Jonatã kure kuune na Davɩdɩ \ref 1Sam 19.1-7, 20; 23.16-18; 2Sam 1.26
18
1 Dɩ dabɔɔkɛ Davɩdɩ mɩɩnanɩ Sayul a pɩ, ɔɔda lʋʋn Sayuli bikuun Jonatã haar waa dɩ thʋ̃ naa, a ho mɔ̃ a nanɩ ɔɔbara. 2 Dɩ ga wilera Sayul toona Davɩdɩ ɔɔ cɔ, aa tu a haa hʋɛ a kɛr a kɔ̃ ɔɔ thɩɩ cɔ bã. 3 Dɩ Jonatã ʋlfɛnanɛ Davɩdɩ nɔ bɩɛl ʋlfɛrɛ; gɩdonɩ a naarɛ a ho mɔ̃ a nanɩ ɔɔbara. 4 Dɩ a fore kẽkẽ kɔ̃tɩ̃ɩkɛ a n tonɩ a ha Davɩdɩ, a hanaa ɔɔ kẽkẽsɔ, narakɛ ɔɔ bajɩna, na thaa na lophɛrɛ. 5 Dɩ paar wo paarɩkɛ Sayul n thɔnɩ Davɩdɩ, a a jal a n 'lɛr kǝǝre. Dɩ Sayul gbaarɛ a pɛ ɔɔ sɔrasɩsɔɔ ƴɛ kʋʋlɔ. Dɩ a kɔɔ dar tɩbɩla fɛw haar narakɛ Sayuli sɔrasɩsɔɔra dakha.Sayul ɩɩrnanɛ gbugi Davɩdɩra a ƴaal a kʋʋ. \ref 1Sam 16.14-23; 19.8-10
6 Dabɔɔkɛ Ɩjɩrayɛldaraa sɔrasɩsɔ kɛrnɩ dɩ wa n bir ɔbɔɔkɛ Davɩdɩ kʋnɩ Golɩatɩ pɩ, Ɩjɩrayɛl dɩ khɛra fɛw ther na kãka hulẽbe, a bɩ̃ bǝ̃bǝnǝ na gɩ̃ bɩ̃bɩ̃ thɩ̃sɔ, a khɩ̃ nɩɛ a sana bɩna dɩ wa n caana Sayul jamana. 7 Dɩ wɩ ti a deena na mana aa:
«Sayul kʋrɛ gbɩlanɩ (1000),
Dɩ Davɩdɩ kʋ gbɩlanɩ yʋɔr (10000)».
8 Dɩ gɩ puure Sayulə, dɩ nĩkhii ho ga lɩɛrʋrɛ. Dɩ so: «Davɩdɩ ka kɔ gbɩlanɩ yʋɔr (10000), sɩ dɩ mer kʋ gbɩlanɩ (1000); aɲe sɩɛ 'lo saagado jamana dʋʋr ga?» 9 Dɩ a fʋna ga wiile na wi gɩrɛ kpaanɛnɩ Sayul na n hɩɩn Davɩdɩ na yi bʋɔ bã.
10 Dɩ gaa dɩ wɩlɔ Thãgba thɔnanɛ thu bise dɩ pɔ lõ Sayullə le cɔ bɩnɔ dɩ ma da n mɩɩ bʋlabʋla. Dɩ Davɩdɩ har da n bɩ̃ kolõjʋ̃ʋ mɔna a n kɔɔ cʋʋnɩ; sɩɩ do Sayul kɔɔ hananɛ kpɩla ɔɔ ɲɔ̃kɔɔ. 11 A gaararɛ kpɩla sa yɩ ɔr ɩna dʋ na mana gʋʋ, dɩ Davɩdɩ vɛlɛ balaɲɔ fɛw. 12 Maar n fʋrɛ Sayul Davɩdɩra mɔ̃ a hanɩ le; gɩdonɩ Thãgba Kɔ̃tɩn fagʋʋrɛ sa ha kha na Davɩdɩ. 13 Dɩ a tiire dɩ hʋnɔnaa, sa cʋʋgʋʋ dɩ do sɔrasɛ gbɩlanɩɩ kɔ̃tɩ̃. Dɩ ɔr n gbaana tɩbɩla ƴɩɛ dɩ jalna kʋʋra, dɩ birnǝ wɩ dɩ ɩna. 14 Gɩrɛ fɛʋʋkɛ Davɩdɩ n tini kpɩɛrɛ dɩ cʋʋ, gɩ n bʋɔraarɛ; gɩdonɩ Thãgba Kɔ̃tɩn ha kha na ɔr. 15 Dɩ mɔ̃ Sayul yɩɛnɩ dɩɩ do thɩ̃ɛ n jɩɩrɛ bʋɔraa, a n jɩɩrɛ maa. 16 Sɩ Ɩjɩrayɛldara na Judadara fɛw nar Davɩdɩ, gɩdonɩ ɔr n gbaana wɩ ƴɩɛ kʋʋra.
