Davɩdɩ taarɛ Keyɩladara
23
1 Wi bɩɛl, wɩ sor Davɩdɩra aa Fɩlɩsɩtɛ̃sɔ ɩɩrnanɛ Keyɩladara kʋʋr, sa wu awɩ thɩ̃sɔɔra gbʋʋlɔ dɩ wa n khɩɩ. 2 Dɩ Davɩdɩ bule Thãgba Kɔ̃tɩn ayɩwɔɔ: «Mɩ punone jal a kena Fɩlɩsɩtɛ̃sɔɔlera ya?» Dɩ Thãgba Kɔ̃tɩn birsee: «Jala, fa bɩɩr wɛr sɩ na taa Keyɩladara». 3 Dɩ Davɩdɩɩ sɔrasɩsɔɔkɛ a hananɩ sʋʋraa: «Sɛr ha wɩrɛ dɩɩ do maar sɩ toona gɩrɛ kɛ Juda dɩɩra, dɩ a sɩ bir ɩɩr jal Keyɩla sɩ kena Fɩlɩsɩtɛ̃sɔɔ sɔrasɩsɔ ga puurore na pɛr» 4 Dɩ Davɩdɩ bir bule Thãgba Kɔ̃tɩn, dɩ Thãgba Kɔ̃tɩn birsee: «Ɩrɛ, a gbuno Keyɩla, ma gbaar Fɩlɩsɩtɛ̃sɔ na dʋ fɩ ɲɔ̃kɔɔ. 5 Dɩ Davɩdɩ ɩɩr na ɔɔ sɔrasɩsɔ a jal Keyɩla, a kena Fɩlɩsɩtɛ̃sɔ a taa awɩ nʋ̃sɔ sa be bɩɩ dɩɩ kɔ̃tɩ̃ ka. Dɩ mɛ̃ Davɩdɩ taa Keyɩladara. 6 Ɔbɔɔkɛ Ahɩmɛlɛkɩɩ bikuun Abɩataar n kɔɔ fuunɩ a jal Davɩdɩra Keyɩla, a kɔɔ jalanɛ bonɩ ji kẽkɩɩn, kɛ dakha wɩ n gbanɩ a ƴaalna Thãgbaa tuur.7 Dɩ wɩ gbaar jalna mɩɩ Sayul aa Davɩdɩ hale Keyɩla. Dɩ so: «Thãgba gbaarɛ dʋ mɩ ɲɔ̃kɔɔ; gɩdonɩ a khaanɛ dɩbara dɩɩraakɛ hananɩ lõ kpalanasɔ». 8 Dɩ Sayul wer ɔɔ sɔrasɩsɔ fɛw a gbɛbɩ koke gbɛbɩrɛ wɩ gbũ Keyɩla dɩɩra wɩ sɔɔ Davɩdɩ na ɔɔ sɔrasɩsɔ. 9 Dɩ Davɩdɩ jɩrɛ puureekɛ Sayul n gbɛbɩraanɩ, a so bonɩ jidaar Abɩataara, a gba bonɩ ji kẽkɩɩn, kɛ wɩ n gbanɩ dakha a ƴaalna Thãgbaa tuur, a pɔna. 10 Dɩ Davɩdɩ so: «Thãgba Kɔ̃tɩnɩkɛ dɔnɩ Ɩjɩrayɛlɩ Thãgba, mɛr afɩ thɔ̃ dodaar nɩɛrɛ bɔɔbɔɔ dɩ Sayul n ƴaalɛ a ɩ̃ kɛ Keyɩla a kʋɛ dɩɩ gɩ do mɛr dɔ nɔɔ». 11 Keyɩla fãgadara na fʋ mɛr na dʋʋ ɲɔ̃kɔɔ ya? Sayul na gbune kɛ ger mɔ̃ mɩ nɩɛnɩ bɛ? Thãgba Kɔ̃tɩnɩkɛ dɔnɩ Ɩjɩrayɛlɩ Thãgba, nɛna mɛr afɩ thɔ̃ dodaar ɩ̃ jɩ». Dɩ Thãgba Kɔ̃tɩn birsee: «A na gbune» 12 Dɩ Davɩdɩ bir so wo: «Keyɩla fãgadara na fʋ mɛr, mɛrɛ na ɩ̃ sɔrasɩsɔ wɩ dʋ Sayul ɲɔ̃kɔɔ ya?» Dɩ Thãgba Kɔ̃tɩn birsee: «Wa fʋ fɛr na haa». 13 Dɩ Davɩdɩ ɩɩr na ɔɔ sɔrasɩsɔɔkɛ na dananɩ kona taamaadõ (600) a the Keyɩla, a gba dɩ wa n jal dɩkhãa pa. Dɩ wɩ gbaar mɩɩ Sayul aa Davɩdɩ fore the Keyɩla. Dɩ faa sa kɛr bir.
