Mɩkaa thɩl cɔ
17
1 Kuun bɩɛl kɔɔ hale Efɩrayɩmɩ mǝlsɔɔ gɔ̃gɔ̃ bənə da n do Mɩka. 2 Dɩ wi bɩɛl a sor ɔɔ nɩra aa: «Dɛ bulo be gbɩlanɩ na tamaakɛra (1.100) wɩ kɔɔ yu fɩnɩ dɩ fɩ sɔnɔ ntɛ ɩ̃ ƴɛra gɩ hale dɩ̃ hana. Mɛr kɔɔ gbaan.» Dɩ ɔɔ nɩ sʋʋraa aa: «Thãgba Kɔ̃tɩn n bɔna fɩ yaa ɩ̃ bikuun!» 3 Dɩ a gbaar dɛ bulo be gbɩlanɩ na tamaara (1.100) a ha ɔɔ nɩ dɩ ɔɔ nɩ so: «Mɩ n har Thãgba Kɔ̃tɩn dɛ bulola na ɩ̃ ɲɔ̃ khorr afɩ irǝ wɩ cʋʋna thɩl buu wɩ phebɩna dɛ bulo thɩl. Thale ma ha fɩ dɛ bule dɩphã. 4 Dɩ mɔ̃ a gbanɩ dɛ bulola a ha ɔɔ nɩ a tire dɛ bulo be taaɲɔ (200) a ha phudaar. Dɩ a gbaar a cʋʋ thɩl buu na dɛ bulo thɩl bu phebɩna dɩ wɩ thɩɩn Mɩkaa cɔ. 5 Dɩɩ do Mɩka hana thãgba fʋɔr paar ɔɔ cɔ. Dɩ a cʋʋrɛ efoodɩana cɔ bɛr thɩla a gba ɔɔ bikuun bɩɛl a pɛr dɩ do ɔɔ bonɩ jidaar.6 Ga bɔɔle Ɩjɩrayɛl bɩsana na kɔɔ hana jamana ga. Ntɛ n cʋʋrɛ gɩrɛ a yɩnɩ dɩɩ bʋɔraa. 7 Daɓolbir bɩɛl kɔɔ hale Bɛtɩlɛhɛm dɩɩraakɛ dʋɔnɩ Judaa mǝlsɔɔ dɩ, a do Levɩɩ mǝl. 8 Dɩ kuunilera ther Bɛtɩlɛhɛm, Judaa mǝlsɔɔ dʋɔ da n jal a ƴaal ka na bʋɔnɔnɩ a puno a too. Dɩ a n jaal a the Efɩrayɩmɩ mǝlsɔɔ gɔ̃gɔ̃ bənə a pɔ dã Mɩkaa cɔ. 9 Dɩ Mɩka bulee aa, kana a the ya? Dɩ sʋʋraa: «Levɩɩ mǝl ha mɩ dɩ̃ the Bɛtɩlɛhɛm, kɛ dɔnɩ Judaa dɩ dɩ ma n kpaar ɩ̃ ƴaal paar ka ma punonɩ na too.» 10 Dɩ Mɩka sʋʋraa: «Dɩ tɔɔ kɛ ɩ̃ pa a dɔ ɩ̃ thɩ na ɩ̃ bonɩ jidaarb. Ma n ha fɛr dɛ bulo be yʋɔr yɛ bɩɛlla na kẽkena na dɩkɔ. Dɩ Levɩɩ mǝl lʋʋn le ɔɔ cɔ. 11 A ture a too le ɔɔ cɔ. Dɩ Mɩka gbaarɛ dɩ hʋʋra ɔɔ bikuun bɩɛl. 12 Dɩ Mɩka pɩɛraarɛ bonɩ ji thɔma dɩ daɓolbirile debi a do ɔɔ bonɩ jidaar a too le ɔɔ cɔ. 13 Dɩ Mɩka so: «Nɛnɛ̃ dɩphã mɩ jɩrɛ Thãgba Kɔ̃tɩn na bɔna mɛr gɩdonɩ mɩ hananɛ Levɩ mǝllikɛ dɩ do ɩ̃ bonɩ jidaar».