Jonatã teere pɛ Davɩdɩra. \ref 1Sam 23. 16-18; 2Sam 9; Sokp 17.17
20
1 Dɩ Davɩdɩ ther Nayɔtɩ, Rama dɩɩra a jal Jonatãa pa a bulee: «Aɲe mɩ cʋʋ, ʋmɔ̃ dɔrakɛ ɩ̃ dɩ tɔr, puu ca ʋmɔ̃ mɩ cʋʋ afɩ thɩra da n ƴaal mɩ yʋʋ?» 2 Dɩ Jonatã birsee: «Mɩ bor kpei, fa khǝ'! Thɩ̃ɛ na hale dɩ ɩ̃ thɩ n cʋʋ a thɩ̃ kɔ̃tɩ̃ɩ gɩ, a thɩ̃ buu gɩ, sɩ aa mɩɩ maa ga. Dɩ aɲe na dɔ nɔɔ dɩ na ker mar gele. Ga ha mã'.» 3 Dɩ Davɩdɩ bir sʋʋraa na ʋlfɛrɛ ayɩ: «Afɩ thɩ jɩrɛ dɩ afɩ kuun mɩ do, agakpaana' gɛr gɩ dɩ so, ado fɩ nɩɛ, ga cʋʋ fɛr dɩ fa gbobi. Sɩ na Thãgba Kɔ̃tɩnɩ i na fɛrɛ thɛthɛɛ i mɩ sona far; nɔ ka babɩɛl sɛ mɩ sɩ ɩ̃ lõ khirǝ».4 Dɩ Jonatã sʋʋraa: «Ma cʋʋ farɛ gɩrɛ fɛʋʋkɛ fɩ n ƴaalnɩ». 5 Dɩ Davɩdɩ so Jonatana: «Hɩnɛ cʋɔ, sɩpor pha fɛtɩ gɩ, mɩ kɔɔ teenanɛ ɩ̃ tɔɔ na jamana sɩ kho dikor, sɩ ha mɩ hʋɛ, ɩ̃ jal hʋɔnɔ ɩ̃ wɔ̃ gɩ dana wire yẽther wiree dʋɔrɔ. 6 Ado afɩ thɩ bule fɩ na kpãkpaanɔ ayɩ aɲe gɩ ma ha kaa ya? Sʋɔraa aa, mɩ bɩɛl fɛr a kpãkpaanɔ fɩ ha mɩ hʋɛ ɩ̃ kɔ̃ khǝ̃khǝ̃ ɩ̃ dʋɔ Bɛtɩlɛhɛm, gɩdonɩ ɩ̃ ca fɛw hananɛ yɛ fi bonɩ jii». 7 Dɩ aa so: «Gɩ bɔrɛ», ga dor mɛr afɩ thɔ̃ dodaarɩ ha ie gɩ. Sɩ aa gba nĩkhii, jɛ dɩ puureekɛra a ƴaalnɩ a cʋʋ mɩ a gbɛbɩrɛ pɩ. 8 Dɩ liir fa nɩna afɩ bɔjɩ mɛr afɩ thɔ̃ dodaara, gɩdonɩ sɩ ʋlfɛrɛ kha na Thãgba Kɔ̃tɩnɩ i. Sɩ ado fɩ yɩ marɛ dɩkha, fɛrɛɛ thɛthɛ n kɔ mɩ, aɲera fa gba mɩ na ha afɩ thɩ?»