Jonatã jaal yɩ Davɩdɩ Jɩfɩ na Mãɔ bǝ̃ kparara. \ref Khɩ 54; 140;1Sam 26.1-4; Khɩ37.32-33
14 Dɩ Davɩdɩ toore le Jɩfɩ bǝ̃ kparara gɔ̃gʋɔnɔ. Wire wo wire Sayul n ƴaalʋ sɩ Thãgba na faa Davɩdɩ dɩ lʋʋn ɲɔ̃kɔɔa'.
15 A yɩɛrɛ dɩ Sayul ther da n ƴaalʋ yʋʋ, dɩ too le Ɔɔrsa dɩɩra, Jɩfɩ bǝ̃ kparara. 16 Dɩ Sayuli bikuun Jonatã ɩɩrɛ ga bɔɔlera a jal le Ɔɔrsa Davɩdɩɩ pa a jɩɩ haa 'lar Thãgbara. 17 Dɩ a sʋʋraarɛ wɔɔ: «Fa n hana maara', gɩdonɩ ɩ̃ thɩ Sayuli ɲɔ̃ na 'li fǝ'. Fa dor jamana Ɩjɩrayɛl dɩɩra, mɛrɛ, ɩ̃ too balaɲɔ too paar afɩ kɩrɔ. Dɩ ɩ̃ thɩ Sayul jɩrɛ gelela dakha bɔɔbɔɔ». 18 Dɩ wɛr yeɲɔ ʋlfɛrɛ kha nɔ bɩɛl ʋlfɛrɛ Thãgba Kɔ̃tɩnɩ ƴɛra. Agɩpɩ, Davɩdɩ toore le Ɔɔrsa sɩ Jonatã kɛr kɔ̃.
Sayul bire wo da n wee Davɩdɩ.
19 Jɩfɩdara ɩɩrɛ jʋʋn Sayuli pa Gɩbea a sʋʋraa: «Fa jɩ dɩɩ do asɩ bǝnnǝ Davɩdɩ ha a wɔ̃, Ɔɔrsa, Hakɩla gɔ̃gʋɔnaakɛ hanɩ Yesɩmɔ̃ wi phã paar ɲɔ̃bɩlana gaa? 20 Dɩ nɛnɛ̃ gɩdonɩ fɩ hananɛ ƴaalɛ jɔɔ fɩ gbũ, jamana gbuno! Ado ser wer gɩ, sa fʋʋrɛ na ha fɛr jamana. 21 Dɩ Sayul so: «Thãgba Kɔ̃tɩn n bɔna nɩ, gɩdonɩ nɩ therna mɛr. 22 Mɩ bɩɛl nɛr, nɩ jala 'lɔ wo, a jɩɛ jɩ tue bɔɔbɔɔ, bil ʋrɛ a n jalnanɩ, na ʋrɛ tʋɔraanɩ yire; gɩdonɩ wɩ so marɛ aa a thʋnɛ kpɛsɛ ka. 23 Nɩ 'lɔ a jɛ paarsɔɔkɛ a na punonɩ na wɔ̃, agɩpɩ nɩ bir nɩ so mar sobɔrɩkɛ nɩ yɩnɩ, nɛnɛ̃ sɩ jal kha. Ado lee bǝnǝ a ha, ma ƴaalʋlɛ Judaa mǝlsɔɔ cɔkasɔɔ thɩ̃thɩɩn». 24 Dɩ Jɩfɩdaraale ɩɩr, a faa Sayul sa kɛr a kɔ̃. Ga bɔɔraalera Mãɔ bǝ̃ kparara, Araba bǝ̃ faana, Yesɩmɔ̃ wi phã paar ɲɔ̃bɩlana Davɩdɩ na ɔɔ sɔrasɩsɔ kɔɔ ha.
25 Dɩ Sayul ɩɩrɛ na ɔɔ sɔrasɩsɔ a jal Davɩdɩɩ ƴaal pa. Dɩ wɩ sor Davɩdɩra, dɩ ɩɩr a jal too Mãɔ bǝ̃ kparara boka kaara. Dɩ bɔɔkɛ Sayul nɩɛnɩ, a ɩɩrɛ a weegʋ da n kpaan le Mãɔ bǝ̃ kparara. 26 Sayul har na ʋ̃ʋ gɔ̃gɔ̃ bil da n fi, sɩ Davɩdɩ na ɔɔ sɔrasɩsɔ hana ʋ̃ʋ bil dɩ wa n jal. Davɩdɩ na ɔɔ sɔrasɩsɔ n yɩrɛ wɩ bu Sayula; gɩdonɩ a har na ɔɔ too dɩ wa n bã wɩ dii war wɩ fʋlɛ. 27 Sɩ ga bɔɔlera thɔ̃thɔn bɩɛl dã a so Sayula a birǝ kɔrɔ, gɩdonɩ Fɩlɩsɩtɛ̃sɔ lʋʋn ɩnɩɩ dʋɔ. 28 Dɩ Sayul sɩrɔrɛ Davɩdɩ weere sa kɛr da n bir a kena Fɩlɩsɩtɛ̃sɔ. Gɛr hɩna dɩ wa n we paarɩlera Sela-Hamalɛkɔtɩ kɩrʋ dʋɔn lee pa boka kɔ̃tɩ̃ɩ.