28
1 Ga bɔɔraalera Fɩlɩsɩtɛ̃sɔ kpa awɩ sɔrasɩ gbũlõsɔ a gbɛbɩ, wɩ kena Ɩjɩrayɛldara. Dɩ Akɩsɩ so Davɩdɩra: «Fɩ jɩrɛ bɔɔbɔɔ dɩ fɛrɛ na afɩ kũusɔ sɛr fa hana kha gaa?» 2 Dɩ Davɩdɩ birsee: «Ɔɔ, fa yɩrɛ gɩrɛ afɩ thɔ̃dodaar na cʋʋnɩ». Dɩ Akɩsɩ sʋʋraa: «Fɛr ma pɛr fɩ do ɩ̃ bɛrdaar bɔɔ khor».Sayul jaal Eyin-Dɔɔ khɛrɩkɛ n bʋɔnɩɩ pa. \ref 1Sam 27.12; 29; Eja 8.19-20; 1 Kur 10.1-6, 13-14
3 Samʋɛl kɔɔ khire dɩ Ɩjɩrayɛldara bɩɩ, sa dʋʋ ɔɔ dʋɔ Rama. Sayul kɔɔ pɩɛrɛ wɩrɛɛkɛ n bʋɔnɩ na wɩrɛɛkɛ n yɛnɩ gɩrɛ na ɩnanɩ ƴɛ kʋʋlɔ, le dʋɔ.
4 Fɩlɩsɩtɛ̃sɔ kpar kha a jal jɛ Sunɛm. Dɩ Sayul kpa Ɩjɩrayɛldara fɛw dɩ wɩ jɛ Gɩlboa. 5 Mɔ̃ Sayul tornɩ Fɩlɩsɩtɛ̃ sɔrasɛra yire, maar fʋʋrɛ dɩɩ kar, dɩ haar na n jɩ̃ɩ. 6 Dɩ Sayul bɩɛlɛ Thãgba Kɔ̃tɩn, sɩ Thãgba Kɔ̃tɩn na kɔɔ birsee dɩ dǝǝlela gɩ, dɩ Urɩmna gɩ, dɩ Thãgbaa mɩmɩɩsɔ gɩrakɛ dɩ gba mɩɩnaa ga.
7 Dɩ Sayul so ɔɔ thɔ̃ dodarara: «Nɩ ƴaalɛ khɛr ʋkhaakɛ n bʋɔnɩ a hana mɩ, ɩ̃ jal a bo mɩ». Dɩ ɔɔ thɔ̃ dodara sʋʋraa: «Eyin-Dɔɔr dɩɩra, khɛr bɩɛl haleekɛ n mɩananɩ khe». 8 Dɩ Sayul debire kẽkena sa to dakpɩɩsɔ a cʋʋ wa n jɩa', agɩpɩ dɩ kpa kona yeɲɔ dɩ wɩ jal a dana dɩtɩnɛ khɛrɩle pa. Dɩ Sayul sʋʋraa: «Bɔ mɩ, a wɛ khĩdida ʋrɛ ma so farnɩ a the». 9 Dɩ khɛr sʋʋraa: «Fɩ jɩrɛ bɔɔbɔɔ gɩrɛ Sayul cʋʋnɩ, mɔ̃kɛ a pɩɛrnɩ wɩrɛɛkɛ n bʋɔnɩ kɛ dɩɩra, na wɩrɛɛkɛ n yɛnɩ gɩrɛ na ɩnanɩ ƴɛ kʋʋlɔ dʋɔ, dɩ mɔ̃ dɔ nɔɔ dɩ fa n pher pheru ɩ̃ yirǝ fɩ kʋ mɩ? 10 Dɩ Sayul ʋlfɛnaa Thãgba Kɔ̃tɩnɩ i a so: «Na Thãgba Kɔ̃tɩnɩ i, sopuu na hale na 'li fɩ thɩmɩɩraaka'». 11 Dɩ khɛr bulee: «Dɩ amɛ fɩ n ƴaal ɩ̃ cʋɛ a the?» Dɩ Sayul birsee: «Cʋɛ Samʋɛl a the».
