SOGƲƲRDARA 11

Ɲẽbe makõther kuun khaa: Jɛfɩte

1 Kuun bɩɛl kɔɔ hale Galaadɩ bǝǝnnǝ a do koke kpɩɛ da n do Jɛfɩte; thetoo khɛr kɔnaa, sɩ ɔɔ thɩ na n do Galaadɩ. 2 Dɩ Galaadɩ cɔ khɛr kʋɔn kuuminə. Dɩ ɔbɔɔkɛ khɛrɩlee bikũusɔ khʋɔnɩ pɩ, wɩ weere Jɛfɩte cʋɔrɔ a faa sa sʋʋraa: Fa 'lɛ asɩ thɩɩ thã', gɩdonɩ khɛr kpɩɩ bɩsã ha fɩ.

3 Dɩ Jɛfɩte car ɔɔ õkũusɔra a jal too Tɔbɩ bǝǝnnǝ a hʋnɔna wɩ. Dɩ tɩɩ kparaasɔ kpar pɔ a ɓaanaa dɩ wɩ tagɩrɩ kha thɩ̃ɛ a na kpaarna. 4 Ga jɩɩ pʋɔra', sɩ dɩɩ do Amɔ̃ɔ mǝlsɔ ɩɩrnanɛ kʋʋr Ɩjɩrayɛl bɩsanana. 5 Dɩ mɔ̃ Amɔ̃ɔ mǝlsɔ ɩɩrnanɩ kʋʋr Ɩjɩrayɛl bɩsanana, Galaadɩ kɔ̃tɩna jaal a ƴaal Jɛfɩte le Tɔbɩ bǝǝnnǝ. 6 Dɩ wɩ sʋʋraarɛ aa: Ɩna a dɔ asɩ sɔrasɩ kɔ̃tɩ̃, sɩ kena Amɔ̃ɔ mǝlsɔ. 7 Dɩ Jɛfɩte bule Galaadɩ kɔ̃tɩna ayɩ: Na n kɔɔ laar mɩ, a wee mɩ ɩ̃ thɩɩ cɔaa? Mɔ̃gɩdo dɩ nɩ ha nɩwɛra nɛnɛ̃ dɩ na n ɩ̃ mar? 8 Dɩ Galaadɩ kɔ̃tɩnaale birsee aa: Gɛrra dɔ nɔɔ dɩ sa n ɩ̃ far, fɩ ɩna ɓana sar a kɛna Amɔ̃ɔ mǝlsɔ, sa dɔ asɩ kɔ̃tɩ̃, na Galaadɩdara fɛʋʋ kɔ̃tɩ̃. 9 Dɩ Jɛfɩte so Galaadɩ kɔ̃tɩnana: A nɩ kɛrna mɩ a birnǝ ɩ̃ kɛna Amɔ̃ɔ mǝlsɔ, dɩ Thãgba Kɔ̃tɩn bo wɩ a to ɩ̃ ɲɔ̃kɔɔ, mɛrra na dʋɔn anɩ kɔ̃tɩ̃ ger dɛ! 10 Dɩ Galaadɩ kɔ̃tɩnaale tu aa: Ado sa cʋʋ gɩrɛ fɩ sonaa waa, Thãgba Kɔ̃tɩn na n hɩnɛ sɩ. 11 Dɩ le dɩphã Jɛfɩte jal kha na Galaadɩ kɔ̃tɩna. Dɩ tɩbɩla pɩɛrɛ ƴɛ kʋʋlɔ dɩ do ƴɛ gban na sɔrasɩ kɔ̃tɩ̃. Dɩ Jɛfɩte 'lorore thɩmɩaakɛra a kɔɔ sonɩ fɛw Thãgba Kɔ̃tɩnɩ ƴɛbʋrɔ, le Mɩsɩpa dɩɩra.

Jɛfɩte mɩɩnanɛ Amɔ̃ɔ mǝlsɔɔ jamana

12 Jɛfɩte thʋɔn thɔ̃thɔna Amɔ̃ɔ mǝlsɔɔ jamanaa pa wɩ bulenee: Aɲee so ca sɩ ha kha dɩ fa n ɩ̃ fɩ kena mɩ na ɩ̃ dɩ? 13 Dɩ Amɔ̃ɔ məlsɔɔ jamana birse Jɛfɩtee thɔ̃thɔna ayɩ: Ɩjɩrayɛl bɩsana tea ɩ̃ dɩ ɔbɔɔkɛ wɩ thenɩ Ejipiti a ɩ̃. A fʋna Arnɔ̃ kɔlɔna a jalna dana Yabɔkɩ kɔlɔ̃, foo a jalna dana Jʋrdɛ̃ mɩɩr. 'Laanɛ gɩ nɛnɛ̃ hɛlɛlɛlɛ.

