Dãa mǝlsɔɔ thɩmɩɩr na Mɩkaa thɩlsɔ
18
1 Ga bɔɔle Ɩjɩrayɛl bɩsana na kɔɔ hana jamana ga. Dɩ dabɔɔlera dakha Dãa məlsɔ har dɩ wa n ƴaal paar wɩ tooro, gɩdonɩ a dananakɛ dabɔɔle wa yɩ paar a ha wɩ Ɩjɩrayɛl bɩsanaa casɔɔ thɩ̃thɩɩna'a 2 Dɩ Dãa mǝlsɔ tire kuun khana yemɔy awɩ thɩ̃thɩɩn Sora na Ɛsɩtaɔl dɩɩra a thɔ̃ wɩ wɩ jala a gɩlɛ dɩɩ a jʋrɛɛ a hɩnɛ. Wɩ so warɛ aa: «Nɩ jala a jʋrɛ dɩɩra». Dɩ wɩ daan Efɩrayɩmɩ mǝlsɔɔ gɔ̃gɔ̃ bənə a pɔ dã Mɩkaa cɔ a cɔ le. 3 Sɩ mɔ̃ wɩ kɔɔ wɔrɔnɩ Mɩkaa cɔ wɩ nɩrɛ Levɩɩ mǝli nɔ a jɩ wire. Dɩ wɩ kɛrɛ bir a bulee: «Amɛ ɛna fɩ kɩɛr? Aɲe fɩ n cʋʋ paarɩkɛ? Aɲe fɩ hana kɩɛr?» 4 Dɩ a so warɛ gɩrɛ Mɩkaa n cʋʋraanɩ sa so: «A n lɩmɩ mɛr sɩ dɩ̃ do ɔɔ bonɩ jidaar.» 5 Dɩ wɩ sʋʋraa: «Bulene Thãgba sɩ hɩɩn ado asɩ kpaarɩkɛ sɩ fʋnɩ na daarɛ.» 6 Dɩ bonɩ jidaarɩle so warɛ aa: «Nɩ jala na ha ɩɩ gɩdonɩ Thãgba Kɔ̃tɩn har kha na nɛrɛ kpaarɛraakɛ na fʋnɩ.»7 Dɩ kona yemɔɩɩle jaal a dã Layɩsɩ. Dɩ wɩ yɩrɛ tɩbɩlaale dɩ wɩ too mɛna ba Sɩdɔ̃daraa kha, wa n dɛna thɩ̃a'. Tibil na hale dɩ ɲaɲaan dɩa', tibil na hale dɩ pɔtɔrɔ wa'. Wa wɔrɔ̃ kha na Sɩdɔ̃dara ga. Wa ha kha dɩkha na tibilǝ'. 8 Dɩ kona yemɔɩɩle kɛrɛ a bir Sora na Ɛsɩtaɔl dɩɩra awɩ too pa. Dɩ wɩ bule wer gɩrɛ wɩ yɩnɩ. 9 Dɩ wɩ so war aa: «Nɩ ɩrɛ! Sɩ jala kɛna Layɩsɩdara. Sɩ yɩrɛ paar dɩ ɓɔ̃ na sobɔr. Na n too mɔlɔa'! Na n do khãkhala ga. Nɩ gba hʋɛ sɩ jal sɩ tee paarɩle.» 10 Ɔbɔɔkɛ na lonɩ dɩɩraale na yɩrɛ tɩbɩla kɛ tɔɔnɩ ba, dɩ pɩɛ gɩ na sobɔr. Thãgba ha nɛr dɩɩra. Thɩ̃ɛ fɛʋʋkɛ hanɩ thɩɩraakɛ hale dɩɩraale.
11 Dɩ kona taamaadõ (600) ther Sora na Ɛsɩtaɔl a gba awɩ koke thɩ̃sɔ a jal. 12 Wɩ jaal a jɛ Kɩrɩyatɩ-Yearɩm khɔra, kɛ dʋɔnɩ Judaa mǝlsɔɔ dʋɔ. Gɛr gɩ dɩ wa n we paarɩle Mahane-Dã : kɩrʋ dʋɔn Dãa jɛw. Gɩ hale Kɩrɩyatɩ-Yearɩm dɩɩra wi lõ pa billo. 13 Agɩpɩ wɩ gbaar a jal Ɛfɩrayɩmɩ gɔ̃gɔ̃ dʋɔsɔ a pɔ dã Mɩkaa cɔ. 14 Dɩ kona yemɔɩɩlera kɔɔ jalanɩ a gɩɩl Layɩsɩ dɩɩ sor awɩ toora aa: «Cɔnasɔraale, efoodɩ hale, na cɔ bɛr thɩla, na thɩl buu, na dɛ bulo thɩl bu phebɩna. Nɩ hɩnɛ mɔ̃ na cʋʋnɩ.» 15 Dɩ wɩ kɛrɛ a lõ Levɩ daɓolbirile pa Mɩkaa cɔ a fʋɔrʋ. 16 Dɩ Dãa mǝlsɔraale kona taamaadõole (600) fɔrɔnɩ awɩ koke thɩ̃sɔ jɩɩlɛ phel lõfonɔɔ. 17 Sɩ kona yemɔɩɩkɛ kɔɔ jalanɩ a gɩɩl dɩɩ lõ a gba thɩl buu, na efoodɩ na cɔ bɛr thɩla, a gbana dɛ bulo thɩl bu phebɩna dabɔɔlera bonɩ jidaar kɔɔ ha a jɩɩl phel lõfonɔɔ na kona taamaadõolera (600) fɔrɔnɩ awɩ koke thɩ̃sɔ. 18 Bɔɔkɛ kona yemɔɩɩle lonɩ Mɩkaa cɔ a gba thɩl buu na efoodɩ na cɔ bɛr thɩla na dɛ bulo thɩl bu phebɩna na pɩ, le bonɩ jidaar bule wɩ aa: Aɲe nɩ n cʋʋlera? 19 Dɩ wɩ sʋʋraa: «Pɩra! Khaanɛ nʋɔ! Ɩna sɩ jal kha fɩ do asɩ thɩ, na asɩ bonɩ jidaar. Dɩ fa do bonɩ jidaar tibil bɩɛlɩ cɔ kara, na gɩrɛ fa donɩ bonɩ jidaar Ɩjɩrayɛl ca bɩɛlla, gɩmɔ̃ baan far?» 20 Dɩ daw fʋrɛ bonɩ jidaarɩle na sobɔr. Dɩ a gbaar efoodɩ na cɔ bɛr thɩla na thɩl buurǝ a cʋrna tɩbɩlaale a jal.
