Thãgba phiire Davɩdɩ dɩ do jamana. \ref 2 Sam 7.8-9; Khɩ 78. 70-72; Th t t 13.22
16
1 Thãgba Kɔ̃tɩn sor Samʋɛla: «Ka Sayulɩdara na kʋɛ fɩ haar na dana? Mɛr bʋɔ faa a na do Ɩjɩrayɛldaraa jamana bã. Pɩɛr niin ʋnɛna gɩ hi, fɩ jal Bɛtɩlɛhɛm Ɩjaɩɩ cɔ, le mɩ n thɔ̃ fɩ, gɩdonɩ ɔɔ bikũusɔɔ thɩ̃thɩɩn mɩ phiir ʋrɛ mɩ ƴaalnɩ a dɔ jamana». 2 Dɩ Samʋɛl so: «Mɔ̃ ma fʋ sɩ na jal? A Sayul nɩɛ thɩmɩɩrɩle, a na kʋ mɛr». Dɩ Thãgba Kɔ̃tɩn sʋʋraa: «Fɔrɔ na ɓolʋ jalana, a sɔ yɛ bonɩɛ fɩ pɔ fɩ ji mɛr Thãgba Kɔ̃tɩnna. 3 Wɛ Ɩjayɩ a pɔ bonɩ jɩ paarɩle. Mɛrɛɛ thɛthɛ na cʋɛ fɩ, fɩ yɩ gɩrɛ fɩ teenanɩ fɩ cʋɛ, fɩ pɛr niin ʋrɛra ma so farnɩ, fɩ ha mɩ.4 Dɩ Samʋɛl cʋʋrɛ gɩrɛɛkɛ Thãgba Kɔ̃tɩn kɔɔ sʋʋraanɩ a gba jal Bɛtɩlɛhɛm. Dɩ mɔ̃ dɩɩlee kɔ̃tɩ̃sɔ yɩɩnɩ, wɩ jaal na jẽu ɔɔ ƴɛra a bulee: «Sɩɩ do daw fɩ n ɩna bɛ?» 5 Dɩ birse wɩ: «Daw gɩ. Bonɩɛ mɩ ɩ̃ ɩ̃ ji Thãgba Kɔ̃tɩnna. Nɩ phʋɔlɛ anɩbara sa ɩna kha na mɛrɛ sɩ ji bonɩɛ». A cʋʋrɛ Ɩjayɩ na ɔɔ cɔdara dakha dɩ wɩ phʋɔl awɩbara sɩ dɩ we wɩ dɩ wɩ pɔ bonɩ ji paar.
6 Ɔbɔɔkɛ wɩ danɩ, dɩ Samʋɛl na yɩ Ɩjaɩɩ bikuun bɩɛl Elɩabɩ, a sor ɔɔbarara aa, ʋrɛ Thãgba Kɔ̃tɩn phiirni ha ʋrɛ ɩnɩɩ ƴɛra, baalɛ na hala'. 7 Sɩ Thãgba Kɔ̃tɩn sʋʋraa: «Fa n hɩɩn ɔɔ ƴɛ na ɔɔ gbaana', mɩ bʋʋrɛ. Ga do mɔ̃ tibil n hɩɩnɩ mɩ n hɩɩna'. Gɩrɛ tibil n yɩnɩ na yire gɛr a n hɩɩn sɩ mɛr Thãgba Kɔ̃tɩn na n hɩɩn haara». 8 Dɩ Ɩjayɩ wer ɔɔ bikuun kpɩɩ Abɩnadabɩ, a kpaa dɩ ka Samʋɛlɩ ƴɛra. Dɩ Samʋɛl so: «Ga do ʋrɛ dakha Thãgba Kɔ̃tɩn phiirǝ'». 9 Dɩ Ɩjayɩ kpa Sama dɩ ka dɩ Samʋɛl so: «Ga do ʋrɛ dakha Thãgba Kɔ̃tɩn phiirǝ'». 10 Dɩ Ɩjayɩ kpar ɔɔ bikona makoɲɔ, kɛ hanɩ le dɩ wɩ ka Samʋɛlɩ ƴɛra, dɩ Samʋɛl sʋʋraa aa, Thãgba Kɔ̃tɩn na phiir bɩɛlakɛ wɛra ga.
