Davɩdɩ har Eyin-Gedi bǝ̃ ka bɩɛlla. \ref 1Sam 26.3-25; Khɩ 7 na 57; Rɔm 12.19-21
24
1 Dɩ Davɩdɩ ther liir a jʋʋn Eyin-Gedi khʋʋra paarraakɛ na hanɩ lʋʋnna kɔrrɔa', a too le. 2 Dɩ ɔbɔɔkɛ Sayul thenɩ Fɩlɩsɩtɛ̃sɔɔ wee pa a bir, wɩ sʋʋraarɛ aa Davɩdɩ har Eyin-Gedi bǝ̃ kparara. 3 Dɩ Sayul phiire kuun khena gbɩlanɩ yẽther (3000) Ɩjɩrayɛl dɩɩra dɩ wɩ jal kha Davɩdɩ na ɔɔ sɔrasɩsɔ ƴaal pa bokananaakɛ hɔ̃ bʋkena n toonɩ. 4 Dɩ mɔ̃ a danɩ na barãsɔɔkɛ hanɩ le hʋ nʋɔra, a yɩrɛ kaar a gba lõ cuu; sɩɩ do kaarlera tɩɛr Davɩdɩ na ɔɔ sɔrasɩsɔ ha a wʋɔn. 5 Dɩ Davɩdɩɩ sɔrasɩsɔɔle bʋ̃bʋʋnaa: «Hɩnɛ, nĩ dɔ wirerǝ Thãgba Kɔ̃tɩn kɔɔ so farnɩ, ɩna gbaar afɩ lãlaardaar a na dʋ fɩ ɲɛɛna dɩ fa cʋgʋʋ mɔ̃ dãa farnɩ.» Dɩ Davɩdɩ jal hɛlɛlɛ a fʋ Sayuli kẽkẽ gbã nɔ a kur. 6 A gele karɔ, Davɩdɩɩ ha mar dɩ ga n sa; gɩdonɩ a kurre Sayuli kẽkẽ gbã nɔ. 7 Dɩ so ɔɔ sɔrasɩsɔɔra: «Thãgba Kɔ̃tɩn n pɩɛrɛ mɩ, ma n cʋʋ ɩ̃ kɔ̃tɩnnaakɛ a phiirnɩ puure, gɩ ho ma ba tire ɲɔ̃ɔ ɩ̃ kʋa'; gɩdonɩ ʋrɛ Thãgba Kɔ̃tɩn phiirnɩ gɩ. 8 Dɩ gaa thɩmɩɩle Davɩdɩ punona ɔɔ sɔrasɩsɔ a pɩɛr wɩ wa n tha Sayulla ga. Agɩpɩ Sayul ɩɩr kaarɔ a the a gba ɔɔ hʋ da n jal.9 Dɩ mɔ̃ ga toonɩ gbe, Davɩdɩ ther le kaw, a ma da n we Sayuli khiro: «Ɩ̃ kɔ̃tɩ̃ jamana!» Dɩ Sayul kɩɩl a hɩɩn, dɩ Davɩdɩ sʋr a gʋɛ ƴɩɛ sa fʋɔr. 10 Agɩpɩ dɩ Davɩdɩ sʋʋraa: «Aɲe gɩ dɩ fa n pɛ tɩbɩlaakɛ n yɛnɩ mɩ n ƴaalɛ ɩ̃ cʋʋ fɩ puure nũu? 11 Fɩ yɩɛrɛ nĩ na afɩ thɛthɛɛ yi, dɩ Thãgba Kɔ̃tɩn gba fɛr dʋ mɩ ɲɔ̃kɔɔ ka bɩnɔ. Dɩ wɩ sor ɩ̃ kɔ fɩ, dɩ mɩ bo fer kʋr sa so; ma ti ɩ̃ ɲɔ̃ a na tha