Davɩdɩ jaal Adulamɩ na Moabɩ dɩɩra. \ref 2Kur 11.15-19; Khɩ 57; 142
22
1 Dɩ Davɩdɩ ther le Gatɩ a jal wɔ̃ boka ka bɩɛla Adulamɩ dɩɩra. Dɩ ɔɔ õkũusɔ na ɔɔ cɔdara fɛw nɩɛrɛ a ɩɩr a kpaaraa. 2 Wɩrɛ fɛʋʋkɛ haar kɔɔ kʋɛnɩ, na heldarasɔ, na wɩrɛ ga gbuni bɩnɔa', kpar kha a ha Davɩdɩɩ khiro dɩ do awɩ kɔ̃tɩ̃. Wɩrɛ hanɩ kha na Davɩdɩ, wɩ thɔɔrɛ kona taanã (400).3 Agɩpɩ Davɩdɩ ther le Adulamɩ a jal Misipe, Moabɩ dɩɩra, a so Moabɩ jamanana: «Mɩ n bɩɛl fɛr, hana ɩ̃ thɩ na ɩ̃ nɩ hʋɛ wɩ be wɩ ɩ̃ wɩ too afɩ dʋɔ, gɩ dana bɔɔkɛ ma jɩnɩ gɩrɛ Thãgba n ƴaalnɩ a cʋʋna mɩ». 4 Dɩ Davɩdɩ kpa wɛr a jalna Moabɩ jamanaa pa, dɩ wɩ too le a pɩna bɔɔkɛ a cʋʋnɩ ɔɔ wɔ̃ pa, Adulamɩ boka kaara.
5 Wi bɩɛl Thãgbaa mɩmɩɩ Gadɩ sor Davɩdɩra: «Fa n too afɩ wɔ̃ paraaka', jala Judaa mǝlsɔɔ dʋɔ». Dɩ Davɩdɩ ɩɩr le a jal Herɛtɩ luu.
Sayul pɛrɛ dɩ wɩ kʋʋr Thãgbaa mɩmɩɩsɔ Nɔbɩ dɩɩra. \ref 1Sam 21.2-10; Khɩ 52; 1Sam 2.27 etc. ; 3.12-14; Sokp 29.12.
6 Wi bɩɛl Sayul kɔɔ har Gɩbea gɔ̃gʋɔna a too tamarɩsɩ kɩrɔ na ɔɔ kpɩla ɲɔ̃kɔɔ; dɩ ɔɔ thɔ̃ dodara fɛw jɩɩl bɛraa. Dɩ a nɩɛrɛ dɩ wɩ yɩ aa wɩ nɩɛrɛ Davɩdɩ na ɔɔ kũusɔɔ tutugo. 7 Dɩ a so warɛ: «Nɛr Bɛ̃jamɛ̃ɛ too nɩ pɛ nũu! Ɩjaɩɩ bikuun na ha nɛrɛ fɛw dakha lɩɛsɔ na dɩvɛ̃ thɩrasɔ bɛ? Dɩ a na pɛr nɛrɛ fɛw dɩ na do sɔrasɛ gbɩlanɩɩ kɔ̃tɩ̃sɔ, na sɔrasɛ tamaa kɔ̃tɩ̃sɔ bɛ? 8 Dɩ mɔ̃ dɔ nɔɔ dɩ nɛrrɛ fɛw na n bɛɛna mɩ nãa, dɩ tibil bɩɛlakɛ na n khe mar dɩ ɩ̃ bikuun na Ɩjaɩɩ bikuun ʋlfɛrɛ kha nɔ bɩɛl ʋlfɛra? Dɩ ʋkharakɛ nɛrɛra na n dɛna mɩ a so mar dɩ ɩ̃ bikuun tɔr ɩ̃ thɔ̃ dodaar pɛ mar a na n phera mɩ phera mɔ̃ a n cʋʋnɩ nĩ gɩra!»
