Samʋɛlɩ khi na mɔ̃ Nabal bonɩ Davɩdɩ bulle
25
1 Samʋɛl khire. Dɩ Ɩjɩrayɛldara fɛw kpa kha der a cʋʋ bɩɩ sa dʋʋ ɔɔ cɔ Rama dɩɩra. Ga bɔɔlera Davɩdɩ ɩɩrɛ a gbũ Parã bǝ̃ kparara.2 Maɔ̃ bǝ̃ kparara kuun bɩɛl kɔɔ hale a hana ɔɔ lẽle thɩ̃sɔ Karmɛl dɩɩra. Kuunna dor tibil kpɛ; a hananɛ bana gbɩlanɩ yẽther (3000) na bɔ gbɩlanɩ (1000). Ga bɔɔralera Karmɛl a kɔɔ ha dɩ khabɩ ɔɔ banasɔ suune. 3 Kuunna wɩ n we Nabal sɩ ɔɔ khɛr na n do Abɩgayɛl. Khɛr fɩl jɩɩ gɩ, a khʋɔn khɛr gel. Sɩ ɔɔ ko hananɛ fɩl khɩɩ, a kpalna cʋʋ paar. Kalɛbɩɩ mǝllǝ a the. 4 Dɩ le bǝ̃ kparara, Davɩdɩ nɩɛrɛ dɩ Nabal hale da n khabɩ ɔɔ bana suune. 5 Dɩ a thʋɔn ɔɔ thɔ̃ dodara yʋɔr ɔɔ pa a so war thakɛ: «Nɩ jʋnɛ Karmɛl Nabalɩ pa, a fʋɔrɛɛ na ɩ̃ i, sa sʋɔraa wɔɔ, 6 a hanana yire a pʋɔrɛ, ha ɩɩ n hana kha na ɔr, ha ɩɩ n hana ɔɔ cɔkara, a hana dakha ɔɔ thɩ̃sɔɔra fɛw. 7 Aa, mɩ nɩɛrɛ nɛnɛ̃ bɔɔkɛ dɩ a hananɛ bana sũu khabɩdara. Sɩ sɛr kɔɔ ha kha na ɔɔ nʋ̃ khesɔ. Dɩ bɔɔ fɛw wɩ toonɩ Karmɛl, sa kɔɔ cʋʋ wɩ dɩkhaa puǝ', dɩ dɩkha dakha na bu wǝ'. 8 A bulene ɔɔ thɔ̃ dodarasɔ wa mɩɩ ɛr. Dɩ gɛr gɩ a hanana nɛr ɩ̃ thɔ̃ dodarasɔɔra bɔ cʋʋrɛ gɩdonɩ nĩkɛ ɓol wire gɩ. Aa, mɩ n bɩɛl ɛr a hana nɛr ɩ̃ thɔ̃ dodara, na mɛr ɔɔ bikuun Davɩdɩ gɩrɛ a hananɩ.
9 Dɩ ɔbɔɔkɛ thɔ̃ dodaraale danɩ, wɩ mɩɩrɛ Nabal mɔ̃kɛra Davɩdɩ sonɩ, sɩ dɩ wa n pɛ nũu. 10 Dɩ Nabal birse Davɩdɩɩ thɔ̃ dodara: «Amɛ wɩ n we Davɩdɩ, dɩ amɛ n dʋɔn Ɩjaɩɩ bikuun? Nĩkɛ thɔ̃dodaar jɔjʋɔ hale n caanɩ the awɩ kɔ̃tɩ̃sɔɔ kalƴɔɔ, 11 Dɩ mɛrɛ n ɩɩr a gba ɩ̃ dɩko, na ɩ̃ ɲɔ̃ na nʋʋnnɩkɛ mɩ gbɛbɩnɩ ɩ̃ ha ɩ̃ bana sũu khabɩdara, a ha tɩbɩlaakɛ ma jɩnɩ awɩ the pa gaa?»
