1 SAMƲƐL 30

Amalɛkɩɩ mǝlsɔ kʋɛrɛ Sɩkɩlaagɩ dɩɩ dɩ Davɩdɩ wee wɩ a kpaan a puno wɩ. \ref 1 Kur 12.20-23; Joj 22.8; Jer 41.11...

1 Wire balãther wirera Davɩdɩ na ɔɔ sɔrasɩsɔ na danɩ Sɩkɩlaagɩ, Amalɛkɩɩ mǝlsɔ kɔɔ lʋʋn Negɛvɩ bǝǝnnǝ a kʋɛ Sɩkɩlaagɩ dɩɩ sa thii. 2 Wɩ fʋlɛlɛ khɛra, na wɩrɛ fɛʋʋkɛ hanɩ le dɩ bɩnɔ, bɩsana na kɔ̃tɩna; wa kɔɔ kʋ tibilǝ', sɩ wɩ kɔɔ fʋlɛ wɛr dɩ wa n jalna. 3 Dɩ Davɩdɩ na ɔɔ sɔrasɩsɔ daan dɩɩra, a yɩɛ dɩɩ do wɩ thiire dɩɩ, sa fʋlɛ awɩ khɛrsɔ, awɩ bikũusɔ na awɩ bikhɛrsɔ. 4 Dɩ Davɩdɩ na tɩbɩlaakɛ a hananɩ kha thʋ khɩa, a khɩɩ waa fãga pɩ wa puno na khɩɩ bã. 5 Amalɛkɩɩ mǝlsɔ kɔɔ jalanɛ dakha Davɩdɩɩ khɛrsɔ yeɲɔɔle: Ahɩnoamɩkɛ thɛnɩ Jɩjɩreyɛl na Abɩgayɛlɩkɛ dɔnɩ Nabalɩkɛ thɛnɩ Karmɛl dɩɩra khikhɛr.

6 Dɩ haar kʋɛrɛ Davɩdɩ koo, gɩdonɩ tɩbɩla n mɩɩrɛ aa wɩ dʋrɛɛ na bokana, mɔ̃ awɩ bikũusɔ na awɩ bikhɛrsɔɔda donɩ wɛr fɛw bɩɛlbɩɛlla kharrɛ na sobɔr. Sɩ Davɩdɩ bire hana 'lar dɩɩ the Thãgba Kɔ̃tɩn ɔɔ Thãgbara. 7 Dɩ a sor Ahɩmɛlɛkɩɩ bikuun bonɩ jidaar Abɩataara: «Gba bonɩ ji kẽkɩɩn kɛ dakha wɩ n ƴaalnanɩ Thãgbaa tuur ɛna ha mɩ». Dɩ Abɩataar gba a haa. 8 Dɩ Davɩdɩ bulele Thãgba Kɔ̃tɩn ayɩ: «Ado mɩ wee tɩbɩlaale ma li wer bɛ? Dɩ Thãgba Kɔ̃tɩn birsee: «Wea wɩ kpaan fa li wer a na taa wɩrɛ wɩ fʋlɛnɩ». 9 Dɩ Davɩdɩ ɩɩr na kona taamaadõokɛ a hananɩ a gba hʋɛ. Dɩ mɔ̃ wɩ danɩ Bɛsɔɔ ɲɔ kɔlɔ̃, 10 kona taaɲɔ vɔɔrɛ wa mar na seera', a too le, sɩ Davɩdɩ wee da n kpaan na kona taanã kɛ sɛnɩ.

11 Dɩ le hʋɔnɔ, Davɩdɩɩ kũusɔ caananɛ Ejipiti kuun a kpaa jalna Davɩdɩra, a haa ɲʋɔn dɩ ɲɔ a hanaa dɩkɔ dɩ kho. 12 Agɩpɩ wɩ haarɛ fɩgɩ thɩr bi khɩ buloo, a hanaa dɩvɛ̃ thɩr bi khɩ buloo yeɲɔ. Dɩ mɔ̃ a khonɩ pɩ, a 'lɛr ɔɔbara gɩdonɩ wire yẽther gɩ kɔɔ cʋʋ sɩ dikor na ɲʋɔn na lʋ̃ʋ nɔa'. 13 Dɩ Davɩdɩ bulee: «Amɛ hɩna fɩ? Dɩ ka fɩ the?» Dɩ birsee: «Ejipitidaar ha mɩ, dɩ̃ do Amalɛkɩɩ mǝl bɩɛlɩ dee. Wire yẽther ha gɩrɛ nĩ, ɩ̃ kɔ̃tɩ̃ bo mɩnɩ faa, gɩdonɩ ma khɩɩra. 14 Kʋʋr sɩ kena Kɛrɛtɩdara, na Judaa dɩɩ too, na Kalɛbɩɩ too, Negɛvɩ bǝǝnnǝ, sa thii Sɩkɩlaagɩ dɩɩ». 15 Dɩ Davɩdɩ sʋʋraa: «Thɔɔ mɩ sɩ kpaan kha ka kokenaalera hanɩ». Dɩ birsee: «Ʋlfɛnɛna mɩ Thãgbaa i dɩ fa kʋ ma', dɩ fa gba mɩ na dʋ ɩ̃ kɔ̃tɩ̃ɩ ɲɛna ga, sɩ sɩ kpaan kha». 16 Dɩ a kpaarɛ dɩ wɩ kpaan, a na phuro, dɩɩ do Amalɛkɩɩ mǝlsɔɔkɛ gbaan dɩɩra fɛw, a kho dɩ wa n ɲɔna dɩ wa n cʋʋna fɛtɩ dɩɩ do thɩ̃ jɔjʋɔkɛra wɩ tagɩrɩnɩ Fɩlɩsɩtɛ̃sɔɔ dʋɔ na Judaa dʋɔ dɔ nɔɔ. 17 Dɩ Davɩdɩ kʋʋr wɩ a fʋna dɩwɩl bɔɔ a kana dana ʋ̃ dɩwɩllɔ dʋɔrɔ. Bɩɛllakɛ na for wɩ ɲɔ̃kɔɔ saagado daɓola taanã (400) wɛɛkɛ jʋnɛnɩ ɲɔɔmɛ̃sɔra a caalɛ gaaga. 18 Dɩ a taarɛ gɩrɛ fɛʋʋkɛ Amalɛkɩɩ mǝlsɔ kɔɔ gbanɩ, a taana dakha ɔɔ khɛrsɔ. 19 Awɩ tibil bɩɛllakɛ na ɓɔrra, dɩ bɩsaan gɩ, dɩ kɔ̃tɩn ga, dɩ bikona wɛ, dɩ bikhɛna wa', dɩ dɩkha gɩ gɩrɛraakɛ wɩ kɔɔ khɩɩna. Davɩdɩ taarɛ fɛw a birnǝ. 20 Dɩ a taarɛ dakha nʋ̃ yɩra na nʋ̃ kɔ̃tɩna fɛw. Dɩ wɩrɛ kʋlɛnɩ nʋmaale ƴɩɛ dɩ wa n jal n sor: «Nɩ yɛkɛ gɩrɛ Davɩdɩ taanɩ kʋʋrra».

