Davɩdɩ na Golɩatɩ thɩmɩɩr. \ref Jer 9.23; Sokp16.18
17
1 Fɩlɩsɩtɛ̃sɔ kpar awɩ kokena a jɛ wɩ ke kʋʋr Juda dɩ bɩɛlaakɛ wɩ n wenɩ Soko. Wɩ kpar kha a jɛ Efɛsɩ-Damɩm, kɛ hanɩ Soko na Ajekaa thɩ̃thɩɩn. 2 Dɩ Sayul na Ɩjɩrayɛldara kpar kha dakha a jɛ ɓɛlɛnɔɔkɛ wɩ n wenɩ Ela, a gbɛbɩ koke gbɛbʋʋ wɩ caan Fɩlɩsɩtɛ̃sɔ. 3 Dɩ Fɩlɩsɩtɛ̃sɔ har ʋ̃ʋ gɔ̃gɔ̃ yʋɔ, dɩ Ɩjɩrayɛldara ha ʋ̃ʋ gɔ̃gɔ̃ yʋɔ sɩ dɩ ɓɛlɛ̃ ha thɩ̃thɩɩn.4 Dɩ sɔrasɩ kuun bɩɛl ther Fɩlɩsɩtɛ̃sɔɔ thɩ̃thɩɩn a tɔ da n dã Ɩjɩrayɛldara. Kuunna wɩ n we Golɩatɩ, Gatɩ dɩɩra a the, ɔɔ gbã thɔɔrɛ mɛtɛrɛ yẽther. 5 A suure ther sɛ kpɩɛ ɔɔ yʋɔ, sa fʋrɔ kũkũ kɛɛ ther sɩɛɛkɛ wɩ cʋʋnɩ dɩɩ hana khʋna, kɛ ɔɔ dʋbɩ thɔɔnɩ kilǝ kpalãther. 6 Nɛgbalã phidaakɛ wɩ cʋʋnanɩ ther sɩɛ a li ɔɔ nɛgbalana sa phɛ ther sɛ kpɩla ɲɔ̃gbɛgbɛlʋla. 7 Ɔɔ kpɩla sar mãkhananɛ kẽkẽ lenaa kpulookɛ wɩ n parɔnɩ kẽkẽ wiir, sɩ kpɩla kpulo biree dʋbɩ pho kilǝ makoɲɔ. Dɩ ʋrɛ n fɔrɔnɩ ɔɔ tomɩ phida kʋʋlɛ ƴɩɛ da n kpaan. 8 Dɩ Golɩatɩ jɩɩlɛ, sa hulẽ nɔ khɩɩr Ɩjɩrayɛldarara ayɩ: «Aɲera nɩ the cʋr koke cʋrʋ? Fɩlɩsɩtɛ̃ mɩ do, dɩ nɩ do Sayuli deesɔ. Nɩ phiire tibil nɛrɛra a gbũ mar kɩɛr. 9 Ado a kɛ̃kɛrɛna mɩ a puno mɩ kʋ, Fɩlɩsɩtɛ̃sɔ na debire na do anɩ deesɔ, sɩ ado mɛr punonee a kʋʋ, na dor asɩ deesɔ na n do sar thɔma». 10 Sa bir so wo: «Nĩikɛ, nɛr Ɩjɩrayɛldara, ado nɩ n 'lar, nɩ te tibil bɩɛl ha mɩ sɩ ke kha». 11 Ɔbɔɔkɛ Sayul na ɔɔ sɔrasɩsɔ nɩɛnɩ Fɩlɩsɩtɛ̃ kuunɩ kpɛ thɩmɩɩle, maar fʋlɛ wɛr dɩ wɩ ho wa khiire.
12 Sɩ Davɩdɩ dor Efɩratadaar kuun bɩɛlɩ bikuun, kɛ thɛnɩ Bɛtɩlɛhɛm Juda dɩɩra, kuunna wɩ n we Ɩjayɩ. Bikona makõther a kɔɔ hana. Sayuli bɔɔle a kɔɔ tɩnɛ ka. 13 Ɔɔ bikuun kɔ̃tɩ̃sɔ yẽther kɔɔ jaal kha na Sayul kʋʋra. Bikuun kɔ̃tɩn n dʋɔn Elɩabɩ, balaɲɔdaar na n do Abɩnadabɩ balãtherdaar na n do Sama. 14 Davɩdɩ kɔɔ dʋɔn diin bʋɔ. Dɩ bɔɔkɛ Davɩdɩɩ õkuun kɔ̃tɩ̃sɔ jalnɩ kha na Sayul kʋʋra, 15 a n ther le Sayuli pa dɩ kɛr dɩ kɔ̃ Bɛtɩlɛhɛm dɩ khe ɔɔ thɩɩ nʋ̃sɔ.
