SAYULI JAMANA DO.
Ɩjɩrayɛldaraa koke na Fɩlɩsɩtɛ̃sɔ na mɔ̃ Sayul dɩnɩ.
13
1 Ɔbɔɔkɛ Sayul n donɩ jamana yɛna [kpelẽ yʋɔr]a a kɔɔ hana. A do warɛ jamana a cʋʋna yɛna [kpalaɲɔ] yeɲɔ.2 Sayul phiire Ɩjɩrayɛldaraa thɩ̃thɩɩn sɔrasɛ gbɩlanɩ yẽther (3000). Dɩ gbɩlanɩ (1000) har kha na ɔɔ bikuun Jonatã Gɩbea dɩɩra Bɛ̃jamɛ̃ɛ dʋɔ, sɩ dɩ hana gbɩlanɩ yeɲɔ (2000) Mɩsɩmasɩ dɩɩra na Betɛl gɔ̃gʋɔna. Sɩ dɩ bɩlã tibil wɩrɛ sɛnɩ dɩ wɩ kɛr bir awɩ kẽkẽ waʋsɔ. 3 Wi bɩɛl, Jonatã tɛnanɛ Fɩlɩsɩtɛ̃ gbulõ bɩɛlɩkɛ hanɩ Geba kɛ n nɛnanɩ dɩ wɛr hɩna fãga. Dɩ Fɩlɩsɩtɛ̃sɔ nɩɛ. Dɩ Sayul pɛrɛ dɩ wɩ ʋ̃ tutuu Ɩjɩrayɛl dɩɩra fɛw aa Ebirǝsɔ n nɩɛnɛ. 4 Dɩ Ɩjɩrayɛldara fɛw nɩɛrɛ dɩ wa n so: «Sayul tɛnanɛ Fɩlɩsɩtɛ̃sɔɔ sɔrasɩsɔ. Dɩ nĩkhii thãthɩlã Fɩlɩsɩtɛ̃sɔ Ɩjɩrayɛldarara. Ɩjɩrayɛldara kpar kha a ha Gɩlgal dɩɩra Sayuli khiro. 5 Dɩ Fɩlɩsɩtɛ̃sɔ kpar ha pa bɩɛl wɩ kena Ɩjɩrayɛl. Wɩ kɔɔ hananɛ koke hotoro gbɩlanɩ kpelẽ yʋɔr (30. 000) na gãgo jʋʋndara gbɩlanɩ maadõ (6. 000) na sɔrasɛ tǝ̃tǝ̃tǝ̃ a ho gbalãkothɩnɩkɛ hanɩ laɲɔ̃ nʋɔra. Dɩ wɩ jaal a jɛ Mɩsɩmasɩ, Bɛtɩ-Avɛn dɩ wi phã paar. 6 Dɩ mɔ̃ Ɩjɩrayɛldara na yɩnɩ kpɩɛr dɛ̃ɛ paar bã, gɩdonɩ wele thʋnɛ pal wɩ, wɩ caalɛlɛ wʋɔn boka kanana, ɩkha u balɔsɔ, ɩkha boka balɔsɔ, ɩkha kanasɔraakɛ hanɩ thɩɩra, ɩkha bir kpoloosɔɔra. 7 Dɩ Ebirǝ ɩkhasɔ caalɛ a seer Jʋrdɛ̃ mɩɩr sa jal Gadɩɩ dʋɔ na Galaadɩ dʋɔ. Ga bɔɔraale Gɩlgal Sayul kɔɔ ha 'lo, dɩ maar fʋlɛ tɩbɩlaakɛ a hananɩ kha dɩ wa n jẽ. 8 Dɩ Sayul kɔɔ pɩɛrɛ Samʋɛl a cʋʋna wire makoɲɔ, kɛ dɔnɩ bɔɔkɛ Samʋɛl kɔɔ dʋnɩ haa, sɩ aa dã le Gɩlgala'. Dɩ tɩbɩla mar dɩ wa n bɩlã sa sɩɩ.
