Samɩsɔ̃ ǝǝle Gaja loosɔ
16
1 Dɩ Samɩsɔ̃ gbaar a jal Gaja dɩɩra a yɩ le thetoo khɛr bɩɛl a lʋʋnaa. 2 Dɩ wɩ sor dɩdarara aa Samɩsɔ̃ lʋʋn kɛ dɩɩra. Dɩ wɩ kpalalaalɛ a nʋɔ dɩtɩnɔɔle waa, le dɩ lõfonʋɔra. Wɩ jɩɩlɛ dɩtɩnɔɔle cɔcɔcɔ sɩ wa n pɩɛr aa dɩwɩl bɔɔ foo ɩnɩ n kʋʋ. 3 Sɩ Samɩsɔ̃ phɩnɛ a dana dɩnɩrɔ. Mɔ̃ dɩɩ nɩrɔnɩ a ɩɩrɛ a fʋ dɩ lõfonɔ lõ phɛrɛ yeɲɔ fɛw na agɩ gogaa na agɩ dakpalada fɛw a ǝl a pɛ gɔra a jalna gɔ̃gɔ̃ yʋɔ kɛ hanɩ Ebʋrɔ ƴɛbʋrɔ a faa.Dalɩla fɩɩlɛ Samɩsɔ̃
4 A gele pɩ Samɩsɔ̃ bire na khɛr bɩɛl wo Sorɛkɩ bǝ̃ faana. Khɛrɩlee i n dʋɔn Dalɩla. 5 Dɩ Fɩlɩsɩtɛ̃sɔɔ jamanasɔ jaal Dalɩlaa pa a sʋʋraa: Fɩlɛ Samɩsɔ̃ a jɛ kana ɔɔ nɔkpaa fãgaalera thenɩ na mɔ̃ sa cʋʋnɩ sɩ na punoo na fʋ na li a na punoo; sɩ sɛrɛ fɛw bɩɛlbɩɛl, tibil bɩɛl n ha fɩ dɛ bulo be gbɩlanɩ na tamaa (1.100) 6 Dɩ Dalɩla sor Samɩsɔna ayɩ: Mɩ n bɩɛl fɛr nɛna mɩ kana afɩ nɔ kpaa fãgaakɛra n thenɩ na gɩrɛ wa linǝ fɩnɩ a na puno fɩ. 7 Dɩ Samɩsɔ̃ sʋʋraa: Ado wɩ linǝ mɩ pɛ hunǝ makoɲɔɔkɛ na khɩɛnɩ pa', ɩ̃ fãga na pɩrɛ sɩ ɩ̃ fi ɩ̃ ho tɩɩ ba. 8 Dɩ Fɩlɩsɩtɛ̃sɔɔ jamanasɔ pɔnanɛ pɛ̃ hunǝ makoɲɔra, kɛ na khɩɛnɩ pa' a ha Dalɩla dɩ gba a linǝǝ. 9 Sɩ jaa tɩbɩla kɔɔ hale ɔɔ pa le duu a nɔ. Dɩ dapaara a phaan: Samɩsɔ̃! Fɩlɩsɩtɛ̃sɔ n ɩnɛ! Dɩ a kuurre pɛ̃ɛle dɩɩ ho mɔ̃ kẽkẽ wiir n kuurnɩ ɔbɔɔkɛ dɔɔ 'lɩɛnɩ. Dɩɩ do wa puno a jɩ ɔɔ fãga the pa ga.
10 Dɩ Dalɩla so Samɩsɔna: Hɩnɛ pal! Fɩ fɩɩl mɛr. Sõso thɩmɩa fɩ mɩɩ mɩ. Mɩ n bɩɛl fɛr nɛnɛ̃, nɛ mar gɩrɛ wa gbanɩ na linǝ fɩ. 11 Dɩ Samɩsɔ̃ sʋʋraa: Ado wɩ li mɩ na pɛ̃ hu cunəəkɛ wa kɔɔ linǝni thɩ̃ɛ pa', ɩ̃ fãga na pɩrɛ sɩ ɩ̃ fi ɩ̃ ho tɩɩ ba. 12 Dɩ Dalɩla gbaar pɛ̃ cu phanana a linǝǝ, sa phã: Samɩsɔ̃! Fɩlɩsɩtɛ̃sɔ n ɩnɛ! Jaa tɩbɩla kɔɔ hale duu a nɔ wo. Dɩ Samɩsɔ̃ kuure pɛ̃ɛle ɲɛɛna dɩɩ ho kẽkẽ wi bɩɛl gɩ dɩbara.
