12
1 Agɩpɩ dɩ Samʋɛl so Ɩjɩrayɛldarara fɛw: «Nɩ yɛ gɩ, mɩ pɛr anɩ nɔ nũu a cʋʋ thɩ̃ɛ fɛʋʋkɛ nɩ kɔɔ so marnɩ, dɩ mɩ pɛrɛ jamana a na n thɔɔ nɩ. 2 Dɩ nɛnɛ̃ ɔr dɔ ʋrɛ na n thɔɔ nɩnɩ. Me wer mɩ tɩnɛ a bulolo yʋʋ, sɩ ɩ̃ bikũusɔ ha wɩrɛ na nɛrɛ. Ɩ̃ daɓol dĩi bɔɔ mɩ thɔɔ nɩ a ɩna dana kɩɛr nĩ. 3 Dɩ nɛnɛ̃ mɛr ha ʋ anɩ ƴɛra; nɩ birsene mɩ Thãgba Kɔ̃tɩnɩ ƴɛra na ʋrɛ Thãgba phiirnii ƴɛra ado dɩɩ haleekɛ mɩ cʋʋ narnɩ. Amɛra mɩ taa na na fãga bɩɩ, dɩ amɛra mɩ tee kũkǝ̃ǝ? Ʋmɔ̃ɔ tibil mɩ ʋʋnɔ, dɩ ʋmɔ̃ɔ mɩ phʋʋn? Dɩ amɛra mɩ tee khaardaa sa khaan yinǝ ɔɔ cʋʋ pa puurǝ? Ado thɩ̃ɛ hale thale, ma birsere gɩrɛra mɩ tee narnɩ.» 4 Dɩ wɩ birsee: «Fa ʋʋn sarra', fa phʋʋn sa', dɩ tibili khaarda gɩ dɩ fɩ teea'». 5 Dɩ Samʋɛl bir so war: «Dɩ Thãgba Kɔ̃tɩn na ɔɔ Mesi tore yire a nɩna nĩ gɩrɛ, dɩ na yɩ mar dɩkha ga». Dɩ wɩ birsee: «Ɔɔ, a tore yire»6 Dɩ Samʋɛl bir so war: «Thãgba Kɔ̃tɩn gbaan Mʋɩjɩ na Aarɔ̃ a tinǝ anɩ thɩthɩsɔ Ejipiti dɩɩra. 7 Dɩ nɛnɛ̃, nɩ jɩlɛ Thãgba Kɔ̃tɩnɩ ƴɛra, ɩ̃ jaa nar Thãgba Kɔ̃tɩnɩ fɩl sar thɔ̃ɔkɛ a donɩ nɛrɛra na anɩ thɩthɩsɔɔra. 8 Ɔbɔɔkɛ Jakɔbɩ na ɔɔ too kɔɔ lonɩ Ejipiti, wɩ hulene Thãgba Kɔ̃tɩnna a bulo nɩ. Dɩ Thãgba Kɔ̃tɩn thɔ̃ Mʋɩjɩ na Aarɔ̃ dɩ wɩ ti wɩ, a ɩna a pɛ ka nɩ hanɩ gɩrɛ. 9 Sɩ wɩ kɔɔ diinǝne Thãgba Kɔ̃tɩn awɩ Thãgba a faa dɩ gba wɩ faa Siseraakɛ dɔnɩ Hasɔɔrɩ sɔrasɩsɔɔ kɔ̃tɩ̃ɩ ɲɔ̃kɔɔ na Fɩlɩsɩtɛ̃sɔra, na Moabɩ jamanaa ɲɔ̃kɔɔ dɩ wɩ kena wɩ kʋʋr. 10 Dɩ wɩ bire a hulẽ wo Thãgba Kɔ̃tɩnna a taa nɩ a so: «Thãgba Kɔ̃tɩn sɩ cʋʋ farɛ puure gɩdonɩ sɩ faarɛ fɛr Thãgba Kɔ̃tɩn sɩ sa n fʋɔr thãgbasɔɔkɛ dɔnɩ Baalsɔ na Asɩtaartesɔ. Nɛnɛ̃ɛkɛ taa sɩ asɩ lãlaardaraa ɲɔ̃kɔɔ, sɩ bir sa n fʋɔr fɩ. 11 Dɩ Thãgba Kɔ̃tɩn thʋɔn Yerubaal, agɩpɩ Bedã, na Jɛfɩte, na mɛr Samʋɛl a taa nɩ anɩ lãlaardaraakɛ diǝ narnɩɩ ɲɔ̃kɔɔ, dɩ mɛ̃ nɩ puno too na ha ɩɩ dɩɩra. 12 Agɩpɩ, bɔɔkɛ nɩ yɩnɩ Amɔ̃ɔ bikũusɔɔ jamana Nahasɩ da ɩ̃ a kena nɩ, nɩ bor sa so, jamana n hana le a na thɔɔ nɩ. Sɩrakɛ Thãgba Kɔ̃tɩn anɩ Thãgba dɔ anɩ jamana. 