Mɔ̃ a lonɩ ɔɔ cɔ, a gbaar khalʋ a kuur ɔɔ khɛrra ƴɔɔ paar ƴɔɔ paar kuur paar yʋɔr yeɲɔ a thɔna Ɩjɩrayɛl bɩsanaa dʋɔsɔ fɛw. 30 Dɩ wɩrɛ fɛʋʋkɛ yɛ gɩnɩ n hulene dɩ wɩ so: «Sa kɔɔ yɩ thɩ̃ɛ thaa dɩɩ fʋna bɔɔkɛ Ɩjɩrayɛl bɩsana thenɩ Ejipiti dɩɩra a dana nə'. Sɩ jʋrɛ thɩ̃ɛkɛra a hɩnɛ, sɩ yɛ kha sa gbarɔ kpɩɛrɛ.»