12 Dɩ Davɩdɩɩ too ɩɩrɛ a gba hʋɛ a kɛr bir. Dɩ ɔbɔɔkɛ wɩ danɩ, wɩ mɩɩrɛ Davɩdɩ gɩrɛ fɛʋʋkɛ Nabal sonɩ. 13 Dɩ Davɩdɩ so ɔɔ sɔrasɩsɔɔra, wɛr fɛw n saa bajɩnasɔ awɩ lophɛrɛsɔɔra. Dɩ wɩ saa; dɩ saa ɔɔda dakha. Dɩ wɩ ther a thɔɔ kona taanã (400) a gba dɩ wa n jal Naballa, sa sɩ kona taaɲɔ dɩ wa n bɛr thɩ̃be.
14 Dɩ Nabalɩ thɔ̃dodaar bɩɛl jaal a so Nabalɩɩ khɛr Abɩgayɛlla ayɩ: «Hɩnɛ Davɩdɩ har le bǝǝnnǝ sa ti thɔ̃thɔna wɩ ɩna fʋɔrɛ asɩ kɔ̃tɩ̃, dɩ mɩɩ wɩ puure. 15 Sɩ tɩbɩla wɛɛkɛ cʋɛ sɩnɩ bɔɔ dɩɩ kar. A fʋna bɔɔkɛ sɩ hanɩ kha le hʋɔnɔ, wa cʋʋ sɩ dɩkhaa puǝ', dɩ dɩkharakɛ na bu sǝ'. 16 Wɛr hɔ gʋʋ a kɛɛ sar, bɔɔ fɛʋʋkɛ sɩ toonɩ kha na wɛr asɩ nʋ̃ khe para. 17 Nɛnɛ̃ɛkɛ kpɩɛrɛ, sa hɩnɛ gɩrɛ fɩ hananɩ na cʋʋ; gɩdonɩ asɩ kɔ̃tɩ̃ na ɔɔ cɔ too bũburõ yɩrɛ; sɩ ɔr wer ɔɔda khɩɩrɛ ka. Fa n puno na mɩgʋʋ thɩ̃a'».
18 Dɩ Abɩgayɛl ɩɩr na phʋnanɛ a gba buru taaɲɔ, dɩvɛ̃ na lokana yeɲɔ, na bana yemɔɩɩkɛ wɩ kʋʋrnɩ a gbɛbɩ, na thɩ̃bi cɩɩna thɩ̃ mɩɛda nʋɔ yemɔy, na dɩvɛ̃ thɩr bi khɩ bulona tamaa, na fɩgɩ thɩr bi khɩ bulona taaɲɔ, 19 a li kũkǝnǝnǝ sa so ɔɔ thɔ̃darasɔɔra, wɩ kʋlɛ nɩ ƴɩɛ ɩna n kpaan. Sɩ aa so ɔɔ ko Naballa thɩ̃a'. 20 Dɩ a jʋʋnɛ kũkǝ̃ bɩɛlla da n gbunǝ gɔ̃gɔ̃ horʋ; sɩɩ do wa biliilera Davɩdɩ na ɔɔ sɔrasɩsɔ hana dakha, da jɩ a phuro war. 21 Dɩ Davɩdɩ kɔɔ sor ɔɔbarara: «Pɔy mɩ vɔɔ a bɛr gɩrɛ fɛʋʋkɛ kuunɩɩle hananɩ le bǝǝnnǝ, dɩ dɩkha bɩɛllakɛ na bu ɔɔ thɩ̃sɔɔra ga sɩ dɩ gba puure a lɩmɩ mɩ ɩ̃ bɔ cʋʋraa.» 22 Thãgba n pɛ mar sor gɩ khɩɩr gɩ ka ado kɩɛr na duuro mɩ sɩ Nabalɩ cɔda ʋkha bɩɛlla dɩ hana yire».