Davɩdɩ her Sayuli bikhɛr Mɩkal \ref 1 Sam 17.25; Sokp 26.24-27
17 Dɩ Sayul so Davɩdɩra: «Yɛ ɩ̃ bikhɛr kɔ̃tɩ̃ Merabɩ, ɔr ma ha fɩ dɩ fa he. Na dɔ mar thɔma dɩbara na afɩ puno, a na thɛ Thãgba Kɔ̃tɩnɩ kosɔɔra.» Sɩ Sayuli kpɩɛr dʋɔn ga n do ɩnɛr kʋʋ na ɩnɩ ɲɔ̃a', sɩ gɩ dɔ Fɩlɩsɩtɛ̃sɔ kʋɔ. 18 Dɩ Davɩdɩ birsee: «Amɛ mɛrkɛ do, dɩ aɲe ɩ̃ thɩɩ cɔka na ɔɔ ca do Ɩjɩrayɛldaraa thɩ̃thɩɩn, dɩ ma do jamanaa thɛɛ? 19 Sɩ ɔbɔɔkɛ bɔɔ danɩ dɩɩ teena wɩ hana Davɩdɩ Merabɩ a he, wɩ gbaarɛ ha Adɩrɩyɛlɩkɛ thɛnɩ Mehola. 20 Sɩ Sayuli bikhɛr bɩɛlɩkɛ wɩ n weni Mɩkal nar Davɩdɩ. Dɩ wɩ gbaar gaa thɩmɩɩ a mɩɩ Sayul dɩɩ daaraa ka. 21 Sayul sor ɔɔ hara ɩna haarɛ Mɩkal a dʋʋra pheru Fɩlɩsɩtɛ̃sɔ n 'lɩɛ wɩ kʋ. Dɩ a sor Davɩdɩra balaɲɔdaa wo: «Nɛnɛ̃ wer ɩ̃ thɛɛ fa do».
22 Dɩ a har ɔɔ thɔ̃ dodara fɩlɛ ayɩ: «Nɩ wolone a mɩana Davɩdɩ a yɛ, jamana na ɔɔ thɔ̃ dodara ɓibi na fɛr, to a dɔ ɔɔ thɛɛ.» 23 Dɩ wɩ gbaar thalera a mɩɩ Davɩdɩ. Dɩ bule wɩ: «Anɩ ƴɛra thɩ̃ yɔɔ gɩ dɩ fa do jamanaa thɛɛ ya? Me wer bɔdaar ha mɩ ma do thɩ̃ɛa'». 24 Dɩ Sayuli thɔ̃ dodara kɛr bir a mɩgʋʋ gɩrɛɛkɛ Davɩdɩ sonɩ. 25 Dɩ so wɔɔ: «Nɩ sʋɔraa aa ma n gbaa ɩ̃ bikhɛrɩ lɩma'. Sɩ gɩrɛ mɩ n ƴaalnɩ dʋɔn a kuure Fɩlɩsɩtɛ̃ tamaa khʋ̃ losɔ a ɛna ha mɩ, gɩ nɩna dɩ mɩ tiir warɛ helu». Sɩ gelelala, hʋɛ Sayul n gbɛbɩ Davɩdɩ n lona Fɩlɩsɩtɛ̃sɔɔ ɲɔ̃kɔɔ wɩ kʋʋ. 26 Dɩ Sayuli thɔ̃ dodara jaal a mɩɩ Davɩdɩ dɩɩ bʋɔraa, dɩ tu a na do jamanaa thɛɛ. Dɩ Davɩdɩ ɩɩrɛ ɔbɔɔkɛ bɔɔ na danɩ pa', 27 a kpa ɔɔ kũusɔ a jal kʋʋr Fɩlɩsɩtɛ̃ kona taaɲɔ, a ɩna awɩ khʋ̃ losɔ dɩ wɩ ha jamana fɛw sɩ a do ɔɔ thɛɛ. Dɩ Sayul gbaar ɔɔ bikhɛr Mɩkal a haa dɩ he.
28 Dɩ mɔ̃ Sayul bonɩ yɩɛ a jɩna dɩ Thãgba Kɔ̃tɩn har kha na Davɩdɩ, dɩ ɔɔ bikhɛr Mɩkal naa, 29 a jɩɩrɛ hananaa maar, a debɩrakɛ do ɔɔ lãlaardaar bɔɔ fɛw. 30 Ga bɔɔraale Fɩlɩsɩtɛ̃ ƴɛ kʋla n kɔɔ ker kʋʋr na Ɩjɩrayɛldara. Dɩ bɔɔ wo bɔɔkɛ wɩ n thenɩ kʋʋra, Davɩdɩ n kɔɔ 'lɛr kǝǝre dɩ jɔ Sayuli thɔ̃ dodara fɛw. Dɩ a ther ire.