Ɲẽbe maadɔ̃ na makoɲɔ kuun kana: Tola na Yayɩɩr
10
1 Ɔbɔɔkɛ Abɩmelɛkɩ khini pɩ, kuun bɩɛlɩkɛ wɩ n wenɩ Tola, ɔɔ thɩ n dʋɔn Puva, sɩ ɔɔ thɩ kɔ̃tɩ̃ na n do Dodo, a do Ɩsakaarɩ mǝl, a ɩɩrɛ ɩnɩ n taa Ɩjɩrayɛl bɩsana. Samɩɩr dɩɩra a the, Efɩrayɩmɩ mǝlsɔ gɔ̃gɔ̃ bənə. 2 A dor sogʋʋrdaar Ɩjɩrayɛl bɩsanana a dana yɛna kpelẽ yẽther, agɩpɩ dɩ khi dɩ wɩ dʋʋ Samɩɩr dɩɩra. 3 Dɩ a karɔrɛ sɩ dɩ kuun bɩɛlɩkɛ wɩ n wenɩ Yayɩɩr deguu, Galaadɩ bǝǝnnǝ a the. A dor so gʋʋrdaar Ɩjɩrayɛl bɩsanana a dana yɛna kpelẽ yeɲɔ. 4 A kɔɔ hananɛ bikona kpelẽ yʋɔr, dɩ wɩ hana kũkǝ̃ ɓolla kpelẽ yʋɔr, kɛ wɩ n kpaarnanɩ. Dɩ wɩ hananɛ dɩ kɔ̃tɩna kpelẽ yʋɔr, dɩ wa n we gɩ nĩnakɛ 'lo Yayɩɩr dɩsɔ. Gɩ hale 'lo Galaadɩ bǝǝnnǝ. 5 Agɩpɩ Yayɩɩr khire dɩ wɩ dʋʋ Kamɔ̃ dɩɩra.Amɔ̃ɔ mǝlsɔ n kenanɛ Ɩjɩrayɛl bɩsana kʋʋr
6 Agɩpɩ Ɩjɩrayɛl bɩsana cʋʋrɛ wo gɩrɛ puuronɩ ka Thãgba Kɔ̃tɩnɩ ƴɛra, dɩ wa n fʋɔr Baal thãgbasɔ, na Asɩtarte thãgbasɔ, dɩ wa n fʋɔrna Siiridaraa thãgbasɔ na Sɩdɔ̃daraa thãgbasɔ na Moabɩdaraa thãgbasɔ na Amɔ̃ɔ mǝlsɔɔ thãgbasɔ na Fɩlɩtɛ̃sɔɔ thãgbasɔ sa bo Thãgba Kɔ̃tɩn wa n fʋɔrʋʋ bã. 7 Dɩ nĩkhii fʋrɛ Thãgba Kɔ̃tɩn Ɩjɩrayɛl bɩsanana dɩ bo wɩ faa Fɩlɩsɩtɛ̃sɔ na Amɔ̃ɔ mǝlsɔɔ ɲɔ̃kɔɔ. 8 Dɩ wɩ hʋɔl warɛ a kpoo war ga yɛɛle na sobɔr. Wɩ kpoore Ɩjɩrayɛl bɩsã wɩrɛra tɔɔnɩ Jʋrdɛ̃ mɩɩr iiro Amɔɔr məlsɔɔ dʋɔ Galaadɩ bǝǝnnǝ a dana yɛna yʋɔr makõther. 9 Dɩ Amɔ̃ɔ mǝlsɔ seererakɛ Jʋrdɛ̃ sa jal wɩ kena Judaa ca na Bɛ̃jamɛ̃ɛ ca, na Efɩrayɩmɩ too. Dɩɩ do khar kɔ̃tɩɩna Ɩjɩrayɛl bɩsana ha waa vʋ̃ʋ. 10 Dɩ Ɩjɩrayɛl bɩsana ƴɛɛrɛ Thãgba Kɔ̃tɩn ayɩ: Sɩ cʋʋ farɛ puure gɩdonɩ sɩ kɔɔ bo fer, fɛrkɛ dʋɔnɩ asɩ Thãgba, sɩ dɩ sa n fʋɔr Baal thãgbasɔ. 11 Dɩ Thãgba Kɔ̃tɩn so Ɩjɩrayɛl bɩsanana: Ɔbɔɔkɛ Ejipitidara na Amɔɔr məlsɔ na Amɔ̃ɔ mǝlsɔ, na Fɩlɩtɛ̃sɔ 12 na Sɩdɔ̃dara na Amalɛkɩɩ mǝlsɔ na Mãɔdara n kɔɔ kpoo narnɩ dɩ nɩ ƴɛɛ mɩ, ma kɔɔ taa nɩ awɩ ɲɔ̃kɔaa? 13 Sɩ dɩ nɩ bo mɩ, sɩ na n fʋɔr thãgba kpɩɩsɔ. Gɛr gɩ, ma bir na taa nɩ bã. 14 Nɩ jalla wɛ thãgbasɔɔkɛra nɩ phiirni, wɛr n ɩ̃ wɩ taa nɩ bɔɔkɛra nɩ hanɩ kharrɛra! 15 Dɩ Ɩjɩrayɛl bɩsana birse Thãgba Kɔ̃tɩn ayɩ: Sɩ cʋʋrɛ puure, cʋɛ sɩ mɔ̃ daan farnɩ. Sɩ taa sɩ nɛnɛ̃daaraakɛ wer. 16 Agɩpɩ dɩ wɩ tiir thɩlasɔ awɩ thɩ̃thɩɩn, sa bir dɩ wa n fʋɔr Thãgba Kɔ̃tɩn. Dɩ bʋɔ fʋrɛ Thãgba Kɔ̃tɩn dapaara awɩ bɔgaarra. 17 Dɩ Amɔ̃ɔ mǝlsɔ kpar kha a the jɛ Galaadɩ bǝǝnnǝ, dɩ Ɩjɩrayɛl bɩsana dakha kpa kha a the jɛ Mɩsɩpa dɩɩra. 18 Dɩ tɩbɩla na Galaadɩ kɔ̃tɩna na n bule kha bɩɛlbɩɛl aa, amɛɛ tibil na kɔɔ fʋɔn kʋʋrra caca na Amɔ̃ɔ mǝlsɔ yaa fɛr? Ntɛɛle na dʋɔn kɔ̃tɩn Galaadɩ bǝǝnnǝ fɛw.