Fɩlɩsɩtɛ̃sɔ bor Davɩdɩ na n kpa nar kʋʋrra ga dɩ kɛr bir Sɩkɩlaagɩ. \ref 1 Sam 28.1-2; 1 Kur 12.20; 2 Tɩm 2.13
29
1 Fɩlɩsɩtɛ̃sɔ kpar awɩ sɔrasɩsɔ fɛw, a jɛ Afɛkɩ. Dɩ Ɩjɩrayɛldara jɛ ɲɔbuka nʋɔraakɛ hanɩ Jɩjɩreyɛl. 2 Fɩlɩsɩtɛ̃ kɔ̃tɩna gbananɛ sɔrasɛ tamaa tamaa na gbɩlanɩ gbɩlanɩ ƴɩɛ, sɩ Davɩdɩ na ɔɔ kũusɔ ha Akɩsɩɩ khiro dɩ wa n jal. 3 Dɩ Fɩlɩsɩtɛ̃ kɔ̃tɩnaale bule: «Aɲe Ebirǝsɔɔkɛ n gba kɩɛr?» Dɩ Akɩsɩ birse wɩ: «Ɩjɩrayɛl jamana Sayuli thɔ̃dodaar Davɩdɩ gɩ. Gɩ daan yɛ bɩɛl agɩbo yɛna yeɲɔ sɩ hanɩ kha gɩrɛ, sɩ ma yɩɩraa dɩɩ a fʋna bɔɔkɛ a danɩ kɛ a dana nǝ̃'». 4 Sɩ nĩkhii fʋlɛlɛ Fɩlɩsɩtɛ̃ kɔ̃tɩnaale Akɩsɩra dɩ wɩ sʋʋraa: «Diǝ kuunikɛ a kɛr a bir dɩɩraakɛ fɩ pɩɛnɩ, a na n jal kha na sɛrɛ kʋʋrra a fi do sar liir sodaara'. Mɔ̃ kuunikɛra wer na kɛr na 'lɛ bɔ jɩɩr ɔɔ kɔ̃tɩ̃ɩ pa; ga do asɩ too yʋsɔ a na birnǝ gaa? 5 Ga do Davɩdɩ irǝra wɩ pɛ nɩɛ dɩ wa n sana aa:«Sayul kʋrɛ gbɩlanɩ (1000)
Dɩ Davɩdɩ kʋ gbɩlanɩ yʋɔrraa (10000)?»
6 Dɩ Akɩsɩ we Davɩdɩ a sʋʋraa: «Yidaar Thãgba Kɔ̃tɩn do, tɩɩ telẽ ha fɩ. Mɩ narra fɩ thɛ kha na mɛrɛ na ɩ̃ sɔrasɩsɔ kʋʋraakɛ gɩdonɩ a fʋna wireekɛ fɩ danɩ ɩ̃ pa a dana nĩ, ma yɩ far dɩkhaa puǝ', sɩ fa da Fɩlɩsɩtɛ̃ kɔ̃tɩnana ga. 7 Nɛnɛ̃ kɛrra birǝ na ha ɩɩ, ga n cʋʋ haar n kʋɛ wa'». 8 Dɩ Davɩdɩ bulee: «Aɲe mɩ cʋʋ? Dɩ aɲe fɩ yɩ mɛr afɩ thɔ̃dodaarra a fʋna wireekɛ mɩ hanɩ kha na fɛrɛ a dana nĩ, dɩ ga pɩɛr mɩ dɩ ma puno na jal na kɛ̃kɛrɛna fɛr ɩ̃ kɔ̃tɩ̃ jamanaa sodara ga?» 9 Dɩ Akɩsɩ birsee: «Sobɔr gɩ, ma yɩ far dɩkhaa puǝ'; fɩ lõ mer haar a ho Thãgbaa thɔ̃thɔ̃ thue. Sɩ Fɩlɩsɩtɛ̃ kɔ̃tɩna bɔ. Wɩ sor, fa n jal kha kʋʋrra na ɩnɛrɛa'. 10 Nɛnɛ̃, mãa ɩɩrɛ duuro phiphi, fɛrɛ na afɩ thɔ̃ dodaraakɛ nɩ ɩnanɩ kha, a maanɔ na dahɩrɛ a kɛra.
11 Dɩ Davɩdɩ na ɔɔ kũusɔ mãa ɩɩrɛ duuro phiphi a kɛr dɩ wa n bir Fɩlɩsɩtɛ̃sɔɔ dʋɔ; sɩ Fɩlɩsɩtɛ̃sɔ gba jal Jɩjɩreyɛl bǝ̃ faana.