12 Dɩ dabɔɔkɛ khɛr yɩnɩ Samʋɛl, a hulene na nɔ kheu sa so Sayulla: «Mɔ̃ dɔ nɔɔ dɩ fɩ fɩɩl mɩ? Sayul ha fɩ». 13 Dɩ jamana sʋʋraa: «Fa n do maar n fʋ fa'. Aɲe fɩ yɩ?» Dɩ khɛr birsee: «Thãgba ʋkha gɩ da n the thɩɩra». 14 Dɩ sʋʋraa: «Mɔ̃ a ha ?» Dɩ khɛr birsee: «Kuun kɔ̃tɩ̃ɩ gɩ, a paar kẽkẽ gbãa da n the». Dɩ Sayul jirɛ dɩ Samʋɛl gɩ, a sʋr thɩɩra a gʋɛ ƴɩɛ. 15 Dɩ Samʋɛl so Sayula: «Aɲe dɔ nɔɔ dɩ fa n ɲaɲan mɩ hɩɩrɛ a cʋʋ dɩ mɩ the? Dɩ Sayul birsee: «Haar kʋɛa mɩ jɔɔ ka; Fɩlɩsɩtɛ̃sɔ n kɛna mɩ kʋʋr, sɩ Thãgba bo mɩ. Aa ha mɩ tuur dɩ Thãgbaa mɩmɩɩsɔɔ nɔra gɩ, dɩ dǝǝlela ga. Gɛr dɔ nɔɔ dɩ mɩ we fɩ, fɩ cʋʋ mɩ ɩ̃ jɩ gɩrɛ mɩ teenanɩ ɩ̃ cʋɛ». 16 Dɩ Samʋɛl sʋʋraa: «Aɲeraakɛ fɩ n bule mɩ, gɩdonɩ Thãgba Kɔ̃tɩn hɛl farɛ, a debɩ do afɩ sodaar? 17 Gɩrɛɛkɛra a kɔɔ so marnɩ dɩ̃ so far gɛr dana. Thãgba Kɔ̃tɩn taa farrɛ jamana dʋʋr a ha ʋkha. Davɩdɩ gɩ. 18 Mɔna fɩ nʋʋrnɩ Thãgba Kɔ̃tɩnna nũu, fa kʋʋr Amalɛkɩɩ too fɛw mɔna a kɔɔ so farna', gɛr gɩ nĩ Thãgba Kɔ̃tɩn cʋʋ fɩ thaa. 19 Dɩrakɛ Thãgba Kɔ̃tɩn na gba fɛr na Ɩjɩrayɛldara fɛw a na dʋ Fɩlɩsɩtɛ̃sɔɔ ɲɔ̃kɔɔ. Cʋɔ fɛrɛ na afɩ bikũusɔ sɛr na ha kha kɛ khĩdi dʋɔ, sɩ Thãgba Kɔ̃tɩn n gba afɩ kokesɔ a dʋ Fɩlɩsɩtɛ̃sɔɔ ɲɔ̃kɔɔ. 20 Dɩ ɔbɔɔkɛ Sayul nɩɛnɩ Samʋɛlɩ thɩmɩɩsɔɔle, gɩ kʋʋrɛ maar, dɩ tǝǝ ji na ɔɔ gbã fɛw a phɩ̃ thɩɩra. Dɩrakɛ, fãga na kɔɔ haara ga, gɩdonɩ aa kɔɔ to thɩ̃ɛ nʋɔ dɩwɩllɔ na dɩtɩnɔɔla'.
21 Dɩ mɔ̃ khɛr tɔnɩ dã Sayul a yɩ mɔ̃ maar jʋɔraanɩ a sʋʋraarɛ: «Hɩnɛ, mɛr afɩ thɔ̃dodaar khɛr pɛr afɩ thɩmɩɩ nũu, ma therna ɩ̃ yiǝ' sa cʋʋ gɩrɛɛkɛ fɩ so marnɩ». 22 Nɛnɛ̃ɛkɛ fɛrɛ dakha pɛ mɛr afɩ thɔ̃daar khɛr nũu; to ɩ̃ ha fɩ dikor gbe fɩ kho gɩdo nɔɔ fɩ 'li fãga fɩ gba hʋɛ». 23 Sɩ Sayul bor ɩna kho dikorra'. Dɩ ɔɔ thɔ̃ dodara na khɛrɩle phʋʋrʋʋ dɩ tu, a ɩɩr thɩɩra a too phɩ̃ paara ƴũu. 24 Khɛrɩle kɔɔ hananɛ ɔɔ cɔ na ɓol khʋ̃ɔ jɔrkpɔrɔɔ. Dɩ a jaal na phʋnanɛ a fʋʋ a kʋ, a gba mɩ̃ɩ a luur, a hɩ buruukɛ na hananɩ tabɩɩra', 25 a gba jalna thɩɩn Sayul na ɔɔ thɔ̃ dodara dɩ wɩ kho. Agɩpɩ dɩ wɩ ɩɩr dɩtɩnɔɔlera a gba hʋɛ.