9 Dɩ Jonatã sʋʋraa: «Kpɩɛrɛɛkɛ fɩ hananɩ dɩ ɩ̃ thɩ tire kpɩɛrɛ a cʋʋ fɩ puure dɩ̃ jɩ, sɩ ma ƴaal ɩ̃ so fara', dɔ gɩ hʋnɔna fɩ». 10 Dɩ Davɩdɩ birsee: «Amɛ na sɔ mar ado afɩ thɩ kpo far yire dɩɩ khɩɩr?» 11 Dɩ Jonatã sʋʋraa: «Ɩna, sɩ tɔ sɩ the hʋɔnɔ.» Dɩ wɩ gbaar wɛr yeɲɔ a the le hʋɔnɔ. 12 Dɩ Jonatã sʋʋraa: «Na Thãgba Kɔ̃tɩnɩkɛ dɔnɩ Ɩjɩrayɛlɩ Thãgbaa i, cʋɔ agɩbo gɩbɩ̃ɩ wɛ̃bɔɔkɛra, ma ber ɩ̃ thɩ bɩnɛ ɩ̃ hɩɩn. Ado a hana farɛ kpɩɛr bʋɔ sɩ na thɔ̃ tibil da pɔ na so far, 13 Thãgba Kɔ̃tɩn n pɛ mɛr Jonatana sor gɩ khɩɩr gɩ ka ado puu cʋʋ kpɩɛrɛ a hana fɩ, sɩ ma so fara'; sɩ ado a hana farɛ kpɩɛr puu, ma so farɛ, sɩ ɩ̃ faa fɩ fɩ jal, gɩ do nɔɔ fɩ jalna ha ɩɩ. Thãgba Kɔ̃tɩn n hana kha na fɛrɛ mɔ̃kɛra a kɔɔ hanɩ kha na ɩ̃ thɩ. 14 Dɩ kɛ na khiro ado mɩ hana yire 'lo, hanana mar Thãgba Kɔ̃tɩnɩ bɔjɩ ca, ɩ̃ hana yire. Dɩ a mɩ khi, 15 hanana ɔ bɔjɩ cara ɩ̃ cɔdarara, adorakɛ Thãgba Kɔ̃tɩn na bũburõ afɩ sodara thɩɩra bɩɛlbɩɛl.» 16 Thale Jonatã ʋlfɛ nɔ bɩɛl ʋlfɛrɛ na Davɩdɩɩ cɔdara ayɩ: «Dɔ Thãgba Kɔ̃tɩn n tiir Davɩdɩɩ sodarara helu.» 17 Dɩ a bire cʋʋ Davɩdɩ, dɩ ʋlfɛ dɩɩ the ɔɔ naʋra, gɩdonɩ a naarɛ a ho mɔ̃ a nanɩ ɔɔbara.
18 Dɩ Jonatã bir sʋʋraa: «Dɩɩkɛ n wɩlanɩ sɩpor pha fɛtɩ gɩ. Wa jɩrɛ fa ha ka', gɩdonɩ afɩ too pa na toore dakhɩɩ. 19 Gɩbɩ̃ɩ wirera, jɩɛ tɔ gbũ tɩɛr, a jala dana dapa fɩ kɔɔ wɔ̃nɩ odoo, a tɔɔ le Ejɛl boka kɩrɔ. 20 Ma thar sẽe yẽther lelee khɔra, gɩ ho thɩ̃ɛ mɩ ti dɩ ma n tha. 21 Agɩpɩ ma thʋɔn daɓolbir bɩɛl sɩ ɩ̃ sʋʋraa: «Jala ule sẽe.» Ado mɩ phaana: «sẽekɛ afɩ khiro, birǝ ule!» Thɩ̃ɛ na hale na mɩɩ bã. Thɛ ɩna, so khɩɩr na hale na 'li fa'. Thãgba Kɔ̃tɩn hananɛ yire. 22 Sɩ ado mɩ phãanaa, «Yɛ sẽe le ƴɔɔ.» Ɩrɛ jala, gɩdonɩ Thãgba Kɔ̃tɩn ƴaalɛ fɩ jala. 23 Thãgba Kɔ̃tɩn torore yire gɩrɛraakɛ sɩ mɩɩnɩ kha.»
24 Dɩ Davɩdɩ jaal le hʋɔnɔ a wɔ̃. Sɩpor phaa fɛtɩ wire daan dɩ jamana ka too dɩko kho paar a kho dikor. 25 A toore mɔna a n toonɩ wire wire ɔɔ too paraakɛ keranɩ gʋʋra, dɩ Abɩnɛɛr too a khunǝǝ, sɩ Jonatã too ɔɔ ƴɛkʋʋlɔ. Sɩ Davɩdɩɩ too pa too dakhɩɩ. 26 Ga wiile Sayul na so thɩ̃ɛa', gɩdonɩ a kpɩɛrɛ, agaboa', dɩkhaa dɩpa dɩkha a hana, gɛr hɩna aa pɔa'. 