21 Dɩ wɩ gbaar hʋɛ a pɛ bɩsana ƴɛbʋra na nʋma na thɩ̃be. 22 Mɔ̃ wɩ hʋnɔnɩ pɩ na Mɩkaa cɔ, tɩbɩlaakɛ hanɩ ɔɔ cɔ khuirǝsɔ wer kha a ɩɩr a wee Dãa mǝlsɔ wa n kpaan. 23 Dɩ wɩ ber hulẽbe Dãa mǝlsɔra. Dɩ wɩ kɛr a bule Mɩka aa: «Aɲe hana fɩ dɩ fa n be hulẽbe thaa?» 24 Dɩ so war: «Ɩ̃ thãgbasɔɔkɛ mɩ cʋʋnɩ nɩ gba a kpana ɩ̃ bonɩ jidaar a jal. Aɲee thɩ̃ sɛ mɩ 'lo? Sɩ dɩ nɩ 'la na n bule mɩ, aɲe hana mɩ yaa mɔ̃?» 25 Dɩ Dãa mǝlsɔ sʋʋraa: «Fa n bir ha nʋɔ asɩ khiro kɩɛr sɩ nɩɛ bã. A mɛ̃ ga nĩkhidara na pɔ narɛ dɩ ga dor fɛr ƴaalɛ thɩlkɩɩr a pɛr afɩ yʋɔ na afɩ toora. 26 Agɩpɩ Dãa mǝlsɔ gbaar dɩ wa n jal. Dɩ mɔ̃ Mɩka yɩɛnɩ dɩɩ do Dãa mǝlsɔ hananɛ fãga a jʋɔ, a kɛrɛ a kɔ̃ ɔɔ cɔ.
Dãa mǝlsɔ teere Layɩsɩ dɩɩ a tooro
27 Thale wɩ gba Mɩkaa thɩlsɔɔkɛ a kɔɔ cʋʋnɩ a kpana ɔɔ bonɩ jidaar a jal. Dɩ wɩ ther Layɩsɩdarara, kɛ kɔɔ tɔɔnɩ ba wa n dɛna thɩ̃a' a kʋʋr wɩ na bajɩna sa thii dɩɩ. 28 Tibil na pɔ a bul wa', gɩdonɩ wa kɔɔ wɔrɔna Sɩdɔ̃dara ga. Dɩ wa kɔɔ ha kha na tibilǝ'. Ɓɛlɛ̃ɛkɛ thɛnɩ Bɛtɩ-Rehɔbɩ dɩɩra dɩɩle kɔɔ ha. Dɩ Dãa mǝlsɔ bire mɩ dɩɩra a tooro. 29 Dɩ wɩ bire dʋ dɩɩra ire: 'Dã', kɛ dɔnɩ awɩ thɩ kɔ̃tɩ̃ɩ i, kɛ dʋɔnɩ Ɩjɩrayɛlɩ bikuun. Sɩ cacara Layɩsɩ dɩɩle n do. 30 Dɩ Dãa mǝlsɔ thɩɩnɛ Mɩkaa thɩl burǝ dɩ do awɩda. Dɩ Yonatãakɛ dʋɔnɩ Gɛrsɔmɩ bikuun sɩ ɔɔ thɩ kɔ̃tɩ̃ na n do Mʋɩjɩ, ɔr na ɔɔ mǝlsɔ dɔ Dãa mǝlsɔɔ bonɩ jidara, phaphapha dɩɩ dana bɔɔkɛ wɩ fʋlɛnɩ tɩbɩla a jalna dee paar. 31 Dɩ Mɩkaa thɩl buulera a kɔɔ cʋʋnɩ wɩ fʋrɔ waa bɔɔ fɛʋraakɛ Thãgbaa cɔ kɔɔ hanɩnakɛ Sɩlob dɩɩra.