14 Dɩ Jɛfɩte bir thʋɔnaa thɔ̃thɔnana wo, 15 aa wɩ sʋɔraa ayɛ: Mɛr Jɛfɩte sɔ ayɩ: Ɩjɩrayɛl bɩsana na tee Moabɩ dɩɩ dɩ Amɔ̃ɔ mǝlsɔɔ dɩ ga. 16 Gɩdonɩ ɔbɔɔkɛ wɩ thenɩ Ejipiti dɩɩra, bǝ̃ kparara wɩ ɩɩr phaphapha a dana laɲɔ̃ sɩɛ, a jal dã Kadɛsɩ dɩɩra. 17 Dɩ le wɩ thɔ̃ thɔ̃thɔna Edɔ̃ jamanana a bɩɛllaa hʋɛ sɩ ɩnɩ n kana ɔɔ dɩ, Edɔ̃ jamana tɔ̃ wɩ hʋɛ. Dɩ Ɩjɩrayɛl bɩsana thɔnanɛ bɩɛl nɔ bɩɛllɩlera Moabɩ jamanana, dɩ ɔr dakha tɔ̃ wɩ ka paar. Dɩ Ɩjɩrayɛl bɩsana tha thʋnɔ a too Kadɛsɩ. 18 Agɩpɩ dɩ wɩ lona bǝ̃ kpara a golõ fi Edɔ̃ dɩɩra, na Moabɩ dɩɩra, a finǝ Moabɩ dɩ wi phã paar a jal jɛ Arnɔ̃ mɩɩr seero, sɩ wa lõ Moabɩ dɩ thɩɩra ga, gɩdonɩ Arnɔna dʋɔn pɛl na Moabɩ dɩɩ. 19 Dɩ Ɩjɩrayɛl bɩsana thɔnanɛ thɔ̃thɔna Sɩhɔnaakɛ dɔnɩ Amɔɔr məlsɔɔ jamana, kɛ hanɩ Hɛsɩbɔ̃ dɩɩra a bɩɛllaa hʋɛ sɩ ɩnɩ n kana ɔɔ dɩ ɩnɩ n jal ɩnɩɩ pa, ka ɩnɩ n jalnɩ. 20 Sɩ Sɩhɔ̃ na kɔɔ hana ha pɛrɛ Ɩjɩrayɛl bɩsanana ga; aa tu na ha wɩ hʋɛ dɩ wa kana ɔɔ da'. Dɩ a kpar ɔɔ too fɛw a jɛ Yahasɩ dɩɩra a kena Ɩjɩrayɛl bɩsana. 21 Sɩ Thãgba Kɔ̃tɩn, Ɩjɩrayɛlɩ Thãgba bor Sɩhɔ̃ na ɔɔ too fɛw a ha Ɩjɩrayɛl bɩsana dɩ wɩ puno wɩ, sa tee dɩɩ Amɔɔr məlsɔraakɛra tɔɔnɩ ga dʋɔɔlera. 22 Thale Ɩjɩrayɛl bɩsana tee Amɔɔr məlsɔɔ dɩ fɛw a fʋ Arnɔ̃ kɔlɔna foo a jalna dana Yabɔkɩ kɔlɔ̃, a fʋ bǝ̃ kparara foo a jalna dana Jʋrdɛ̃ mɩɩrra. 23 Thãgba Kɔ̃tɩn, Ɩjɩrayɛlɩ Thãgba wea Amɔɔr məlsɔ awɩ dʋɔ, sa gba dɩɩ a ha ɔɔ too, dɩ fɛr na tea war ya? 24 Gɩrɛ afɩ thãgba Kɛmɔsɩ ha fɩnɩ fɩ hɩna fa hɩ̃aa? Dɩ mɛna gɩ. Gɩrɛ fɛʋʋkɛ Thãgba Kɔ̃tɩn, asɩ Thãgba ha sɩnɩ sa hɩnɛ kɛ! 25 Fɛr baan Sɩpɔɔrɩ bikuun Balakɩ Moabɩ jamana ya? Sɩ ɔr, aa kɩɩlna Ɩjɩrayɛl bɩsana ga, aa kena wɩ kʋʋr dakha woa'. 26 Yɛna tãather (300) ha gɩrɛ Ɩjɩrayɛl bɩsana toonɩ Hɛsɩbɔ̃ dɩɩra na Aroe dɩɩra na awɩ dɩ bidarasɔra fɛw, na dɩɩsɔraakɛ hanɩ Arnɔ̃ kɔlɔ̃ nʋɔsɔra fɛw. Dɩ aɲe gɩ fa kɔɔ taa war ga bɔɔlera ga? 27 Ga do mɛr dɛ fara', sɩ fɛr ka cʋʋ mar puure, mɔ̃ fɩ n kena mɩnɩ kʋʋr. Thãgba Kɔ̃tɩn, kɛ dɔnɩ so gʋʋrdaar, ɔr n gʋrɛ gɩ nĩ Ɩjɩrayɛl bɩsanana na Amɔ̃ɔ mǝlsɔra. 28 Sɩ Amɔ̃ɔ mǝlsɔɔ jamana na pɛ nũu thɩmɩaakɛ Jɛfɩte thɔnɩ sʋʋraa ga.

