Kʋʋr Efɩrayɩmɩ mǝlsɔ na Galaadɩdarara
12
1 Efɩrayɩmɩ mǝlsɔra, kona kpar kha a jal a seer Jʋrdɛ̃ mɩɩr sa jal Safɔ̃ dɩɩra a bule Jɛfɩte aa: Mɔ̃gɩdo dɩ fɩ jal a kena Amɔ̃ɔ mǝlsɔ, sɩ fa we sɩ dɩ sɩ jal kha ga? Foo sɩ thii fɩ cʋɔr na fɛrɛ dakha. 2 Dɩ Jɛfɩte so war: Mɛrɛ na ɩ̃ too, sɩ kɔɔ hananɛ thʋ̃ kha na Amɔ̃ɔ mǝlsɔ dɩɩ kɔ̃tɩ̃ ka. Dɩ mɩ kɔɔ we ner sɩ nɛr na ɩna a taa mɩ awɩ ɲɔ̃kɔa'. 3 Dɩ mɩ yɩɛnɩ dɩ na n ɩ̃ nɩ taa ma', gɛr gɩ dɩ̃ tu khir sa jal dɩbara a kena Amɔ̃ɔ mǝlsɔ. Dɩ Thãgba Kɔ̃tɩn bo wer a to mɩ ɲɔ̃kɔɔ; dɩ aɲera nɩ n ɩ̃ nĩ nɩ kena mɩ kʋʋr? 4 Dɩ Jɛfɩte kpar Galaadɩ kona fɛw a der kʋʋrra. Dɩ Galaadɩdara punone Efɩrayɩmɩ mǝlsɔ, kɛ kɔɔ sɔnɩ Galaadɩdarara aa: Nɛr Galaadɩdara, nɩ n caalɛlɛ baba ka. Nɩ ther Efɩrayɩmɩ mǝlsɔ dʋɔ a lõ Manasee mǝlsɔ dʋɔ. 5 Dɩ Galaadɩdara teere Jʋrdɛ̃ ɓɛlɛ̃ paarsɔ a var Efɩrayɩmɩ mǝlsɔ seer paar. A Efɩrayɩmɩ mǝl ntɛ yɩ ɩnɩ n ƴaalɛ ɩnɩ n seer, Galaadɩdara n fʋʋrɛ a bulee: Efɩrayɩmɩ mǝl ha fɩ ya? Dɩ ntɛ n so: Ooho. 6 Dɩ wɩ sʋʋraa: Dɩ sɔ 'Cibolɛtɩ'. Dɩ a ntɛ na puno a so Galaadɩdaraa kha ga, sa so Sɩbolɛtɩ, dɩ wɩ fʋʋ a kʋ liirǝ Jʋrdɛ̃ ɓɛlɛ̃ pa nʋɔra. Dɩ Efɩrayɩmɩ mǝlsɔkɛ wɩ kʋʋrnɩ dabɔɔle wɩ har tɩbɩla gbɩlanɩ kpalaɲɔ yeɲɔ (42.000). 7 Yɛna maadõ Jɛfɩteekɛ donɩ Galaadɩdaar do so gʋʋrdaar Ɩjɩrayɛl bɩsanana a dana. Agɩpɩ a khire dɩ wɩ dʋʋrɛ le dɩ bɩɛlla Galaadɩ bǝǝnnǝ.Nyẽbe yʋɔr phe bire kuun khaa : Ɩbɩsã
8 Mɔ̃ Jɛfɩte karɔnɩ pɩ, Ɩbɩsãakɛ thɛnɩ Bɛtɩlɛhɛm dɩɩra kɔɔ dʋɔn so gʋʋrdaar Ɩjɩrayɛl bɩsanana. 9 A hananɛ bikona kpelẽ yʋɔr na bikhɛna kpelẽ yʋɔrɩkɛ a 'laanɩ dɩ wɩ he fɛw jɩɛra, sa gba jɛ kheminǝ a ha ɔɔ bikũusɔ. A dor so gʋʋrdaar Ɩjɩrayɛl bɩsanana a dana yɛna makoɲɔ. 10 Agɩpɩ Ɩbɩsã khire dɩ wɩ dʋʋ Bɛtɩlɛhɛm.
Nyẽbe yʋɔr kuun khaa : Elɔ̃
11 Mɔ̃ Ɩbɩsã karɔnɩ Elɔ̃ɔkɛ thɛnɩ Jabɩlɔ̃ɔ mǝllǝ kɔɔ dʋɔn so gʋʋrdaar Ɩjɩrayɛl bɩsanana a dana yɛna yʋɔr. 12 Agɩpɩ a khire dɩ wɩ dʋʋ Ayalɔ̃ dɩɩra le Jabɩlɔ̃ɔ mǝlsɔɔ dʋɔ.
Nyẽbe yʋɔr bɩɛl kuun khaa : Abɩdɔ̃
13 Mɔ̃ Elɔ̃ karɔnɩ pɩ Hɩlɛlɩ bikuun Abɩdɔ̃, kɛ thɛnɩ Pɩratɔ̃ dɩɩra kɔɔ dʋɔn so gʋʋrdaar Ɩjɩrayɛl bɩsanana. 14 A hananɛ bikona kpalaɲɔ na ɔɔ bisɔɔ bikũusɔ kpelẽ yʋɔr, dɩ wɩ hana kũkǝ̃ ɓolla kpalãther yʋɔr, kɛ wɩ n kpaarnanɩ. A dor so gʋʋrdaar Ɩjɩrayɛl bɩsanana a dana yɛna makõther. 15 Agɩpɩ Hɩlɛlɩ bikuun Abɩdɔ̃, kɛ thɛnɩ Pɩratɔ̃ khire dɩ wɩ dʋʋ Pɩratɔ̃ ɔɔ dʋɔra le Efɩrayɩmɩ mǝlsɔɔ dʋɔ, Amalɛkɩsɔɔ gɔ̃gɔna.