Davɩdɩ bire bo Sayul kʋr \ref Khɩ 17; 1 Tes 5.15
26
1 Jɩfɩdara jaal Gɩbea Sayuli pa a sʋʋraa aa Davɩdɩ hale a wɔ̃ Hakɩla gɔ̃gʋɔnna, a jalna ka Yesɩmɔ̃ ɓɛlɛ̃ pɛnɩ ƴɩɛ. 2 Dɩ Sayul ɩɩrɛ na Ɩjɩrayɛl kuun khena gbɩlanɩ yẽther (3000) a gbũ Jɩfɩ bǝǝnnǝ, a ƴaal Davɩdɩ. 3 A jaal a too Hakɩla gɔ̃gʋɔnna, hʋɛra ka Yesɩmɔ̃ ɓɛlɛ̃ pɛnɩ ƴɩɛ. Dɩ mɔ̃ Davɩdɩ hanɩ le bǝǝnnǝ, a nɩɛrɛ dɩ Sayul gbune ɔɔ wee pa, 4 a thʋɔn gɩgɩla a jɩɩ jɩ tue; dɩɩ do a daan ger. 5 Dɩ le a ɩɩr gba jal paarɩɩkɛra Sayul toonɩ a yɩ ka a n phɩnɩ na Nɛɛrɩ bikuun Abɩnɛrɩkɛ dɔnɩ ɔɔ sɔrasɩsɔɔ kɔ̃tɩ̃. Ɔɔ sɔrasɩsɔɔ thɩ̃thɩɩn a n phɩ̃, dɩ sɔrasɛ n kpalalaa.6 Dɩ Davɩdɩ wer Ahɩmɛlɛkɩɩkɛ dɔnɩ Hɛtɩɩ mǝl, na Seruya bikuun Abɩsayɩɩkɛ dɔnɩ Joabɩɩ õkuun a bule: «Amɛ n ƴaalɛ a gbũ kha na mɛrɛ Sayuli pa? Dɩ Abɩsayɩ tu: «Mɛrɛ ma gbune kha na fɛrɛ». 7 Davɩdɩ ɩɩr dɩtɩnɔ na Abɩsayɩ a na gbũ Sayulsɔɔ pa, Sayulɩkɛ phɩna thɩ̃thɩɩn a ga kpɩla yʋɔ sa daar, dɩ Abɩnɛɛ na tɩbɩla phɩɩn a kpalalaa. 8 Dɩ Abɩsayɩ so Davɩdɩra: «Thãgba gbaar kuunnɩkɛ nĩ a dʋ fɩ ɲɔ̃kɔɔ. Ha mɩ hʋɛ, ɩ̃ kpaa na ɩ̃ kpɩla babɩɛldaa dɩbara ɩ̃ mana thɩɩ». 9 Dɩ Davɩdɩ sʋʋraa: «Fa n kʋa', gɩdonɩ amɛ hale na ti ɲɔ̃ɔ na tha ʋrɛraakɛ Thãgba Kɔ̃tɩn phiirnɩ sɩɩ do a 'leere sor?» 10 Sa bir so: «Yidaar Thãgba Kɔ̃tɩn do, ɔr na kʋɔ, agɩbo ɔɔ thɛthɛɛ wi na dana a khi, agɩbo wo, a jal kʋʋra a khi». 11 Thãgba Kɔ̃tɩn n pɩɛrɛ mɩ, ma n ti ɲɔ̃ a tha ʋrɛraakɛ a phiirna'. Phɛ ɔɔ kpɩlaakɛ a ganɩ yʋɔ dɩbara, a gbana ɲɔ pɛ lokaarɩɩkɛ na ɲʋɔn sɩ jal». 12 Dɩ Davɩdɩ gbaar kpɩla na ɲɔ pɛ lokaarɩɩle na ɲɔ kɛ Sayul thɩɩnɩ yʋɔ dɩ wɩ jal. Tɩɩ bɩɛllakɛ na jaga', bɩɛllakɛ na yɩ wa, bɩɛllakɛ na jɩrɔ thɩ̃a', wɛr fɛw kɔɔ daarɛ, gɩdonɩ Thãgba Kɔ̃tɩn kɔɔ thɔnana daan kɔ̃tɩ̃ɩ a pɛ war. 13 Dɩ Davɩdɩ gbaar seer ule bilo, a jɩɩle ƴɔɔ gɔ̃gʋɔnna ƴũu. Bǝ̃ǝkɛ vaarɛ wɩnɩ kha kɔɔ pɩɛrɛ na sobɔr. 14 Agɩpɩ dɩ be hulẽbire Sayuli sɔrasɩsɔɔra na Nɛɛ bikuun Abɩnɛɛra ayɩ: «Abɩnɛɛ wei, fa n birse maa? Dɩ Abɩnɛɛ birse: «Amɛ ha fɩ, fɛrlera n kɩɛrɛnɩ jamana nʋɔ? 15 Dɩ Davɩdɩ birsee: «Ga do kuun fɩ doa', amɛ hãakɛ Ɩjɩrayɛl dɩɩra a hona fɩ? Dɩ mɔ̃ dɔ nɔɔ dɩ fa bɛr afɩ kɔ̃tɩ̃ jamana ga? Tibil ʋkha pɔr ɩnɩ n kʋ jamana». 16 Gɩrɛ fɩ cʋʋnɩle, ga bɔra'. Yidaar Thãgba Kɔ̃tɩn do, khir nɩ teena, nɩ bonɩ ʋrɛ Thãgba Kɔ̃tɩn phiirni, anɩ kɔ̃tɩ̃, bɛrrɛ. Nɛnɛ̃ hɩnɛ ka jamanaa kpɩla na ɲʋɔnnɩkɛ a thɩɩnɩ na ɲɔ pɛ lokaar ɔɔ yʋɔ hanɩ».
