Sayul cʋʋrɛ dɩɩ wo balanyɔdaa dɩ Thãgba bʋʋ faa. \ref Khɩ 94.1-3; Jer 48.10
15
1 Wi bɩɛl Samʋɛl sor Sayula: «Mɛr dɔ ʋrɛ Thãgba Kɔ̃tɩn kɔɔ thɔnɩ dɩ̃ phiir fɩ, fɩ dɔ jamana a na thɔɔ ɔɔ too Ɩjɩrayɛldara. Dɩ pɛ nũu gɩrɛ a yɩnɩ ɩ̃ sɔ far. 2 Thãgba Kɔ̃tɩnɩkɛ dɔnɩ kokenaa kɔ̃tɩ̃ sɔ wɔɔ: «Mɩ tire kpɩɛrɛ ɩ̃ pɛ Amalɛkɩɩ toora sor gɩ do gɩrɛ wɩ cʋʋnɩ Ɩjɩrayɛldarara ɔbɔɔraakɛ wɩ thenɩ Ejipiti a ha hʋɔ dɔ nɔɔ. 3 Gɛr gɩ nɛnɛ̃, ɩrɛ jala a kʋrɛ wɩ, bũburone wɩ na awɩ thɩ̃sɔ fɛw, fa n hana war bɔ jɩɩra'. Kʋrɛ thɩ̃ ye fɛw: kona na khɛra, bɩsana na be, na na banasɔ, ɲɔɔmɛ̃ na kũkǝnǝ.4 Dɩ Sayul kpar ɔɔ sɔrasɩsɔ a gbɛbɩ Talayɩm dɩɩra a ther wɩ. Konaakɛ dɔnɩ nɛdara har gbɩlanɩ gbɩlanɩ der paar taɲɔ (200. 000) dɩ Judadara ha kona gbɩlanɩ yʋɔr (10. 000). 5 Dɩ Sayul gbaar jal dã Amalɛkɩɩ mǝlsɔɔ dʋɔ, a cʋʋ ɔɔ sɔrasɩsɔ dɩ wɩ wʋɔn ɓɛlɛnɔ. 6 Agɩpɩ dɩ thɔ̃ so Kenisɔɔra: «Nɩ thɛ Amalɛkɩɩ too thɩ̃thɩɩn, nɩ lea a hʋnɔnɛna wɩ. Ma n ƴaal ɩ̃ bũburone nɩ kha na wɛra', gɩdonɩ nɩ kɔɔ hananɛ bɔ jɩɩr Ɩjɩrayɛldarara bɔɔraakɛ wɩ kɔɔ thenɩ Ejipiti dɩ wa n jʋʋn». Dɩ Kenisɔ lee.
7 Dɩ Sayul kʋʋr Amalɛkɩɩ too a fʋna Havɩla a jalna dana Suur, ka Ejipiti dɩɩ pɛnɩ ƴɩɛ. 8 Dɩ a kʋʋrɛ tɩbɩla cacaca sa fʋ Agaagɩ, kɛ dɔnɩ awɩ jamana na yire. 9 Sɩ Sayul na ɔɔ too bor Agaagɩ kʋr, na nʋ̃ yɩrɛ bʋɔnɔ warnɩ: nʋ̃ yɩra na nʋ̃ kɔ̃tɩnaa thɩ̃thɩɩn. Wɩ faarɛ bana bi khɔna na ye, na thɩ̃ɛ fɛʋʋkɛ wɩ yɩnɩ dɩɩ bɔ war. Gɩrɛ wa yɩrɔnɩ ƴɔ̃ɔa', na gɩrɛ na dɔnɩ bɔtaa ga, gɛr dɩbara wɩ bũburõ.
