\ref Sokp 17.17; 31.8-9
19
1 Sayul sor ɔɔ bikuun Jonatana na ɔɔ thɔ̃ dodarara fɛw aa ɩna kʋrɛ Davɩdɩ. Sɩ Jonatã nar Davɩdɩ dɩɩ thʋ̃ kar; 2 Dɩ gba sʋʋraa: «Ɩ̃ thɩ Sayul n ƴaalɛ a kʋ fɩ. Dɩ gɛr gɩ cʋɔ duuro na dɔ bʋrɛ. Ƴaalɛ wɔ̃ paar a wɔnanɔ. 3 Ma ther sɩ pɔ kha na ɩ̃ thɩ le hʋɔnɔ dapaakɛra fɩ wɔ̃nɩ, ɩ̃ gba afɩda ɩ̃ mɩgʋʋ, ɩ̃ hɩɩn gɩrɛ a na sonɩ agɩpɩ, ɩ̃ pɔ ɩ̃ mɩɩ fɩ.» 4 Jonatã mɩɩrɛ ɔɔ thɩ, Davɩdɩɩ da bɔ a sʋʋraa: «Jamana fa n cʋʋ puure afɩ thɔ̃ dodaar Davɩdɩra ga, gɩdonɩ aa cʋʋ far puurǝ'. Bɔɔ a ka cʋʋ fɩ dɩɩ ka. 5 Ɔɔ yi a 'laa a kʋ Fɩlɩsɩtɛ̃ kuunile, sɩ dɩ Thãgba Kɔ̃tɩn taa ɔɔ too Ɩjɩrayɛldara taarɛ dɩɩ kɔ̃tɩ̃ ka. Fɩ to garɛ yire dɩɩ da far ka. Dɩ aɲeraakɛ fa cʋʋ sopuu, fɩ deer tɩɩ sarʋʋ tɔmɩn, fɩ kʋ Davɩdɩ sɩ kɩrʋ na hala'.» 6 Dɩ Sayul pɛr Jonatãada nũu, a ʋlfɛ aa yidaar Thãgba Kɔ̃tɩn do ɩna kʋ Davɩdɩ bã. 7 Dɩ Jonatã wer Davɩdɩ a gba thɩ̃ɛ fɛw a mɩgʋʋ, agɩpɩ dɩ kpaa kɔna Sayuli pa, dɩ bir fʋ ɔɔ thɔ̃ mɔna gɩ kɔɔ hanɩ kɛkɛra.Mɩkal taarɛ Davɩdɩ khirǝ \ref 1Sam 18.8-11; Khɩ 37; 32, etc.
8 Dɩ mɔ̃ kʋʋr birni ɩɩr, Davɩdɩ ther a kena Fɩlɩsɩtɛ̃sɔ, a puno wɩ dɩɩ thʋ̃ puuro ka, dɩ wɩ fuule sa sɩɩ. 9 Dɩ thu biseekɛ thɛnɩ Thãgba Kɔ̃tɩnɩ pa pɔr a lõ Sayulə tɔɔnɩ le cɔ bɩnɔ na kpɩla ɲɔ̃kɔɔ. Dɩ mɔ̃ Davɩdɩ toonɩ da n bɩ̃ kolõjʋ̃ʋ, 10 Sayul yɩ ɩna kpaarɛ na mana gʋʋ, dɩ Davɩdɩ vɛlɛ sɩ dɩ gɔ gʋʋ na kpɩla. Dɩ Davɩdɩ ɩɩr gaa dɩtɩnɔɔle a ca buurǝǝ.