13 Dɩ nɛnɛ̃ jamanakɛra nɩ phiirni ha ʋ. Nɩ bɩɛlɛ jamana dɩ Thãgba Kɔ̃tɩn ha nɛr jamanana. 14 Dɩ ado na ma Thãgba Kɔ̃tɩn, a na fʋɔrʋʋ, a na nɩɩ nũu, a na lã Thãgba Kɔ̃tɩn thɩmɩɩra ga, nɛrɛ na anɩ jamana na n 'lire kha na Thãgba Kɔ̃tɩn anɩ Thãgba. 15 Sɩ ado nɩ bo Thãgba Kɔ̃tɩn nũ nɩɩr, a lã Thãgba Kɔ̃tɩnɩ thɩmɩɩra, Thãgba Kɔ̃tɩn na ga narɛ ɔɔ ɲɔ̃ mɔ̃kɛra gɩ kɔɔ hanɩ anɩ thɩthɩsɔɔra. 16 Sɩ nɛnɛ̃, nɩ jɩlɛ kɩɛr a tɔrɔ yire nɔ kpaa thɩɛnaakɛ Thãgba Kɔ̃tɩn na cʋʋnɩ anɩ ƴɛra. 17 Ga do bile kha bɔɔ gɩ nɛnɛ̃ gɩraa? Sɩ ma bɩɛlɛ Thãgba Kɔ̃tɩn, dɩ na 'laa thãgba ɲʋɔn na thãgba nɔ khena, gɩ cʋʋ nɩ, nɩ jɩ, nɩ yɩna mɔ̃ anɩ puukɛra nɩ cʋʋnɩ kɔ̃tɩnɩ Thãgba Kɔ̃tɩnɩ ƴɛra, nɩ bɩɛlaanɩ a hananɩ jamana».
18 Dɩ Samʋɛl bɩɛl Thãgba Kɔ̃tɩn dɩ Thãgba Kɔ̃tɩn thɔna thãgba ɲʋɔn na thãgba nɔ khena ga wiilera. Dɩ ma kɔ̃tɩ̃ɩ fʋlɛ tɩbɩla fɛw Thãgba Kɔ̃tɩnna na Samʋɛla dakha. 19 Dɩ Ɩjɩrayɛldara fɛw so Samʋɛla: «Bɩɛlɛ Thãgba Kɔ̃tɩn afɩ Thãgba pɛ sɛr afɩ thɔ̃ dodarara, gɩ do nɔɔ sa khiirǝ', gɩdonɩ sopuu kpɩɩ sɩ cʋʋ a bir dɛ̃ɛ asɩ sopuusɔɔra, mɔ̃ sɩ bɩɛlnɩ jamana». 20 Dɩ Samʋɛl so war: «Na n do maar n fʋ na'. Sobɔr gɩ nɩ cʋʋrɛ puure dɩɩ kɔ̃tɩ̃, sɩ nɛnɛ̃ gɩrɛ na n hʋnɔna Thãgba Kɔ̃tɩnna, na n fʋɔrɛ Thãgba Kɔ̃tɩn na anɩ ha fɛw. 21 Na n hʋnɔnaa ga, a mɛ̃ gaa na kpar thɩ̃ɛsɔɔraakɛ dɔnɩ mɔlɔ thɩ̃ɛ, kɛ na n 'laanɛnɩ dɩkhaa bɔ, dɩ taarɛ ga, gɩdonɩ mɔlɔ thɩ̃ɛ gɩ do dɩbara. 22 Thãgba Kɔ̃tɩn na faa ɔɔ tooa', gɩ do ɔɔ i wabɩ dɔ kɩrʋ, gɩdonɩ kpɩɛrɛ a ti a cʋʋ nɩ, dɩ nɩ do ɔɔ too. 23 Dɩ mɛrɛ dakha ma sɩrɔ kpɩɩ ma bɩɛl Thãgba Kɔ̃tɩn ma n pɛ nara, gɩ do sopuu mɩ cʋʋ Thãgbara ga, sɩ ma hale ma n nɩ nar hʋ bʋɔ na hʋ telẽe. 24 Sɩ anɩ bilo, nɩ hanana maar Thãgba Kɔ̃tɩnna, a na fʋɔrɛɛ na sobɔr na haar fɛw. Nɩ yɛ nɔ kpaa thɩ̃ kɔ̃tɩ̃ɩkɛ a cʋʋnɩ anɩ ƴɛra. 25 Sɩ ado nɩ bo na cʋʋ puure, nɛrɛ na anɩ jamana, na bũburone.