16 Dɩ mɛna Fɩlɩsɩtɛ̃ kuunna n the duuro na dʋɔrɔ dɩ kpɛ wɩ a cʋʋna wire kpalaɲɔ. 17 Wi bɩɛl Ɩjayɩ sor ɔɔ bikuun Davɩdɩra: «Gba thɩ̃bi cɩɩnaakɛ Efa nɔ bɩɛl na buru yʋɔrɩkɛ a kpaana khǝ̃khǝ̃ hana afɩ õkũusɔ koke jɛw. 18 Gba dakha na ɩlɩ̃ khʋrʋ be yʋɔr a hana awɩ sɔrasɛ gbɩlanɩɩ ƴɛkʋʋldaar, sa yɛ afɩ õkũusɔ ado wɩ khɩɩre, tea war thɩ̃ɛkɛ ma jɩnanɩ dɩ fɩ daan a ɛna. 19 Sayul wɩ hana kha na Ɩjɩrayɛl sɔrasɛ fɛw Ela ɓɛlɛnɔ, dɩ wa n ke kʋʋr na Fɩlɩsɩtɛ̃sɔ».
20 Dɩ Davɩdɩ mãa ɩɩrɛ duuro phiphi, a kpa nʋma ha nʋ̃ kheda kpɩɩ, sa gba ɔɔ hẽeda a jal mɔ̃kɛra Ɩjayɩ sʋʋraanɩ. Dɩ bɔɔkɛ a na danɩ koke jɛw, sɔrasɛ ther a gbɛbɩ koke gbɛbɩrʋ dɩ wa n bena koke hulẽbe. 21 Dɩ Ɩjɩrayɛldara na Fɩlɩsɩtɛ̃sɔ gbɛbɩrɛ wɩ ke a gbẽlẽ kha gbulona gbulona. 22 Dɩ Davɩdɩ thʋbɩ ɔɔ hẽeda a dʋ thɩ̃bi hɩ̃ɩdaar ɲɔ̃kɔɔ, sa ca da n jal ka sɔrasɛ cʋrnɩ. Dɩ dabɔɔkɛ a danɩ a bulele ɔɔ õkũusɔ bɔɔ. 23 Dɩ dabɔɔkɛ wɩ hanɩ mɩɩrɔ na ɔɔ õkũusɔ, hɩnɛ Fɩlɩsɩtɛ̃ kuunna wɩ n wenɩ Golɩatɩ, kɛ thɛnɩ Gatɩ dɩɩra, ther Fɩlɩsɩtɛ̃sɔɔ jɔrɔna da n pɔ war na thɩmɩɩ nɔ bɩɛlɩlera wo dɩ Davɩdɩ nɩɛ. 24 Dɩ mɔ̃ Ɩjɩrayɛldara 'laanɩ na yɩ kuunɩle, maar fʋlɛ wɛr fɛw dɩɩ kar, dɩ wɩ caalɛ. 25 Dɩ fɛw bɩɛlbɩɛl na n so: «Nɩ yɩrɛ kuunna gbaanɩ da n ɩ̃? Asɩ phiile para a n ɩ̃ wo. Tibilikɛ na punoneni a na kʋʋ, jamana na haarɛ lẽle thɩ̃ɛ jɔɔ, a na hanaa ɔɔ bikhɛr a he, sɩ a hɛl ɔɔ thɩɩ cɔdara lãpho tirǝ Ɩjɩrayɛl dɩɩra».
26 Dɩ Davɩdɩ bule tibil wɩrɛ a hananɩ kha: «Aɲee kako ca wa ha tibilikɛ na kɔnɩ Fɩlɩsɩtɛ̃ kuunnɩkɛra, a ti Ɩjɩrayɛl yicuruukɛ a pɩɛraanɩ? Amɛ Fɩlɩsɩtɛ̃ kuunɩkɛ na kuroni khʋ̃a' do a kpɛ Thãgba yidaarɩ kokesɔ?» 27 Dɩ tɩbɩla bir gba mɛna wo a mɩgʋʋ. 28 Sɩ nĩkhii fʋrɛ Davɩdɩɩ õkuun kɔ̃tɩ̃ Elɩabɩ Davɩdɩra ɔbɔɔkɛ a nɩɛnɩ da n mɩɩna tɩbɩla. Dɩ bule Davɩdɩ: «Aɲee do fɩ kpaan kɛ? Amɛra fɩ pɛr afɩ nʋ̃ gbeekɛ fɩ hananɩ le bǝ̃ kparara? Mɩ jɩrɛ afɩ ko ka na afɩ ha khe. Kʋʋrɩkɛ n kɩɛnɩ fɩ ɩ̃ fɩ hɩɩn». 29 Dɩ Davɩdɩ birsee: «Yɛkɛ thɩmɩɩ! Aɲee puu mɩ cʋʋ? » 30 Dɩ Davɩdɩ fagʋʋrɛ sa kɛr bule tɩɩ kpɩɩ bule ca bɩɛlɩlera. Dɩ wɩ sʋʋraa caca khaara wo.