23 Ɔbɔɔkɛ Abɩgayɛl yɩnɩ Davɩdɩ, a gbune kũkǝnǝ pʋpʋr a sʋr Davɩdɩɩ ƴɛra a gʋɛ ƴɩɛ sa fʋɔr. 24 Agɩpɩ, a jiirǝǝre nɛɛra sa so: «Ɩ̃ kɔ̃tɩ̃, ɩ̃ pa dɩɩ ha. Hana afɩ thɔ̃dodaar khɛr hʋɛ a mɩɩ; pɛ afɩ thɔ̃dodaar khɛrɩ thɩmɩɩsɔ nũu. 25 Ɩ̃ kɔ̃tɩ̃ fa n therna Nabal, kɛ ɔɔda khɩɩrnɩɩda, gɩdonɩ mɔna a hanɩ, mɛna ɔɔ i ha. Ɔr wɩ n we Nabal, aa jɩ fɩlla'. Dɩ mɛr afɩ thɔ̃dodaar khɛr, ma kɔɔ to yire tɩbɩlalaakɛ ɩ̃ kɔ̃tɩ̃ thɔna. 26 Dɩ nɛnɛ̃ ɩ̃ kɔ̃tɩ̃, na Thãgba Kɔ̃tɩnɩ i, na afɩ i, Thãgba Kɔ̃tɩn pɩɛrɛ fɩ, fa n kʋ tibil, gɩdo afɩ thɛthɛɛ hel fɩ tiirǝ'. Dɔ afɩ lãlaardara, wɩrɛkɛra n ƴaalɛnɩ afɩ dapuu n ho Nabal. 27 Ɩ̃ kɔ̃tɩ̃ n to tea khaardaakɛ mɛr afɩ thɔ̃daar khɛr ɩnanɩ, thɔ̃darakɛ n kpa farnɩ n tɩnɛ. 28 Mɩ n bɩɛl fɛr, faa dakha mɛr afɩ thɔ̃daar khɛrɩ dɩ a ha mɩ. Mɩ hananɛ tu jɩɩr dɩ Thãgba Kɔ̃tɩn na cʋʋrɛ fɛr ɩ̃ kɔ̃tɩ̃ɩ cɔka gɩ tɩ kɩbɩ; gɩdonɩ ɔrra fɩ n ke kʋʋr fa n pɛ. Wa n yɩ far dɩɩ kpɩɩraka'. 29 A tibil ɩɩr a ti fɩ na wee, a na ƴaal fɩ yʋʋ, Thãgba Kɔ̃tɩn afɩ Thãgba n bɛrra afɩ thu yidaraa thɩ̃thɩɩn ɔɔ kalƴɔɔ, sa dɔna afɩ lãlaardarada ƴɔɔ fĩi mɔ̃ wɩ n baanɩ bãbʋʋ. 30 Dɩ ɔbɔɔkɛ Thãgba Kɔ̃tɩn na cʋʋ farnɩ bɔɔkɛ a kɔɔ sonɩ, a cʋʋ fɩ fɩ do Ɩjɩrayɛlɩ thɔthɔɔ, 31 fɛr ɩ̃ kɔ̃tɩ̃ na hana ha helle a na so a ma jɩ gɩrɛraakɛ fɩ deernɩ tɔmɩn dakhɩɩ, a tiirnǝ helʋa'. Dɩ dabɔɔkɛ Thãgba Kɔ̃tɩn na cʋʋ fɩnɩ bɔɔlera, kpɩɛrna mɩ.»