ɩ̃ kɔ̃tɩnna ga, gɩdonɩ ʋrɛ Thãgba Kɔ̃tɩn phiirnɩ ha fɩ. 12 Yɛkɛ ɩ̃ thɩ, yɛ afɩ kẽkẽ gbã nɔ ɩ̃ ɲɔ̃kɔɔ. Dɩ mɔ̃ mɩ kurni afɩ kẽkẽ gbã nɔ sɩ ma kʋ fa', kuure hɩnɛ sa jɛ dɩ ɩ̃ ɩɩr para bɩ̃ kpalɛ na hale dɩ lãʋ ga. Dɩ ma cʋʋ far puurǝ', sɩ fɛrrɛ, fɩ weele mɩ fa n kpaarna fɩ kʋ. 13 Thãgba Kɔ̃tɩn na kɩlɛ mɛrrɛ na fɛrrɛɛ so. Dɩ a na tiir farrɛ ɩ̃ hel, sɩ ɩ̃ ɲɔ̃ɔ thɛthɛ wer na ti na tha fara'. 14 Mɔ̃kɛ mama sokpaa sonɩ aa, tɩɩ puurǝ kpalɛ n the, dakha gɩ. Sɩ mer wer, ɩ̃ ɲɔ̃ na ti na tha farra'. 15 Amɛ fɛr Ɩjɩrayɛl jamana the fɩ kena? Amɛ fɩ wee fa n kpaan? Mɛr be khire, na mɛr yidu thaa khaar pɔy. 16 Thãgba Kɔ̃tɩn na kɩlɛ. Ɔr na dʋɔn kɩɩldaar mɛrrɛ na fɛrrɛɛ thɩ̃thɩɩn, a hɩɩn sorra, sɩ a tee a pɛ mar. Ɔr na dɔ ɩ̃ kɩkɩɩl a taana mɩ afɩ ɲɛna».
17 Ɔbɔɔkɛ Davɩdɩ mɩɩnɩ Sayul gaa thɩmɩɩle na pɩ, Sayul so: «Ɩ̃ bikuun Davɩdɩ, sɩɩ do afɩ wi gɩ gel bɛ?» Agɩpɩ dɩ ma da n bɩ. 18 Agɩpɩ dɩ so Davɩdɩra: «Fɩ dor tɩɩ sarʋ a jɔ mɩ, gɩdonɩ fɩ cʋʋ mɛr bɔɔ sɩ dɩ̃ lɩmɩ fɩ puure. 19 Fɩ nɩna mɛr nĩ afɩ bɔ cʋʋ, gɩdonɩ Thãgba Kɔ̃tɩn gba mɛr dʋ fɩ ɲɔ̃kɔɔ sɩ fa kʋ ma'. 20 A tibil 'lɛ ɔɔ lãlaardaar a pɛ ɲɛɛna, a n fagʋʋrɛ pɔpɔl dɩ gba ɔɔ hʋ da n jal kã? Thãgba Kɔ̃tɩn n ka fɩ gɩrɛraakɛ fɩ cʋʋ marnɩ nĩ. 21 Nɛnɛ̃ hɩnɛ, mɩ jɩrɛ dɩ fa dor jamana, baalɛ na hala', dɩ Ɩjɩrayɛl dɩɩ na pʋɔrɛ afɩ ɲɔ̃kɔɔ. 22 Ʋlfɛnɛna mɩ nɛnɛ̃ na Thãgba Kɔ̃tɩn dɩ fa bũburõ ɩ̃ mǝlɩɩkɛ na kpaanɛnɩ gɩdo nɔɔ ɩ̃da n pɩ ɩ̃ too thɩ̃thɩɩna'. 23 Dɩ Davɩdɩ ʋlfɛnanɛ Sayul thalera. Agɩpɩ a gbaar kɔ̃, sɩ Davɩdɩ na ɔɔ sɔrasɩsɔ gba jʋʋn awɩ wɔ̃ pa gɔ̃gʋɔnna.