11 Agɩpɩ dɩ Samʋɛl bule Ɩjayɩ: «Afɩ bikũusɔ fɛw har kɩɛr bɛ?» Dɩ birsee: «Dabuu hale sɩ. Sɩ ɔr n khɛ nʋma». Dɩ Samʋɛl so Ɩjaɩra: «Thɔna kpaa ɛna, gɩdonɩ sa fʋ bonɩ ji diko khor a aa ɩ̃aa ga». 12 Dɩ Ɩjayɩ thɔ̃ kpaa ɩna. Daɓolbir sɩɛ kɔɔ gɩ khǝ̃ǝkhǝ̃ǝ, yinǝ bɔɔbɔɔ, ƴɛ bire caca. Dɩ Thãgba Kɔ̃tɩn so Samʋɛla a ɩrɛ, a pɩɛraa niin yʋɔ gɩdonɩ ɔr gɩ. 13 Dɩ Samʋɛl gbaar niin na ʋnɛ a pɩɛraa yʋɔ ɔɔ õkũusɔɔ ƴɛra. Dɩ Thãgba Kɔ̃tɩnɩ thu lʋʋn Davɩdɩra a fʋna ga wiile na wi gɩrɛ kpaannɛnɩ. Agɩpɩ dɩ Samʋɛl ɩɩr a kɛr bir Rama.
Davɩdɩ har Sayuli thɔna. \ref 1Sam 18.10-15
14 Thãgba Kɔ̃tɩnɩ thu kɔɔ ther Sayula, sɩ dɩ thɔna thu bise dɩ lʋʋnaa da n gaarʋ. 15 Dɩ Sayuli thɔ̃ dodara sʋʋraa: «Hɩnɛ Thãgba thɔna thu bise dɩ ɩ̃ da n gaar fɩ. 16 Afɩ too afɩ thɔ̃ dodara too. Fɛr asɩ kɔ̃tɩn n hana sɛr afɩ thɔ̃ dodara hʋɛ, sɩ ƴaal tibillikɛ jɛnɩ kõlõjõ bɩ̃ɩ. A thu biseekɛ thɛnɩ Thãgbaa pa ɩ̃ lõ far a na n bɩ̃ gɩ ba far». 17 Dɩ Sayul birse ɔɔ thɔ̃ dodara: «Dɩ nɩ ƴaalɛ tibilikɛ jɛnɩ kõlõjõ bɩɩnna a kpaa ɛna mar».
18 Dɩ ɔɔ thɔ̃ dodaar daɓolbir bɩɛl so: «Mɩ yɩrɛ Bɛtɩlɛhɛm dɩɩra Ɩjaɩɩ bikuun bɩɛl, kɛ jɩɛnɩ kõlõjõ bɩɩn. Dako kpɩɛ gɩ, a dona koken, a khʋɔn kuun waa gel, ɔɔ thɩmɩ mɩɩ pa har caca, dɩ Thãgba Kɔ̃tɩn ha kharɛ na ɔr». 19 Dɩ Sayul thʋɔn tɩbɩla a so Ɩjayɩ n thɔna nar ɔɔ bikuun Davɩdɩɩkɛ n khɛnɩ ɔɔ nʋ̃sɔ a pɔ. 20 Dɩ Ɩjayɩ fʋ kũkǝ̃ǝ, a gba buru na dɩvɛ̃ lokaara a fʋna bʋ ɓolʋ, a thɔna ɔɔ bikuun Davɩdɩ dɩ jalna ha Sayul. 21 Dɩ bɔɔkɛ Davɩdɩ danɩ le Sayuli pa, a toore le ɔɔ thɔna. Dɩ Sayul naarɛ dɩɩ ka, a gbaa dɩ do ɔɔ koke thɩ̃ fʋrɔdaar. 22 Agɩpɩ dɩ Sayul thɔ̃ so Ɩjaɩra a faa Davɩdɩ a too nar gɩdonɩ ɔɔda lõ ner haar kpɛ. 23 Dɩ a fʋna ga bɔɔle, ɔbɔɔkɛ Thãgba n thɔnɩ thu bise dɩ ɩ̃ dɩ lõ Sayula, Davɩdɩ n gbaar kõlõjʋ̃ʋ dɩ bɩ̃, dɩ thueele n the dɩ hʋnɔnaa dɩ Sayul n jo, dɩɩ do gɩ baaraarɛ.