11 Dɩ Sayul thʋɔn tɩbɩla Davɩdɩɩ cɔ, wɩ jala a nʋɔ a dɩɩ wɩl duuro wɩ kʋʋ. Sɩ ɔɔ khɛr Mɩkal gbaar a mɩgʋʋ sa sʋʋraa: «A fa ca dɩtɩnɔɔka', sɩ dɩ dɩɩ wɩl 'li fɩ, fɩ khire». 12 Dɩ a fʋrɛ Davɩdɩ dɩ gbunǝ fɛnɛtɩrɩ a ca bu. 13 Agɩpɩ a gbaar cɔ bɛr thɩl a kana pɛ Davɩdɩɩ phɩ̃ pa, a gba bʋ lʋʋ a thii yʋʋ, sa thii kẽkɩɩn. 14 Dɩ ɔbɔɔkɛ Sayuli thɔ̃thɔ̃sɔ danɩ wɩ fʋ Davɩdɩ, ɔɔ khɛr so warɛ gɩ n khʋʋrɛ. 15 Dɩ Sayul bir thɔ̃ wɩ wo a so war: «Nɩ jala yɩɛ, a gbaanɛɛ na ɔɔ phɩ̃ pa ɛna ha mɩ ɩ̃ kʋ». 16 Dɩ ɔbɔɔkɛ Sayuli thɔ̃thɔ̃sɔ kɛrnɩ bir jal, cɔ bɛr thɩl wɩ yɩ phɩ̃ paara, na bʋ lʋʋ yʋɔ. 17 Dɩ Sayul bule Mɩkal: «Mɔ̃ dɔ nɔɔ dɩ fɩ gba mar fɩl ca ʋrɛ, sa faa ɩ̃ lãlaardaar dɩ ca bu?» Dɩ Mɩkal birsee: «A so marɛ, ɩ̃ faanɩ ɩnɩ n jal, a mɛ̃ ga ɩna kʋ mɛr.»
Sayul weere Davɩdɩ a kpaan Nayɔtɩ
18 Thale Davɩdɩ ca a bu, a gba jal Samʋɛlɩ pa Rama, a mɩgʋ gɩrɛ fɛʋʋkɛ Sayul kɔɔ cʋʋraanɩ. Agɩpɩ wɩ gbaar na Samʋɛl a jal too Nayɔtɩ. 19 Dɩ wɩ gbaar jalna mɩɩ Sayul aa Davɩdɩ hale Nayɔtɩ, Rama dɩɩra. 20 Dɩ Sayul bire thɔ̃ tɩbɩla wɩ jala fʋɔnɛɛ. Dɩ ɔbɔɔkɛ wɩ danɩ, wɩ yɩrɛ Thãgbaa mɩmɩɩ gbulõ bɩɛl dɩ Samʋɛl kʋʋl wɩ ƴɩɛ dɩ wa n mɩɩ gɩrɛ thɛnɩ Thãgbaa pa. Dɩ Thãgba thu lʋʋn thɔ̃thɔnanaale, dɩ wɛr dakha mar dɩ wa n mɩɩ gɩrɛ thɛnɩ Thãgbaa pa. 21 Dɩ wɩ gbaar jalna mɩɩ Sayul, dɩ bir thɔ̃ tɩɩ kpɩɩsɔ wo, dɩ wɛr dakha daan a ma dɩ wa n mɩɩ gɩrɛ thɛnɩ Thãgbaa pa. Dɩ a thʋɔn balãtherdaa wo, dɩ wele dakha mar dɩ wa n mɩɩ gɩrɛ thɛnɩ Thãgbaa pa. 22 Dɩ Sayuli thɛthɛ ɩɩr a jal Rama. Dɩ ɔbɔɔkɛ a danɩ bireraakɛ hanɩ Seku, a bulele: «Kana Samʋɛl na Davɩdɩ ha?» Dɩ wɩ birsee: Wɩ hale Nayɔtɩ, Rama dɩɩra.» 23 Dɩ le Sayul ga ƴɩɛ da n jal Nayɔtɩ, Rama dɩɩra. Dɩ Thãgbaa thu lʋʋnaanɛ dakha dɩ mɩɩ gɩrɛ thɛnɩ Thãgbaa pa na hʋɛ a jalna dana Nayɔtɩ. 24 Dɩ ɔr dakha kpaarɛ ɔɔ kẽkẽsɔ sɩ da n mɩɩ gɩrɛ thɛnɩ Thãgbaa pa Samʋɛlɩ ƴɛra. Agɩpɩ a tǝǝre ji thʋnɔ na tomɩr biire a jo jɔlɔjɔlɔ. Dɩ a phɩnɛ le thʋnɔ ga wiile a kana dana dɩwɩlɔ. Gɛr dɔ kɩrʋ dɩ tɩbɩla na n so: «Sayul dakha dor Thãgbaa mɩmɩɩ ya?»