31 Dɩ mɔ̃ wɩ nɩɛnɩ Davɩdɩɩ thɩmɩɩ, wɩ gbaar jalna mɩɩ Sayul dɩ Sayul thɔ̃ wɩɩ. 32 Dɩ Davɩdɩ so Sayula: «Tibil bɩɛllakɛ na n do ɲɛ̃ɛ n khiiru Fɩlɩsɩtɛ̃ kuunileedara ga, mɛr afɩ thɔ̃ dodaar na jaal na kenaa». 33 Dɩ Sayul so Davɩdɩra: «Kpei! Fa n jala'; daɓolbir diine ha fɩ khaar pɔy, sɩ ole ɔɔ daɓol dĩi bɔɔ a fʋ ko kɩɩr a dana nĩ». 34 Dɩ Davɩdɩ birse Sayul ayɩ: «Ɔbɔɔkɛ mɛr afɩ thɔ̃ dodaar n hanɩ ɩ̃ thɩɩ nʋ̃ khe pa, a sidũ'ũu pɔ agɩbo ursi a fʋ nʋmɩ, 35 mɩ n car dã a bɩɩ, sa tee nʋmɩɩle ɔɔ nɔra. Aa pɩɛr mɩ, mɩ n fʋʋrɛ lɔ̃, sa bɩɩrʋʋ kʋ. 36 Thale mɛr afɩ thɔ̃ dodaar kɔɔ kʋʋr sidũ'unǝ, na sɩɓɛlɛ̃sɔ, dɩ thalera ma cʋʋ Fɩlɩsɩtɛ̃ kuunɩkɛra na kuroni khʋ̃a' a phiilenɩ Thãgba yidaarɩ kokesɔ». 37 Sa bir so: «Thãgba Kɔ̃tɩnɩkɛ taa mɩnɩ sidũ'ũu na sɩɓɛlɛ̃ɛ nɛbi khora, na taa mɛr Fɩlɩsɩtɛ̃ kuunɩkɛɛ ɲɛna». Dɩ Sayul so Davɩdɩra: «Dɩ jala, Thãgba Kɔ̃tɩn n hana kha na fɛrɛ».
38 Dɩ Sayul tor Davɩdɩ ɔɔ thɛthɛɛ kẽkẽsɔ. A subuure ther sɛ kpɩɛ, sa tʋʋ kũkũ kɛɛ ther. 39 Dɩ Davɩdɩ gbaar Sayuli bajɩna a saa pelela a dɛ̃ɛ kẽkenanaakɛ a tonɩ, a ɩɩrna a hɩɩn aa punǝ', gɩdonɩ aa kɔɔ mɩlna ga. Dɩ a sor Sayulə ɩna puno na gele na ɩɩra'. Agɩpɩ dɩ fʋʋr, 40 sa gba ɔɔ gbol a fʋrɔ ɲɔ̃kɔɔ, a uulnǝ boka pɔlɔɔ yemɔy poo nʋɔra a to ɔɔ nʋ̃ khe lokara a gba ɔɔ bãabo a tɔ da n dã Fɩlɩsɩtɛ̃ kuunɩle.
