Samɩsɔ̃ɔ kɔ̃ thɩmɩɩ
13
1 Ɩjɩrayɛl bɩsana cʋʋrɛ wo gɩrɛ puuronɩ ka Thãgba Kɔ̃tɩnɩ ƴɛra dɩ Thãgba Kɔ̃tɩn bo wɩ faa Fɩlɩsɩtɛ̃sɔɔ ɲɔ̃kɔɔ a dana yɛna kpalaɲɔ. 2 Dɩ kuun bɩɛl gɩ a kɔɔ hale Sora dɩɩra a do Dãa mǝl dɩ wa n wɩɩ Manoa. Ɔɔ khɛr na kɔɔ kɔ̃ birǝkɛ a yɩa', gɩdonɩ a kõbore. 3 Dɩ Thãgba Kɔ̃tɩnɩ thɔ̃thɔ̃ thu nɩnanɛ ɔɔbara khɛrrara wi bɩɛl a sʋʋraa: Fa kɔ̃ bi wera', gɩdonɩ fɩ kõbore, sɩ hɩnɛ fa hananɛ pɛmɛr a na kɔ̃ kũubir. 4 Gɛr gɩ dɔ bʋrɛ nɛnɛ̃, fa n ɲɔ dɩvɛ̃, dɩ taan ga. Fa n kho dakha thɩ̃ɛɛkɛ sãasɩnɛna'. 5 Fa hananɛ pɛmɛr a na kɔ̃ kũubir. Bakaa na n kaa yʋɔa', gɩdonɩ bɩsaana na dor bɩsaanɩkɛ wɩ kpɛɛnɩ Thãgbara, gɩ fʋna bɔɔkɛ a na hanɩnakɛ ɔɔ nɩɩ bɩnɔ. Ɔr na fʋɔn a na taa Ɩjɩrayɛl bɩsana Fɩlɩsɩtɛ̃sɔɔ ɲɔ̃kɔɔ. 6 Dɩ khɛrɩle kʋɔn a mɩɛ ɔɔ ko aa: Thãgbaa tibil bɩɛl the marɛ, da n hona Thãgbaa thɔ̃thɔ̃ thu, da n kʋ maar hɩɩnɛna. Ma bulee kana a thena', aa mɩɛ mɩ dakha ɔɔ i dɩ̃ jɩ ga. 7 Sɩ a so marɛ aa, ma hananɛ pɛmɛr a na kɔ̃ kũubir. Aa a fʋna nɛnɛ̃, ma n ɲɔ dɩvɛ̃ dɩ taan ga; aa ma n kho thɩ̃ɛɛkɛ n sãasɩnɛna'; gɩdonɩ bɩsaana na dor bɩsaanɩkɛ wɩ hanɩ Thãgba, gɩ fʋna bɔɔkɛ a na hanɩnakɛ ɔɔ nɩɩ bɩnɔ, phaphapha gɩ dana ɔɔ khi wib.8 Dɩ Manoa bɩɛlɛ Thãgba Kɔ̃tɩn thakɛ ayɩ: O! Kɔ̃tɩn, dɔ Thãgbaa tibilikɛra fɩ kɔɔ thɔnɩ n bir a ɩ̃ wo asɩ pa a dɩɩr sɩ gɩrɛ sɩ teenanɩ sɩ cʋɛ birǝkɛra wa kɔnɩ! 9 Dɩ Thãgba ture Manoaa bɩɛl. Dɩ ɔɔ thɔ̃thɔ̃ thurǝ bir pɔ khɛrɩ para wo. Lɔɔ a kɔɔ ha a too, sɩ ɔɔ ko Manoa na kɔɔ ha kha na ɔra'. 