10 Dɩ Thãgba Kɔ̃tɩn mɩɩnanɛ Samʋɛl ayɩ: 11 «Haar kʋɛ mɛr gɩrɛraakɛ mɩ phiirnɩ Sayul dɩ do jamana; gɩdonɩ a fire khiru pɛ mar, a n cʋʋ gɩrɛɛkɛ mɩ n sʋʋraana'». Dɩ kpɩɛrɛ ɲaɲaanɛ Samʋɛl ga dɩtɩnɔɔle dɩ bɩɛl Thãgba Kɔ̃tɩn a wɩlna dɩɩ. 12 Sɩ mɔ̃ dɩɩ na wɩlnɩ duuro phiphi, Samʋɛl mãa ɩɩrɛ a jal a caana Sayul. Dɩ mɔ̃ a hanɩ hʋɛra wɩ sʋʋraarɛ aa Sayul jaal Karmɛl a mɩ thɩ̃ɛ, kɛ wa kpɩɛrnanɩ wa n jɩnaa, agɩpɩ a ther le a gba hʋɛ da n gbũ Gɩlgal. 13 Dɩ a gbaar kpaan Sayula dɩ Sayul sʋʋraa: «Thãgba Kɔ̃tɩn n bɔna fɩ! Mɩ cʋʋrɛ gɩrɛra Thãgba Kɔ̃tɩn so marnɩ». 14 Dɩ Samʋɛl bulee: «Sɩ aɲee nʋ̃ yɩra khɩɩ na nʋ̃ kɔ̃tɩ̃ khɩɩ ca mɩ n nɩɛɛle?». 15 Dɩ Sayul birse: «Ɩ̃ sɔrasɩsɔ phiire nʋ̃ yɩra wɩrɛ bʋɔnɔnɩ na nʋ̃ kɔ̃tɩ̃ wɩrɛ bʋɔnɔnɩ Amalɛkɩɩ too pa a ɩna wɩ jinǝ bonɩɛ Thãgba Kɔ̃tɩn afɩ Thãgbara. Sɩ thɩ̃ gɩrɛ sɛnɩ sɩ bũburõ ger ɓibi».
16 Dɩ Samʋɛl sʋʋraa: «Gɩ thʋnɛ dã dɩphã mɛ̃; ma mɩɛ fɛr gɩrɛ Thãgba Kɔ̃tɩn so marnɩ dɩtɩnɔɔkɛ kanɩ». Dɩ Sayul sʋʋraa: «Mɩa!» 17 Dɩ Samʋɛl so: «Dabɔɔkɛ fa kɔɔ thernanɩ afɩbara tibilǝ', ga do gɛr fɩ doro Ɩjɩrayɛl caar fɛʋʋ jamana gaa? Dɩ Thãgba Kɔ̃tɩn phiir fer a cʋʋ fɩ dɩ fɩ do Ɩjɩrayɛl jamana. 18 Thãgba Kɔ̃tɩn kɔɔ ha fɛr hʋɛ aa, fɩ jala a kɛna Amalɛkɩɩ too, sopuuda ca wele, a thiǝ wɩ cacaca, 19 dɩ mɔ̃ dɔ nɔɔ dɩ fɩ bo Thãgba Kɔ̃tɩn nũ nɩɩr? Mɔ̃ dɔ nɔɔ dɩ fɩ 'lɔɔ awɩ thɩna, a cʋʋ gɩrɛ na danɩ Thãgba Kɔ̃tɩn haara'?»
20 Dɩ Sayul birsee: «Mɩ nɩrɛ Thãgba Kɔ̃tɩn nũu bɔɔbɔɔ; dɩ hʋɛɛkɛ a nɩ marnɩ, ɔmɛna mɩ jal. Mɩ fʋrɛ Amalɛkɩɩ too jamana Agaagɩ a ɩna, sa bũburõ wɛr fɛw. 21 Sɩ ɩ̃ too te caca thɩ̃ɛ nʋ̃ yɩra na nʋ̃ kɔ̃tɩna Amalɛkɩɩ too thɩna, kɛ kɔɔ teananɩ bũburone a ɩna wɩ jinǝ bonɩɛ Gɩlgal Thãgba Kɔ̃tɩn afɩ Thãgbara». 22 Dɩ Samʋɛl sʋʋraa:
«Nʋ̃ thii bonɩ jir na bonɩɛsɔ n
dar Thãgba Kɔ̃tɩnna
a ka jɔ mɔ̃ fa nɩɩnɩ nũu bɛɛ?
