Samɩsɔ̃ her Fɩlɩsɩtɛ̃ khɛr
14
1 Dɩ wi bɩɛl Samɩsɔ̃ jaal Tɩmɩna dɩɩra a yɩ le khɛr bɩɛl, Fɩlɩsɩtɛ̃sɔɔ khebisɔra. 2 Dɩ ɔbɔɔkɛ a kɛrnɩ bir a sor ɔɔ thɩ na ɔɔ nɩra ayɩ: Mɩ yɩrɛ khɛr bɩɛl Tɩmɩna dɩɩra, Fɩlɩsɩtɛ̃ kheminǝǝ thɩ̃thɩɩn, dɩ ma n ƴaal nɩ jalla a bɩɛlɛ a ha mɩ ɩ̃ he. 3 Dɩ ɔɔ thɩ na ɔɔ nɩ bulee ayɩ: Fa yɩ khebir kɛ afɩ omɩsɔɔ pa dɩ afɩ casɔɔ pa ga dɩ fa n jal fɩ gba khɛr Fɩlɩsɩtɛ̃sɔɔ thɩ̃thɩɩn, kɛ na n kuroni khʋ̃a' bɛ? Dɩ Samɩsɔ̃ birse ɔɔ thɩ aa: Ɔr daan mar, bɩɛlɛ ɔr a ha mɩ. 4 Ɔɔ thɩ na ɔɔ nɩ na kɔɔ jɩ dɩɩ do Thãgba Kɔ̃tɩn pɩɛraa kpɩɛr caarɩla'. Sɩɩ do hʋɛ a n ƴaal, sɩ a ƴaal Fɩlɩsɩtɛ̃sɔ nʋɔ, gɩdonɩ dabɔɔle Fɩlɩsɩtɛ̃sɔ n pɔtɔrɔnɛ Ɩjɩrayɛl bɩsana. 5 Dɩ Samɩsɔ̃ jaal Tɩmɩna na ɔɔ thɩ na ɔɔ nɩ. Dɩ mɔ̃ wɩ danɩ dɩvɛ̃ thɩr lɩɛɛkɛ hanɩ Tɩmɩna dɩ nʋɔra, dapaara sidũ'ũ ɓollʋ ther na oore da n caan Samɩsɔ̃. 6 Dɩ Thãgba Kɔ̃tɩnɩ Thu har Samɩsɔna, dɩ fʋ sidũ'ũu na ɲɛ̃biirera a ɓǝǝru mɔ̃ wɩ n ɓǝǝrni bʋ̃bir sɩ aa mɩɛrakɛ ɔɔ thɩ na ɔɔ nɩ gɩrɛ a cʋʋna'. 7 Dɩ a jaal a mɩɩna khɛrra. Dɩ khɛrra daaraarɛ na sobɔr.8 Mɔ̃ ga pʋɔrnɩ gbe Samɩsɔ̃ birre kɛr le Tɩmɩna ɩnɩ n kpa khɛrra. Dɩ a lɩ̃ɛ ɩnɩ n hɩɩn sidũ'ũ khirera. Dɩ thɔ hale a ju sidũ'ũ bɩnɔna a mɩ thʋʋr. 9 Dɩ a khor thʋʋrra a fʋrɔ ɲɔ̃kɔɔ a kho hʋɛra. Ɔbɔɔkɛ a danɩ ɔɔ thɩ na ɔɔ nɩɩ pa, a ha wɛr dɩ wɩ kho, sɩ aa mɩɛ wɩ a yɩ sidũ'ũ bɩnɔ ɩnɩ kho thʋʋrra ga.
