SOGƲƲRDARA 15

Samɩsɔ̃ tiire helu Fɩlɩsɩtɛ̃sɔra

1 Mɔ̃ ga pʋɔrnɩ gbe bile kha bɔɔ, Samɩsɔ̃ jalnanɛ bʋ ɓolbir a yɩna ɔɔ khɛr. Dɩ a sor ɔɔ thɛɛ kona: Mɩ n ƴaalɛ ɩ̃ lõ ɩ̃ khɛrɩ duu. Sɩ ɔɔ thɛɛ kõ na tu a lona ga. 2 Dɩ a sor Samɩsɔna aa: Mɩ kpɩɛrɛ fa naa bã gɛr gɩ dɩ̃ gbaa ha afɩ alãkha bɩɛl. Sɩ ɔɔ õkhɛr bu na bɔrakɛ a jʋaa? Gbaanɛ a tɔ ɔɔ bara. 3 Dɩ Samɩsɔ̃ so war aa: Nɛnɛ̃ wer dɩphã a mɩ cʋʋ Fɩlɩsɩtɛ̃sɔ puure ma dɩ wara'. 4 Dɩ a jaal a fʋlɛ hɔ̃ bena tãather (300), kɛ a fini sʋʋsɔ a caan kha. Agɩpɩ a gbaar hɔ̃ le, dɩ li bɩɛl sʋʋ yeɲɔ thɩ̃thɩɩn. 5 Agɩpɩ a pɛrɛ dɔɔ hɔ̃ lera sa faa hɔ̃ benaale dɩ wɩ lõ Fɩlɩsɩtɛ̃sɔɔ bile lɛsɔra, dɩ dɔɔ mar bile gɩrɛ deranɩ gbʋʋlsɔra na gɩrɛ jɩlɛnɩ ƴũu a hɩ̃ fɛw a gbananakɛ dɩvɛ̃ thɩr lɩɛsɔ na olivɩ thɩr lɩɛsɔ a hɩ̃ dakha. 6 Dɩ Fɩlɩsɩtɛ̃sɔ na n bule ntɛɛkɛ cʋɛnɩ thalera. Dɩ wɩ so war aa: Samɩsɔ̃ gɩ, kɛ dɔnɩ Tɩmɩdaar bɩɛlɩ thɛɛ; gɩdonɩ ɔɔ thɛɛ kɔɔ gbaar ɔɔ khɛr a ha ɔɔ alãkha bɩɛl, gɛr gɩ. Dɩ Fɩlɩsɩtɛ̃sɔ jaal a thii khebirile na ɔɔ thɩ. 7 Dɩ Samɩsɔ̃ so war: Gɩdonɩ thale nɩ n cʋʋ, a ma tiir nar helu a hǝ', ma sɩrɔa'. 8 Dɩ a kʋʋr wɛr dɩɩ dã wɩ agɩpɩ dɩ gba jal a wɔ̃ boka kaarra, Etam bǝǝnnǝ.

Samɩsɔ̃ kʋʋrɛ Fɩlɩsɩtɛ̃sɔ

9 Agɩpɩ Fɩlɩsɩtɛ̃sɔ jaal a jɛ wɩ kena Judaa mǝlsɔ, dɩ wɩ derre foo a jal dana Lehi bǝǝnnǝ. 10 Dɩ Judaa mǝlsɔ bule wɩ ayɩ: Aɲera nɩ ɩ̃ nɩ kena sɩ? Dɩ wɩ so war: Samɩsɔ̃ sɩ ɩ̃ sɩ fʋ sɩ li, sɩ cʋgʋʋ mɔna a kɔɔ cʋʋ sɩnɩ. 11 Liir Juda kona gbɩlanɩ yẽther (3.000) ɩɩr a jal boka kaaraakɛ hanɩ Etam bǝǝnnǝ a bule Samɩsɔ̃ aa: Fa jɩ dɩɩ do Fɩlɩsɩtɛ̃sɔ n kʋmãdɩnɛ saa? Aɲe fɩ cʋʋ sar thale? Dɩ Samɩsɔ̃ birse wɩ aa: Wɛr kɔɔ cʋɛ mɩ dɩ̃ cʋʋ wɩ oti. 12 Dɩ wɩ sʋʋraa: Sɩ ɩnɛ sɩ li fɩ sɩ ha Fɩlɩsɩtɛ̃sɔ. Dɩ Samɩsɔ̃ birse wɩ aa: Nɩ ʋlfɛnɛ a yɛ na kʋ ma'. 13 Dɩ wɩ sʋʋraa: Kpei! Sɩ n ƴaalɛ dɩbara sɩ li fɩ sɩ ha wɩ; sa n ƴaal sɩ kʋ fa'. Dɩ wɩ liire na pɛ̃ phana yeɲɔ a thenaa boka kaara. 14 Ɔbɔɔkɛ Samɩsɔ̃ danɩ Lehi bǝǝnnǝ, Fɩlɩsɩtɛ̃sɔ n caanʋʋnɛ na hulẽbi khena. Dɩ Thãgba Kɔ̃tɩnɩ Thu har Samɩsɔna. Dɩ pɛ̃ɛkɛ wɩ linǝǝnɩ ɲɛ̃ɛ debire a ho balãsɩ pɛ̃ɛ gɩ dɩ dɔɔ hɩ̃. Dɩ ɔɔ lida thʋbɩrɛ dapaara ɲɛɛna. 15 Dɩ a yɩrɛ kũkǝ̃ gbʋa khubi huu thɩɩra, dɩ a gbaar gbʋa khubiilera a kʋna tɩbɩla gbɩlanɩ(1000). 16 Dɩ Samɩsɔ̃ so:

Na kũkǝ̃ gbʋa khu bɩɛl

sɩ dɩ̃ der khe gbulona, gbulona.

Ɔɔ, na kũkǝ̃ gbʋa khubi bɩɛl,

sɩ dɩ̃ kʋ kona gbɩlanɩ (1.000).

17 Ɔbɔɔkɛ a mɩɩnɩ gele pɩ, a dʋnanɛ gbʋa khubiile faa. Gɛr gɩ dɩ wa n we paarɩle: Rama-Lehi, kɩrʋ dʋɔn gbʋa khubi gɔ̃gʋɔn. 18 Agɩpɩ yɔlkhaa hor ga lɩɛrɛ Samɩsɔ̃ dɩ bɩɛl Thãgba Kɔ̃tɩn ayɩ: Fɛrkɛ gbaanɩ mɛr afɩ thɔ̃daar a 'laana taa kɔ̃tɩ̃ caarɩkɛ, ɩ̃ khe yɔlkhaara Fɩlɩsɩtɛ̃sɔɔkɛ na kuroni khʋa' n puno mɩ ya? 19 Dɩ Thãgba lɩɛr boka kaarɩkɛ hanɩle Lehi dɩ ɲʋɔn thero. Dɩ Samɩsɔ̃ ɲɔr dɩ haar birsee dɩ 'lɛ yire. Gɛr gɩ dɩ wɩ dʋ ɲɔ bu kaarɩle ire Ɛn-Hakore kɩrʋ dʋɔn ʋrɛ n bɩɛlɛnɩɩ ɲɔ bu ka. Ɲɔ bu kaarɩle halerakɛ nĩ 'lo Lehi. 20 Ga bɔɔkɛ Fɩlɩsɩtɛ̃sɔ n kʋmãdɩnɩ gɛr Samɩsɔ̃ doro Ɩjɩrayɛl bɩsanaa so gʋʋrdaar a cʋʋna yɛna kpelẽ.