41 Dɩ Fɩlɩsɩtɛ̃ kuun dakha pɛr ʋrɛ n fɔrɔnɩ ɔɔ kũkũ kɛɛ ther ƴɔɔ, a tɔ gbe gbe da n cãa Davɩdɩ. 42 Dɩ a na hɩɩnɛ a 'laa yɩ Davɩdɩ a beesʋʋ gɩdonɩ daɓol diin sɩɛ khaar thaa pɔy a yɩ, ƴɛ bire caca. 43 Dɩ a sor Davɩdɩra: «Bɩɩn ha mɩ dɩ fa n ɩna mar gbola ya?» Dɩ a wɩɩrɛ Fɩlɩsɩtɛ̃ thɩla a pɛ Davɩdɩra. 44 Sa bir so: «Dana mɩ kɩɛr, 'lominǝ jɩɛra na hɔ̃ nʋma thɩɩra ma pɛ afɩ nʋ̃ dɩ wa kho». 45 Dɩ Davɩdɩ sʋʋraa: «Fɛrɛ, fɩ n ɩ̃ marɛ na bajɩna na kpɩla na gbuusõo, sɩ mɛrɛ, mɩ n caan fɛr na Thãgba Kɔ̃tɩnɩ i, Thãgbaakɛ dɔnɩ kokenaa kɔ̃tɩ̃, kɛ fɩ kpɛnɩ. 46 Nĩkɛra Thãgba Kɔ̃tɩn na gba fɩ na dʋ mɩ ɲɔ̃kɔɔ, dɩ ma kʋ fɛr na kur fɩ yʋʋ. Nĩ! Nɛr Fɩlɩsɩtɛ̃ sɔrasɛɛ khi ma pɛr 'lominǝ jɩɛra, na hɔ̃ nʋma thɩɩra dɩ ga do dikor dɩ wa kho, dɩ mɛ̃ tɩbɩla fɛw thɩɩra na jɩ dɩ Ɩjɩrayɛl hananɛ Thãgba. 47 Dɩ tɩbɩla fɛʋʋkɛ na jɩrɛ dɩ ga do bajɩna na kpɩla Thãgba Kɔ̃tɩn n gba dɩ taana ga; gɩdonɩ Thãgba Kɔ̃tɩn dɔ kʋʋrɩkɛɛ kɔ̃tɩ̃. A na gba nɛr na dʋ sɩ ɲɔ̃kɔɔ.»
48 Dɩ mɔ̃ Fɩlɩsɩtɛ̃ kuunna jɩɩnɩ gbɛbɩ, sɩ a pɔ Davɩdɩra, Davɩdɩ car na phananɛ a caanʋ, 49 a 'lɔɔ ti bokaar lokaarɔ, a pɛ bãbʋʋra, a bãa kurera gbẽ; dɩ bokaar lõ le bɩnɔ, dɩ ji gbib. 50 Thale Davɩdɩɩ puno jɔ Fɩlɩsɩtɛ̃ kuun, dɩ kʋʋ na bãbʋʋ na bokaar sɩrakɛ aa hana bajɩna ga. 51 Dɩ Davɩdɩ car dã, a hal Fɩlɩsɩtɛ̃ kuunɩ bajɩnana a phe a kurnǝǝ yʋʋ. Dɩ mɔ̃ Fɩlɩsɩtɛ̃sɔ yɩɛnɩ dɩɩ do awɩ nake kpulooda pɩrɛ, wɩ mar dɩ wa n caalɛ. 52 Dɩ liir Ɩjɩrayɛl sɔrasɛ na Judaa sɔrasɛ ɩɩr a be koke hulẽbire sa ca a thʋ wɩ sɩkaar a weele wɩ jalna dana Gatɩ na Ekʋrɔ̃ dɩ nʋɔra. Dɩ mɛ̃ Fɩlɩsɩtɛ̃sɔɔ khi phɩl Sarɩm hʋɛra a jalna dana Gatɩ na Ekʋrɔ̃. 53 Agɩpɩ wɩ sɩrɔrɛ awɩ weele, sa kɛr bir Fɩlɩsɩtɛ̃sɔɔ koke jɛw a khɩɩ awɩ thɩ̃sɔ fɛw. 54 Dɩ Davɩdɩ gbaar Golɩatɩɩ yʋra a jalna Jerujalɛm, sɩ Golɩatɩɩ koke thɩ̃sɔ wer, ɔɔ kẽkẽ waw a thɩɩn.
55 Ɔbɔɔkɛ Sayul kɔɔ yɩnɩ Davɩdɩ dɩ gba da n cãa Golɩatɩ a kɔɔ bulele ɔɔ sɔrasɩsɔ kɔ̃tɩ̃ Abɩnɛɛ ayɩ: «Amɛɛ bikuun ha kũubirikɛra?» Dɩ birsee: «Na ɩ̃ kɔ̃tɩ̃ jamanaa i, ma jɩrɔ thɩ̃ɛa'. 56 Dɩ jamana sʋʋraa: «Bulene a jɛ ntɛ kɔnanɩ daɓolbirikɛ». 57 Dɩ ɔbɔɔkɛ Davɩdɩ kʋnɩ Fɩlɩsɩtɛ̃ kuun pɩ a kɛr da n bir, Abɩnɛɛ kpaarɛ a jalna Sayuli ƴɛra. Sɩ Davɩdɩ kɔɔ hananɛ Fɩlɩsɩtɛ̃ kuunɩ yʋ a thɛbɩ ɲɔ̃kɔɔ. 58 Dɩ Sayul bulee: «Ɩ̃ bi, amɛɛ bikuun ha fɩ? Dɩ Davɩdɩ birsee: «Afɩ thɔ̃ dodaar Ɩjaɩɩkɛ thɛnɩ Bɛtɩlɛhɛm kɔna mɩ».