Sayul na ɔɔ bikũusɔɔ khiir. \ref 1 Kur 10,13-14; 2 Sam 1; Amɔ 2.14-15
31
1 Fɩlɩsɩtɛ̃sɔ thʋrɛ kʋʋr na Ɩjɩrayɛldara Gɩlboa gɔ̃gʋɔnna. Dɩ Ɩjɩrayɛldara caalɛ, sɩ jɔɔ khiir. 2 Dɩ Fɩlɩsɩtɛ̃sɔ gbʋrɛ Sayul na ɔɔ bikũusɔ, a kʋ Jonatã na Abɩnadab, na Malkɩsuaakɛ dɔnɩ ɔɔ bikũusɔ. 3 Dɩ a fʋna ga bɔɔle kʋʋr jule Sayulla. Fɩlɩsɩtɛ̃ sẽdara thɩɩraarɛ dɩ maar na n lɩɛrʋ da n jẽ awɩ ƴɛra. 4 Dɩ so ʋrɛraakɛ n fɔrɔnɩ ɔɔ koke thɩ̃sɔ ayɩ: «Phɛ afɩ bajɩna a kɔ mɩ, gɩdo nɔɔ wɩrɛ na kuroni khʋ̃a' na n kʋ mɩ a cʋʋ mɩ ɩ̃ yɩ war kharrɛ ga». Sɩ ɔɔ koke thɩ̃ fʋrɔdaarɩle bor, gɩdonɩ maar hor ga hǝrrǝǝre. Dɩ Sayul gbaar bajɩna a bɩ̃ jiro. 5 Dɩ mɔ̃ ɔɔ koke thɩ̃ fʋrɔdaar yɩɩnɩ dɩɩ do a khire, a gbaar ɔɔda dakha a bɩ̃ jiro a khi pɛr. 6 Thale Sayul na ɔɔ bikona yẽther, na ɔɔ koke thɩ̃ fʋrɔdaar na ɔɔ sɔrasɩsɔ fɛw khiir bɔ bɩɛlla wi bɩɛlɩɩlera. 7 Dɩ ɔbɔɔkɛ Ɩjɩrayɛlda wɩrɛ hanɩ ʋlẽ seero, bǝ̃ faana, na wɩrɛ hanɩ Jʋrdɛ̃ iiro yɩɛnɩ dɩ Ɩjɩrayɛldara n caalɛlɛ, dɩ Sayul na ɔɔ bikũusɔ khiire, wɩ faarɛ awɩ dɩsɔ sa caalɛ; dɩ Fɩlɩsɩtɛ̃sɔ jal a gba tooro.8 Dɩ gaa dɩwɩlɔ Fɩlɩsɩtɛ̃sɔ jaal wɩ khɩɩ khee thɩ̃sɔ, a yɩ Sayul na ɔɔ bikũusɔ khiirenɩ Gɩlboa gɔ̃gʋɔnna. 9 Dɩ wɩ kurre Sayuli yʋ, sa tiir ɔɔ koke thɩ̃sɔ. Agɩpɩ wɩ mɩɩrɛ gaa thɩmɩɩr dɩɩ kpaar Fɩlɩsɩtɛ̃sɔɔ dʋɔ fɛw, awɩ thɩl cɔsɔɔra, na tɩbɩlaa thɩ̃thɩɩn. 10 Wɩ gbaar ɔɔ koke thɩ̃sɔɔle a thɩɩn Asɩtaarte thãgba fʋɔr cɔ, sa gba ɔɔ tomɩr a ju Bɛtɩ-Sã dɩ gʋʋra.
11 Dɩ ɔbɔɔkɛ Yabɛsɩdaraakɛ hanɩ Galaadɩ bǝǝnnǝ nɩɛnɩ gɩrɛ Fɩlɩsɩtɛ̃sɔ kɔɔ cʋʋnɩ Sayula, 12 Kuun 'la'lasɔ fɛw ɩɩrɛ, a gba hʋɛ a ɩɩrna dɩtɩnɛɛle fɛw sa dã a ti Sayuli khi na ɔɔ bikũusɔɔda Bɛtɩ-Sã dɩ gʋʋra a birnǝ Yabɛsɩ a thii. 13 Agɩpɩ wɩ kpalmanɛ awɩ khubisɔ a dʋ Yabɛsɩ tamarɩsɩ thɩr kɩrrɔ sa li nʋɔ a cʋʋna wire makoɲɔ.