Jonatã 'lɛr kǝǝre Fɩlɩsɩtɛ̃sɔɔ sɔrasɩ gbulõ bɩɛla.
14
1 Wi bɩɛl Sayuli bikuun Jonatã sor daɓolbirrəəkɛ n fɔrɔnɩ ɔɔ koke thɩ̃sɔ ayɩ: «Ɩna sɩ dã Fɩlɩsɩtɛ̃sɔɔ gbulõ bɩɛlaakɛ jɛnɩ ulẽe seero». Sɩ aa so ɔɔ thɩrarakɛ thɩ̃ɛa'.2 Sayul kɔɔ hale Gɩbea dɩ khu paar a too gɩrenadɩ thɩr kɩrɔ dɩ buurǝǝkɛ wɩ n wenɩ Mɩgʋrɔ̃. Dɩ tɩbɩlaakɛ a hananɩ kha thɔɔrɛ kona taamaadõ (600). 3 Da bɔɔle, Thãgba Kɔ̃tɩnɩ bonɩ jidaar kɔɔ hale Silo da n do Ahɩya, a to bonɩ jɩ kɩ̃kɩɩn. Ikabɔdɩɩ õkuun Ahɩtubɩɩ bikuun gɩ. Dɩ Ikabɔdɩ do Fɩneyasɩɩ bikuun gɩ, dɩ Fɩneyasɩ do Elii bikuun; Eli ʋrɛ kɔɔ dɔnɩ Thãgba Kɔ̃tɩnɩ bonɩ jidaar Silo. Sɩ tɩɩ bɩɛlakɛ na kɔɔ jɩ dɩ Jonatã jaal paara'.
4 Kapaarsɔɔkɛ Jonatã ƴaalnɩ a kana sɩ a dã Fɩlɩsɩtɛ̃ sɔrasɛsɔɔ jɛ pa, boka kɔ̃tɩ̃ gãgama yeɲɔ hale. Bɩɛl ha ʋ̃ bilo dɩ bɩɛlɩle ha ʋ̃ bilo. Bokana yeɲɔɔlee isɔ n dʋɔn: Botɩsɛtɩ na Sɛnɛ. 5 Wi phã paar ɲɔ̃bɩlana ka Mɩkɩmasɩ dɩɩ pɛnɩ ƴɩɛ boka gãgã bɩɛl ha, sɩ bɩɛlɩle ha wi phã paar ɲɔ̃bɔɔra ka Geba dɩɩ pɛnɩ ƴɩɛ.
6 Dɩ Jonatã sor daɓolbirəəkɛ n fɔrɔnɩ ɔɔ koke thɩ̃sɔ ayɩ: «Sɩ jala wɩrɛ na kuronɩ khʋ̃ʋnaa jɛ pa; agaboa', Thãgba Kɔ̃tɩn na kɛ̃kɛrɛnɛ na pɛ sar, gɩdonɩ a sɩ jɔrɛ a sa jɔra' thɩ̃ɛ na hale dɩɩ pɩɛr Thãgba Kɔ̃tɩn a na n 'laa kǝǝrǝǝ ga». 7 Dɩ ʋrɛ n fɔrɔnɩ ɔɔ koke thɩ̃sɔ birsee: «Cʋɛ gɩrɛ fɛʋʋkɛ afɩ ha n kpɩɛrnɩ, sɩ jala mɩ gbɛbɩrɛ pɩ a na kpa far paar wo paarɩkɛ fɩ n jalnɩ». 8 Dɩ Jonatã so: «Gel! Sɩ dana tɩbɩlaalee pa wɩ yɩ sɩ. 9 Ado wɩ so sar: «Nɩ jɩlɛ le sɩ pɔ!» Sɩ jɩlɛ liir; sa n jal wara'. 10 Sɩ ado wɩ so: «Nɩ ɩna kɛ». Sɩ jala, gɩdonɩ gɛr dɔ jɩɩn sa jɩnanɩ dɩ Thãgba Kɔ̃tɩn gba wɛr dʋ sɩ ɲɔ̃kɔɔ».