Thale ga! Nũ nɩɩr Thãgba Kɔ̃tɩnna baar bonɩ jir.
Dɩ dɩbara wure ba banake niin».
23 Dɩ sopuu ca bɩɛlla nũ nʋʋrɛ do na bʋʋr.
Dɩ lãʋ do bɩɛl na thɩl jir na fɩl gõgolõ.
Dɩ mɔna fɩ bonɩ Thãgba Kɔ̃tɩn nũ nɩɩr,
Thãgba Kɔ̃tɩn bo fer dakha fa do jamana bã».
24 Dɩ Sayul so Samʋɛla: «Mɩ cʋʋrɛ sopuu gɩdonɩ ma nɩ nũu Thãgba Kɔ̃tɩnɩ nɔ thɩmɩɩra ga. Dɩ fɛrɛ thɛthɛɛdara ga; ɩ̃ too mɩ ma a ka pɛ awɩ nɔ nũu. 25 Gɛr gɩ nɛnɛ̃ɛkɛ mɩ n bɩɛl fɛr, faa ɩ̃ sopuurə ha mɩ, sa kɛra birǝ kha na mɛrɛ, ɩ̃ puno ɩ̃ gburõkhu ɩ̃ fʋɔr Thãgba Kɔ̃tɩn». 26 Dɩ Samʋɛl so Sayula: «Ma puno na bir kha na fɛrɛ 'lo bã, gɩdonɩ fɩ bor Thãgba Kɔ̃tɩnɩ thɩmɩɩr, dɩ Thãgba Kɔ̃tɩn bo fer gɩ do nɔɔ fa do jamana Ɩjɩrayɛldarara bã.» 27 Dɩ mɔ̃ Samʋɛl fini khiru a gba a jal, Sayul fʋʋrɛ kẽkẽ nʋɔ dɩɩ ɓǝr. 28 Dɩ Samʋɛl sʋʋraa: «Thalera Thãgba Kɔ̃tɩn ɓǝr nĩ afɩ jamana do Ɩjɩrayɛla, a taa far a ha afɩ ʋkhaakɛ baan fɩnɩ. 29 Ʋrɛɛkɛ dɔnɩ Ɩjɩrayɛlɩ ha pɛ dɛ̃ɛ pa na n kur sõsora', dɩ aa hana a so a ma ja', gɩdonɩ tibil haa a ma jɩ n thɩɩ nʋɔa'». 30 Dɩ Sayul bir so: «Sopuu mɩ cʋʋ! Nɛnɛ̃ mɩ n bɩɛl fɛr, hanana mar cʋrɛ ɩ̃ too Ɩjɩrayɛl kɔ̃tɩna na Ɩjɩrayɛldaraa ƴɛra a birǝ thɔa mɩ ɩ̃ puno ɩ̃ gburõkhu ɩ̃ fʋɔr Thãgba Kɔ̃tɩn afɩ Thãgba».
31 Dɩ Samʋɛl bir jal kha na Sayul dɩ gburõkhu a fʋɔr Thãgba Kɔ̃tɩn. 32 A gele pɩ Samʋɛl so: «Nɩ kpa Amalɛkɩɩ too jamanana a ɛna mar». Dɩ Agaagɩ ther na daw da n jal Samʋɛla, gɩdonɩ ɔɔ kpɩɛr dʋɔn khar khir hʋnɔnɛ kha na ɩnɛrɛ. 33 Dɩ Samʋɛl sʋʋraa: «Mɔ̃kɛra afɩ bajɩna cʋʋnɩ khɛra, dɩ wɩ 'lee awɩ bɩsãsɔ, ɔmɛna afɩ nɩ dakha na 'lee fɩ», sa gbʋʋl Agaagɩ Thãgba Kɔ̃tɩnɩ ƴɛra Gɩlgal.