27 Dɩ ga dɩwɩlɔ, sɩpor pha fɛtɩɩ balaɲɔ wi, Davɩdɩɩ too pa toore dakhɩɩ wo. Dɩ Sayul bule ɔɔ bikuun Jonatã ayɩ: «Aɲe dɔ nɔɔ Ɩjaɩɩ bikuun na ɩ̃ dɩko kho paar de dɩ nĩ ga? » 28 Dɩ Jonatã birsee: «A bɩɛl mɛr a kpãkpaanɔ, ɩ̃ ha nɩ hʋɛ ɩnɩ n kɔ̃ Bɛtɩlɛhɛm. 29 A so marɛ ɩ̃ ha nɩ hʋɛ ɩnɩ n kɔ̃, gɩdonɩ ɩnɩɩ dʋɔ ɩnɩ hananɛ ca bonɩ ji, dɩ ɩnɩɩ õkuun thɔ̃ wenɩ ɩnɩ n pɔ. Dɩ ado mɩ hana narɛ bɔ jɩɩr, ɩ̃ faanɩ hʋɛ ɩnɩ n kɔ̃ ɩnɩ n yɩ ɩnɩɩ omɩsɔ. Gɛr hɩna aa hanɩ kɛ dɩko kho paar na fɛr jamana ga.» 30 Dɩ le nĩkhii thãthɩlã Sayul Jonatana dɩ nɩɩrʋ aa: «Bebireekɛ! Ma jɩ dɩ kuune fɩ kur na Ɩjaɩɩ bikuunaa? Afɩ yicur na afɩ nɩɩda gɩ do. 31 Bɔɔ wo bɔɔkɛ Ɩjaɩɩ bikuun na hananɩ yire thɩɩraakɛ fɛrɛ thɛthɛ na yɩ ƴɛ hɩrɛrɛ dɩ afɩ jamana dora ga. Dɩ gɛr gɩ, thɔna ƴaalɛɛ, a kpaa ɛna mar, gɩdonɩ khir a teena.» 32 Dɩ Jonatã birse ɔɔ thɩ Sayul ayɩ: «Aɲera fa kʋʋ; aɲe a cʋʋ?» 33 Dɩ Sayul ti kpɩla ɩnɩ n dʋʋ. Dɩ le Jonatã jɩɩ jɩ tue dɩ kpɩɛrɛ ɔɔ thɩ ti na sobɔr ɩnɩ n kʋ Davɩdɩ. 34 Dɩ le a ɩɩr dɩko kho paar na nĩkhii, a cɩ̃cɩma fɛtɩɩ balaɲɔ wi dɩkɔ a bo. Davɩdɩɩdara a gbobi; dɩɩ do nɩɩr pa puukɛ ɔɔ thɩ nɩɩrnɩ Davɩdɩ dɔ kɩrʋ.
35 Dɩ ga dɩwɩlɔ duuro, Jonatã gbaar jal le hʋɔnɔ ka Davɩdɩ hanɩ mɔ̃kɛra wɩ kɔɔ mɩɩnɩ kha. Ɔɔ thɔ̃ dodaar daɓolbir bɩɛl thɔgʋʋrɛ dɩ wɩ jal kha. 36 Dɩ a sor daɓolbirǝǝle: «Ca jala ƴaalɛ sẽekɛ ma thanɩ a ule.» Dɩ daɓolbir ca jal dɩ Jonatã thar sõ bɩɛl dɩɩ kpãasɛraa. 37 Dɩ bɔɔkɛ daɓolbirile jalnɩ gɩdo a daan dapa Jonatã thanɩ sõo dɩɩ ji, Jonatã phaanaanɛ ayɩ: «Sõo na be dapaale fɩ hanɩ sa hale pal ƴɔɔaa? 38 Phana khǝ̃khǝ̃ fa n jɩɩla'». Dɩ Jonatãa daɓolbir khɩɩrɛ sẽe a kɛr bir ɔɔ kɔ̃tɩ̃ɩ pa. 39 Daɓolbirile na jɩrɔ thɩ̃ɛa', Jonatã na Davɩdɩ dɩbara kɔɔ jɛ kha thɩ̃doo. 40 Jonatã gbaar ɔɔ tha na sẽe a ha daɓolbirile a kɛrana kɔna dɩɩra. 41 Dɩ ɔbɔɔkɛ daɓolbirile gbanɩ jal pɩ, Davɩdɩ ther le ɔɔ wɔ̃ pa boka bilo, a sʋr balãther Jonatãa ƴɛra. Agɩpɩ kona yeɲɔɔle palɛ kha, a ma dɩ wa n khɩɩ. Sɩ Davɩdɩ khɩa jɔɔ. 42 Agɩpɩ Jonatã sor Davɩdɩra ayɩ: «Kɔna na ha ɩɩ; gɩdonɩ sɛr yeɲɔ ʋlfɛnɛ kha na Thãgba Kɔ̃tɩnɩ i a so yɩ: «Thãgba Kɔ̃tɩn dʋɔn barãdaa mɛrɛ na fɛrɛɛ thɩ̃thɩɩn, ɩ̃ mǝl na afɩ mǝlsɔɔ thɩ̃thɩɩn bɔɔ khorr.»