11 Dɩ mɔ̃ wɩ jalnɩ wɛr yeɲɔra dɩ Fɩlɩsɩtɛ̃sɔ tor war yire wɩ sor: «Nɩ yɛ Ebirǝsɔ n thɩɩrɛnɩ kanasɔraakɛ wɩ wʋɔnɩ». 12 Dɩ wɩ wer Jonatã na ɔɔ koke thɩ̃ fʋrɔdaar a so war: «Nɩ jʋnɛ sɩ mɩɩ nɩ dɩkha». Dɩ Jonatã sor ɔɔ koke thɩ̃ fʋrɔdaara: «Na kpa mar sɩ jʋʋn gɩdonɩ Thãgba Kɔ̃tɩn gba wɛr dʋ Ɩjɩrayɛl ɲɔ̃kɔɔ pɩ». 13 Dɩ Jonatã ɩɩ na ɲɛ̃ɛ na nɛɛ a jal jʋʋn, dɩ ɔɔ koke thɩ̃ fʋrɔdaar ha sɩkaar; dɩ wɩ tɛna Fɩlɩsɩtɛ̃sɔ, Jonatã n ber dɩ kpɛɛ dɩ ɔɔ koke thɩ̃ fʋrɔdaar n pɩɩr da n kpaana. 14 Jonatã na ɔɔ koke thɩ̃ fʋrɔdaarɩ caca beekɛ wɩ benɩ Fɩlɩsɩtɛ̃sɔ, gɩ kpalɛ khor. Bǝ̃ buurǝ fɩɩʋ, wɩ kʋrɛ tɩbɩla kpelẽsɔ. 15 Dɩ ma kɔ̃tɩ̃ɩ gbaar koke jɩɛ na wɩrɛ diǝ warnɩɩ bǝ̃sɔ a fʋlɛ tɩbɩla fɛw. Maar fʋlɛlɛ wɩrɛ dɔnɩ bɛbɛra na wɩrɛ dɔnɩ thɩ̃ kʋɛasɔ dakha. Thɩɩ mar wo, a jẽ da n ɓãa, dɩ maar kɔɔ karɛ. Dɩ maar gɩɩkɛ thɛnɩ Thãgbaa pa.
16 Sayuli tookɛ a kɔɔ pɛrnɩ Gɩbea Bɛ̃jamɛ̃ɛ dʋɔ wa n gɩlɛ, 'laarɛ yɩ Fɩlɩsɩtɛ̃sɔkɛ n caalɛnɛnɩ bʋlabʋla. 17 Dɩ Sayul so tɩbɩlalaakɛ a hananɩ kha: «Nɩ thera tɩbɩla a jɛ ntɛɛkɛ thɛnɩ asɩ thɩ̃thɩɩn a jal war». Dɩ wɩ ther tɩbɩla a yɩɛ dɩɩ do Jonatã na ʋrɛ n fɔrɔnɩ ɔɔ koke thɩ̃sɔ na hãala'. 18 Dɩ Sayul so Ahɩyara: «Gba Thãgbaa ʋlfɛ khɛɛsʋaɛna! Gɩdonɩ Thãgbaa ʋlfɛ khɛɛsʋ kɔɔ har Ɩjɩrayɛldaraa thɩ̃thɩɩn ga wiile. 19 Dɩ bɔɔkɛ Sayul hanɩ da n mɩɩna bonɩ jidaar, nɔkhena jɩɩrɛ lũkpurũ Fɩlɩsɩtɛ̃sɔɔ thɩ̃thɩɩn, dɩ so bonɩ jidaara: «Kho thakɛ». 20 Agɩpɩ Sayul na ɔɔ tookɛ a hananɩ, kpar kha a jal na dã koke paarɩle, ɲaɲaanɛ kar ga ha mɩɩrɛra ga; Fɩlɩsɩtɛ̃sɔɔkɛ n kʋrɛ kha awɩ ha na bajɩnasɔ. 21 Ebirǝ ɩkhasɔɔkɛ kɔɔ hanɩ kha na Fɩlɩsɩtɛ̃sɔ kɛkɛra dɩ wɩ the kha kʋʋrsɔɔra, wele hɛlɛ a ɓã Ɩjɩrayɛldararaakɛ hanɩ kha na Sayul na Jonatã. 22 Dɩ ɔbɔɔkɛ Ɩjɩrayɛlda wɩrɛ kɔɔ wʋɔnɛnɩ Efɩrayɩm gɔ̃gɔnana nɩɛnɩ dɩ Fɩlɩsɩtɛ̃sɔ pɛrrɛ nɛ pɛla, wɩ thɩɩrɛ dakha a ɓã awɩ toora dɩ wa n weele fɩlɩsɩtɛ̃sɔ. 23 Thale Thãgba Kɔ̃tɩn cʋʋ Ɩjɩrayɛldara dɩ wɩ 'lɛ kǝǝre ga wiile a ke kʋʋr foo a jalna bena Bɛtɩ-Avã dɩɩ.