9 Dɩ Sayul so: «Nɩ gbɛba bonɩ thiinǝ, na 'likha bonɩɛsɔ a ɛna ha mɩ». Dɩ a gbaar bonɩ thiinǝsɔ a ji. 10 Dɩ ɔbɔɔkɛ a jini bonɩ thiinǝ na pɩ, Samʋɛl daan. Dɩ the a caanʋ a fʋɔrʋ. 11 Dɩ Samʋɛl sʋʋraa: «Aɲe ha gɩrɛ fɩ cʋʋnɩ thaa?» Dɩ Sayul birsee: «Mɔ̃ mɩ yɩnɩ tɩbɩla dɩ wɩ bɩlã, sɩ wa n sɩ mɩ, dɩ mɩ pɛ fɩ nũu bɔɔraakɛ fɩ dʋnɩ ma n yɩ fa', sɩ Fɩlɩsɩtɛ̃sɔ kɔɔ kpar der Mɩkɩmasɩ, 12 dɩ mɩ kpɩɛrɛ wa gbũ sarɛ kɛ Gɩlgal, ɔbɔɔkɛ sa bɩɛlnɩ Thãgba Kɔ̃tɩn pa, gɛr dɔ nɔɔ dɩ mɛrɛ thɛthɛ ti kpɩɛrɛ a ji bonɩ thiinǝ». 13 Dɩ Samʋɛl so Sayula: «Fɩ cʋʋrɛ dǝ̃bǝǝle khorr! Fa hɩɩn Thãgba Kɔ̃tɩnɩkɛ dɔnɩ afɩ Thãgbaa jɔfʋʋkɛ a kɔɔ ha fɩna'. Thãgba Kɔ̃tɩn na kɔɔ fʋrɛ afɩ jamana do Ɩjɩrayɛl dɩɩra dɩ ga do khordaa! 14 Sɩ nɛnɛ̃, afɩ jamana do na pʋɔra'. Thãgba Kɔ̃tɩnɩ thɛthɛ phiire tibil dɩ ha mɔ̃ ɔɔ ha n kpɩɛrnɩ, dɩ ɔr Thãgba Kɔ̃tɩn pɛr da do Ɩjɩrayɛldaraa thɔthɔɔ, gɩdonɩ fa nɩ nũu gɩrɛraakɛ Thãgba Kɔ̃tɩn kɔɔ so farna'». 15 Agɩpɩ Samʋɛl ther le Gɩlgal a jal Gɩbea Bɛ̃jamɛ̃ɛ caa dʋɔ. Sayul there tɩbɩlaakɛ sɩɛraanɩ dɩ wɩ thɔɔ kona taamaadõ (600). 16 Dɩ Sayul na ɔɔ bikuun Jonatã, na tɩbɩla fɛʋʋkɛ wɩ hananɩ kha, kɔɔ gbɛbɩrɛ koke gbɛbɩrʋ a too Geba Bɛ̃jamɛ̃ɛ caa dʋɔ sɩ Fɩlɩsɩtɛ̃sɔ jɛ Mɩkɩmasɩ. 17 Dɩ sɔrasɩ gbulona yẽther ther Fɩlɩsɩtɛ̃sɔɔ thɩ̃thɩɩn wɩ kʋɛ thɩ̃ɛ: gbulõ bɩɛl jalnanɛ Ɔfɩra hʋ khʋʋ, kɛ hanɩ Sual dɩɩra. 18 Dɩ balaɲɔdaar gba Bɛtɩ-Horɔ̃ dɩ hʋɛ; sɩ balãtherdaar gba da n jal na pɛlɩkɛ n gbunonɩ Seboyɩm ɓɛlɛ̃ khʋʋra le bǝ̃ kpara bilo.
19 Ga bɔɔraale phube bɩɛlakɛ na kɔɔ ha Ɩjɩrayɛl dɩɩra ga, gɩdonɩ Fɩlɩsɩtɛ̃sɔ kɔɔ pɩɛr wɛr, wɛr thɛthɛ na n be bajɩna dɩ kpɩla ga. 20 Fɩlɩsɩtɛ̃ɛ phubɛɛ pa, Ɩjɩrayɛl kona fɛw bɩɛlbɩɛl n kɔɔ gbũ dɩ wɩ tɩɛl awɩ na sũgbusɔ na awɩ bɔ̃tɔ̃sɔ na awɩ kpãkposɔ na awɩ sũgbusɔ. 21 Le wɩ n gbũ dabɔɔkɛ awɩ na sũgbosɔ, awɩ bɔ̃tɔ̃sɔ, awɩ kpãkposɔ, awɩ sũgbusɔ, awɩ gagasɔ tini nʋɔ, na a wa naar awɩ na gɔdasɔ. 22 Dɩ gelela dɔ nɔɔ koke wire, Sayul na Jonatãa tibil bɩɛllakɛ na kɔɔ hana bajɩna dɩ kpɩla ga. Sayulla na ɔɔ bikuun Jonatã dɩbara kɔɔ hana gɩ. 23 Dɩ Fɩlɩsɩtɛ̃sɔɔ sɔrasɩ gbulõ bɩɛl jaal a pɩɛr hʋɛraakɛ kananɩ gɔ̃gʋɔn a jal Mɩkɩmasɩ.