2 SAMƲƐL 2

Davɩdɩ dor Juda jamana Ebʋrɔ̃ dɩɩra.

1 Mɔ̃ thɩ̃ɛsɔɔle kanɩ pɩ, Davɩdɩ bulele Thãgba Kɔ̃tɩn ayɩ: «Ɩ̃ ɩrɛ jala Juda dɩ bɩɛla ya?» Dɩ Thãgba Kɔ̃tɩn tu: «Jʋnɛ.» Dɩ Davɩdɩ bulee: «Ɩ̃ jala ʋmɔ̃ɔ dɩra?» Dɩ Thãgba Kɔ̃tɩn birsee: «Jalla Ebʋrɔ̃» 2 Dɩ Davɩdɩ jaal na ɔɔ khɛrsɔ yeɲɔ, Ahɩnoam, kɛ thɛnɩ Jɩjɩrɛl, na Abɩgayɛl, Nabaalɩ khikhɛr, kɛ thɛnɩ Karmɛl. 3 Davɩdɩ jalnanɛ dakha konaakɛ hanɩ kha na ɔr, wɛr fɛw na awɩ cɔdara. Dɩ wɩ toore dɩɩsɔraakɛ khonǝni Ebʋrɔ̃.

4 Dɩ konaakɛ thɛnɩ Judaa cara pɔr le Ebʋrɔ̃ a pɩɛraa niin yʋɔ, a phiiru pɛr dɩ do awɩ jamana. Agɩpɩ tɩbɩla mɩɛrɛ Davɩdɩ aa, Yabɛsɩdaraakɛ hanɩ Galaadɩ bǝǝnǝ, wɛr kɔɔ dɔ Sayul. 5 Dɩ Davɩdɩ thɔna war tɩbɩla, a so war: «Thãgba Kɔ̃tɩn n bɔna nɩ, mɔ̃ nɩ cʋʋnɩ anɩ kɔ̃tɩ̃ Sayul bɔɔ, a dʋʋ. 6 Nɛnɛ̃ɛkɛ, Thãgba Kɔ̃tɩn n cʋɛ nɩ bɔɔ na sobɔr. Mɛrɛ dakha, ma cʋʋ nɛr bɔɔ, gɩdonɩ nɩ kɔɔ cʋʋrɛ thale. 7 Nɩ hanana 'lar. Nɩ dɔ kuun khana. Anɩ kɔ̃tɩ̃ Sayul khire wer, sɩ mɛr Judaa ca phiir a pɛ mar niin yʋɔ ɩ̃ dɔ awɩ jamana.

Wɩ pɛrɛ Ɩsɩbosɛtɩ dɩ do jamana Ɩjɩrayɛl ca wɩrɛra sɛnɩ.

8 Sɩ Abɩnɛɛr wer, kɛ dɔnɩ Nɛɛrɩ bikuun, kɛ dɔnɩ Sayuli sɔrasɩsɔɔ kɔ̃tɩ̃ kɔɔ jalnanɛ Ɩsɩbosɛtɩɩkɛ dɔnɩ Sayuli bikuun Mahanayɩm dɩɩra. 9 Dɩ le a pɩɛraa dɩ do jamana caarsɔɔraakɛ hanɩ Galaadɩ bǝǝnǝ, na Asuuri mǝlsɔɔra, na Jɩjɩrɛldarara na Efɩrayɩmɩ məlsɔ, na Bɛ̃jamɛ̃ɛ məlsɔ, a dor jamana Ɩjɩrayɛl bɩsanana fɛw. 10 Yɛna kpalaɲɔ Sayuli bikuun Ɩsɩbosɛtɩ hana wɩ n pɩɛraanɩ jamana dʋʋr Ɩjɩrayɛl ca wɩrɛra sɛnɩ. Dɩ a kɔɔ dor jamana a cʋʋna yɛna yeɲɔ. Sɩ Judaa ca wer ha Davɩdɩɩ khiro. 11 Dɩ Davɩdɩ kɔɔ dor Juda jamana a cʋʋna yɛna makoɲɔ na sɩpora maadõ Ebʋrɔ̃.

Kʋʋr ɩɩrɛ Juda na Ɩjɩrayɛl ca wɩrɛ sɛnɩɩ thɩ̃thɩɩn

12 Abɩnɛɛr, kɛ dɔnɩ Nɛɛrɩ bikuun nakha Sayuli bikuun Ɩsɩbosɛtɩɩ kobisɔ ther Mahanayɩm dɩ wa n jal Gabãɔ dɩ khʋra. 13 Dɩ Joabɩɩkɛ ɔɔ nɩ n donɩ Seruya ther dakha na Davɩdɩɩ kobisɔ dɩ wa n jal. Dɩ gbulona yeɲɔɔle caanɛ kha Gabãɔ perura. Dɩ wɛ jɩɩlɛ ʋ̃ʋ bilo, dɩ wɛ jɩɩl ʋ̃ʋ bilo. 14 Dɩ Abɩnɛɛr so Joabɩra: «Dɔ daɓolminǝǝkɛ n ɩɩr, wɩ nɩ kha fãga sɩ hɩɩn!» Dɩ Joabɩ so: «Wɩ ɩrɛ bɛɛ» 15 Dɩ wɩ caanɛ a mãkha. Wɩrɛ thɛnɩ Bɛ̃jamɛ̃ɛ məlsɔɔra, kɛ dɔnɩ Sayuli bikuun Ɩsɩbosɛtɩɩ kobisɔ har yʋɔr yeɲɔ. Dɩ Davɩdɩɩ kobisɔ dakha har yʋɔr yeɲɔ. 16 Dɩ ʋ n fʋ ɔɔ sodaar yʋʋ na ɲɔ̃ bɩɛl sɩ dɩ wɩ gɔ kha na bajɩna gɛlɔ dɩ wɩ gbɛbɩ jiir. Dɩ wɩ har paarɩlera hanɩ Gabãɔ khɔra ire: Ɛlkatɩ-Asurim. Kɩrʋ dʋɔn bajɩna lɩɛ. 17 Dɩ dawiilera, kʋʋr ɩɩrɛ a khɩɩr ka. Dɩ Davɩdɩɩ kobisɔ puno Abɩnɛɛr na ɔɔ too.