Sokpa tiirnǝǝkɛ Samɩsɔ̃ sonɩ Fɩlɩsɩtɛ̃sɔra
10 Samɩsɔ̃ɔ thɩ jaal khɛrɩlee pa, dɩ Samɩsɔ̃ gbɛbɩrɛ he fɛtɩ kɔ̃tɩ̃ɩ le gɩdonɩ thale daɓola n cʋʋ. 11 Ɔbɔɔkɛ wɩ yɩnɩ Samɩsɔ̃, wɩ phiire alãkha kpelẽ yʋɔr wa n hana kha na ɔr. 12 Dɩ Samɩsɔ̃ so warɛ ayɩ: Ma dʋ nɛr sokpa tiirnǝ bɩɛl. Ado nɩ jɩ kɩrʋ a mɩɛ mɩ he fɛtɩ we makoɲɔɔkɛ bɩnɔ, ma ha nɛr kẽkena kpelẽ yʋɔr na fɛtɩ kẽkena kpelẽ yʋɔr. 13 Sɩ ado na puno a mɩɛ ma', nɛr na hana mɩ kẽkena kpelẽ yʋɔr na fɛtɩ kẽkena kpelẽ yʋɔr. Dɩ wɩ sʋʋraa: Dɔ afɩ sokpa tiirnǝ dɔɔ sɩ pɛ nũu bɛɛ! 14 Dɩ Samɩsɔ̃ so war ayɩ: Ʋrɛraakɛ n khɔnɩ thɩ̃ khonanɛ n the. Dɩ dakhɩɩra thɩ̃ daw n the. Aɲe gɩ? Dɩ gɩ dãa wire yẽther sɩ wa puno yɩ kɩrʋ a 'laa ga. 15 Dɩ wire makoɲɔ wirera wɩ sor Samɩsɔ̃ɔ khɛrra aa: Fɩlɛ afɩ ko a mɩɛ fɩ sokpaa tiirnǝǝ kɩrra fɩ mɩɛ sɩ dɛ! A fɩ bo sa thii fer, fɛrɛ na afɩ thɩɩ cɔdara fɛw. Phʋʋn paar nɩ we sɩ a ɩna yaa mɔ̃? 16 Dɩ Samɩsɔ̃ khɛr jaal a mɩɩ da n khɩɩna ɔɔ kora aa: Fɩ n laar mɛr, fa na mɩ fɩɩʋraka'. Fɩ dʋrɛ ɩ̃ dɩɩ kũubisɔ sokpa tiirnǝ sɩ fa ƴaallakɛ fɩ mɩɛ mɩ kɩrʋa'. Dɩ Samɩsɔ̃ birsee aa: Ɩ̃ thɩ na ɩ̃ nɩrakɛ ma mɩɛ wɩ kɩrʋa', dɩ fɛr ma mɩɛ ya? 17 Dɩ a n vɔgʋʋrɛ na khɩa foo a dana he fɛtɩ wire makoɲɔɔlera fɛw. Dɩ pɩpɩɩ wire, wire makoɲɔ wirera a mɩɛnʋʋnɛ kɩrʋra gɩdonɩ a n ɔ'ɔrɔɔrɛ ka. Dɩ a gbaar kɩrʋra a mɩɛ ɔɔ dɩɩ kũubisɔ. 18 Dɩ wire makoɲɔ wirera, mɔ̃ wire na lonɩ pa' dɩ kuuminǝ sor Samɩsɔna ayɩ: Aɲe wer hãale a daar a jɔ saagado thʋʋr ga? Dɩ aɲe hãale a hana fãga a jɔ saagado sidũ'ũu ga? Dɩ Samɩsɔ̃ so war: A ga do ɩ̃ na phɩɩrra nɩ kɔɔ gba kʋʋlna ga, na kɔɔ puno na jɩ ɩ̃ sokpa tiirnǝǝkɛɛ kɩrʋa'. 19 Dɩ Thãgba Kɔ̃tɩnɩ Thu har Samɩsɔna dɩ ɩɩr a jal Asɩkalɔ̃ dɩɩra a kʋʋr tɩbɩla kpelẽ yʋɔr sa fʋʋr awɩ kẽkẽsɔ a jalna fɛtɩ kẽkenana a ha wɩrɛɛkɛ tenɩ sokpa tiirnǝnǝ kɩrra. Sɩ nĩkhii fʋʋ dɩ cɩ̃cɩma a kɛr kɔ̃ ɔɔ thɩɩ cɔ. 20 Dɩ wɩ gbaar Samɩsɔ̃ɔ khɛr a ha ɔɔ alãkha bɩɛl, kɛ kɔɔ dʋɔnɩ Samɩsɔ̃ɔ kuun bɩnɔ.