21 Dɩ Davɩdɩ daan kona taaɲɔɔkɛ kɔɔ vɔanɩ wa puno wa n kpaaraa ga, kɛ wɩ kɔɔ faanɩ Bɛsɔɔ ɲɔ kɔlɔna. Dɩ wɩ gbaar dɩ wa n caannʋʋ na tɩbɩlaakɛ a hananɩ kha. Dɩ Davɩdɩ tɔr dã wɩ a fʋɔr wɩ. 22 Dɩ fɩl khedarasɔ na wɩrɛra ga gbuni bɩnɔa', wɩrɛraakɛ kɔɔ jallananɩ kha na Davɩdɩ gbaar thɩmɩa a so: «Wa jalnɩ kha na sɛrra', wa ha wɩ thɩ̃ɛ gɩrɛraakɛ sɩ taanɩ kʋʋra saagado ntɛɛ khɛr na ɔɔ bikũusɔ wɩ haa gaaga. Wɩ kpa wɛr a jala». 23 Sɩ Davɩdɩ so wɔɔ: «Ɩ̃ omɩsɔ na n cʋʋ mɛ̃ na thɩ̃ɛɛkɛ Thãgba Kɔ̃tɩn ha sɩna'. A bɛr sɛr a gbananakɛ tɩbɩlaakɛ kɔɔ khɩa sɩnɩ thɩ̃ɛ a dʋ sɩ ɲɔ̃kɔɔ. 24 Dɩ amɛ na pɛ nɩ nũu thɩ̃ caarraakɛ? Ʋrɛ jalanɩ kʋʋrraada na ʋrɛ tɔɔnɩ da n bɛr thɩ̃ɛɛda teenanɛ gɩ mãkhanɛ; wɛr fɛw n gbɛba tɩnɛnɛ».

25 Dɩ thale Davɩdɩ cʋʋ ga wirǝǝle na bɔɔkɛ kpaanɛnɩ. Dɩ wɩ gbaar gelela dɩɩ do jɔfʋ Ɩjɩrayɛl dɩɩra a dana nĩ.

26 Dɩ mɔ̃ Davɩdɩ danɩ Sɩkɩlaagɩ, a ɓɛlɛ thɩ̃ ɩkha a thɔna Juda kɔ̃tɩnana, na ɔɔ kũusɔɔra a sona war: «Anɩ khaarda ha gɩrɛ. Thãgba Kɔ̃tɩnɩ sodaraa thɩnaakɛ sɩ taanɩ le gɩ the». 27 Dɩ mɛ̃ a thɔnasɔ a ha wɩrɛ hanɩ Betɛl, na wɩrɛ hanɩ Negɛvɩ Aramɔtɩ, na wɩrɛ hanɩ Yatɩr, 28 na wɩrɛ hanɩ Aroyɛɛr, na wɩrɛ hanɩ Sɩfɩmɔtɩ, na wɩrɛ hanɩ Ɛsɩtemoa, 29 na wɩrɛ hanɩ Arakal, na wɩrɛ hanɩ Yeramayelɩtɩdaraa dɩsɔɔra, na wɩrɛ hanɩ Kenɩtɩ mǝlsɔɔ dɩsɔɔra, 30 na wɩrɛ hanɩ Hɔrma na wɩrɛ hanɩ Bɔɔr-Asã, na wɩrɛ hanɩ Atakɩ, 31 na wɩrɛ hanɩ Ebʋrɔ̃ na paar wo paarɩkɛ ɔr na ɔɔ kũusɔ kananɩ.