Davɩdɩ bire jal Fɩlɩsɩtɛ̃sɔɔ dʋɔ a wɔ̃. \ref 1Sam 21.10-15; 28.1-2; 2 Kur 6.14-17
27
1 Davɩdɩ so ɔɔbarara: «Sayul na kʋ mɛr dɩkhõo gɩrɛra. Gɩrɛ na ba marnɩ dʋɔn, dɔ ɩ̃ ɩɩr ɩ̃ ca ɩ̃ jal Fɩlɩsɩtɛ̃sɔɔ dʋɔ ɩ̃ too le. Sayul na sɩrɔrɛ ɩ̃ weele Ɩjɩrayɛl dɩɩra fɛw; thale na baar ɩ̃ buurǝǝ. 2 Dɩ Davɩdɩ ɩɩrɛ, ɔr na ɔɔ kona taamaadõokɛ (600) a hananɩ, a gba jal Maɔkɩɩ bikuun Akɩsɩɩkɛ dɔnɩ Gatɩ jamanaa pa. 3 Dɩ wɩ toore Gatɩ jamana Akɩsɩɩ pa ɔr na ɔɔ kũusɔ ntɛ na ɔɔ cɔdara. Davɩdɩ kɔɔ hananɛ ɔɔ khɛrsɔ yeɲɔ: Ahɩmoamɩɩkɛ thɛnɩ Jɩjɩreyɛl na Abɩgayɛlɩɩkɛ dɔnɩ Nabal kɛ thɛnɩ Karmɛl dɩɩra khikhɛr. 4 Dɩ wɩ gbaar jalna mɩɩ Sayul aa Davɩdɩ ca jal Gatɩ dɩɩra dɩ a sɩrɔrɛ a n ƴaalʋʋ bã.5 Wi bɩɛl Davɩdɩ sor Akɩsɩra wɔɔ: «Ado fɩ jɩ mɛr bʋɔra, hana mɩ pa ʋkha dɩ biisɔɔra, ɩ̃ jal ɩ̃ too le; gɩdonɩ aɲeraakɛ mɛr afɩ thɔ̃dodaar na ɩ̃ sɩ too kha dɩɩraakɛ fɛr jamana hanɩ?» 6 Dɩ ga wiilera Akɩsɩ haa Sɩkɩlaagɩ dɩɩ. Gɛr dɔ kɩrʋ Sɩkɩlaagɩ donɩ Juda jamanasɔɔda a dana nĩ. 7 Yɛ bɩɛl na sɩpora yenã Davɩdɩ too Fɩlɩsɩtɛ̃sɔɔ dʋɔ. 8 A n kɔɔ jaal na ɔɔ sɔrasɩsɔ dɩ kena Gesuurdara, na Gɩɩrgasɩdara na Amalɛkɩɩ too. Wɛr dɔ wɩrɛ kɔɔ tɔɔnɩ mama bɔɔle bǝǝnnǝǝkɛ fɔnɩ Suur dɩɩra kpɩ a jalna dana Ejipiti pɛlla. 9 A n kɔɔ cɛcɛbɛ wɛr dɩɩ. A n faa kuun dɩ khɛr gɩ dɩ hana yirǝ'; sɩ dɩ kpa nʋ̃ yɩra na nʋ̃ kɔ̃tɩna, na kũkǝnǝ, na yɔɔmɛ̃sɔ, dɩ khɩɩna kẽkena dɩ kɛrna dɩ birnǝ Akɩsɩɩ pa. 10 Dɩ Akɩsɩ n bulee: «Kana nɩ jal nĩ a ke kʋʋr?» Dɩ Davɩdɩ n birsee dɩ yɩ: «Negɛvɩ gɩ, jallananɩ Juda bǝǝnnǝ, na Negɛvɩ Yerameyelɩtɩdaraa khɔrra na Negɛvɩ Kenisɔ pa. 11 Davɩdɩ na n kɔɔ sɩ kuunna, dɩ khɛr gɩ dɩ hana yire a kpa a jalna Gata'. A sor ɔɔbarara wa liirnǝ ner wɩ so: «Thakɛ Davɩdɩ n cʋʋ». Thale kɔɔ dɔ Davɩdɩɩ cʋʋ pa, bɔɔ fɛʋʋkɛ a gbanɩ a toona Fɩlɩsɩtɛ̃sɔɔ dʋɔ. 12 Akɩsɩ n kɔɔ dɛɛnɛ ɔɔ ha pɛ Davɩdɩra. A sor ɔɔbarara aa, a kurre laarɛ na kha ɔɔ too Ɩjɩrayɛldara dɩ a na toore bɔɔ khor na do ɩnɩɩ thɔ̃dodaar.