13 Dɩ Dalɩla so Samɩsɔna: A dana nɛnɛnakɛ fɩ n fɩɩl mɛr dɩ fa n mɩɩ mɩ sõso thɩmɩa. Nɛ mar gɩrɛ wa gbanɩ na linǝ fɩ. Dɩ Samɩsɔ̃ sʋʋraa: Ado fɩ kɔɔ fʋrɛra ɩ̃ yʋ be makoɲɔɔkɛ wɩ lenɩ a gbɛbɩna kẽkẽ wiir a le a mana kẽkẽ le maasɩ̃ jɔrkɔ̃, ɩ̃ fãga na pɩrɛ sɩ ɩ̃ fi ɩ̃ ho tɩɩ ba. 14 Dɩ a daarʋrɛ sa le a mana kẽkẽ le maasɩ̃ kpãbire sa phã: Samɩsɔ̃! Fɩlɩsɩtɛ̃sɔ n ɩnɛ! Dɩ a jaarɛ daanɔ, a phɩɩr kpãbire na kẽkẽ le maasɩ̃ɩ a phɩɩrna ɔɔ jɔrkɔ̃ fɛw. 15 Dɩ Dalɩla so: Gɛr fɩ soro fɩ na mɛrɩ? Afɩ harakɛ na ha mara'! Hɩnɛ balãther ha gɩrɛ ɓoɓo fɩ fɩɩl mɩnɩ sɩ fa nɩ mar kana afɩ nɔ kpaa fãgara n thena'. 16 Dɩ wire wo wire mɛna Dalɩla n ɔ'ɔrɔɔ na ga thɩmɩɩra a n haa hɩɩra', dɩ Samɩsɔ̃ thʋ̃ vɔɔrakɛ aa puno na dɛna khir bã. 17 Dɩ a khɛrraarɛ haar dɩphã fɛw a sʋʋraa: Baka na ka ɩ̃ yʋɔɔkɛ babɩɛllaka' gɩdonɩ wɩ gba mɛr a ha Thãgba Kɔ̃tɩnna a fʋna bɔɔkɛ mɩ kɔɔ hanɩnakɛ ɩ̃ nɩɩ bɩnɔ. Ado ɩ̃ yʋsũukɛ kɔɔ khabɩrɛ, ga dor ɩ̃ fãga na kɔɔ pɩrɛ dɩ ma fire na ho tɩɩ ba.
18 Dɩ mɔ̃ Dalɩla jɩnɩ a khɛr narɛ ɔɔ ha dɩphã fɛw, a thʋɔn a so Fɩlɩsɩtɛ̃sɔɔ jamanasɔra ayɩ: Nɛnɛ̃ wer nɩ ɩna, gɩdonɩ a khɛr marɛ ɔɔ ha fɛw. Dɩ Fɩlɩsɩtɛ̃sɔɔ jamaasɔɔle fʋrɔrɛ mũsumona awɩ ɲɔ̃kɔɔ a jalna. 19 Dɩ Dalɩla cʋʋrɛ Samɩsɔ̃ dɩ daar ɔɔ nɛra sa we kuun bɩɛl. Dɩ a khabɩrɛ Samɩsɔ̃ɔ yʋbe makoɲɔra a ma da n jʋʋ thale, gɩdonɩ ɔɔ fãga thɩɩraarɛ mɛ̃. 20 Agɩpɩ a phaan: Samɩsɔ̃! Fɩlɩsɩtɛ̃sɔ n ɩnɛ! Dɩ jaa daanɔ a kpɩɛr ɩna vǝǝn a na taa caca khaara, gɩdonɩ aa kɔɔ jɩ dɩ Thãgba Kɔ̃tɩn hɛllɛ sa fagʋa'. 21 Dɩ Fɩlɩsɩtɛ̃sɔ fʋʋrɛ a cɩɩrʋ yinǝ sa jalnaa Gaja a lii na ther sɛ jɔrkɔ̃ kpẽkperẽ sa pɩɛraa naana da n nã bile le khaɩra. 22 Sɩ ga bɔɔle ɔɔ yʋsũukɛ wɩ kɔɔ khabɩnɩ fʋrɛ dɩ ga n phu.