Sayul ʋlfɛrɛ dɩɩ fʋ ɔɔ bikuun Jonatã \ref Sog 11.30..., 21; Dǝt 17.20
24 Da wiile Ɩjɩrayɛldaraa fãga fɛw pɩrɛ, gɩdonɩ Sayul kɔɔ ʋlfɛrɛ pɛ war ayɩ: «A fʋna kɩɛr na dana dʋɔrɔ, a ma tiir helu ɩ̃ sodarara pa', sɩ dɩ tibil to dikor nʋɔ, sʋɔn n 'lie». Dɩ tibil bɩɛlakɛ na kɔɔ to dikor nʋɔa'. 25 Dɩ wɩ kɔɔ jaal fɛw a dã lu bɩɛl, dɩ thʋʋr hale thɩɩra. 26 Dɩ bɔɔkɛ tɩbɩla fɛw danɩ luule, wɩ yɩrɛ thʋʋra n celanɩ sɩ tibil bɩɛlakɛ na kɔɔ ɓɛ gɩ a to nʋɔa', gɩdonɩ maar fʋ wɛr ʋlfɛrɛraale. 27 Sɩ Jonatã na kɔɔ jɩ dɩ ɔɔ thɩ ʋlfɛrɛ pɛ ɔɔ toora ga, sa 'laa gbʋʋlɩkɛ a hananɩ ɲɔ̃kɔɔ a gɔ niin, thʋ phɛrɛra a birnǝ to nʋɔ a bir 'lɛ fãga. 28 Dɩ tibil bɩɛl awɩ thɩ̃thɩɩn sʋʋraa: «Afɩ thɩ ʋlfɛrɛ pɛ sar aa a tibil to dikor nʋɔ nĩ, sʋɔn n 'lie. Gɛr dɔ nɔɔ dɩ fãga pɩ tɩbɩla fɛw». 29 Dɩ Jonatã so: «Ɩ̃ thɩ n pɛr gaarɛ dɩɩra. Nɩ yɛ mɔ̃ mɩ tonɩ thʋʋr gbe nʋɔ, a 'lɛ fãga kɛ. 30 Baalɛ na hala', ado tɩbɩla kɔɔ khor nĩ gɩrɛ wɩ taanɩ lãlaraa ɲɔ̃kɔɔ Fɩlɩsɩtɛ̃sɔɔ kʋʋr na kɔɔ jɔ mɛ̃».
31 Ɩjɩrayɛldara kʋʋrɛ Fɩlɩsɩtɛ̃sɔ ga wiile Mɩkɩmasɩ dɩɩra foo a jalna dana Ayalɔ̃ dɩɩ; sɩ fãga thʋ̃ pɩ wɩ dɩɩ ka, 32 dɩ wɩ wu awɩ sodaraa thɩna, a fʋlɛ nũ yɩra na nasɔ na na ɓola a kana kʋʋr liirǝ a khona tɔmɩn. 33 Dɩ wɩ gbaar jalna mɩɩ Sayul aa Ɩjɩrayɛl bɩsana cʋʋrɛ sopuu Thãgba Kɔ̃tɩnna a kho nʋʋn na tɔmɩn. Dɩ Sayul so: «Aɲee nũ nʋʋr ca ha gɩrɛ nɩ nʋʋrnɩ? Nɩ kpurone boka kɔ̃tɩ̃ɩ kɔrɔ a ɛna mar kɩɛr. 34 Agɩpɩ, nɩ jala tɩbɩlala a sɔ war fɛw bɩɛlbɩɛl ntɛ n ɛna ɔɔ na, agɩbo ɔɔ bana a kɔ kɩɛr, agɩpɩ nɩ kho. Dɩ mɛ̃ na cʋʋ sopuu Thãgba Kɔ̃tɩnna, nɩ kho nʋʋn na tɔmɩna'». Ga dɩtɩnɔɔle tɩbɩla fɛw bɩɛlbɩɛl pɔnanɛ gɩrɛ ntɛ hananɩ ɲɔ̃kɔɔ a kʋ paarɩle. 35 Dɩ Sayul mɩrɛ bonɩ ji paar Thãgba Kɔ̃tɩnna. Gɛr dɔ ɔɔ caca bonɩ ji paarɩkɛ a mɩnɩ Thãgba Kɔ̃tɩnna.