10 Dɩ a car khǝ̃khǝ̃khǝ̃ a jal so ɔɔ kora ayɩ: Hɩnɛ kuunikɛra kɔɔ ɩna marnɩ dawi bire the mar wo. 11 Dɩ Manoa ɩɩrɛ a kpa ɔɔ khɛra a jal tibililee pa a bulee: Fɛr kɔɔ mɩana khɛrɩkɛɛ? Dɩ birsee: Ɔɔ, mɛr gɩ. 12 Dɩ Manoa bir bulee ayɩ: Nɛnɛ̃ ado afɩ thɩmɩɩra ɩ̃ a dã oti, aɲe teana sɩ cʋɛ bɩsaanana na aɲe teana a cʋɛ? 13 Dɩ Thãgba Kɔ̃tɩnɩ thɔ̃thɔ̃ thurǝ sʋʋraa: Afɩ khɛr teenanɛ a cʋɛ gɩrɛ fɛʋʋkɛra mɩ kɔɔ sʋʋraanɩ. 14 A na n kho thɩ̃ɛɛkɛ sɩɛnɩ dɩvɛ̃ thɩrʋra ga. A na n ɲɔ dɩvɛ̃ dɩ taan ga. A na n kho thɩ̃ɛɛkɛ n sãasɩnɛna'. A fɔ ɩ̃ nɔɔkɛra mɩ kɔɔ mɩɛɛnɩ. 15 Dɩ Manoa so Thãgba Kɔ̃tɩnɩ thɔ̃thɔ̃ thurǝ aa: Pɩɛrɛ sɩ gbe, sɩ gbɛbɩrɩ fɩ bʋ ɓollʋ. 16 Dɩ Thãgba Kɔ̃tɩnɩ thɔ̃thɔ̃ thu sʋʋraa: A mɩ pɩɛrrakɛ sɩ ma kho afɩ dɩkoa'. Sɩ ado fɩ n ƴaalɛ fɩ ji Thãgba Kɔ̃tɩnna bonɩ thiinǝ, je! Manoa na kɔɔ jɩ dɩ Thãgba Kɔ̃tɩnɩ thɔ̃thɔ̃ thu ga. 17 Dɩ a bire bule Thãgba Kɔ̃tɩnɩ thɔ̃thɔ̃ thurǝ aa: Mɔ̃ afɩ i n do? Gɩ do nɔɔ ado afɩ thɩmɩɩra ɩ̃ a ha oti sɩ puno sɩ fʋɔr fɩ? 18 Dɩ Thãgba Kɔ̃tɩnɩ thɔ̃thɔ̃ thu birsee: Aɲe gɩ dɩ fa n bule ɩ̃ i? Nɔ kpaa ire gɩ. 19 Dɩ Manoa gbaar bʋ ɓollʋla a gbɛbɩnɩ na thɩ̃ bi bonɩɛ, a jinǝ bonɩ thiinǝ Thãgba Kɔ̃tɩnna nãabʋʋna ƴũu. Dɩ nɔ kpaa thɩ̃ɛ cʋʋrɛ Manoa na ɔɔ khɛrɩ ƴɛra ɔbɔɔkɛ wɩ n hɩɩnɩ. 20 Mɔ̃ dɔ lɩnanɛ thenɩ bonɩ ji paara dɩ a n jʋʋn ƴũu, Thãgba Kɔ̃tɩnɩ thɔ̃thɔ̃ thuule jʋʋnɛ na dɔ lɩnanɛɛle. Mɔ̃ Manoa na ɔɔ khɛr yɩɛnɩ thale, wɩ gʋɛrɛ ƴɩɛ thɩɩra. 21 Dɩ Thãgba Kɔ̃tɩnɩ thɔ̃thɔ̃ thuule na bir nɩna ɔɔbara Manoa na ɔɔ khɛrra bã. Le Manoa jɩ dɩ Thãgba Kɔ̃tɩnɩ thɔ̃thɔ̃ thu kɔɔ gɩ. 22 Dɩ sor ɔɔ khɛrra aa: Baalɛ na hala', sa khiire gɩdonɩ sɩ yɩrɛ Thãgba. 23 Dɩ ɔɔ khɛr sʋʋraa ayɩ: Ɔ̃'ɔ̃, sa khiirǝ'. Ado Thãgba Kɔ̃tɩn kɔɔ ƴaalɛ a kʋʋr sɩ, a na kɔɔ tee asɩ bonɩ thiinǝ na asɩ khaarda ga; a na kɔɔ nɩna sɩ gɩrɛ sɩ yɩnɩ gɩra', a na cʋʋ sɩ dakha dɩ sa nɩ gɩrɛ sɩ nɩnɩ gɩra'.