9 Dɩ Dɔɛgɩɩkɛ dɔnɩ Edɔ̃daar, kɛ dɔnɩ yʋʋ Sayuli thɔ̃ dodarasɔɔra sʋʋraa: «Mɩ yɩrɛ Ɩjaɩɩ bikuun pʋɔnɩ le Nɔbɩ, Ahɩtubii bikuun Ahɩmɛlɛkɩɩ pa, 10 dɩ bule Thãgba Kɔ̃tɩnɩ tuur a haa, a hanaa dɩkɔ, na Golɩatɩɩ bajɩna». 11 Dɩ jamana thʋɔn we Ahɩtubii bikuun Ahɩmɛlɛkɩ, na ɔɔ cɔdara fɛw, kɛ dɔnɩ bonɩ jidara Nɔbɩ dɩɩra dɩ wɩ pʋɔraa. 12 Dɩ Sayul sor: «Ahɩtubii bikuun pɛ nũu! Dɩ so: «Mɛkɛ ɩ̃ kɔ̃tɩ̃». 13 Dɩ Sayul bulee: «Mɔ̃ dɔ nɔɔ dɩ na n bɛɛna mɩ nãa, fɛrɛ na Ɩjaɩɩ bikuun? Mɔ̃ dɔ nɔɔ dɩ fɩ haa buru, a hanaa bajɩna, a bulena Thãgbaa tuur a haa, gɩ cʋgʋʋ a kɛr a tɛna mɩ, a na n pher mɩ phera mɔ̃ a n cʋʋnɩ nĩ gɩrɛ?» 14 Dɩ Ahɩmɛlɛkɩ birsee: «Ʋmɔ̃ afɩ thɔ̃ dodara fɛʋʋ thɩ̃thɩɩn dɔrakɛ sobɔ cʋʋdaar a ho Davɩdɩ? Fɛr jamanaa thɛɛ a do, a dona afɩ tomɩr bɛrdaraa kɔ̃tɩ̃; a hananɛ i dʋbɩrɛ dɩɩ kɔ̃tɩ̃ ka. 15 Ga do ga wiile dɔ cacadaa mɩ fʋnɩ a bule Thãgbaa tuur dɩ ma n haa ga, thale ga. Jamana na n gba sorɩkɛ a heen mɛr ɔɔ thɔ̃ dodaar agɩborakɛ ʋkha ɩ̃ cɔkara ga, gɩdonɩ mɛr afɩ thɔ̃dodaar na jɩ dɩkha fɩɩʋrakɛ thɩ̃ɛnaaka'». 16 Dɩ jamana so: «Ahɩmɛlɛkɩ, fɛrɛ na afɩ cɔdara khir dɔ anɩda». 17 Agɩpɩ dɩ so ɔɔ bɛbɛrsɔraakɛ jɩlɛnɩ bɛraa ayɩ: «Nɩ kʋrɛ Thãgba Kɔ̃tɩnɩ bonɩ jidara; gɩdonɩ wɛr dakha wɩ bule pɛr Davɩdɩra. Wɩ jɩrɛ dɩ a n car sɩ wa khe mara'». Sɩ ɔɔ thɔ̃ dodaarsɔ na tu na ti ɲɔ̃ɔ na kʋʋr Thãgba Kɔ̃tɩnɩ bonɩ jidarasɔa'. 18 Dɩ jamana so Dɔɛgɩra: «Fe kʋrɛ bonɩ jidaraakɛ». Dɩ Dɔɛgɩɩkɛ thɛnɩ Edɔ̃ fi. Ɔr kʋrɛ wɩ. A kʋʋrɛ ga wiile kona kpalanã yemɔy kɛ dɔnɩ wɩrɛ n tɔnɩ bonɩ ji kẽkena. 19 Dɩ Sayul bir pɛr wo dɩ wɩ kana bonɩ jidaraa dɩ, Nɔbɩɩ dɩɩ too, kona na khɛra, bɩsana na be, na kũkǝnǝ na banasɔ, a kʋʋr na bajɩna.
20 Abɩataarkɛ dɔnɩ Ahɩtubii bikuun Ahɩmɛlɛkɩ bi dɩbara fora, a ca a kpaan Davɩdɩra. 21 Dɩ Abɩataar gbaar mɩɩ Davɩdɩ aa Sayul kʋʋrɛ Thãgba Kɔ̃tɩnɩ bonɩ jidara. 22 Dɩ Davɩdɩ sor Abɩataara: «Mɩ kɔɔ jɩrɛrakɛ bɔɔbɔɔ dawiile, dɩ Edɔ̃ Dɔɛgɩɩkɛ hanɩle na kɔɔ bo Sayul mɩɛra'. Mɛr dɔ nɔɔ dɩ tɩbɩla fɛw afɩ cɔ khiir. 23 Tɔɔ na mɛrɛ; gɩdonɩ ʋrɛɛkɛra n ƴaalɛ mɩnɩ yʋʋ n ƴaalɛ afɩ yʋ dakha; Tɔɔ kɛ ɩ̃ kɩrɔ, fa 'lɛr bɛrɛ bɔɔbɔɔ.