Jɛfɩte so nʋɔ

29 Dɩ Thãgba Kɔ̃tɩnɩ thu har Jɛfɩtera dɩ ɩɩr a seer Galaadɩ bǝǝn na Manase mǝli dʋɔ sa jal Mɩsɩpa dɩɩra kɛ hanɩ Galaadɩ bǝǝnnǝ, a the Mɩsɩpa a telẽ Amɔ̃ɔ mǝlsɔɔ pa. 30 Dɩ Jɛfɩte sor nʋɔ Thãgba Kɔ̃tɩnna ayɩ: Ado fɩ ɓã mar dɩ n puno Amɔ̃ɔ mǝlsɔ, 31 tibil wo tibilikɛ na thɛnɩ ɩ̃ cɔ a na n caan mɩ bɔɔraakɛ ma thenɩ Amɔ̃ɔ mǝlsɔɔ pa ma n ɩ̃, ado mɩ ɩ̃ na kǝǝrǝ, ma gbaarɛ na ha fɛr Thãgba Kɔ̃tɩn, ɩ̃ gbaa a ho bonɩ thiinǝ fɛr Thãgba Kɔ̃tɩnna. 32 Agɩpɩ dɩ Jɛfɩte seer Amɔ̃ɔ mǝlsɔra a kena wɩ. Dɩ Thãgba Kɔ̃tɩn bo wer a to Jɛfɩte ɲɔ̃kɔɔ. 33 Dɩ Jɛfɩte kʋʋr wɛr na sobɔr, Aroe dɩɩra, foo a jalna dana Mɩnɩtɩ dɩ khuirǝsɔ, a tee dɩɩ kpelẽ, a jalna phaphapha a dana Abɛl-Keramɩm dɩɩra. Dɩ Amɔ̃ɔ mǝlsɔ thar thʋnɔ sa wur jo Ɩjɩrayɛl bɩsanana.

Jɛfɩte nɔ hɛl thɩmɩɩ na ɔɔ bikhɛr

34 Agɩpɩ Jɛfɩte kɛrɛ a kɔ̃ ɔɔ cɔ Mɩsɩpa. Dɩ hɩnɛ, ɔɔ bikhɛr ther a bɩ̃ gõgʋ̃ʋ a sana bɩna da n caanaa. Ɔrra dʋɔn ɔɔ bi bɩɛl 'lẽ 'lẽ 'lẽ. Aa hala', aa hana kũubir yaa, dɩ khebir kpɩɩ gɩ bã. 35 Ɔbɔɔkɛ Jɛfɩte na yɩɩnɩ a ɓǝǝre ɔɔ kẽkẽsɔ sa hulẽ: Hu! Ɩ̃ bikhɛr ya! Fɩ kʋ mɛr. Fɩ gbɛbɩnanɛ wɩrɛ n ʋʋnɛ marnɩ a do bɩɛl ! Mɩ so nʋɔ Thãgba Kɔ̃tɩnɩ ƴɛbʋrɔ, ma puno na phɩlã bã. 36 Dɩ ɔɔ bikhɛr sʋʋraa: Ɩ̃ thɩ yaa, ado fɩ so nʋɔ Thãgba Kɔ̃tɩnna, gɩdonɩ Thãgba Kɔ̃tɩn tiir fer helu afɩ lãlaardara Amɔ̃ɔ mǝlsɔra, cʋɛna mɩ gɩrɛra thɛnɩ afɩ nɔra. 37 Sa bir a so ɔɔ thɩra aa: To mɩ bɩɛl bɩɛllaakɛ dɩbara: Ha mɩ bɔɔ, sɩpora yeɲɔ ɩ̃ jal gɔ̃gɔnana na ɩ̃ alãkhasɔ ɩ̃ bɩ mɔ̃ ma henɩ kuuna'. 38 Dɩ ɔɔ thɩ haarɛ hʋɛ a jalla cʋɛ sɩpora yeɲɔra. Dɩ a jaal na ɔɔ alãkhasɔ gɔ̃gɔnana. Dɩ a bɩrɛ mɔ̃ a na henɩ kuuna'. 39 Ɔbɔɔkɛ sɩpora yeɲɔ kanɩ pɩ a kɛrɛ a bir ɔɔ thɩɩ pa, dɩ ɔɔ thɩ hɛlnaa nʋɔɔkɛ a kɔɔ sonɩ. Aa kɔɔ jɩ kuuna'. Ga bɔɔlera gɩ fʋ khorr a do kpam. 40 Yɩɛr wo yɩɛr Ɩjɩrayɛl kheminǝ n jaal a bɩ Galaadɩ Jɛfɩtee bikhɛrɩdara a cʋʋna wire yenã.