32 Dɩ Davɩdɩ so Abɩgayɛlla: «Thãgba Kɔ̃tɩnnɩkɛ dɔnɩ Ɩjɩrayɛlɩ Thãgba, kɛ thɔna fɩnɩ nĩ dɩ fɩ cãa mɩ, hɩna i dʋbɩrɛ. 33 Thãgba Kɔ̃tɩnɩ i n dʋbarʋ gɩ the afɩ fɩl jɩra. Dɩ a bɔna fɩ, fɛrrɛɛkɛ pɩɛrɛ mɩnɩ nĩ, ma n deer tɔmɩn, a tiir helʋ pɛ ɩ̃ thɛthɛ bara ga. 34 Yidaar Thãgba Kɔ̃tɩnɩɩkɛ dɔnɩ Ɩjɩrayɛlɩ Thãgba do gel. Ɔr pɩɛrɛ mɩ, ma n cʋʋ fɩ puurǝ'. Ado fa kɔɔ phana cãa ma', sobɔr mɩ so far gel kɩɛr na dɩɩ na n wɩlnɩ duuro, Nabalɩ cɔda bɩɛllakɛ na kɔɔ sa'.» 35 Dɩ Davɩdɩ teere Abɩgayɛlla gɩrɛ a pɔnanɩ sa sʋʋraa: «Kɛrra birǝ kɔna afɩ cɔ na ha ɩɩ. Mɩ ture afɩ nɔ, ma cʋʋrɛ mɔna fɩ sonɩ.
Abɩgayɛl debire a do Davɩdɩɩ khɛr. \ref 2 Sam 13.23-24; Khɩ 73; Sokp 1.32
36 Dɩ bɔɔkɛ Abɩgayɛl danɩ cʋɔr, Nabal har dɩko khoro dɩɩ ho mɔ̃ jamana n cʋʋnɩ fɛtɩ. Daw kɔɔ hire haara, dɩrakɛ taan n kʋʋrɛ dɩɩ kar. Dɩ a fʋna bɔɔle Abɩgayɛl na kɔɔ mɩgʋʋ thɩ̃a' dɩɩ dana duuro. 37 Sɩ mɔ̃ dɩɩ wɩlnɩ duuro dɩ taan cɩ Naballa, ɔɔ khɛr gbaar gɩrɛ fɛʋʋkɛ kɔɔ kanɩ a mɩgʋʋ. Dɩ haar thʋʋrɛ sɩmɩmɩ dɩ debi a ho bokaar. 38 Dɩ mɔ̃ ga kanɩ wire yʋɔrsɔ, Thãgba Kɔ̃tɩn bɩɩrɛ dɩ khi.
39 Dɩ ɔbɔɔkɛ Davɩdɩ nɩɛnɩ dɩ Nabal khire, a sor: «Thãgba Kɔ̃tɩn hɩna fʋɔrɛ, ɔrkɛ teanɩ a pɛ mar beesireraakɛ Nabal beesi mɩnɩ, a pɩɛrna mɩ ma n cʋʋ puurǝ'. Thãgba Kɔ̃tɩn cʋʋrɛ dɩ ɔɔ puu kɛr heenʋʋ». Agɩpɩ Davɩdɩ thʋɔn mɩɩna Abɩgayɛl ɩnɩ n gbaa a do ɩnɩɩ khɛr. 40 Dɩ Davɩdɩɩ thɔ̃ dodara daan Karmɛl Abɩgayɛlɩ pa a sʋʋraa thakɛ ayɩ wɔɔ: «Davɩdɩ thɔna sɩ afɩ pa, aa sɩ ɩna gba fɩ, fɩ do ɩnɩɩ khɛr». 41 Dɩ a sʋrrɛ a gʋɛ ƴɩɛ sa so: «Mɛr ɔɔ thɔ̃dodaar khɛr n dɔ dee a na cɔa ɔɔ thɔ̃ dodara nɛɛ». 42 Agɩpɩ dɩ pal ɩɩr na phʋnanɛ a jʋʋn kũkǝnǝ dɩ ɔɔ thɔ̃dodaar kheminǝ yemɔy thɔɔ ɩ dɩ wɩ kpa thɔ̃thɔnanaale dɩ wɩ jal, dɩ do Davɩdɩɩ khɛr.