18 Seruyaa bikona yẽtherɩkɛ dɔnɩ: Joabɩ, na Abɩsaɩ, na Ajaɛl kɔɔ hale. Ajaɛlɩ nɛ kɔɔ pher a ho jʋwala hʋɔnɔ. 19 Dɩ a mar Abɩnɛɛr da n wee, a n kɛrna ɲɔ̃bɔɔ dɩ ɲɔ̃bɩlã ga. 20 Dɩ Abɩnɛɛr kɛr a bulee: «Fɛr Ajaɛl gɩ bɛ?» Dɩ tu ɔɔ, ɩnɛr gɩ. 21 Dɩ Abɩnɛɛr sʋʋraa: «A fɩ jɩ lɛnana ɲɔ̃bɔɔ, agɩbo ɲɔ̃bɩlã a fɔ sɔrasɩ daɓolbir ʋkha, a kɔ, a fʋʋrɛ ɔɔ thɩ̃bi.» Sɩ Ajaɛl na tu na lɛ̃ sɩ na fagʋa'. 22 Dɩ Abɩnɛɛr bir sʋʋraa wo: «Ajaɛl, fa n kpa mara' dɛ! Fɩ n fɛrɛ mɛr ɩ̃ kɔ fɩ ya? Mɔ̃ ma cʋʋ sɩ na 'la na hɩɩn afɩ õkuun Joabɩɩ ƴɛ?» 23 Sɩ Ajaɛl bor lɩɛn. Liir dɩphã Abɩnɛɛr kɛr a gʋɔ bɩnɛna na kpɩla sɩkaar, dɩɩ the khiro. Dɩ ji gbib a khi. Dɩ wɩrɛ fɛʋʋkɛ n pʋɔnnɩ, a wa dã ka a jini khi, dɩ wɩ jɩɩl.

24 Le Joabɩ, na Abɩsaɩ wee Abinɛɛr a kpaan dɩ ɔbɔɔkɛ wire n lonɩ, wɩ daan Ama gɔ̃gʋ̃ɔ, kɛ eenenɩ paarɩkɛ wɩ n wenɩ Gɩya, kɛ hanɩ hʋɛraakɛ n jalanɩ Gabaɔ̃ bǝ̃ kparara. 25 Dɩ Bɛ̃jamɛ̃ɛ məlsɔ kpar der Abɩnɛɛra a do sɔrasɩ gbulone, a jɩɩl gɔ̃gɔ̃ bɩɛlɩ yʋɔ. 26 Dɩ Abɩnɛɛr 'laa we Joabɩ a sʋʋraa: «Bajɩna teenanɛ a na n kʋrɛ wire wire ya? Fa jɩ thɩmɩɩra na ɩnanɛ puure pɩpɩɩ paaraa? Aɲe fɩ n pɩɛr sɩ fɩ so afɩ toora wa n wee awɩ omɩsɔ bã? » 27 Dɩ Joabɩ tu: «Yidaar Thãgba do gel. Sɩ ado fa kɔɔ so thala', foo ɩ̃ too n weele nɩ wɩ dana duuro sɩ wɩ faa.»

28 Dɩ Joabɩ ʋ̃ tutuu dɩ ɔɔ too fɛw jɩɩl, wa n wee Ɩjɩrayɛl sɔrasɛ bã; dɩ kʋʋr pɩ. 29 Dɩ Abɩnɛɛr na ɔɔ too ɩɩrna dɩtɩnɛɛlera Araba bə̃ fãana, a seerna Jʋrdɛ̃ mɩɩr, a seerna bɩtɩrɔ̃ fɛw, sa dã Mahanayɩm. 30 Mɔ̃ Joabɩ faanɩ Abɩnɛɛr sa kɛr, a kpar ɔɔ too fɛw a jɛ; dɩ tɩbɩla kpelẽ phe bire na Ajaɛl ɓɔr Davɩdɩɩ toora. 31 Sɩ Davɩdɩɩ too kʋʋr Bɛ̃jamɛ̃ɛ məlsɔ tãather kpalãther (360), kɛ dɔnɩ Abɩnɛɛr sɔrasɩsɔ. 32 Dɩ wɩ gbaar Ajaɛl a jalna dʋ ɔɔ thɩɩ kara Bɛtɩlɛhɛm. Agɩpɩ, Joabɩ na ɔɔ too ɩɩrna dɩtɩnɛ dɩ dɩɩ na wɩl dɩ wɩ dã Ebʋrɔ̃.