21
1 Dɩ Davɩdɩ ther le a gba jal, sɩ dɩ Jonatã kɛr kɔ̃ dɩɩra.Davɩdɩ car jal Nɔbɩ dɩɩra, bonɩ jidaar Ahɩmɛlɛkɩ pa. \ref 1Sam 22.9, 27; Khɩ 34; 56.
2 Davɩdɩ gbaar jal Nɔbɩ dɩɩra bonɩ jidaarɩkɛ wɩ n wenɩ Ahɩmɛlɛkɩɩ pa. Dɩ Ahɩmɛlɛkɩ ɩɩr na jẽu a ca caanʋ, a bulee: «Mɔ̃ gɩ dɩ fɩ ha dɩbara fa hana tibilǝ'?» 3 Dɩ Davɩdɩ birsee: «Jamana thɔna mɩ sa so yɩ tibil na n jɩ gɩrɛra ɩnɩ thɔ̃ mɩnɩ, na mɔ̃ ɩnɩ sona'. Dɩ gɛr gɩ dɩ mɩ nɩ ɩ̃ toora paar, ka sa caanɩ kha. 4 Aɲee dɩko ca fɩ hana nɛnɛ̃ɛkɛ gɩrɛ. Ha mɩ buru yemɔy agɩbo gɩrɛ fɩ hananɩ.» 5 Dɩ le bonɩ jidaar birsee: «Ma hana buru pɔy ɲɔ̃kɔa'. Buruukɛ mɩ hanɩ Thãgba, gɛr hãakɛ. Ma punone na ha nɩ, ado afɩ thɔ̃dodaarsɔ na dã kha na khɛra ga.» 6 Dɩ Davɩdɩ birsee: «Gɩ pɩɛr sɛr khɛr phɩ̃na mɔna gɩ n hanɩ, a thɩ̃ɛ ha thaa. Dɩrakɛ a ma jal kʋʋra, asɩ sɔrasɩsɔɔ koke thɩ̃sɔ n phʋɔlɛ. Dɩ adorakɛ ko ʋrɛ na do Thãgbaa irǝ ga sɩ koke thɩ̃ɛsɔ phʋɔlɛ.» 7 Dɩ bonɩ jidaar gbaar buruukɛ wɩ hanɩ Thãgba Kɔ̃tɩn a haa; gɩdonɩ buru kpɩɩ na hale saagado gɛr gaaga. Gɛr dɔ buruukɛ n hanɩ Thãgba Kɔ̃tɩnɩ ƴɛra, a debi wire dã, dɩ wɩ debi na buru phʋɛ sa gba. 8 Ga wiilera le Thãgba Kɔ̃tɩnɩ cɔ, Sayuli thɔ̃dodaar bɩɛl kɔɔ hale a pɔ thãgbaa thɔ̃ dɩkhara. Edɔ̃ɔ mǝl gɩ da n do Dɔɛgɩ. Sayuli nʋ̃ khedaar kɔ̃tɩ̃ɩ a do. 9 Dɩ Davɩdɩ bule Ahɩmɛlɛkɩ: «Fa hana kɩɛr kpɩla agɩbo bajɩna ga? Ma gba ɩ̃ bajɩna, dɩ ɩ̃ koke thɩ̃sɔ ga, gɩdonɩ jamanaa thɔna n phʋnanɛ». 10 Dɩ Ahɩmɛlɛkɩ birse: «Golɩatɩɩkɛ dɔnɩ Fɩlɩsɩtɛ̃ɛkɛ fɩ kʋnɩ Ela ɓɛlɛnɔ, ɔɔ bajɩna hale dɩ̃ parna kẽkɩɩn a thɩɩn bonɩ ji kẽkẽ bilo. Ado fɩ n ƴaalɛ fɩ gba, gba, a mɛ̃ ga dakpɩɩ na ha kɩɛra'». Dɩ Davɩdɩ sʋʋraa: «Ha mɩ, ma yɩ dakpɩɩ dɩ baa ga.»
Davɩdɩ jaal Gatɩ dɩɩra, Fɩlɩsɩtɛ̃sɔɔ pa.
11 Dɩ Davɩdɩ ɩɩr ga wiile a ca Sayulə a jal dã Gatɩ jamana Akɩsɩɩ pa.
12 Dɩ Akɩsɩɩ thɔ̃dodara bule Akɩsɩ: «Ga do Davɩdɩɩkɛ dʋɔnɩ Ɩjɩrayɛl jamana ha ʋka'? Ga do ɔɔ irǝ wɩ pɛ nɩɛɛkɛ wɩ n khɩnɩ dɩ wa n sana aa:
«Sayul kʋrɛ gbɩlanɩ (1000)
dɩ Davɩdɩ kʋ gbɩlanɩ yʋɔrra (10000)»?
13 Thɩmɩale sor Davɩdɩ thɩ̃ɛ haarra jɔɔ dɩ maar ho ga hǝrǝǝre Gatɩ jamanana. 14 Dɩ a jɩrɛ sa cʋʋ a ho dǝ̃bǝǝlu awɩ ƴɛra, a ma da n mɩɩ bʋlabʋla, da n kherena loosɔɔra, a lɩna ɲɔ̃thɩɩn kalala da n pɛ nɔkhuusera. 15 Dɩ Akɩsɩ so ɔɔ thɔ̃ dodarara: «Ner yɩnɩ kuunna a jɩ kpãkpũdaar gɩ, aɲera nɩ kpaa dɩ na n ɩna mar? 16 Kpãkpũdara 'lea mɩ dɩ nɩ kpa ʋrɛ ɩna a na n cʋʋ mar ɔɔ kpãkpũ thɔ̃sɔɔkɛ ya? Ʋrɛɛkɛra na lʋʋn ɩ̃ cɔ yaa?»