17 Dɩ Sayul jɩ Davɩdɩɩ wi a bule: «Sɩɩ do ɩ̃ bikuun Davɩdɩɩ wi gɩ gel bɛ? Dɩ Davɩdɩ birsee: «Ɩ̃ wi gɩ yaa ɩ̃ kɔ̃tɩ̃ jamana». 18 Sa bir so: «Mɔ̃ dɔ nɔɔ dɩ fɛr ɩ̃ kɔ̃tɩ̃ ti mɛr afɩ thɔ̃dodaar dɩ fa n wee? Aɲe mɩ cʋʋ fɩ, dɩ cʋʋ pa kpal ca ʋmɔ̃ hãa ɩ̃ ɩɩr para? 19 Ɩ̃ kɔ̃tɩ̃ jamana pɛ nũu gɩrɛ mɩ hananɩ a na so far: «Ado Thãgba Kɔ̃tɩn n tɔ fɩ da n pɛ mar, a to tea khaardaa a wuro nĩkhii. Sɩ ado tɩbɩla n tɔ fɩ, sʋɔn n 'le wɩ Thãgba Kɔ̃tɩnɩ ƴɛra; gɩdonɩ wɩ ti mer nĩ wa n wee, wa n pɩɛr mɩ ma n too dɩɩraakɛ Thãgba Kɔ̃tɩn kɔɔ ʋlfɛnɩ a ha ɔɔ toa'. Dɩ gɩ hor wɩ sor ɩ̃ jalla na fʋɔrɛ thãgba kpɩɩsɔ. 20 Pha! Ɩ̃ tɔmɩn na n deer thɩɩra a hʋnɔna Thãgba Kɔ̃tɩnɩ ƴa'; gɩdonɩ fɛr Ɩjɩrayɛl jamana ther dɩ fa n ƴaal mɛr yidu thaa pɔy, dɩ fa n kpa mɩ mɔ̃ wɩ n kpanɩ mãtoo yaa gɔ̃gɔnana.» 21 Dɩ Sayul so: «Mɩ cʋʋrɛ sopuu. Ɩ̃ bikuun Davɩdɩ kɛrra ɩna, ma bir na cʋʋ fɩ puurǝ bã, gɩdonɩ nĩ ɩ̃ yi dor thɩ̃ kokʋʋ afɩ ƴɛra. Dǝ̃bǝǝl khaa mɩ cʋʋ, a cʋʋ dɩɩ, dɩɩ kɔ̃tɩ̃ ka». 22 Dɩ Davɩdɩ birsee: «Jamanaa kpɩla ha ʋ, afɩ thɔ̃dodaar bɩɛl n ɩna gba. 23 Thãgba Kɔ̃tɩn na lɩma ntɛ mɔ̃kɛ ɔɔ tɩɩ sar do, na ɔɔ fɩl sar hanɩ; gɩdonɩ Thãgba Kɔ̃tɩn gba fɛr nĩkɛ a dʋ mɩ ɲɔ̃kɔɔ, sɩ ma ƴaal ɩ̃ te ɲɔ̃ɔ a tha ʋrɛraakɛ Thãgba Kɔ̃tɩn phiirna'. 24 Dɩ mɔ̃kɛ afɩ yi do marnɩ nĩ thɩ̃ kokʋʋ, ɩ̃ yi dɔ thɩ̃ kokʋʋ Thãgba Kɔ̃tɩnna a tee a na n pɛ mar nɩwɛ fɛʋra». 25 Dɩ Sayul so Davɩdɩra: «Thãgba n bɔna fɩ ɩ̃ bikuun Davɩdɩ. Fa cʋʋrɛ thɩ̃ kɔ̃tɩna sobɔra dɩ ga bɔrrɛ otirǝ. Dɩ Davɩdɩ gbaar hʋɛ da n jal sɩ Sayul kɛr kɔ̃.