36 Dɩ Sayul so: «Nĩ dɩtɩnɔɔkɛ sɩ gbuno Fɩlɩsɩtɛ̃sɔra a tagɩrɛ wɩ thɩ̃ɛ a wɩlana dɩɩ, sa n sɩ bɩɛla na yirǝ'». Dɩ ɔɔ too birsee: «Cʋɛ gɩrɛ fɩ yɩnɩ dɩɩ bɔr». Dɩ bonɩ jidaar so wɔɔ: «Sɩ kɔɔ bulene Thãgba Kɔ̃tɩn ɓo». 37 Dɩ Sayul bule Thãgba: «Ɩ̃ wea Fɩlɩsɩtɛ̃sɔ kpaan ya? Fa gba wɛr na dʋ sɩ ɲɔ̃kɔɔ ya?» Sɩ ga wiile aa kɔɔ haa tuurǝ'. 38 Dɩ Sayul so: «Nɛr Ɩjɩrayɛl kɔ̃tɩna nɩ tɔ dana kɩɛr a 'lɔ jɛ sopuu dɔɔkɛ cʋɛnɩ nĩ; 39 na Thãgba Kɔ̃tɩnɩkɛ hanɩ ƴũu, kɛ dɔnɩ Ɩjɩrayɛlɩ taadaar! Adorakɛ ɩ̃ bikuun Jonatã cʋɛ so dɔɔ, khir a teena». Sɩ tibil bɩɛllakɛ awɩ thɩ̃thɩɩn na ǝl nʋɔ a deeraa ga. 40 Dɩ Sayul bir so: «Nɛr Ɩjɩrayɛldara, nɩ jɩlɛ kho bɩɛl, sɩ mɛrɛ nakha ɩ̃ bikuun Jonatã n ha kho bɩɛl». Dɩ wɩ sʋʋraa: «Cʋɛ gɩrɛ fɩ yɩnɩ dɩɩ bɔr». 41 Dɩ Sayul so Thãgba Kɔ̃tɩnna: «Ɩjɩrayɛlɩ Thãgba cʋɛ sɩ yɩ sobɔr». Dɩ lɩɩ kana Jonatã na Sayul a fʋ dɩɩ do Ɩjɩrayɛldara therore. 42 Dɩ Sayul so: «Nɩ lɛ lɩɩ mɛrɛ na Jonatana a jɛ ntɛ hananɩ dɩɩ». Dɩ lɩɩ fʋ Jonatã. 43 Dɩ Sayul so Jonatana: «Sɔ mar gɩrɛ fɩ cʋʋnɩ». Dɩ Jonatã sʋʋraa: «Mɩ gɔr thʋʋr na gbʋʋlɩkɛ mɩ kɔɔ hananɩ a dɩ; a khir gɩ, mɛrkɛ». 44 Dɩ Sayul so: «Thãgba n pɛ mar sor gɩ khɩɩr gɩ ka ado fɛr Jonatã na khǝ'». 45 Dɩ tɩbɩla so Sayulla: «Aɲee? Aa Jonatã n khi ya? Ɔrkɛ taanɩ Ɩjɩrayɛl taa kɔ̃tɩ̃ caakɛɛ? Sɩ bor! Na Thãgba Kɔ̃tɩnɩkɛ hanɩ ƴũu, ɔɔ yʋsũu bɩɛllakɛ na ji thʋnɔa'; gɩdonɩ Thãgbaa fãga a kɛ̃kɛrɛna nĩ dɩwɩlʋlaakɛ». Thale tɩbɩlaale taa Jonatã dɩ aa khǝ'. 46 Dɩ Sayul sɩrɔrɛ Fɩlɩsɩtɛ̃sɔ weere sa kɛr bir. Dɩ Fɩlɩsɩtɛ̃sɔ gba kɔ̃ awɩ pa.
47 Ɔbɔɔkɛ Sayul gbanɩ jamana dʋʋr Ɩjɩrayɛl dɩɩra, a ker kʋʋr na ɔɔ lãlaardarasɔɔkɛ diǝni ɔɔ dʋɔ. Wɛr dɔ: Moabɩdara, na Amɔ̃ɔ mǝlsɔ, na Edɔ̃ɔ mǝlsɔ, na Soba jamanasɔ na Fɩlɩsɩtɛ̃sɔ. Paar wo paarɩkɛ a n kɔɔ finǝni ɔr n kɔɔ 'lɛ kǝǝre. 48 A nɩnanɛ Amalɛkɩ ɔɔ dako do a puno wɩ, sa taa Ɩjɩrayɛl wɩrɛ n phʋʋnɛɛnɩɩ ɲɔ̃kɔɔ.
49 Sayuli bikũusɔ dʋɔn: Jonatã, Yɩsɩvɩ na Malkɩsʋa. Dɩ ɔɔ bikhɛrsɔ yeɲɔ dakha, kɔ̃tɩn wɩ n we Merabɩ sɩ diine na n do Mɩkal. 50 Ɔɔ khɛr n dʋɔn Ahɩnoam, Ahɩmatɩɩ bikhɛr gɩ. Ɔɔ sɔrasɩsɔɔ kɔ̃tɩ̃ wɩ n we Abɩnɛɛ; Sayuli jẽ, Nɛɛ bikuun gɩ. 51 Abɩɛl kɔna Sayuli thɩ Kɩsɩ na Abɩnɛɛ thɩ Nɛɛ. 52 A fʋna Sayuli yi hanana fɛw, kokena kɔɔ hale na Fɩlɩsɩtɛ̃sɔ. Dɩ bɔɔ wo bɔɔ, a Sayul kɔɔ yɩ kuun khɩɩ, kɛ n 'lanɩ a n gbaarɛ dɩ to ɔɔ sɔrasɩsɔɔra.