Samɩsɔ̃ɔ pɩpɩɩ hel tiir na ɔɔ khi
23 Dɩ wi bɩɛl Fɩlɩsɩtɛ̃sɔɔ jamanasɔ kpar kha a jɛ wɩ ji bonɩ kɔ̃tɩ̃ɩ Dagɔna, kɛ dɔnɩ awɩ thãgba, wɩ kãkana gɩdonɩ wɩ sor: «Asɩ thãgba fʋrɛ Samɩsɔ̃ asɩ lãlaardaarra a ha sɩ waa». 24 Dɩ ɔbɔɔkɛ tɩbɩla yɩnɩ Samɩsɔ̃, wɩ n kpãgarɛ awɩ thãgba dɩ wa n sona ayɩ: «Asɩ thãgba fʋrɛ asɩ lãlaardaarra a ha sɩ. Ɔrra n kɔɔ kʋɛa asɩ dɩ da n kʋʋrna asɩ too hǝrǝrera». 25 Dɩ mɔ̃ daw jɔ warnɩ mɛ̃, wɩ sor: «Nɩ wɛ Samɩsɔ̃ ɛna a sa sɩ bɩna!» Dɩ wɩ wer Samɩsɔ̃ khaɩra a pɔna awɩ ƴɛbʋrɔ da n pɛ war mathɩ̃. Dɩ wɩ pɩɛrɛ thɩrkaraa thɩ̃thɩɩn. 26 Dɩ Samɩsɔ̃ sor daɓolbirǝǝkɛ n fʋɔnɛɛnɩ ɲɔ̃ɔ ayɩ: «Faa mɩ ɩ̃ fʋ thɩrkaraakɛ tɩɛnɩ cʋɔr ɩ̃ puno ɩ̃ ƴɛl gar».
27 Cʋɔrɩle kɔɔ hinǝne tɩbɩla : kona na khɛra. Fɩlɩsɩtɛ̃sɔɔ jamanasɔ fɛw kɔɔ hale. Tɩbɩlaakɛ kɔɔ hanɩle nãsʋrɔ kona na khɛra dɩ wa n hɩɩn Samɩsɔ̃ kɛ n pɛ warnɩ mathɩ̃, wɩ thɔɔrɛ tɩbɩla gbɩlanɩ yẽthersɔ (3.000). 28 Dɩ Samɩsɔ̃ bɩɛllɛ Thãgba Kɔ̃tɩn ayɩ: «Kɔ̃tɩn Thãgba Kɔ̃tɩn wei! Jɛna mɩnakɛ mɩ bɩɛl fɛr. O! Ɩ̃ Thãgba! Hana mɩ fãgarakɛ nɛnɛ̃daakɛ dɩbara gɩ do nɔɔ babɩɛldaa dɩbara ɩ̃ puno ɩ̃ tiir helu Fɩlɩsɩtɛ̃sɔra yinǝ yeɲɔraakɛ wɩ cɩɩr mɩnɩ!» 29 Agɩpɩ Samɩsɔ̃ fʋrɛ thɩrkara yeɲɔɔkɛ cʋɔr dɛɛnɔnɩ, bɩɛl ɲɔ̃bɔɔra bɩɛl ɲɔ̃bɩlana, sa tɔ. 30 Dɩ a sor: «Ɩ̃ khe kha na Fɩlɩsɩtɛ̃sɔ!» Dɩ a khule sa tɔ na fãga. Dɩ cʋɔr khar a thi Fɩlɩsɩtɛ̃sɔɔ jamanasɔra na tɩbɩlala fɛʋʋkɛ kɔɔ hanɩle. Dɩɩ do wɩrɛ a kʋʋrnɩ ɔɔ khi bɔɔ jɔrrɛ a jɔ wɩrɛ a kʋʋrnɩ ɔɔ yi hana bɔɔ. 31 Dɩ ɔɔ õkũusɔ na ɔɔ thɩɩ too fɛw gbune a gba ɔɔ khi a kɛrna kɔna a dʋʋ ɔɔ thɩ Manoaa kara. Kaarɩle hale Sora na Ɛsɩtaɔl thɩ̃thɩɩn. A kɔɔ dor Ɩjɩrayɛl bɩsanana sogʋʋrdaar a cʋʋna yɛna kpelẽ.